| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૫. એકન્તદુક્ખસુત્તં
5. Ekantadukkhasuttaṃ
૧૧૮. સાવત્થિયં વિહરતિ…પે॰… ‘‘પથવીધાતુ ચે 1 હિદં, ભિક્ખવે, એકન્તદુક્ખા અભવિસ્સ દુક્ખાનુપતિતા દુક્ખાવક્કન્તા અનવક્કન્તા સુખેન, નયિદં સત્તા પથવીધાતુયા સારજ્જેય્યું. યસ્મા ચ ખો, ભિક્ખવે, પથવીધાતુ સુખા સુખાનુપતિતા સુખાવક્કન્તા અનવક્કન્તા દુક્ખેન, તસ્મા સત્તા પથવીધાતુયા સારજ્જન્તિ’’.
118. Sāvatthiyaṃ viharati…pe… ‘‘pathavīdhātu ce 2 hidaṃ, bhikkhave, ekantadukkhā abhavissa dukkhānupatitā dukkhāvakkantā anavakkantā sukhena, nayidaṃ sattā pathavīdhātuyā sārajjeyyuṃ. Yasmā ca kho, bhikkhave, pathavīdhātu sukhā sukhānupatitā sukhāvakkantā anavakkantā dukkhena, tasmā sattā pathavīdhātuyā sārajjanti’’.
‘‘આપોધાતુ ચે હિદં, ભિક્ખવે…પે॰… તેજોધાતુ ચે હિદં, ભિક્ખવે… વાયોધાતુ ચે હિદં, ભિક્ખવે, એકન્તદુક્ખા અભવિસ્સ દુક્ખાનુપતિતા દુક્ખાવક્કન્તા અનવક્કન્તા સુખેન, નયિદં સત્તા વાયોધાતુયા સારજ્જેય્યું. યસ્મા ચ ખો, ભિક્ખવે, વાયોધાતુ સુખા સુખાનુપતિતા સુખાવક્કન્તા અનવક્કન્તા દુક્ખેન, તસ્મા સત્તા વાયોધાતુયા સારજ્જન્તિ.
‘‘Āpodhātu ce hidaṃ, bhikkhave…pe… tejodhātu ce hidaṃ, bhikkhave… vāyodhātu ce hidaṃ, bhikkhave, ekantadukkhā abhavissa dukkhānupatitā dukkhāvakkantā anavakkantā sukhena, nayidaṃ sattā vāyodhātuyā sārajjeyyuṃ. Yasmā ca kho, bhikkhave, vāyodhātu sukhā sukhānupatitā sukhāvakkantā anavakkantā dukkhena, tasmā sattā vāyodhātuyā sārajjanti.
‘‘પથવીધાતુ ચે હિદં, ભિક્ખવે, એકન્તસુખા અભવિસ્સ સુખાનુપતિતા સુખાવક્કન્તા અનવક્કન્તા દુક્ખેન, નયિદં સત્તા પથવીધાતુયા નિબ્બિન્દેય્યું. યસ્મા ચ ખો, ભિક્ખવે, પથવીધાતુ દુક્ખા દુક્ખાનુપતિતા દુક્ખાવક્કન્તા અનવક્કન્તા સુખેન, તસ્મા સત્તા પથવીધાતુયા નિબ્બિન્દન્તિ.
‘‘Pathavīdhātu ce hidaṃ, bhikkhave, ekantasukhā abhavissa sukhānupatitā sukhāvakkantā anavakkantā dukkhena, nayidaṃ sattā pathavīdhātuyā nibbindeyyuṃ. Yasmā ca kho, bhikkhave, pathavīdhātu dukkhā dukkhānupatitā dukkhāvakkantā anavakkantā sukhena, tasmā sattā pathavīdhātuyā nibbindanti.
‘‘આપોધાતુ ચે હિદં, ભિક્ખવે…પે॰… તેજોધાતુ ચે હિદં, ભિક્ખવે… વાયોધાતુ ચે હિદં, ભિક્ખવે, એકન્તસુખા અભવિસ્સ સુખાનુપતિતા સુખાવક્કન્તા અનવક્કન્તા દુક્ખેન, નયિદં સત્તા વાયોધાતુયા નિબ્બિન્દેય્યું. યસ્મા ચ ખો, ભિક્ખવે, વાયોધાતુ દુક્ખા દુક્ખાનુપતિતા દુક્ખાવક્કન્તા અનવક્કન્તા સુખેન, તસ્મા સત્તા વાયોધાતુયા નિબ્બિન્દન્તી’’તિ. પઞ્ચમં.
‘‘Āpodhātu ce hidaṃ, bhikkhave…pe… tejodhātu ce hidaṃ, bhikkhave… vāyodhātu ce hidaṃ, bhikkhave, ekantasukhā abhavissa sukhānupatitā sukhāvakkantā anavakkantā dukkhena, nayidaṃ sattā vāyodhātuyā nibbindeyyuṃ. Yasmā ca kho, bhikkhave, vāyodhātu dukkhā dukkhānupatitā dukkhāvakkantā anavakkantā sukhena, tasmā sattā vāyodhātuyā nibbindantī’’ti. Pañcamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૫. એકન્તદુક્ખસુત્તવણ્ણના • 5. Ekantadukkhasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૫. એકન્તદુક્ખસુત્તવણ્ણના • 5. Ekantadukkhasuttavaṇṇanā
