| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
13. ஏகபுக்³க³லவக்³கோ³
13. Ekapuggalavaggo
170. ‘‘ஏகபுக்³க³லோ , பி⁴க்க²வே, லோகே உப்பஜ்ஜமானோ உப்பஜ்ஜதி ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானங் . கதமோ ஏகபுக்³க³லோ? ததா²க³தோ அரஹங் ஸம்மாஸம்பு³த்³தோ⁴. அயங் கோ², பி⁴க்க²வே, ஏகபுக்³க³லோ லோகே உப்பஜ்ஜமானோ உப்பஜ்ஜதி ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸான’’ந்தி.
170. ‘‘Ekapuggalo , bhikkhave, loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṃ . Katamo ekapuggalo? Tathāgato arahaṃ sammāsambuddho. Ayaṃ kho, bhikkhave, ekapuggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussāna’’nti.
171. ‘‘ஏகபுக்³க³லஸ்ஸ, பி⁴க்க²வே, பாதுபா⁴வோ து³ல்லபோ⁴ லோகஸ்மிங். கதமஸ்ஸ ஏகபுக்³க³லஸ்ஸ? ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ. இமஸ்ஸ கோ², பி⁴க்க²வே, ஏகபுக்³க³லஸ்ஸ பாதுபா⁴வோ து³ல்லபோ⁴ லோகஸ்மி’’ந்தி.
171. ‘‘Ekapuggalassa, bhikkhave, pātubhāvo dullabho lokasmiṃ. Katamassa ekapuggalassa? Tathāgatassa arahato sammāsambuddhassa. Imassa kho, bhikkhave, ekapuggalassa pātubhāvo dullabho lokasmi’’nti.
172. ‘‘ஏகபுக்³க³லோ, பி⁴க்க²வே, லோகே உப்பஜ்ஜமானோ உப்பஜ்ஜதி அச்ச²ரியமனுஸ்ஸோ. கதமோ ஏகபுக்³க³லோ? ததா²க³தோ அரஹங் ஸம்மாஸம்பு³த்³தோ⁴. அயங் கோ², பி⁴க்க²வே, ஏகபுக்³க³லோ லோகே உப்பஜ்ஜமானோ உப்பஜ்ஜதி அச்ச²ரியமனுஸ்ஸோ’’தி.
172. ‘‘Ekapuggalo, bhikkhave, loke uppajjamāno uppajjati acchariyamanusso. Katamo ekapuggalo? Tathāgato arahaṃ sammāsambuddho. Ayaṃ kho, bhikkhave, ekapuggalo loke uppajjamāno uppajjati acchariyamanusso’’ti.
173. ‘‘ஏகபுக்³க³லஸ்ஸ, பி⁴க்க²வே, காலகிரியா ப³ஹுனோ ஜனஸ்ஸ அனுதப்பா 1 ஹோதி. கதமஸ்ஸ ஏகபுக்³க³லஸ்ஸ? ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ. இமஸ்ஸ கோ², பி⁴க்க²வே, ஏகபுக்³க³லஸ்ஸ காலகிரியா ப³ஹுனோ ஜனஸ்ஸ அனுதப்பா ஹோதீ’’தி.
173. ‘‘Ekapuggalassa, bhikkhave, kālakiriyā bahuno janassa anutappā 2 hoti. Katamassa ekapuggalassa? Tathāgatassa arahato sammāsambuddhassa. Imassa kho, bhikkhave, ekapuggalassa kālakiriyā bahuno janassa anutappā hotī’’ti.
174. ‘‘ஏகபுக்³க³லோ, பி⁴க்க²வே, லோகே உப்பஜ்ஜமானோ உப்பஜ்ஜதி அது³தியோ அஸஹாயோ அப்படிமோ அப்படிஸமோ அப்படிபா⁴கோ³ அப்படிபுக்³க³லோ அஸமோ அஸமஸமோ த்³விபதா³னங் அக்³கோ³. கதமோ ஏகபுக்³க³லோ? ததா²க³தோ அரஹங் ஸம்மாஸம்பு³த்³தோ⁴. அயங் கோ², பி⁴க்க²வே, ஏகபுக்³க³லோ லோகே உப்பஜ்ஜமானோ உப்பஜ்ஜதி அது³தியோ அஸஹாயோ அப்படிமோ அப்படிஸமோ அப்படிபா⁴கோ³ அப்படிபுக்³க³லோ அஸமோ அஸமஸமோ த்³விபதா³னங் அக்³கோ³’’தி.
174. ‘‘Ekapuggalo, bhikkhave, loke uppajjamāno uppajjati adutiyo asahāyo appaṭimo appaṭisamo appaṭibhāgo appaṭipuggalo asamo asamasamo dvipadānaṃ aggo. Katamo ekapuggalo? Tathāgato arahaṃ sammāsambuddho. Ayaṃ kho, bhikkhave, ekapuggalo loke uppajjamāno uppajjati adutiyo asahāyo appaṭimo appaṭisamo appaṭibhāgo appaṭipuggalo asamo asamasamo dvipadānaṃ aggo’’ti.
175-186. ‘‘ஏகபுக்³க³லஸ்ஸ , பி⁴க்க²வே, பாதுபா⁴வா மஹதோ சக்கு²ஸ்ஸ பாதுபா⁴வோ ஹோதி, மஹதோ ஆலோகஸ்ஸ பாதுபா⁴வோ ஹோதி, மஹதோ ஓபா⁴ஸஸ்ஸ பாதுபா⁴வோ ஹோதி, ச²ன்னங் அனுத்தரியானங் பாதுபா⁴வோ ஹோதி, சதுன்னங் படிஸம்பி⁴தா³னங் ஸச்சி²கிரியா ஹோதி, அனேகதா⁴துபடிவேதோ⁴ ஹோதி, நானாதா⁴துபடிவேதோ⁴ ஹோதி, விஜ்ஜாவிமுத்திப²லஸச்சி²கிரியா ஹோதி, ஸோதாபத்திப²லஸச்சி²கிரியா ஹோதி, ஸகதா³கா³மிப²லஸச்சி²கிரியா ஹோதி, அனாகா³மிப²லஸச்சி²கிரியா ஹோதி, அரஹத்தப²லஸச்சி²கிரியா ஹோதி. கதமஸ்ஸ ஏகபுக்³க³லஸ்ஸ? ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ. இமஸ்ஸ கோ², பி⁴க்க²வே, ஏகபுக்³க³லஸ்ஸ பாதுபா⁴வா மஹதோ சக்கு²ஸ்ஸ பாதுபா⁴வோ ஹோதி, மஹதோ ஆலோகஸ்ஸ பாதுபா⁴வோ ஹோதி, மஹதோ ஓபா⁴ஸஸ்ஸ பாதுபா⁴வோ ஹோதி, ச²ன்னங் அனுத்தரியானங் பாதுபா⁴வோ ஹோதி, சதுன்னங் படிஸம்பி⁴தா³னங் ஸச்சி²கிரியா ஹோதி, அனேகதா⁴துபடிவேதோ⁴ ஹோதி, நானாதா⁴துபடிவேதோ⁴ ஹோதி, விஜ்ஜாவிமுத்திப²லஸச்சி²கிரியா ஹோதி, ஸோதாபத்திப²லஸச்சி²கிரியா ஹோதி, ஸகதா³கா³மிப²லஸச்சி²கிரியா ஹோதி, அனாகா³மிப²லஸச்சி²கிரியா ஹோதி, அரஹத்தப²லஸச்சி²கிரியா ஹோதீ’’தி.
175-186. ‘‘Ekapuggalassa , bhikkhave, pātubhāvā mahato cakkhussa pātubhāvo hoti, mahato ālokassa pātubhāvo hoti, mahato obhāsassa pātubhāvo hoti, channaṃ anuttariyānaṃ pātubhāvo hoti, catunnaṃ paṭisambhidānaṃ sacchikiriyā hoti, anekadhātupaṭivedho hoti, nānādhātupaṭivedho hoti, vijjāvimuttiphalasacchikiriyā hoti, sotāpattiphalasacchikiriyā hoti, sakadāgāmiphalasacchikiriyā hoti, anāgāmiphalasacchikiriyā hoti, arahattaphalasacchikiriyā hoti. Katamassa ekapuggalassa? Tathāgatassa arahato sammāsambuddhassa. Imassa kho, bhikkhave, ekapuggalassa pātubhāvā mahato cakkhussa pātubhāvo hoti, mahato ālokassa pātubhāvo hoti, mahato obhāsassa pātubhāvo hoti, channaṃ anuttariyānaṃ pātubhāvo hoti, catunnaṃ paṭisambhidānaṃ sacchikiriyā hoti, anekadhātupaṭivedho hoti, nānādhātupaṭivedho hoti, vijjāvimuttiphalasacchikiriyā hoti, sotāpattiphalasacchikiriyā hoti, sakadāgāmiphalasacchikiriyā hoti, anāgāmiphalasacchikiriyā hoti, arahattaphalasacchikiriyā hotī’’ti.
187. ‘‘நாஹங் பி⁴க்க²வே, அஞ்ஞங் ஏகபுக்³க³லம்பி ஸமனுபஸ்ஸாமி யோ ஏவங் ததா²க³தேன அனுத்தரங் த⁴ம்மசக்கங் பவத்திதங் ஸம்மதே³வ அனுப்பவத்தேதி யத²யித³ங், பி⁴க்க²வே, ஸாரிபுத்தோ. ஸாரிபுத்தோ, பி⁴க்க²வே, ததா²க³தேன அனுத்தரங் த⁴ம்மசக்கங் பவத்திதங் ஸம்மதே³வ அனுப்பவத்தேதீ’’தி.
187. ‘‘Nāhaṃ bhikkhave, aññaṃ ekapuggalampi samanupassāmi yo evaṃ tathāgatena anuttaraṃ dhammacakkaṃ pavattitaṃ sammadeva anuppavatteti yathayidaṃ, bhikkhave, sāriputto. Sāriputto, bhikkhave, tathāgatena anuttaraṃ dhammacakkaṃ pavattitaṃ sammadeva anuppavattetī’’ti.
ஏகபுக்³க³லவக்³கோ³ தேரஸமோ.
Ekapuggalavaggo terasamo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 13. ஏகபுக்³க³லவக்³க³வண்ணனா • 13. Ekapuggalavaggavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 13. ஏகபுக்³க³லவக்³க³வண்ணனா • 13. Ekapuggalavaggavaṇṇanā
