| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
12. து³தியனித்³த³ஸஸுத்தங்
12. Dutiyaniddasasuttaṃ
43. ஏவங் மே ஸுதங் – ஏகங் ஸமயங் ப⁴க³வா கோஸம்பி³யங் விஹரதி கோ⁴ஸிதாராமே. அத² கோ² ஆயஸ்மா ஆனந்தோ³ புப்³ப³ண்ஹஸமயங் நிவாஸெத்வா பத்தசீவரமாதா³ய கோஸம்பி³ங் பிண்டா³ய பாவிஸி. அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘அதிப்பகோ³ கோ² தாவ கோஸம்பி³யங் பிண்டா³ய சரிதுங். யங்னூனாஹங் யேன அஞ்ஞதித்தி²யானங் பரிப்³பா³ஜகானங் ஆராமோ தேனுபஸங்கமெய்ய’’ந்தி. அத² கோ² ஆயஸ்மா ஆனந்தோ³ யேன அஞ்ஞதித்தி²யானங் பரிப்³பா³ஜகானங் ஆராமோ தேனுபஸங்கமி ; உபஸங்கமித்வா தேஹி அஞ்ஞதித்தி²யேஹி பரிப்³பா³ஜகேஹி ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³.
43. Evaṃ me sutaṃ – ekaṃ samayaṃ bhagavā kosambiyaṃ viharati ghositārāme. Atha kho āyasmā ānando pubbaṇhasamayaṃ nivāsetvā pattacīvaramādāya kosambiṃ piṇḍāya pāvisi. Atha kho āyasmato ānandassa etadahosi – ‘‘atippago kho tāva kosambiyaṃ piṇḍāya carituṃ. Yaṃnūnāhaṃ yena aññatitthiyānaṃ paribbājakānaṃ ārāmo tenupasaṅkameyya’’nti. Atha kho āyasmā ānando yena aññatitthiyānaṃ paribbājakānaṃ ārāmo tenupasaṅkami ; upasaṅkamitvā tehi aññatitthiyehi paribbājakehi saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi.
தேன கோ² பன ஸமயேன தேஸங் அஞ்ஞதித்தி²யானங் பரிப்³பா³ஜகானங் ஸன்னிஸின்னானங் ஸன்னிபதிதானங் அயமந்தராகதா² உத³பாதி³ – ‘‘யோ ஹி கோசி, ஆவுஸோ, த்³வாத³ஸ வஸ்ஸானி பரிபுண்ணங் பரிஸுத்³த⁴ங் ப்³ரஹ்மசரியங் சரதி, ‘நித்³த³ஸோ பி⁴க்கூ²’தி அலங் வசனாயா’’தி.
Tena kho pana samayena tesaṃ aññatitthiyānaṃ paribbājakānaṃ sannisinnānaṃ sannipatitānaṃ ayamantarākathā udapādi – ‘‘yo hi koci, āvuso, dvādasa vassāni paripuṇṇaṃ parisuddhaṃ brahmacariyaṃ carati, ‘niddaso bhikkhū’ti alaṃ vacanāyā’’ti.
அத² கோ² ஆயஸ்மா ஆனந்தோ³ தேஸங் அஞ்ஞதித்தி²யானங் பரிப்³பா³ஜகானங் பா⁴ஸிதங் நேவ அபி⁴னந்தி³ நப்படிக்கோஸி. அனபி⁴னந்தி³த்வா அப்படிக்கோஸித்வா உட்டா²யாஸனா பக்காமி – ‘‘ப⁴க³வதோ ஸந்திகே ஏதஸ்ஸ பா⁴ஸிதஸ்ஸ அத்த²ங் ஆஜானிஸ்ஸாமீ’’தி. அத² கோ² ஆயஸ்மா ஆனந்தோ³ கோஸம்பி³யங் பிண்டா³ய சரித்வா பச்சா²ப⁴த்தங் பிண்ட³பாதபடிக்கந்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச –
Atha kho āyasmā ānando tesaṃ aññatitthiyānaṃ paribbājakānaṃ bhāsitaṃ neva abhinandi nappaṭikkosi. Anabhinanditvā appaṭikkositvā uṭṭhāyāsanā pakkāmi – ‘‘bhagavato santike etassa bhāsitassa atthaṃ ājānissāmī’’ti. Atha kho āyasmā ānando kosambiyaṃ piṇḍāya caritvā pacchābhattaṃ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –
‘‘இதா⁴ஹங், ப⁴ந்தே, புப்³ப³ண்ஹஸமயங் நிவாஸெத்வா பத்தசீவரமாதா³ய கோஸம்பி³ங் பிண்டா³ய பாவிஸிங். தஸ்ஸ மய்ஹங், ப⁴ந்தே, ஏதத³ஹோஸி – ‘அதிப்பகோ³ கோ² தாவ கோஸம்பி³யங் பிண்டா³ய சரிதுங். யங்னூனாஹங் யேன அஞ்ஞதித்தி²யானங் பரிப்³பா³ஜகானங் ஆராமோ தேனுபஸங்கமெய்ய’ந்தி…பே॰… தேஹி ஸத்³தி⁴ங் ஸம்மோதி³ங். ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங்.
‘‘Idhāhaṃ, bhante, pubbaṇhasamayaṃ nivāsetvā pattacīvaramādāya kosambiṃ piṇḍāya pāvisiṃ. Tassa mayhaṃ, bhante, etadahosi – ‘atippago kho tāva kosambiyaṃ piṇḍāya carituṃ. Yaṃnūnāhaṃ yena aññatitthiyānaṃ paribbājakānaṃ ārāmo tenupasaṅkameyya’nti…pe… tehi saddhiṃ sammodiṃ. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃ.
‘‘தேன கோ² பன, ப⁴ந்தே, ஸமயேன தேஸங் அஞ்ஞதித்தி²யானங் பரிப்³பா³ஜகானங் ஸன்னிஸின்னானங் ஸன்னிபதிதானங் அயமந்தராகதா² உத³பாதி³ – ‘யோ ஹி கோசி, ஆவுஸோ, த்³வாத³ஸவஸ்ஸானி பரிபுண்ணங் பரிஸுத்³த⁴ங் ப்³ரஹ்மசரியங் சரதி, நித்³த³ஸோ பி⁴க்கூ²தி அலங் வசனாயா’தி. அத² க்²வாஹங், ப⁴ந்தே, தேஸங் அஞ்ஞதித்தி²யானங் பரிப்³பா³ஜகானங் பா⁴ஸிதங் நேவ அபி⁴னந்தி³ங் நப்படிக்கோஸிங். அனபி⁴னந்தி³த்வா, அப்படிக்கோஸித்வா உட்டா²யாஸனா பக்கமிங் – ‘ப⁴க³வதோ ஸந்திகே ஏதஸ்ஸ பா⁴ஸிதஸ்ஸ அத்த²ங் ஆஜானிஸ்ஸாமீ’தி. ஸக்கா நு கோ², ப⁴ந்தே, இமஸ்மிங் த⁴ம்மவினயே கேவலங் வஸ்ஸக³ணனமத்தேன நித்³த³ஸோ பி⁴க்கு² பஞ்ஞாபேது’’ந்தி?
‘‘Tena kho pana, bhante, samayena tesaṃ aññatitthiyānaṃ paribbājakānaṃ sannisinnānaṃ sannipatitānaṃ ayamantarākathā udapādi – ‘yo hi koci, āvuso, dvādasavassāni paripuṇṇaṃ parisuddhaṃ brahmacariyaṃ carati, niddaso bhikkhūti alaṃ vacanāyā’ti. Atha khvāhaṃ, bhante, tesaṃ aññatitthiyānaṃ paribbājakānaṃ bhāsitaṃ neva abhinandiṃ nappaṭikkosiṃ. Anabhinanditvā, appaṭikkositvā uṭṭhāyāsanā pakkamiṃ – ‘bhagavato santike etassa bhāsitassa atthaṃ ājānissāmī’ti. Sakkā nu kho, bhante, imasmiṃ dhammavinaye kevalaṃ vassagaṇanamattena niddaso bhikkhu paññāpetu’’nti?
‘‘ந கோ², ஆனந்த³, ஸக்கா இமஸ்மிங் த⁴ம்மவினயே கேவலங் வஸ்ஸக³ணனமத்தேன நித்³த³ஸோ பி⁴க்கு² பஞ்ஞாபேதுங். ஸத்த கோ² இமானி, ஆனந்த³, நித்³த³ஸவத்தூ²னி மயா ஸயங் அபி⁴ஞ்ஞா ஸச்சி²கத்வா பவேதி³தானி.
‘‘Na kho, ānanda, sakkā imasmiṃ dhammavinaye kevalaṃ vassagaṇanamattena niddaso bhikkhu paññāpetuṃ. Satta kho imāni, ānanda, niddasavatthūni mayā sayaṃ abhiññā sacchikatvā paveditāni.
‘‘கதமானி ஸத்த? இதா⁴னந்த³, பி⁴க்கு², ஸத்³தோ⁴ ஹோதி, ஹிரீமா ஹோதி, ஒத்தப்பீ ஹோதி, ப³ஹுஸ்ஸுதோ ஹோதி, ஆரத்³த⁴வீரியோ ஹோதி, ஸதிமா ஹோதி, பஞ்ஞவா ஹோதி. இமானி கோ², ஆனந்த³, ஸத்த நித்³த³ஸவத்தூ²னி மயா ஸயங் அபி⁴ஞ்ஞா ஸச்சி²கத்வா பவேதி³தானி. இமேஹி கோ², ஆனந்த³, ஸத்தஹி நித்³த³ஸவத்தூ²ஹி ஸமன்னாக³தோ பி⁴க்கு² த்³வாத³ஸ சேபி வஸ்ஸானி பரிபுண்ணங் பரிஸுத்³த⁴ங் ப்³ரஹ்மசரியங் சரதி, ‘நித்³த³ஸோ பி⁴க்கூ²’தி அலங் வசனாய; சதுப்³பீ³ஸதி சேபி வஸ்ஸானி பரிபுண்ணங் பரிஸுத்³த⁴ங் ப்³ரஹ்மசரியங் சரதி, ‘நித்³த³ஸோ பி⁴க்கூ²’தி அலங் வசனாய; ச²த்திங்ஸதி சேபி வஸ்ஸானி பரிபுண்ணங் பரிஸுத்³த⁴ங் ப்³ரஹ்மசரியங் சரதி, ‘நித்³த³ஸோ பி⁴க்கூ²’தி அலங் வசனாய, அட்ட²சத்தாரீஸங் சேபி வஸ்ஸானி பரிபுண்ணங் பரிஸுத்³த⁴ங் ப்³ரஹ்மசரியங் சரதி, ‘நித்³த³ஸோ பி⁴க்கூ²’தி அலங் வசனாயா’’தி. த்³வாத³ஸமங்.
‘‘Katamāni satta? Idhānanda, bhikkhu, saddho hoti, hirīmā hoti, ottappī hoti, bahussuto hoti, āraddhavīriyo hoti, satimā hoti, paññavā hoti. Imāni kho, ānanda, satta niddasavatthūni mayā sayaṃ abhiññā sacchikatvā paveditāni. Imehi kho, ānanda, sattahi niddasavatthūhi samannāgato bhikkhu dvādasa cepi vassāni paripuṇṇaṃ parisuddhaṃ brahmacariyaṃ carati, ‘niddaso bhikkhū’ti alaṃ vacanāya; catubbīsati cepi vassāni paripuṇṇaṃ parisuddhaṃ brahmacariyaṃ carati, ‘niddaso bhikkhū’ti alaṃ vacanāya; chattiṃsati cepi vassāni paripuṇṇaṃ parisuddhaṃ brahmacariyaṃ carati, ‘niddaso bhikkhū’ti alaṃ vacanāya, aṭṭhacattārīsaṃ cepi vassāni paripuṇṇaṃ parisuddhaṃ brahmacariyaṃ carati, ‘niddaso bhikkhū’ti alaṃ vacanāyā’’ti. Dvādasamaṃ.
தே³வதாவக்³கோ³ சதுத்தோ².
Devatāvaggo catuttho.
தஸ்ஸுத்³தா³னங் –
Tassuddānaṃ –
அப்பமாதோ³ ஹிரீ சேவ, த்³வே ஸுவசா து³வே மித்தா;
Appamādo hirī ceva, dve suvacā duve mittā;
த்³வே படிஸம்பி⁴தா³ த்³வே வஸா, து³வே நித்³த³ஸவத்து²னாதி.
Dve paṭisambhidā dve vasā, duve niddasavatthunāti.
