| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૧૮. અટ્ઠારસમવગ્ગો
18. Aṭṭhārasamavaggo
(૧૮૧) ૫. એકમગ્ગકથા
(181) 5. Ekamaggakathā
૮૧૦. એકેન અરિયમગ્ગેન ચત્તારિ સામઞ્ઞફલાનિ સચ્છિકરોતીતિ? આમન્તા. ચતુન્નં ફસ્સાનં…પે॰… ચતુન્નં સઞ્ઞાનં સમોધાનં હોતીતિ? ન હેવં વત્તબ્બે…પે॰… એકેન અરિયમગ્ગેન ચત્તારિ સામઞ્ઞફલાનિ સચ્છિકરોતીતિ? આમન્તા. સોતાપત્તિમગ્ગેનાતિ ? ન હેવં વત્તબ્બે…પે॰… સકદાગામિ…પે॰… અનાગામિમગ્ગેનાતિ? ન હેવં વત્તબ્બે…પે॰….
810. Ekena ariyamaggena cattāri sāmaññaphalāni sacchikarotīti? Āmantā. Catunnaṃ phassānaṃ…pe… catunnaṃ saññānaṃ samodhānaṃ hotīti? Na hevaṃ vattabbe…pe… ekena ariyamaggena cattāri sāmaññaphalāni sacchikarotīti? Āmantā. Sotāpattimaggenāti ? Na hevaṃ vattabbe…pe… sakadāgāmi…pe… anāgāmimaggenāti? Na hevaṃ vattabbe…pe….
કતમેન મગ્ગેનાતિ? અરહત્તમગ્ગેનાતિ. અરહત્તમગ્ગેન સક્કાયદિટ્ઠિં વિચિકિચ્છં સીલબ્બતપરામાસં જહતીતિ? ન હેવં વત્તબ્બે…પે॰… અરહત્તમગ્ગેન સક્કાયદિટ્ઠિં વિચિકિચ્છં સીલબ્બતપરામાસં જહતીતિ? આમન્તા. નનુ તિણ્ણં સંયોજનાનં પહાનં સોતાપત્તિફલં વુત્તં ભગવતાતિ? આમન્તા. હઞ્ચિ તિણ્ણં સંયોજનાનં પહાનં સોતાપત્તિફલં વુત્તં ભગવતા, નો ચ વત રે વત્તબ્બે – ‘‘અરહત્તમગ્ગેન સક્કાયદિટ્ઠિં વિચિકિચ્છં સીલબ્બતપરામાસં જહતી’’તિ.
Katamena maggenāti? Arahattamaggenāti. Arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatīti? Na hevaṃ vattabbe…pe… arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatīti? Āmantā. Nanu tiṇṇaṃ saṃyojanānaṃ pahānaṃ sotāpattiphalaṃ vuttaṃ bhagavatāti? Āmantā. Hañci tiṇṇaṃ saṃyojanānaṃ pahānaṃ sotāpattiphalaṃ vuttaṃ bhagavatā, no ca vata re vattabbe – ‘‘arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatī’’ti.
અરહત્તમગ્ગેન ઓળારિકં કામરાગં ઓળારિકં બ્યાપાદં જહતીતિ? ન હેવં વત્તબ્બે…પે॰… અરહત્તમગ્ગેન ઓળારિકં કામરાગં ઓળારિકં બ્યાપાદં જહતીતિ? આમન્તા. નનુ કામરાગબ્યાપાદાનં તનુભાવં સકદાગામિફલં વુત્તં ભગવતાતિ? આમન્તા. હઞ્ચિ કામરાગબ્યાપાદાનં તનુભાવં સકદાગામિફલં વુત્તં ભગવતા, નો ચ વત રે વત્તબ્બે – ‘‘અરહત્તમગ્ગેન ઓળારિકં કામરાગં ઓળારિકં બ્યાપાદં જહતી’’તિ.
Arahattamaggena oḷārikaṃ kāmarāgaṃ oḷārikaṃ byāpādaṃ jahatīti? Na hevaṃ vattabbe…pe… arahattamaggena oḷārikaṃ kāmarāgaṃ oḷārikaṃ byāpādaṃ jahatīti? Āmantā. Nanu kāmarāgabyāpādānaṃ tanubhāvaṃ sakadāgāmiphalaṃ vuttaṃ bhagavatāti? Āmantā. Hañci kāmarāgabyāpādānaṃ tanubhāvaṃ sakadāgāmiphalaṃ vuttaṃ bhagavatā, no ca vata re vattabbe – ‘‘arahattamaggena oḷārikaṃ kāmarāgaṃ oḷārikaṃ byāpādaṃ jahatī’’ti.
અરહત્તમગ્ગેન અણુસહગતં કામરાગં અણુસહગતં બ્યાપાદં જહતીતિ? ન હેવં વત્તબ્બે…પે॰… અરહત્તમગ્ગેન અણુસહગતં કામરાગં અણુસહગતં બ્યાપાદં જહતીતિ? આમન્તા . નનુ કામરાગબ્યાપાદાનં અનવસેસપ્પહાનં અનાગામિફલં વુત્તં ભગવતાતિ? આમન્તા. હઞ્ચિ કામરાગબ્યાપાદાનં અનવસેસપ્પહાનં અનાગામિફલં વુત્તં ભગવતા, નો ચ વત રે વત્તબ્બે – ‘‘અરહત્તમગ્ગેન અણુસહગતં કામરાગં અણુસહગતં બ્યાપાદં જહતી’’તિ.
Arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti? Na hevaṃ vattabbe…pe… arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti? Āmantā . Nanu kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatāti? Āmantā. Hañci kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatā, no ca vata re vattabbe – ‘‘arahattamaggena aṇusahagataṃ kāmarāgaṃ aṇusahagataṃ byāpādaṃ jahatī’’ti.
૮૧૧. ન વત્તબ્બં – ‘‘એકેન અરિયમગ્ગેન ચત્તારિ સામઞ્ઞફલાનિ સચ્છિકરોતી’’તિ? આમન્તા. ભગવતા સોતાપત્તિમગ્ગો ભાવિતોતિ? આમન્તા . ભગવા સોતાપન્નોતિ? ન હેવં વત્તબ્બે…પે॰… ભગવતા સકદાગામિ…પે॰… અનાગામિમગ્ગો ભાવિતોતિ? આમન્તા. ભગવા અનાગામીતિ? ન હેવં વત્તબ્બે…પે॰….
811. Na vattabbaṃ – ‘‘ekena ariyamaggena cattāri sāmaññaphalāni sacchikarotī’’ti? Āmantā. Bhagavatā sotāpattimaggo bhāvitoti? Āmantā . Bhagavā sotāpannoti? Na hevaṃ vattabbe…pe… bhagavatā sakadāgāmi…pe… anāgāmimaggo bhāvitoti? Āmantā. Bhagavā anāgāmīti? Na hevaṃ vattabbe…pe….
૮૧૨. ભગવા એકેન અરિયમગ્ગેન ચત્તારિ સામઞ્ઞફલાનિ સચ્છિકરોતિ, સાવકા ચતૂહિ અરિયમગ્ગેહિ ચત્તારિ સામઞ્ઞફલાનિ સચ્છિકરોન્તીતિ? આમન્તા. સાવકા બુદ્ધસ્સ ભગવતો અદિટ્ઠં દક્ખન્તિ અનધિગતં અધિગચ્છન્તિ અસચ્છિકતં સચ્છિકરોન્તીતિ? ન હેવં વત્તબ્બે…પે॰….
812. Bhagavā ekena ariyamaggena cattāri sāmaññaphalāni sacchikaroti, sāvakā catūhi ariyamaggehi cattāri sāmaññaphalāni sacchikarontīti? Āmantā. Sāvakā buddhassa bhagavato adiṭṭhaṃ dakkhanti anadhigataṃ adhigacchanti asacchikataṃ sacchikarontīti? Na hevaṃ vattabbe…pe….
એકમગ્ગકથા નિટ્ઠિતા.
Ekamaggakathā niṭṭhitā.
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૫. એકમગ્ગકથાવણ્ણના • 5. Ekamaggakathāvaṇṇanā
