| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
10. து³தியபாபணிகஸுத்தங்
10. Dutiyapāpaṇikasuttaṃ
20. ‘‘தீஹி , பி⁴க்க²வே, அங்கே³ஹி ஸமன்னாக³தோ பாபணிகோ நசிரஸ்ஸேவ மஹத்தங் வேபுல்லத்தங் 1 பாபுணாதி போ⁴கே³ஸு. கதமேஹி தீஹி? இத⁴, பி⁴க்க²வே, பாபணிகோ சக்கு²மா ச ஹோதி விது⁴ரோ ச நிஸ்ஸயஸம்பன்னோ ச. கத²ஞ்ச, பி⁴க்க²வே, பாபணிகோ சக்கு²மா ஹோதி? இத⁴, பி⁴க்க²வே, பாபணிகோ பணியங் ஜானாதி – ‘இத³ங் பணியங் ஏவங் கீதங், ஏவங் விக்கயமானங் 2, எத்தகங் மூலங் ப⁴விஸ்ஸதி, எத்தகோ உத³யோ’தி 3. ஏவங் கோ², பி⁴க்க²வே, பாபணிகோ சக்கு²மா ஹோதி.
20. ‘‘Tīhi , bhikkhave, aṅgehi samannāgato pāpaṇiko nacirasseva mahattaṃ vepullattaṃ 4 pāpuṇāti bhogesu. Katamehi tīhi? Idha, bhikkhave, pāpaṇiko cakkhumā ca hoti vidhuro ca nissayasampanno ca. Kathañca, bhikkhave, pāpaṇiko cakkhumā hoti? Idha, bhikkhave, pāpaṇiko paṇiyaṃ jānāti – ‘idaṃ paṇiyaṃ evaṃ kītaṃ, evaṃ vikkayamānaṃ 5, ettakaṃ mūlaṃ bhavissati, ettako udayo’ti 6. Evaṃ kho, bhikkhave, pāpaṇiko cakkhumā hoti.
‘‘கத²ஞ்ச, பி⁴க்க²வே, பாபணிகோ விது⁴ரோ ஹோதி? இத⁴, பி⁴க்க²வே, பாபணிகோ குஸலோ ஹோதி பணியங் கேதுஞ்ச விக்கேதுஞ்ச. ஏவங் கோ², பி⁴க்க²வே, பாபணிகோ விது⁴ரோ ஹோதி.
‘‘Kathañca, bhikkhave, pāpaṇiko vidhuro hoti? Idha, bhikkhave, pāpaṇiko kusalo hoti paṇiyaṃ ketuñca vikketuñca. Evaṃ kho, bhikkhave, pāpaṇiko vidhuro hoti.
‘‘கத²ஞ்ச, பி⁴க்க²வே, பாபணிகோ நிஸ்ஸயஸம்பன்னோ ஹோதி? இத⁴ பி⁴க்க²வே , பாபணிகங் யே தே க³ஹபதீ வா க³ஹபதிபுத்தா வா அட்³டா⁴ மஹத்³த⁴னா மஹாபோ⁴கா³ தே ஏவங் ஜானந்தி – ‘அயங் கோ² ப⁴வங் பாபணிகோ சக்கு²மா விது⁴ரோ ச படிப³லோ புத்ததா³ரஞ்ச போஸேதுங், அம்ஹாகஞ்ச காலேன காலங் அனுப்பதா³து’ந்தி. தே நங் போ⁴கே³ஹி நிபதந்தி – ‘இதோ, ஸம்ம பாபணிக, போ⁴கே³ கரித்வா 7 புத்ததா³ரஞ்ச போஸேஹி, அம்ஹாகஞ்ச காலேன காலங் அனுப்பதே³ஹீ’தி. ஏவங் கோ², பி⁴க்க²வே, பாபணிகோ நிஸ்ஸயஸம்பன்னோ ஹோதி. இமேஹி கோ², பி⁴க்க²வே, தீஹி அங்கே³ஹி ஸமன்னாக³தோ பாபணிகோ நசிரஸ்ஸேவ மஹத்தங் வேபுல்லத்தங் பாபுணாதி போ⁴கே³ஸு.
‘‘Kathañca, bhikkhave, pāpaṇiko nissayasampanno hoti? Idha bhikkhave , pāpaṇikaṃ ye te gahapatī vā gahapatiputtā vā aḍḍhā mahaddhanā mahābhogā te evaṃ jānanti – ‘ayaṃ kho bhavaṃ pāpaṇiko cakkhumā vidhuro ca paṭibalo puttadārañca posetuṃ, amhākañca kālena kālaṃ anuppadātu’nti. Te naṃ bhogehi nipatanti – ‘ito, samma pāpaṇika, bhoge karitvā 8 puttadārañca posehi, amhākañca kālena kālaṃ anuppadehī’ti. Evaṃ kho, bhikkhave, pāpaṇiko nissayasampanno hoti. Imehi kho, bhikkhave, tīhi aṅgehi samannāgato pāpaṇiko nacirasseva mahattaṃ vepullattaṃ pāpuṇāti bhogesu.
‘‘ஏவமேவங் கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² நசிரஸ்ஸேவ மஹத்தங் வேபுல்லத்தங் பாபுணாதி குஸலேஸு த⁴ம்மேஸு. கதமேஹி தீஹி? இத⁴, பி⁴க்க²வே, பி⁴க்கு² சக்கு²மா ச ஹோதி விது⁴ரோ ச நிஸ்ஸயஸம்பன்னோ ச. கத²ஞ்ச, பி⁴க்க²வே, பி⁴க்கு² சக்கு²மா ஹோதி? இத⁴, பி⁴க்க²வே, பி⁴க்கு² ‘இத³ங் து³க்க²’ந்தி யதா²பூ⁴தங் பஜானாதி, ‘அயங் து³க்க²ஸமுத³யோ’தி யதா²பூ⁴தங் பஜானாதி, ‘அயங் து³க்க²னிரோதோ⁴’தி யதா²பூ⁴தங் பஜானாதி, ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி. ஏவங் கோ², பி⁴க்க²வே, பி⁴க்கு² சக்கு²மா ஹோதி.
‘‘Evamevaṃ kho, bhikkhave, tīhi dhammehi samannāgato bhikkhu nacirasseva mahattaṃ vepullattaṃ pāpuṇāti kusalesu dhammesu. Katamehi tīhi? Idha, bhikkhave, bhikkhu cakkhumā ca hoti vidhuro ca nissayasampanno ca. Kathañca, bhikkhave, bhikkhu cakkhumā hoti? Idha, bhikkhave, bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti. Evaṃ kho, bhikkhave, bhikkhu cakkhumā hoti.
‘‘கத²ஞ்ச, பி⁴க்க²வே, பி⁴க்கு² விது⁴ரோ ஹோதி? இத⁴, பி⁴க்க²வே, பி⁴க்கு² ஆரத்³த⁴வீரியோ விஹரதி அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. ஏவங் கோ², பி⁴க்க²வே, பி⁴க்கு² விது⁴ரோ ஹோதி.
‘‘Kathañca, bhikkhave, bhikkhu vidhuro hoti? Idha, bhikkhave, bhikkhu āraddhavīriyo viharati akusalānaṃ dhammānaṃ pahānāya, kusalānaṃ dhammānaṃ upasampadāya, thāmavā daḷhaparakkamo anikkhittadhuro kusalesu dhammesu. Evaṃ kho, bhikkhave, bhikkhu vidhuro hoti.
‘‘கத²ஞ்ச, பி⁴க்க²வே, பி⁴க்கு² நிஸ்ஸயஸம்பன்னோ ஹோதி? இத⁴, பி⁴க்க²வே, பி⁴க்கு² யே தே பி⁴க்கூ² ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா தே காலேன காலங் உபஸங்கமித்வா பரிபுச்ச²தி பரிபஞ்ஹதி – ‘இத³ங், ப⁴ந்தே, கத²ங், இமஸ்ஸ கோ அத்தோ²’தி? தஸ்ஸ தே ஆயஸ்மந்தோ அவிவடஞ்சேவ விவரந்தி, அனுத்தானீகதஞ்ச உத்தானீகரொந்தி, அனேகவிஹிதேஸு ச கங்கா²டா²னியேஸு த⁴ம்மேஸு கங்க²ங் படிவினோதெ³ந்தி. ஏவங் கோ², பி⁴க்க²வே, பி⁴க்கு² நிஸ்ஸயஸம்பன்னோ ஹோதி. இமேஹி கோ², பி⁴க்க²வே, தீஹி த⁴ம்மேஹி ஸமன்னாக³தோ பி⁴க்கு² நசிரஸ்ஸேவ மஹத்தங் வேபுல்லத்தங் பாபுணாதி குஸலேஸு த⁴ம்மேஸூ’’தி. த³ஸமங்.
‘‘Kathañca, bhikkhave, bhikkhu nissayasampanno hoti? Idha, bhikkhave, bhikkhu ye te bhikkhū bahussutā āgatāgamā dhammadharā vinayadharā mātikādharā te kālena kālaṃ upasaṅkamitvā paripucchati paripañhati – ‘idaṃ, bhante, kathaṃ, imassa ko attho’ti? Tassa te āyasmanto avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṃ paṭivinodenti. Evaṃ kho, bhikkhave, bhikkhu nissayasampanno hoti. Imehi kho, bhikkhave, tīhi dhammehi samannāgato bhikkhu nacirasseva mahattaṃ vepullattaṃ pāpuṇāti kusalesu dhammesū’’ti. Dasamaṃ.
ரத²காரவக்³கோ³ து³தியோ.
Rathakāravaggo dutiyo.
பட²மபா⁴ணவாரோ நிட்டி²தோ.
Paṭhamabhāṇavāro niṭṭhito.
தஸ்ஸுத்³தா³னங் –
Tassuddānaṃ –
அபண்ணகத்தா தே³வோ ச, து³வே பாபணிகேன சாதி.
Apaṇṇakattā devo ca, duve pāpaṇikena cāti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. து³தியபாபணிகஸுத்தவண்ணனா • 10. Dutiyapāpaṇikasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. து³தியபாபணிகஸுத்தவண்ணனா • 10. Dutiyapāpaṇikasuttavaṇṇanā
