| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
4. து³தியஸத்தஸுத்தவண்ணனா
4. Dutiyasattasuttavaṇṇanā
64. சதுத்தே² அந்தீ⁴கதாதி காமா நாம அனந்த⁴ம்பி அந்த⁴ங் கரொந்தி.
64. Catutthe andhīkatāti kāmā nāma anandhampi andhaṃ karonti.
யதா²ஹ –
Yathāha –
‘‘லுத்³தோ⁴ அத்த²ங் ந ஜானாதி, லுத்³தோ⁴ த⁴ம்மங் ந பஸ்ஸதி;
‘‘Luddho atthaṃ na jānāti, luddho dhammaṃ na passati;
அந்த⁴தமங் ததா³ ஹோதி, யங் லோபோ⁴ ஸஹதே நர’’ந்தி. (இதிவு॰ 88; மஹானி॰ 5; சூளனி॰ க²க்³க³விஸாணஸுத்தனித்³தே³ஸ 128) –
Andhatamaṃ tadā hoti, yaṃ lobho sahate nara’’nti. (itivu. 88; mahāni. 5; cūḷani. khaggavisāṇasuttaniddesa 128) –
தஸ்மா காமேன அனந்தா⁴பி அந்தா⁴ கதாதி அந்தீ⁴கதா. ஸேஸங் அனந்தரஸுத்தே வுத்தனயமேவ. தத்த² ஹி மனுஸ்ஸானங் பவத்தி பி⁴க்கூ²ஹி தி³ஸ்வா ப⁴க³வதோ ஆரோசிதா, இத⁴ ப⁴க³வதா ஸாமங்யேவ தி³ட்டா²தி அயமேவ விஸேஸோ. ஸத்தா² ஸாவத்தி²தோ நிக்க²மித்வா ஜேதவனங் க³ச்ச²ந்தோ அந்தராமக்³கே³ அசிரவதியங் நதி³யங் மச்ச²ப³ந்தே⁴ஹி ஒட்³டி³தங் குமினங் பவிஸித்வா நிக்க²ந்துங் அஸக்கொந்தே ப³ஹூ மச்சே² பஸ்ஸி, ததோ அபரபா⁴கே³ ஏகங் கீ²ரபகங் வச்ச²ங் கோ³ரவங் கத்வா அனுப³ந்தி⁴த்வா த²ஞ்ஞபிபாஸாய கீ³வங் பஸாரெத்வா மாது அந்தரஸத்தி²யங் முக²ங் உபனெந்தங் பஸ்ஸி. அத² ப⁴க³வா விஹாரங் பவிஸித்வா பாதே³ பக்கா²லெத்வா பஞ்ஞத்தவரபு³த்³தா⁴ஸனே நிஸின்னோ பச்சி²மங் வத்து²த்³வயங் புரிமஸ்ஸ உபமானபா⁴வேன க³ஹெத்வா இமங் உதா³னங் உதா³னேஸி.
Tasmā kāmena anandhāpi andhā katāti andhīkatā. Sesaṃ anantarasutte vuttanayameva. Tattha hi manussānaṃ pavatti bhikkhūhi disvā bhagavato ārocitā, idha bhagavatā sāmaṃyeva diṭṭhāti ayameva viseso. Satthā sāvatthito nikkhamitvā jetavanaṃ gacchanto antarāmagge aciravatiyaṃ nadiyaṃ macchabandhehi oḍḍitaṃ kuminaṃ pavisitvā nikkhantuṃ asakkonte bahū macche passi, tato aparabhāge ekaṃ khīrapakaṃ vacchaṃ goravaṃ katvā anubandhitvā thaññapipāsāya gīvaṃ pasāretvā mātu antarasatthiyaṃ mukhaṃ upanentaṃ passi. Atha bhagavā vihāraṃ pavisitvā pāde pakkhāletvā paññattavarabuddhāsane nisinno pacchimaṃ vatthudvayaṃ purimassa upamānabhāvena gahetvā imaṃ udānaṃ udānesi.
தத்த² காமந்தா⁴தி வத்து²காமேஸு கிலேஸகாமேன அந்தா⁴ விசக்கு²கா கதா. ஜாலஸஞ்ச²ன்னாதி ஸகத்தபா⁴வபரத்தபா⁴வேஸு அஜ்ஜ²த்திகபா³ஹிராயதனேஸு, தன்னிஸ்ஸிதேஸு ச த⁴ம்மேஸு அதீதாதி³வஸேன அனேகபே⁴த³பி⁴ன்னேஸு ஹெட்டு²பரியவஸேன அபராபரங் உப்பத்தியா அந்தோக³தா⁴னங் அனத்தா²வஹதோ ச ஜாலபூ⁴தாய தண்ஹாய ஸுகு²மச்சி²த்³தே³ன ஜாலேன பரிவுதோ விய உத³கரஹதோ³ ஸஞ்ச²ன்னா பலிகு³ண்டி²தா அஜ்ஜொ²த்த²டா. தண்ஹாச²த³னசா²தி³தாதி தண்ஹாஸங்கா²தேன ச²த³னேன ஸேவாலபணகேன விய உத³கங் சா²தி³தா, படிச்ச²ன்னா பிஹிதாதி அத்தோ². பத³த்³வயேனாபி காமச்ச²ந்த³னீவரணனிவாரிதகுஸலசித்தாசாரதங் த³ஸ்ஸேதி.
Tattha kāmandhāti vatthukāmesu kilesakāmena andhā vicakkhukā katā. Jālasañchannāti sakattabhāvaparattabhāvesu ajjhattikabāhirāyatanesu, tannissitesu ca dhammesu atītādivasena anekabhedabhinnesu heṭṭhupariyavasena aparāparaṃ uppattiyā antogadhānaṃ anatthāvahato ca jālabhūtāya taṇhāya sukhumacchiddena jālena parivuto viya udakarahado sañchannā paliguṇṭhitā ajjhotthaṭā. Taṇhāchadanachāditāti taṇhāsaṅkhātena chadanena sevālapaṇakena viya udakaṃ chāditā, paṭicchannā pihitāti attho. Padadvayenāpi kāmacchandanīvaraṇanivāritakusalacittācārataṃ dasseti.
பமத்தப³ந்து⁴னா ப³த்³தா⁴தி கிலேஸமாரேன தே³வபுத்தமாரேன ச ப³த்³தா⁴. யத³க்³கே³ன ஹி கிலேஸமாரேன ப³த்³தா⁴, தத³க்³கே³ன தே³வபுத்தமாரேனபி ப³த்³தா⁴ நாம ஹொந்தி. வுத்தஞ்ஹேதங் –
Pamattabandhunā baddhāti kilesamārena devaputtamārena ca baddhā. Yadaggena hi kilesamārena baddhā, tadaggena devaputtamārenapi baddhā nāma honti. Vuttañhetaṃ –
‘‘அந்தலிக்க²சரோ பாஸோ, ய்வாயங் சரதி மானஸோ;
‘‘Antalikkhacaro pāso, yvāyaṃ carati mānaso;
தேன தங் பா³த⁴யிஸ்ஸாமி, ந மே ஸமண மொக்க²ஸீ’’தி. (ஸங்॰ நி॰ 1.151; மஹாவ॰ 33);
Tena taṃ bādhayissāmi, na me samaṇa mokkhasī’’ti. (saṃ. ni. 1.151; mahāva. 33);
நமுசி கண்ஹோ பமத்தப³ந்தூ⁴தி தீணி மாரஸ்ஸ நாமானி. தே³வபுத்தமாரோபி ஹி கிலேஸமாரோ விய அனத்தே²ன பமத்தே ஸத்தே ப³ந்த⁴தீதி பமத்தப³ந்து⁴. ‘‘பமத்தா ப³ந்த⁴னே ப³த்³தா⁴’’திபி பட²ந்தி. தத்த² ப³ந்த⁴னேதி காமகு³ணப³ந்த⁴னேதி அத்தோ². ப³த்³தா⁴தி நியமிதா. யதா² கிங்? மச்சா²வ குமினாமுகே² யதா² நாம மச்ச²ப³ந்த⁴கேன ஒட்³டி³தஸ்ஸ குமினஸ்ஸ முகே² பவிட்டா² மச்சா² தேன ப³த்³தா⁴ ஹுத்வா மரணமன்வெந்தி பாபுணந்தி, ஏவமேவ மாரேன ஒட்³டி³தேன காமகு³ணப³ந்த⁴னேன ப³த்³தா⁴ இமே ஸத்தா ஜராமரணமன்வெந்தி. வச்சோ² கீ²ரபகோவ மாதரங் யதா² கீ²ரபாயீ தருணவச்சோ² அத்தனோ மாதரங் அன்வேதி அனுக³ச்ச²தி, ந அஞ்ஞங் ஏவங் மாரப³ந்த⁴னப³த்³தா⁴ ஸத்தா ஸங்ஸாரே பரிப்³ப⁴மந்தா மரணமேவ அன்வெந்தி அனுக³ச்ச²ந்தி, ந அஜரங் அமரணங் நிப்³பா³னந்தி அதி⁴ப்பாயோ.
Namuci kaṇho pamattabandhūti tīṇi mārassa nāmāni. Devaputtamāropi hi kilesamāro viya anatthena pamatte satte bandhatīti pamattabandhu. ‘‘Pamattā bandhane baddhā’’tipi paṭhanti. Tattha bandhaneti kāmaguṇabandhaneti attho. Baddhāti niyamitā. Yathā kiṃ? Macchāva kumināmukhe yathā nāma macchabandhakena oḍḍitassa kuminassa mukhe paviṭṭhā macchā tena baddhā hutvā maraṇamanventi pāpuṇanti, evameva mārena oḍḍitena kāmaguṇabandhanena baddhā ime sattā jarāmaraṇamanventi. Vaccho khīrapakova mātaraṃ yathā khīrapāyī taruṇavaccho attano mātaraṃ anveti anugacchati, na aññaṃ evaṃ mārabandhanabaddhā sattā saṃsāre paribbhamantā maraṇameva anventi anugacchanti, na ajaraṃ amaraṇaṃ nibbānanti adhippāyo.
சதுத்த²ஸுத்தவண்ணனா நிட்டி²தா.
Catutthasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 4. து³தியஸத்தஸுத்தங் • 4. Dutiyasattasuttaṃ
