| Library / Tipiṭaka / திபிடக • Tipiṭaka / உதா³னபாளி • Udānapāḷi |
5. து³தியனானாதித்தி²யஸுத்தங்
5. Dutiyanānātitthiyasuttaṃ
55. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா நானாதித்தி²யஸமணப்³ராஹ்மணபரிப்³பா³ஜகா ஸாவத்தி²யங் படிவஸந்தி நானாதி³ட்டி²கா நானாக²ந்திகா நானாருசிகா நானாதி³ட்டி²னிஸ்ஸயனிஸ்ஸிதா.
55. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā nānātitthiyasamaṇabrāhmaṇaparibbājakā sāvatthiyaṃ paṭivasanti nānādiṭṭhikā nānākhantikā nānārucikā nānādiṭṭhinissayanissitā.
ஸந்தேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘ஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தி பனேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘அஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘ஸஸ்ஸதோ ச அஸஸ்ஸதோ ச 1 அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தி பனேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘நேவ ஸஸ்ஸதோ நாஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘ஸயங்கதோ அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தி பனேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘பரங்கதோ அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘ஸயங்கதோ ச பரங்கதோ ச 2 அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தி பனேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘அஸயங்காரோ அபரங்காரோ 3 அதி⁴ச்சஸமுப்பன்னோ அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘ஸஸ்ஸதங் ஸுக²து³க்க²ங் அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தி பனேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘அஸஸ்ஸதங் ஸுக²து³க்க²ங் அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘ஸஸ்ஸதஞ்ச அஸஸ்ஸதஞ்ச 4 ஸுக²து³க்க²ங் அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தி பனேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘நேவ ஸஸ்ஸதங் நாஸஸ்ஸதங் ஸுக²து³க்க²ங் அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘ஸயங்கதங் ஸுக²து³க்க²ங் அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தி பனேகே ஸமணப்³ராஹ்மணா ஏவங்வாதி³னோ ஏவதி³ட்டி²னோ – ‘‘பரங்கதங் ஸுக²து³க்க²ங் அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘ஸயங்கதஞ்ச பரங்கதஞ்ச 5 ஸுக²து³க்க²ங் அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி. ஸந்தி பனேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘‘அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²ங் அத்தா ச லோகோ ச, இத³மேவ ஸச்சங் மோக⁴மஞ்ஞ’’ந்தி.
Santeke samaṇabrāhmaṇā evaṃvādino evaṃdiṭṭhino – ‘‘sassato attā ca loko ca, idameva saccaṃ moghamañña’’nti. Santi paneke samaṇabrāhmaṇā evaṃvādino evaṃdiṭṭhino – ‘‘asassato attā ca loko ca, idameva saccaṃ moghamañña’’nti. Santeke samaṇabrāhmaṇā evaṃvādino evaṃdiṭṭhino – ‘‘sassato ca asassato ca 6 attā ca loko ca, idameva saccaṃ moghamañña’’nti. Santi paneke samaṇabrāhmaṇā evaṃvādino evaṃdiṭṭhino – ‘‘neva sassato nāsassato attā ca loko ca, idameva saccaṃ moghamañña’’nti. Santeke samaṇabrāhmaṇā evaṃvādino evaṃdiṭṭhino – ‘‘sayaṃkato attā ca loko ca, idameva saccaṃ moghamañña’’nti. Santi paneke samaṇabrāhmaṇā evaṃvādino evaṃdiṭṭhino – ‘‘paraṃkato attā ca loko ca, idameva saccaṃ moghamañña’’nti. Santeke samaṇabrāhmaṇā evaṃvādino evaṃdiṭṭhino – ‘‘sayaṃkato ca paraṃkato ca 7 attā ca loko ca, idameva saccaṃ moghamañña’’nti. Santi paneke samaṇabrāhmaṇā evaṃvādino evaṃdiṭṭhino – ‘‘asayaṃkāro aparaṃkāro 8 adhiccasamuppanno attā ca loko ca, idameva saccaṃ moghamañña’’nti. Santeke samaṇabrāhmaṇā evaṃvādino evaṃdiṭṭhino – ‘‘sassataṃ sukhadukkhaṃ attā ca loko ca, idameva saccaṃ moghamañña’’nti. Santi paneke samaṇabrāhmaṇā evaṃvādino evaṃdiṭṭhino – ‘‘asassataṃ sukhadukkhaṃ attā ca loko ca, idameva saccaṃ moghamañña’’nti. Santeke samaṇabrāhmaṇā evaṃvādino evaṃdiṭṭhino – ‘‘sassatañca asassatañca 9 sukhadukkhaṃ attā ca loko ca, idameva saccaṃ moghamañña’’nti. Santi paneke samaṇabrāhmaṇā evaṃvādino evaṃdiṭṭhino – ‘‘neva sassataṃ nāsassataṃ sukhadukkhaṃ attā ca loko ca, idameva saccaṃ moghamañña’’nti. Santeke samaṇabrāhmaṇā evaṃvādino evaṃdiṭṭhino – ‘‘sayaṃkataṃ sukhadukkhaṃ attā ca loko ca, idameva saccaṃ moghamañña’’nti. Santi paneke samaṇabrāhmaṇā evaṃvādino evadiṭṭhino – ‘‘paraṃkataṃ sukhadukkhaṃ attā ca loko ca, idameva saccaṃ moghamañña’’nti. Santeke samaṇabrāhmaṇā evaṃvādino evaṃdiṭṭhino – ‘‘sayaṃkatañca paraṃkatañca 10 sukhadukkhaṃ attā ca loko ca, idameva saccaṃ moghamañña’’nti. Santi paneke samaṇabrāhmaṇā evaṃvādino evaṃdiṭṭhino – ‘‘asayaṃkāraṃ aparaṃkāraṃ adhiccasamuppannaṃ sukhadukkhaṃ attā ca loko ca, idameva saccaṃ moghamañña’’nti.
தே ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹரந்தி – ‘‘ஏதி³ஸோ த⁴ம்மோ, நேதி³ஸோ த⁴ம்மோ; நேதி³ஸோ த⁴ம்மோ, ஏதி³ஸோ த⁴ம்மோ’’தி.
Te bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti – ‘‘ediso dhammo, nediso dhammo; nediso dhammo, ediso dhammo’’ti.
அத² கோ² ஸம்ப³ஹுலா பி⁴க்கூ² புப்³ப³ண்ஹஸமயங் நிவாஸெத்வா பத்தசீவரமாதா³ய ஸாவத்தி²ங் பிண்டா³ய பாவிஸிங்ஸு. ஸாவத்தி²யங் பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் –
Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ –
‘‘இத⁴, ப⁴ந்தே, ஸம்ப³ஹுலா நானாதித்தி²யஸமணப்³ராஹ்மணபரிப்³பா³ஜகா ஸாவத்தி²யங் படிவஸந்தி நானாதி³ட்டி²கா நானாக²ந்திகா நானாருசிகா நானாதி³ட்டி²னிஸ்ஸயனிஸ்ஸிதா.
‘‘Idha, bhante, sambahulā nānātitthiyasamaṇabrāhmaṇaparibbājakā sāvatthiyaṃ paṭivasanti nānādiṭṭhikā nānākhantikā nānārucikā nānādiṭṭhinissayanissitā.
‘‘ஸந்தேகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி…பே॰… தே ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹரந்தி – ‘ஏதி³ஸோ த⁴ம்மோ, நேதி³ஸோ த⁴ம்மோ; நேதி³ஸோ த⁴ம்மோ, ஏதி³ஸோ த⁴ம்மோ’’’தி.
‘‘Santeke samaṇabrāhmaṇā evaṃvādino evaṃdiṭṭhino – ‘sassato attā ca loko ca, idameva saccaṃ moghamañña’nti…pe… te bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti – ‘ediso dhammo, nediso dhammo; nediso dhammo, ediso dhammo’’’ti.
‘‘அஞ்ஞதித்தி²யா, பி⁴க்க²வே, பரிப்³பா³ஜகா அந்தா⁴ அசக்கு²கா; அத்த²ங் ந ஜானந்தி அனத்த²ங் ந ஜானந்தி, த⁴ம்மங் ந ஜானந்தி அத⁴ம்மங் ந ஜானந்தி. தே அத்த²ங் அஜானந்தா அனத்த²ங் அஜானந்தா, த⁴ம்மங் அஜானந்தா அத⁴ம்மங் அஜானந்தா ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹரந்தி – ‘ஏதி³ஸோ த⁴ம்மோ, நேதி³ஸோ த⁴ம்மோ; நேதி³ஸோ த⁴ம்மோ, ஏதி³ஸோ த⁴ம்மோ’’’தி.
‘‘Aññatitthiyā, bhikkhave, paribbājakā andhā acakkhukā; atthaṃ na jānanti anatthaṃ na jānanti, dhammaṃ na jānanti adhammaṃ na jānanti. Te atthaṃ ajānantā anatthaṃ ajānantā, dhammaṃ ajānantā adhammaṃ ajānantā bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti – ‘ediso dhammo, nediso dhammo; nediso dhammo, ediso dhammo’’’ti.
அத² கோ² ப⁴க³வா ஏதமத்த²ங் விதி³த்வா தாயங் வேலாயங் இமங் உதா³னங் உதா³னேஸி –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘இமேஸு கிர ஸஜ்ஜந்தி, ஏகே ஸமணப்³ராஹ்மணா;
‘‘Imesu kira sajjanti, eke samaṇabrāhmaṇā;
அந்தராவ விஸீத³ந்தி, அப்பத்வாவ தமோக³த⁴’’ந்தி. பஞ்சமங்;
Antarāva visīdanti, appatvāva tamogadha’’nti. pañcamaṃ;
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / உதா³ன-அட்ட²கதா² • Udāna-aṭṭhakathā / 5. து³தியனானாதித்தி²யஸுத்தவண்ணனா • 5. Dutiyanānātitthiyasuttavaṇṇanā
