| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. ஏகபீ³ஜிஸுத்தவண்ணனா
4. Ekabījisuttavaṇṇanā
494. விபஸ்ஸனதோ நிஸ்ஸக்கந்தி விபஸ்ஸனிந்த்³ரியேஹி நிஸ்ஸக்கங். இதா³னி தமேவ ஸங்கே²பதோ வுத்தமத்த²ங் விவரந்தோ ‘‘ஸமத்தானீ’’திஆதி³மாஹ. தீணி நிஸ்ஸக்கானி ஏவமித⁴ பஞ்ச நிஸ்ஸக்கானி நீஹரிதப்³பா³னி ஏகபீ³ஜிஆதி³விபா⁴வனதோ. தேனாஹ ‘‘ஸகதா³கா³மிமக்³க³ஸ்ஸ ஹீ’’திஆதி³. ஸோதாபத்திமக்³க³ஸ்ஸ விபஸ்ஸனிந்த்³ரியானி நாம தேனத்தபா⁴வேன ஸகதா³கா³மிமக்³க³ங் பத்துங் க³ச்ச²ந்தஸ்ஸ ஸோதாபன்னஸ்ஸ விபஸ்ஸனிந்த்³ரியானி. பஞ்சபி தே ஸோதாபத்திமக்³க³ஸ்ஸ பே⁴தா³யேவாதி ‘‘ஸகதா³கா³மிமக்³கே³ ட²த்வா நீஹரிதப்³பா³னீ’’தி வுத்தங்.
494.Vipassanatonissakkanti vipassanindriyehi nissakkaṃ. Idāni tameva saṅkhepato vuttamatthaṃ vivaranto ‘‘samattānī’’tiādimāha. Tīṇi nissakkāni evamidha pañca nissakkāni nīharitabbāni ekabījiādivibhāvanato. Tenāha ‘‘sakadāgāmimaggassa hī’’tiādi. Sotāpattimaggassa vipassanindriyāni nāma tenattabhāvena sakadāgāmimaggaṃ pattuṃ gacchantassa sotāpannassa vipassanindriyāni. Pañcapi te sotāpattimaggassa bhedāyevāti ‘‘sakadāgāmimagge ṭhatvā nīharitabbānī’’ti vuttaṃ.
ஏகபீ³ஜீதி எத்த² க²ந்த⁴பீ³ஜங் நாம கதி²தங். யஸ்ஸ ஹி ஸோதாபன்னஸ்ஸ ஏகங் க²ந்த⁴பீ³ஜங் அத்தி², ஏகங் அத்தபா⁴வக்³க³ஹணங், ஸோ ஏகபீ³ஜி நாம. தேனாஹ – ‘‘ஸோதாபன்னோ ஹுத்வா’’திஆதி³. மானுஸகங் ப⁴வந்தி இத³ங் பனெத்த² தே³ஸனாமத்தங், தே³வப⁴வங் நிப்³ப³த்தேதீதிபி வத்துங் வட்டதியேவ. ப⁴க³வதா க³ஹிதனாமானேதானி. எத்தகஞ்ஹி பமாணங் க³தோ ஸத்தக்க²த்துபரமோ நாம ஹோதி, எத்தகங் கோலங்கோலோ, எத்தகங் ஏகபீ³ஜீதி ப⁴க³வதா ஏதேஸங் நாமங் க³ஹிதங்.
Ekabījīti ettha khandhabījaṃ nāma kathitaṃ. Yassa hi sotāpannassa ekaṃ khandhabījaṃ atthi, ekaṃ attabhāvaggahaṇaṃ, so ekabīji nāma. Tenāha – ‘‘sotāpanno hutvā’’tiādi. Mānusakaṃbhavanti idaṃ panettha desanāmattaṃ, devabhavaṃ nibbattetītipi vattuṃ vaṭṭatiyeva. Bhagavatā gahitanāmānetāni. Ettakañhi pamāṇaṃ gato sattakkhattuparamo nāma hoti, ettakaṃ kolaṃkolo, ettakaṃ ekabījīti bhagavatā etesaṃ nāmaṃ gahitaṃ.
த்³வே தயோ ப⁴வேதி தே³வமனுஸ்ஸேஸு ஏவ த்³வே தயோ ப⁴வே. ஸம்போ³தி⁴சதுஸச்சத⁴ம்மோ பரங் அயனங் நிஸ்ஸயோ க³தி ஏதஸ்ஸாதி ஸம்போ³தி⁴பராயணோ. குலதோ குலங் க³ச்ச²தீதி கோலங்கோலோ. ஸோதாபத்திப²லஸச்சி²கிரியதோ பட்டா²ய ஹி நீசகுலே உப்பத்தி நாம நத்தி², மஹாபோ⁴கே³ஸு குலேஸு ஏவ நிப்³ப³த்ததீதி அத்தோ². கேவலோபி ஹி குல-ஸத்³தோ³ மஹாபோ⁴க³குலமேவ வத³தி. த்³வே வா தீணி வா குலானீதி தே³வமனுஸ்ஸவஸேன த்³வே வா தயோ வா ப⁴வேதி அயம்பி மிஸ்ஸகப⁴வேன கதி²தோ. ஜாதஸ்ஸ குமாரஸ்ஸ விய அரியாய ஜாதியா ஜாதஸ்ஸ நாமமேதங், யதி³த³ங் நியதோதி ஸத்தக்க²த்துபரமாதி³கோதி ச ஸமஞ்ஞாதி த³ஸ்ஸெந்தோ ஆஹ ‘‘ப⁴க³வதா க³ஹிதனாமவஸேனேவா’’திஆதி³.
Dve tayo bhaveti devamanussesu eva dve tayo bhave. Sambodhicatusaccadhammo paraṃ ayanaṃ nissayo gati etassāti sambodhiparāyaṇo. Kulato kulaṃ gacchatīti kolaṃkolo. Sotāpattiphalasacchikiriyato paṭṭhāya hi nīcakule uppatti nāma natthi, mahābhogesu kulesu eva nibbattatīti attho. Kevalopi hi kula-saddo mahābhogakulameva vadati. Dve vā tīṇi vā kulānīti devamanussavasena dve vā tayo vā bhaveti ayampi missakabhavena kathito. Jātassa kumārassa viya ariyāya jātiyā jātassa nāmametaṃ, yadidaṃ niyatoti sattakkhattuparamādikoti ca samaññāti dassento āha ‘‘bhagavatā gahitanāmavasenevā’’tiādi.
யதி³ புப்³ப³ஹேதுனியமதோ ஸோதாபன்னோ ச நியதோதி ஸோதாபத்திமக்³க³தோ உத்³த⁴ங் திண்ணங் மக்³கா³னங் உபனிஸ்ஸயாபா⁴வதோ புப்³ப³ஹேதுகிச்சங் நத்தீ²தி ஸோதாபத்திமக்³க³ஸ்ஸ உபனிஸ்ஸயபா⁴வோ ஆபஜ்ஜதி. யதி³ தஸ்ஸபி புப்³ப³ஹேதுஉபனிஸ்ஸயோ ஸியா, தாவ நியமதோ ஸோதாபத்திமக்³கு³ப்பத்திதோ புப்³பே³ ஏவ நியமிதோ, யாவஞ்ச அகனிட்ட²ங் தஸ்ஸ புப்³ப³ஹேது நாம , அஹேதுகதா ஆபன்னா, இச்சஸ்ஸ அஹேது அப்பச்சயா நிப்ப²த்தி பாபுணாதி. கிஞ்ச ஹேது சே? நியமதோ ஸோதாபன்னோ ச நியதோதி பட²மமக்³கா³தி⁴க³மேனேவ அனுக்கமேன உபரி திண்ணங் மக்³கா³னங் கிச்சானி நிப்ப²ஜ்ஜந்தி, ஏவங் ஸத்தக்க²த்துபரமதாதி³னியமே ஸதி ஸத்தமப⁴வாதி³தோ உத்³த⁴ங் பவத்ததாய து³க்க²ஸ்ஸ மூலபூ⁴தா கிலேஸா பட²மமக்³கே³னேவ கீ²ணாதி உபரி தயோ மக்³கா³ அகிச்சா ஸியுங். தேனாஹ ‘‘பட²மமக்³க³ஸ்ஸ உபனிஸ்ஸயோ கதோ நாமா’’திஆதி³.
Yadi pubbahetuniyamato sotāpanno ca niyatoti sotāpattimaggato uddhaṃ tiṇṇaṃ maggānaṃ upanissayābhāvato pubbahetukiccaṃ natthīti sotāpattimaggassa upanissayabhāvo āpajjati. Yadi tassapi pubbahetuupanissayo siyā, tāva niyamato sotāpattimagguppattito pubbe eva niyamito, yāvañca akaniṭṭhaṃ tassa pubbahetu nāma , ahetukatā āpannā, iccassa ahetu appaccayā nipphatti pāpuṇāti. Kiñca hetu ce? Niyamato sotāpanno ca niyatoti paṭhamamaggādhigameneva anukkamena upari tiṇṇaṃ maggānaṃ kiccāni nipphajjanti, evaṃ sattakkhattuparamatādiniyame sati sattamabhavādito uddhaṃ pavattatāya dukkhassa mūlabhūtā kilesā paṭhamamaggeneva khīṇāti upari tayo maggā akiccā siyuṃ. Tenāha ‘‘paṭhamamaggassa upanissayo kato nāmā’’tiādi.
யதி³ உபரி தயோ மக்³கா³ ஸத்தக்க²த்துபரமாதி³தங் நியமெந்தி, ததோ ச அஞ்ஞோ ஸோதாபன்னோ நத்தீ²தி ஸோதாபத்திமக்³க³ஸ்ஸ அகிச்சகதா நிப்பயோஜனதா ஆபஜ்ஜெய்ய. அத² ஸக்காயதி³ட்டி²ஆதி³ப்பஹானங் தஸ்ஸ கிச்சங், தேஸங் தேஸங் பஹானேன ஸத்தக்க²த்துபரமாதி³னியமதாய. ப⁴விதப்³ப³ங், யாவ உபரிமக்³கா³ ஏவ ஹொந்தீதி ஸத்தப⁴வாதி³தோ உத்³த⁴மபவத்தனதோ தேன வினானேன ஸக்காயதி³ட்டி²ஆதி³ப்பஹானேன ச தேன வினா ப⁴விதப்³ப³ந்தி ஆஹ – ‘‘பட²மமக்³கே³ அனுப்பன்னேவ உபரி தயோ மக்³கா³ உப்பன்னாதி ஆபஜ்ஜதீ’’தி. திண்ணங் மக்³கா³னந்தி உபரி திண்ணங் மக்³கா³னங். விபஸ்ஸனா நியமேதீதி யுஜ்ஜதீதி வுத்தமத்த²ங் விவரந்தோ ‘‘ஸசே ஹீ’’திஆதி³மாஹ.
Yadi upari tayo maggā sattakkhattuparamāditaṃ niyamenti, tato ca añño sotāpanno natthīti sotāpattimaggassa akiccakatā nippayojanatā āpajjeyya. Atha sakkāyadiṭṭhiādippahānaṃ tassa kiccaṃ, tesaṃ tesaṃ pahānena sattakkhattuparamādiniyamatāya. Bhavitabbaṃ, yāva uparimaggā eva hontīti sattabhavādito uddhamapavattanato tena vinānena sakkāyadiṭṭhiādippahānena ca tena vinā bhavitabbanti āha – ‘‘paṭhamamagge anuppanneva upari tayo maggā uppannāti āpajjatī’’ti. Tiṇṇaṃ maggānanti upari tiṇṇaṃ maggānaṃ. Vipassanā niyametīti yujjatīti vuttamatthaṃ vivaranto ‘‘sace hī’’tiādimāha.
ஸோதாபன்னோ வட்டஜ்ஜா²ஸயோ. தத்ரேகச்சே பாகடே பஞ்ஞாதே த³ஸ்ஸெந்தோ ‘‘அனாத²பிண்டி³கோ’’திஆதி³மாஹ. இத⁴ட்ட²கவோகிண்ணஸுக்க²விபஸ்ஸகஸ்ஸாதி யோ இமஸ்மிங் காமப⁴வே டி²தோ மனுஸ்ஸதே³வவஸேன வோகிண்ணப⁴வூபபத்திகோ ஸுக்க²விபஸ்ஸகோ ச, தஸ்ஸ வஸேன. நாமங் கதி²தந்தி ஸத்தக்க²த்துபரமோதி நாமங் கதி²தங். கேசி பன ‘‘காமப⁴வே ஸத்தக்க²த்துங்யேவ உப்பஜ்ஜதி, ந ததோ’’தி வத³ந்தி, தங் வீமங்ஸிதப்³ப³ங்.
Sotāpanno vaṭṭajjhāsayo. Tatrekacce pākaṭe paññāte dassento ‘‘anāthapiṇḍiko’’tiādimāha. Idhaṭṭhakavokiṇṇasukkhavipassakassāti yo imasmiṃ kāmabhave ṭhito manussadevavasena vokiṇṇabhavūpapattiko sukkhavipassako ca, tassa vasena. Nāmaṃ kathitanti sattakkhattuparamoti nāmaṃ kathitaṃ. Keci pana ‘‘kāmabhave sattakkhattuṃyeva uppajjati, na tato’’ti vadanti, taṃ vīmaṃsitabbaṃ.
ஸோதெ⁴ஸ்ஸாமீதி ஜம்பு³தீ³பே கேனசி தேபிடகேன பி⁴க்கு²னா ஸத்³தி⁴ங் பிடகத்தயமேவ மய்ஹங் உக்³க³ஹபரிபுச்சா²வஸேன ஸோதெ⁴ய்யாமீதி பரதீரங் ஜம்பு³தீ³பங் க³தோ. யோ பி⁴க்கு² ஸக்கோதீதி யோஜனா. அனிச்சானுபஸ்ஸனாதீ³ஸு ஏகமுகே²ன அபி⁴னிவிட்டே²னபி அபி⁴த⁴ம்மபரியாயேன தீஹி ஏவ விமொக்கே²ஹி மக்³க³ங் லப⁴தீதி அபி⁴னிவேஸபே⁴தே³ன தயோ புக்³க³லா ஸுஞ்ஞததோ வுட்டி²தா, ததா² தயோ அப்பணிஹிததோ வுட்டி²தாதி ச² ஹொந்தி, தேவ ஸத்³தா⁴து⁴ரபஞ்ஞாது⁴ரவஸேன த்³வாத³ஸ ஸகதா³கா³மினோ. ததா² அரஹந்தோ, தயோ அந்தராபரினிப்³பா³யினோ ஏகோ உபஹச்சபரினிப்³பா³யீ ஏகோ உத்³த⁴ங்ஸோதோ அகனிட்ட²கா³மீதி பஞ்ச, தே அஸங்கா²ரஸஸங்கா²ரபரினிப்³பா³யிபே⁴தே³ன த³ஸாதி அவிஹாதீ³ஸு சதூஸுபி சத்தாலீஸ, அகனிட்டே² பன உத்³த⁴ங்ஸோதோ நத்தீ²தி அட்ட²சத்தாலீஸ அனாகா³மினோ. விபஸ்ஸனா கதி²தா ஸம்மஸனசாரஸ்ஸ கதி²தத்தா.
Sodhessāmīti jambudīpe kenaci tepiṭakena bhikkhunā saddhiṃ piṭakattayameva mayhaṃ uggahaparipucchāvasena sodheyyāmīti paratīraṃ jambudīpaṃ gato. Yo bhikkhu sakkotīti yojanā. Aniccānupassanādīsu ekamukhena abhiniviṭṭhenapi abhidhammapariyāyena tīhi eva vimokkhehi maggaṃ labhatīti abhinivesabhedena tayo puggalā suññatato vuṭṭhitā, tathā tayo appaṇihitato vuṭṭhitāti cha honti, teva saddhādhurapaññādhuravasena dvādasa sakadāgāmino. Tathā arahanto, tayo antarāparinibbāyino eko upahaccaparinibbāyī eko uddhaṃsoto akaniṭṭhagāmīti pañca, te asaṅkhārasasaṅkhāraparinibbāyibhedena dasāti avihādīsu catūsupi cattālīsa, akaniṭṭhe pana uddhaṃsoto natthīti aṭṭhacattālīsa anāgāmino. Vipassanā kathitā sammasanacārassa kathitattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ஏகபீ³ஜீஸுத்தங் • 4. Ekabījīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. ஏகபீ³ஜீஸுத்தவண்ணனா • 4. Ekabījīsuttavaṇṇanā
