| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. து³தியஸந்தி³ட்டி²கஸுத்தங்
6. Dutiyasandiṭṭhikasuttaṃ
48. அத² கோ² அஞ்ஞதரோ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ ப்³ராஹ்மணோ ப⁴க³வந்தங் ஏதத³வோச – ‘‘‘ஸந்தி³ட்டி²கோ த⁴ம்மோ, ஸந்தி³ட்டி²கோ த⁴ம்மோ’தி, போ⁴ கோ³தம, வுச்சதி. கித்தாவதா நு கோ², போ⁴ கோ³தம, ஸந்தி³ட்டி²கோ த⁴ம்மோ ஹோதி அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீ’’தி?
48. Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho so brāhmaṇo bhagavantaṃ etadavoca – ‘‘‘sandiṭṭhiko dhammo, sandiṭṭhiko dhammo’ti, bho gotama, vuccati. Kittāvatā nu kho, bho gotama, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti?
‘‘தேன ஹி, ப்³ராஹ்மண, தஞ்ஞேவெத்த² படிபுச்சி²ஸ்ஸாமி. யதா² தே க²மெய்ய ததா² நங் ப்³யாகரெய்யாஸி. தங் கிங் மஞ்ஞஸி, ப்³ராஹ்மண, ஸந்தங் வா அஜ்ஜ²த்தங் ராக³ங் ‘அத்தி² மே அஜ்ஜ²த்தங் ராகோ³’தி பஜானாஸி, அஸந்தங் வா அஜ்ஜ²த்தங் ராக³ங் ‘நத்தி² மே அஜ்ஜ²த்தங் ராகோ³’தி பஜானாஸீ’’தி? ‘‘ஏவங், போ⁴’’. ‘‘யங் கோ² த்வங், ப்³ராஹ்மண, ஸந்தங் வா அஜ்ஜ²த்தங் ராக³ங் ‘அத்தி² மே அஜ்ஜ²த்தங் ராகோ³’தி பஜானாஸி, அஸந்தங் வா அஜ்ஜ²த்தங் ராக³ங் ‘நத்தி² மே அஜ்ஜ²த்தங் ராகோ³’தி பஜானாஸி – ஏவம்பி கோ², ப்³ராஹ்மண, ஸந்தி³ட்டி²கோ த⁴ம்மோ ஹோதி…பே॰….
‘‘Tena hi, brāhmaṇa, taññevettha paṭipucchissāmi. Yathā te khameyya tathā naṃ byākareyyāsi. Taṃ kiṃ maññasi, brāhmaṇa, santaṃ vā ajjhattaṃ rāgaṃ ‘atthi me ajjhattaṃ rāgo’ti pajānāsi, asantaṃ vā ajjhattaṃ rāgaṃ ‘natthi me ajjhattaṃ rāgo’ti pajānāsī’’ti? ‘‘Evaṃ, bho’’. ‘‘Yaṃ kho tvaṃ, brāhmaṇa, santaṃ vā ajjhattaṃ rāgaṃ ‘atthi me ajjhattaṃ rāgo’ti pajānāsi, asantaṃ vā ajjhattaṃ rāgaṃ ‘natthi me ajjhattaṃ rāgo’ti pajānāsi – evampi kho, brāhmaṇa, sandiṭṭhiko dhammo hoti…pe….
‘‘தங் கிங் மஞ்ஞஸி, ப்³ராஹ்மண, ஸந்தங் வா அஜ்ஜ²த்தங் தோ³ஸங்…பே॰… ஸந்தங் வா அஜ்ஜ²த்தங் மோஹங்…பே॰… ஸந்தங் வா அஜ்ஜ²த்தங் காயஸந்தோ³ஸங்…பே॰… ஸந்தங் வா அஜ்ஜ²த்தங் வசீஸந்தோ³ஸங்…பே॰… ஸந்தங் வா அஜ்ஜ²த்தங் மனோஸந்தோ³ஸங் ‘அத்தி² மே அஜ்ஜ²த்தங் மனோஸந்தோ³ஸோ’தி பஜானாஸி, அஸந்தங் வா அஜ்ஜ²த்தங் மனோஸந்தோ³ஸங் ‘நத்தி² மே அஜ்ஜ²த்தங் மனோஸந்தோ³ஸோ’தி பஜானாஸீ’’தி? ‘‘ஏவங், போ⁴’’. ‘‘யங் கோ² த்வங், ப்³ராஹ்மண, ஸந்தங் வா அஜ்ஜ²த்தங் மனோஸந்தோ³ஸங் ‘அத்தி² மே அஜ்ஜ²த்தங் மனோஸந்தோ³ஸோ’தி பஜானாஸி, அஸந்தங் வா அஜ்ஜ²த்தங் மனோஸந்தோ³ஸங் ‘நத்தி² மே அஜ்ஜ²த்தங் மனோஸந்தோ³ஸோ’தி பஜானாஸி – ஏவங் கோ², ப்³ராஹ்மண, ஸந்தி³ட்டி²கோ த⁴ம்மோ ஹோதி அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீ’’தி.
‘‘Taṃ kiṃ maññasi, brāhmaṇa, santaṃ vā ajjhattaṃ dosaṃ…pe… santaṃ vā ajjhattaṃ mohaṃ…pe… santaṃ vā ajjhattaṃ kāyasandosaṃ…pe… santaṃ vā ajjhattaṃ vacīsandosaṃ…pe… santaṃ vā ajjhattaṃ manosandosaṃ ‘atthi me ajjhattaṃ manosandoso’ti pajānāsi, asantaṃ vā ajjhattaṃ manosandosaṃ ‘natthi me ajjhattaṃ manosandoso’ti pajānāsī’’ti? ‘‘Evaṃ, bho’’. ‘‘Yaṃ kho tvaṃ, brāhmaṇa, santaṃ vā ajjhattaṃ manosandosaṃ ‘atthi me ajjhattaṃ manosandoso’ti pajānāsi, asantaṃ vā ajjhattaṃ manosandosaṃ ‘natthi me ajjhattaṃ manosandoso’ti pajānāsi – evaṃ kho, brāhmaṇa, sandiṭṭhiko dhammo hoti akāliko ehipassiko opaneyyiko paccattaṃ veditabbo viññūhī’’ti.
‘‘அபி⁴க்கந்தங் , போ⁴ கோ³தம, அபி⁴க்கந்தங், போ⁴ கோ³தம…பே॰… உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி. ச²ட்ட²ங்.
‘‘Abhikkantaṃ , bho gotama, abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Chaṭṭhaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5-6. ஸந்தி³ட்டி²கஸுத்தத்³வயவண்ணனா • 5-6. Sandiṭṭhikasuttadvayavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-6. இணஸுத்தாதி³வண்ணனா • 3-6. Iṇasuttādivaṇṇanā
