| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
10. து³தியராக³ஸுத்தவண்ணனா
10. Dutiyarāgasuttavaṇṇanā
69. த³ஸமே அதரீதி திண்ணோ, ந திண்ணோ அதிண்ணோ. ஸமுத்³த³ந்தி ஸங்ஸாரஸமுத்³த³ங், சக்கா²யதனாதி³ஸமுத்³த³ங் வா. தது³ப⁴யம்பி து³ப்பூரணட்டே²ன ஸமுத்³தோ³ வியாதி ஸமுத்³த³ங். அத² வா ஸமுத்³த³னட்டே²ன ஸமுத்³த³ங், கிலேஸவஸ்ஸனேன ஸத்தஸந்தானஸ்ஸ கிலேஸஸத³னதோதி அத்தோ². ஸவீசிந்தி கோதூ⁴பாயாஸவீசீஹி ஸவீசிங். வுத்தஞ்ஹேதங் ‘‘வீசிப⁴யந்தி கோ², பி⁴க்கு², கோதூ⁴பாயாஸஸ்ஸேதங் அதி⁴வசன’’ந்தி (இதிவு॰ 109; ம॰ நி॰ 2.162). ஸாவட்டந்தி பஞ்சகாமகு³ணாவட்டேஹி ஸஹ ஆவட்டங். வுத்தம்பி சேதங் ‘‘ஆவட்டப⁴யந்தி கோ², பி⁴க்கு², பஞ்சன்னேதங் காமகு³ணானங் அதி⁴வசன’’ந்தி (இதிவு॰ 109; ம॰ நி॰ 2.164; அ॰ நி॰ 4.122). ஸக³ஹங் ஸரக்க²ஸந்தி அத்தனோ கோ³சரக³தானங் அனத்த²ஜனநதோ சண்ட³மகரமச்ச²கச்ச²பரக்க²ஸஸதி³ஸேஹி விஸபா⁴க³புக்³க³லேஹி ஸஹிதங். ததா² சாஹ ‘‘ஸக³ஹங் ஸரக்க²ஸந்தி கோ², பி⁴க்கு², மாதுகா³மஸ்ஸேதங் அதி⁴வசன’’ந்தி (இதிவு॰ 109). அதரீதி மக்³க³பஞ்ஞானாவாய யதா²வுத்தங் ஸமுத்³த³ங் உத்தரி. திண்ணோதி நித்திண்ணோ. பாரங்க³தோதி தஸ்ஸ ஸமுத்³த³ஸ்ஸ பாரங் பரதீரங் நிரோத⁴ங் உபக³தோ. த²லே திட்ட²தீதி ததோ ஏவ ஸங்ஸாரமஹோக⁴ங் காமாதி³மஹோக⁴ஞ்ச அதிக்கமித்வா த²லே பரதீரே நிப்³பா³னே பா³ஹிதபாபப்³ராஹ்மணோ திட்ட²தீதி வுச்சதி.
69. Dasame atarīti tiṇṇo, na tiṇṇo atiṇṇo. Samuddanti saṃsārasamuddaṃ, cakkhāyatanādisamuddaṃ vā. Tadubhayampi duppūraṇaṭṭhena samuddo viyāti samuddaṃ. Atha vā samuddanaṭṭhena samuddaṃ, kilesavassanena sattasantānassa kilesasadanatoti attho. Savīcinti kodhūpāyāsavīcīhi savīciṃ. Vuttañhetaṃ ‘‘vīcibhayanti kho, bhikkhu, kodhūpāyāsassetaṃ adhivacana’’nti (itivu. 109; ma. ni. 2.162). Sāvaṭṭanti pañcakāmaguṇāvaṭṭehi saha āvaṭṭaṃ. Vuttampi cetaṃ ‘‘āvaṭṭabhayanti kho, bhikkhu, pañcannetaṃ kāmaguṇānaṃ adhivacana’’nti (itivu. 109; ma. ni. 2.164; a. ni. 4.122). Sagahaṃ sarakkhasanti attano gocaragatānaṃ anatthajananato caṇḍamakaramacchakacchaparakkhasasadisehi visabhāgapuggalehi sahitaṃ. Tathā cāha ‘‘sagahaṃ sarakkhasanti kho, bhikkhu, mātugāmassetaṃ adhivacana’’nti (itivu. 109). Atarīti maggapaññānāvāya yathāvuttaṃ samuddaṃ uttari. Tiṇṇoti nittiṇṇo. Pāraṅgatoti tassa samuddassa pāraṃ paratīraṃ nirodhaṃ upagato. Thale tiṭṭhatīti tato eva saṃsāramahoghaṃ kāmādimahoghañca atikkamitvā thale paratīre nibbāne bāhitapāpabrāhmaṇo tiṭṭhatīti vuccati.
இதா⁴பி கா³தா² ஸுக்கபக்க²வஸேனேவ ஆக³தா. தத்த² ஊமிப⁴யந்தி யதா²வுத்தஊமிப⁴யங், பா⁴யிதப்³ப³ங் ஏதஸ்மாதி தங் ஊமி ப⁴யங். து³த்தரந்தி து³ரதிக்கமங். அச்சதாரீதி அதிக்கமி.
Idhāpi gāthā sukkapakkhavaseneva āgatā. Tattha ūmibhayanti yathāvuttaūmibhayaṃ, bhāyitabbaṃ etasmāti taṃ ūmi bhayaṃ. Duttaranti duratikkamaṃ. Accatārīti atikkami.
ஸங்கா³திகோ³தி ராகா³தீ³னங் பஞ்சன்னங் ஸங்கா³னங் அதிக்கந்தத்தா பஹீனத்தா ஸங்கா³திகோ³. அத்த²ங்க³தோ ஸோ ந பமாணமேதீதி ஸோ ஏவங்பூ⁴தோ அரஹா ராகா³தீ³னங் பமாணகரத⁴ம்மானங் அச்சந்தமேவ அத்த²ங் க³தத்தா அத்த²ங்க³தோ, ததோ ஏவ ஸீலாதி³த⁴ம்மக்க²ந்த⁴பாரிபூரியா ச ‘‘ஏதி³ஸோ ஸீலேன ஸமாதி⁴னா பஞ்ஞாயா’’தி கேனசி பமிணிதுங் அஸக்குணெய்யோ பமாணங் ந ஏதி, அத² வா அனுபாதி³ஸேஸனிப்³பா³னஸங்கா²தங் அத்த²ங் க³தோ ஸோ அரஹா ‘‘இமாய நாம க³தியா டி²தோ, ஏதி³ஸோ ச நாமகொ³த்தேனா’’தி பமிணிதுங் அஸக்குணெய்யதாய பமாணங் ந ஏதி ந உபக³ச்ச²தி. ததோ ஏவ அமோஹயி மச்சுராஜங், தேன அனுப³ந்தி⁴துங் அஸக்குணெய்யோதி வதா³மீதி அனுபாதி³ஸேஸனிப்³பா³னதா⁴துயாவ தே³ஸனங் நிட்டா²பேஸி. இதி இமஸ்மிங் வக்³கே³ பட²மபஞ்சமச²ட்டே²ஸு வட்டங் கதி²தங், து³தியஸத்தமஅட்ட²மேஸு விவட்டங், ஸேஸேஸு வட்டவிவட்டங் கதி²தந்தி வேதி³தப்³ப³ங்.
Saṅgātigoti rāgādīnaṃ pañcannaṃ saṅgānaṃ atikkantattā pahīnattā saṅgātigo. Atthaṅgato so na pamāṇametīti so evaṃbhūto arahā rāgādīnaṃ pamāṇakaradhammānaṃ accantameva atthaṃ gatattā atthaṅgato, tato eva sīlādidhammakkhandhapāripūriyā ca ‘‘ediso sīlena samādhinā paññāyā’’ti kenaci pamiṇituṃ asakkuṇeyyo pamāṇaṃ na eti, atha vā anupādisesanibbānasaṅkhātaṃ atthaṃ gato so arahā ‘‘imāya nāma gatiyā ṭhito, ediso ca nāmagottenā’’ti pamiṇituṃ asakkuṇeyyatāya pamāṇaṃ na eti na upagacchati. Tato eva amohayi maccurājaṃ, tena anubandhituṃ asakkuṇeyyoti vadāmīti anupādisesanibbānadhātuyāva desanaṃ niṭṭhāpesi. Iti imasmiṃ vagge paṭhamapañcamachaṭṭhesu vaṭṭaṃ kathitaṃ, dutiyasattamaaṭṭhamesu vivaṭṭaṃ, sesesu vaṭṭavivaṭṭaṃ kathitanti veditabbaṃ.
த³ஸமஸுத்தவண்ணனா நிட்டி²தா.
Dasamasuttavaṇṇanā niṭṭhitā.
து³தியவக்³க³வண்ணனா நிட்டி²தா.
Dutiyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 10. து³தியராக³ஸுத்தங் • 10. Dutiyarāgasuttaṃ
