| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
7. ஏகபுத்தகஸுத்தவண்ணனா
7. Ekaputtakasuttavaṇṇanā
17. ஸத்தமே ஏகபுத்தகோதி ஏகோ புத்தோ, ஸோ ச அனுகம்பிதப்³ப³ட்டே²ன ஏகபுத்தகோ, பியாயிதப்³ப³ட்டே²ன பியோ, மனஸ்ஸ வட்³ட⁴னட்டே²ன மனாபோ. ஸரீரஸோபா⁴ஸம்பத்தியா வா த³ஸ்ஸனீயட்டே²ன பியோ, ஸீலாசாரஸம்பத்தியா கல்யாணத⁴ம்மதாய மனாபோ. கலேதி ஸத்தே கே²பேதீதி காலோ, மரணங். தங் கதோ பத்தோதி காலங்கதோ, காலேன வா மச்சுனா கதோ நட்டோ² அத³ஸ்ஸனங் க³தோதி காலங்கதோ, மதோதி அத்தோ².
17. Sattame ekaputtakoti eko putto, so ca anukampitabbaṭṭhena ekaputtako, piyāyitabbaṭṭhena piyo, manassa vaḍḍhanaṭṭhena manāpo. Sarīrasobhāsampattiyā vā dassanīyaṭṭhena piyo, sīlācārasampattiyā kalyāṇadhammatāya manāpo. Kaleti satte khepetīti kālo, maraṇaṃ. Taṃ kato pattoti kālaṅkato, kālena vā maccunā kato naṭṭho adassanaṃ gatoti kālaṅkato, matoti attho.
ஸம்ப³ஹுலா உபாஸகாதி ஸாவத்தி²வாஸினோ ப³ஹூ உபாஸகா மதபுத்தஉபாஸகஸ்ஸ ஸஹஸோகீபா⁴வேன யாவ ஆளாஹனா பச்ச²தோ க³ந்த்வா மதஸரீரஸ்ஸ கத்தப்³ப³ங் காரெத்வா படினிவத்தா யதா²னிவத்தா²வ உத³கங் ஓதரித்வா ஸீஸங்ன்ஹாதா வத்தா²னி பீளெத்வா அனோதாபெத்வாவ ஏகங் நிவாஸெத்வா ஏகங் உத்தராஸங்க³ங் கத்வா உபாஸகங் புரதோ கத்வா ‘‘ஸோகவினோத³னங் த⁴ம்மங் ஸத்து² ஸந்திகே ஸொஸ்ஸாமா’’தி ப⁴க³வந்தங் உபஸங்கமிங்ஸு. தேன வுத்தங் ‘‘அல்லகேஸா’’திஆதி³.
Sambahulā upāsakāti sāvatthivāsino bahū upāsakā mataputtaupāsakassa sahasokībhāvena yāva āḷāhanā pacchato gantvā matasarīrassa kattabbaṃ kāretvā paṭinivattā yathānivatthāva udakaṃ otaritvā sīsaṃnhātā vatthāni pīḷetvā anotāpetvāva ekaṃ nivāsetvā ekaṃ uttarāsaṅgaṃ katvā upāsakaṃ purato katvā ‘‘sokavinodanaṃ dhammaṃ satthu santike sossāmā’’ti bhagavantaṃ upasaṅkamiṃsu. Tena vuttaṃ ‘‘allakesā’’tiādi.
தத்த² அல்லவத்தா²தி உத³கேன திந்தவத்தா². தி³வா தி³வஸ்ஸாதி தி³வஸஸ்ஸபி தி³வா, மஜ்ஜ²ன்ஹிகே காலேதி அத்தோ². யஸ்மா ஜானந்தாபி ததா²க³தா புச்ச²ந்தி , ஜானந்தாபி ந புச்ச²ந்தி. காலங் விதி³த்வா புச்ச²ந்தி, காலங் விதி³த்வா ந புச்ச²ந்தி, தஸ்மா ஜானந்தோயேவ ப⁴க³வா கதா²ஸமுட்டா²பனத்த²ங் புச்ச²ந்தோ ‘‘கிங் நு கோ² தும்ஹே உபாஸகா’’திஆதி³மாஹ. தஸ்ஸத்தோ² – தும்ஹே உபாஸகா அஞ்ஞேஸு தி³வஸேஸு மம ஸந்திகங் ஆக³ச்ச²ந்தா ஓதாபிதஸுத்³த⁴வத்தா² ஸாயன்ஹே ஆக³ச்ச²த², அஜ்ஜ பன அல்லவத்தா² அல்லகேஸா டி²தமஜ்ஜ²ன்ஹிகே காலே இதா⁴க³தா, தங் கிங் காரணந்தி. தேன மயந்தி தேன புத்தவியோக³ஜனிதசித்தஸந்தாபேன ப³லவஸோகாபி⁴பூ⁴ததாய ஏவங்பூ⁴தா மயங் இதூ⁴பஸங்கமந்தாதி.
Tattha allavatthāti udakena tintavatthā. Divā divassāti divasassapi divā, majjhanhike kāleti attho. Yasmā jānantāpi tathāgatā pucchanti , jānantāpi na pucchanti. Kālaṃ viditvā pucchanti, kālaṃ viditvā na pucchanti, tasmā jānantoyeva bhagavā kathāsamuṭṭhāpanatthaṃ pucchanto ‘‘kiṃ nu kho tumhe upāsakā’’tiādimāha. Tassattho – tumhe upāsakā aññesu divasesu mama santikaṃ āgacchantā otāpitasuddhavatthā sāyanhe āgacchatha, ajja pana allavatthā allakesā ṭhitamajjhanhike kāle idhāgatā, taṃ kiṃ kāraṇanti. Tena mayanti tena puttaviyogajanitacittasantāpena balavasokābhibhūtatāya evaṃbhūtā mayaṃ idhūpasaṅkamantāti.
ஏதமத்த²ங் விதி³த்வாதி பியவத்து²ஸம்ப⁴வா ஸோகது³க்க²தோ³மனஸ்ஸாத³யோ, அஸதி பியவத்து²ஸ்மிங் ஸப்³ப³ஸோ ஏதே ந ஸந்தீதி ஏதமத்த²ங் ஸப்³பா³காரதோ ஜானித்வா தத³த்த²ப்பகாஸனங் இமங் உதா³னங் உதா³னேஸி.
Etamatthaṃ viditvāti piyavatthusambhavā sokadukkhadomanassādayo, asati piyavatthusmiṃ sabbaso ete na santīti etamatthaṃ sabbākārato jānitvā tadatthappakāsanaṃ imaṃ udānaṃ udānesi.
தத்த² பியரூபஸ்ஸாத³க³தி⁴தாஸேதி பியஸபா⁴வேஸு ரூபக்க²ந்தா⁴தீ³ஸு ஸுக²வேத³னஸ்ஸாதே³ன க³தி⁴தா படிப³த்³த⁴சித்தா. க³தி⁴தாஸேதி ஹி க³தி⁴தாஇச்சேவத்தோ². ஸேதி வா நிபாதமத்தங். பியரூபா நாம சக்கா²த³யோ புத்ததா³ராத³யோ ச. வுத்தஞ்ஹேதங் – ‘‘கிஞ்ச லோகே பியரூபங் ஸாதரூபங் சக்கு² லோகே …பே॰… த⁴ம்மதண்ஹா லோகே பியரூபங் ஸாதரூப’’ந்தி (சூளனி॰ ஹேமகமாணவபுச்சா²னித்³தே³ஸ 55).
Tattha piyarūpassādagadhitāseti piyasabhāvesu rūpakkhandhādīsu sukhavedanassādena gadhitā paṭibaddhacittā. Gadhitāseti hi gadhitāiccevattho. Seti vā nipātamattaṃ. Piyarūpā nāma cakkhādayo puttadārādayo ca. Vuttañhetaṃ – ‘‘kiñca loke piyarūpaṃ sātarūpaṃ cakkhu loke …pe… dhammataṇhā loke piyarūpaṃ sātarūpa’’nti (cūḷani. hemakamāṇavapucchāniddesa 55).
‘‘கெ²த்தங் வத்து²ங் ஹிரஞ்ஞங் வா, க³வஸ்ஸங் தா³ஸபோரிஸங்;
‘‘Khettaṃ vatthuṃ hiraññaṃ vā, gavassaṃ dāsaporisaṃ;
தி²யோ ப³ந்தூ⁴ புது² காமே, யோ நரோ அனுகி³ஜ்ஜ²தீ’’தி ச. (ஸு॰ நி॰ 775);
Thiyo bandhū puthu kāme, yo naro anugijjhatī’’ti ca. (su. ni. 775);
தஸ்மா தேஸு பியரூபேஸு அஸ்ஸாதே³ன கி³த்³தா⁴ முச்சி²தா அஜ்ஜா²பன்னாதி அத்தோ². கே பன தே பியரூபஸ்ஸாத³க³தி⁴தாதி தே த³ஸ்ஸேதி ‘‘தே³வகாயா புது²மனுஸ்ஸா சா’’தி, சாதுமஹாராஜிகாத³யோ ப³ஹுதே³வஸமூஹா சேவ ஜம்பு³தீ³பகாதி³கா ப³ஹுமனுஸ்ஸா ச. அகா⁴வினோதி காயிகசேதஸிகது³க்கே²ன து³க்கி²தா. பரிஜுன்னாதி ஜராரோகா³தி³விபத்தியா யொப்³ப³னாரொக்³யாதி³ஸம்பத்திதோ பரிஹீனா. யதா²லாப⁴வஸேன வாயமத்தோ² தே³வமனுஸ்ஸேஸு வேதி³தப்³போ³. அத² வா காமஞ்சேகந்தஸுக²ஸமப்பிதானங் தே³வானங் து³க்க²ஜராரோகா³ ந ஸம்ப⁴வந்தி, தத³னதிவத்தஸபா⁴வதாய பன தேபி ‘‘அகா⁴வினோ’’தி ‘‘பரிஜுன்னா’’தி ச வுத்தா. தேஸம்பி வா புப்³ப³னிமித்துப்பத்தியா படிச்ச²ன்னஜராய சேதஸிகரோக³ஸ்ஸ ச வஸேன து³க்கா²தீ³னங் ஸம்ப⁴வோ வேதி³தப்³போ³. மச்சுராஜஸ்ஸ வஸங் க³ச்ச²ந்தீதி பியவத்து²விஸயாய தண்ஹாய அப்பஹீனத்தா புனப்புனங் க³ப்³பூ⁴பக³மனதோ தா⁴துத்தயிஸ்ஸரதாய மச்சுராஜஸங்கா²தஸ்ஸ மரணஸ்ஸ வஸங் ஹத்த²மேவ க³ச்ச²ந்தி.
Tasmā tesu piyarūpesu assādena giddhā mucchitā ajjhāpannāti attho. Ke pana te piyarūpassādagadhitāti te dasseti ‘‘devakāyāputhumanussā cā’’ti, cātumahārājikādayo bahudevasamūhā ceva jambudīpakādikā bahumanussā ca. Aghāvinoti kāyikacetasikadukkhena dukkhitā. Parijunnāti jarārogādivipattiyā yobbanārogyādisampattito parihīnā. Yathālābhavasena vāyamattho devamanussesu veditabbo. Atha vā kāmañcekantasukhasamappitānaṃ devānaṃ dukkhajarārogā na sambhavanti, tadanativattasabhāvatāya pana tepi ‘‘aghāvino’’ti ‘‘parijunnā’’ti ca vuttā. Tesampi vā pubbanimittuppattiyā paṭicchannajarāya cetasikarogassa ca vasena dukkhādīnaṃ sambhavo veditabbo. Maccurājassa vasaṃ gacchantīti piyavatthuvisayāya taṇhāya appahīnattā punappunaṃ gabbhūpagamanato dhātuttayissaratāya maccurājasaṅkhātassa maraṇassa vasaṃ hatthameva gacchanti.
எத்தாவதா வட்டங் த³ஸ்ஸெத்வா இதா³னி ‘‘யே வே தி³வா’’திஆதி³னா விவட்டங் த³ஸ்ஸேதி. தத்த² யே வே தி³வா ச ரத்தோ ச அப்பமத்தாதி ‘‘தி³வஸங் சங்கமேன நிஸஜ்ஜாய ஆவரணீயேஹி த⁴ம்மேஹி சித்தங் பரிஸோதே⁴தீ’’திஆதி³னா வுத்தனயேன தி³வஸபா⁴கே³ ரத்திபா⁴கே³ ச த³ள்ஹங் அப்பமத்தா அப்பமாத³ப்படிபத³ங் பூரெந்தி. ஜஹந்தி பியரூபந்தி சதுஸச்சகம்மட்டா²னபா⁴வனங் உஸ்ஸுக்காபெத்வா அரியமக்³கா³தி⁴க³மேன பியரூபங் பியஜாதிகங் சக்கா²தி³பியவத்து²ங் தப்படிப³த்³த⁴ச²ந்த³ராக³ஜஹனேன ஜஹந்தி. தே வே க²ணந்தி அக⁴மூலங், மச்சுனோ ஆமிஸங் து³ரதிவத்தந்தி தே அரியபுக்³க³லா அக⁴ஸ்ஸ வட்டது³க்க²ஸ்ஸ மூலபூ⁴தங், மச்சுனா மரணேன ஆமஸிதப்³ப³தோ ஆமிஸங், இதோ ப³ஹித்³தா⁴ கேஹிசிபி ஸமணப்³ராஹ்மணேஹி நிவத்திதுங் அஸக்குணெய்யதாய து³ரதிவத்தங், ஸஹ அவிஜ்ஜாய தண்ஹங் அரியமக்³க³ஞாணகுதா³லேன க²ணந்தி, லேஸமத்தம்பி அனவஸேஸந்தா உம்மூலயந்தீதி. ஸ்வாயமத்தோ² –
Ettāvatā vaṭṭaṃ dassetvā idāni ‘‘ye ve divā’’tiādinā vivaṭṭaṃ dasseti. Tattha ye ve divā ca ratto ca appamattāti ‘‘divasaṃ caṅkamena nisajjāya āvaraṇīyehi dhammehi cittaṃ parisodhetī’’tiādinā vuttanayena divasabhāge rattibhāge ca daḷhaṃ appamattā appamādappaṭipadaṃ pūrenti. Jahanti piyarūpanti catusaccakammaṭṭhānabhāvanaṃ ussukkāpetvā ariyamaggādhigamena piyarūpaṃ piyajātikaṃ cakkhādipiyavatthuṃ tappaṭibaddhachandarāgajahanena jahanti. Te ve khaṇanti aghamūlaṃ, maccuno āmisaṃ durativattanti te ariyapuggalā aghassa vaṭṭadukkhassa mūlabhūtaṃ, maccunā maraṇena āmasitabbato āmisaṃ, ito bahiddhā kehicipi samaṇabrāhmaṇehi nivattituṃ asakkuṇeyyatāya durativattaṃ, saha avijjāya taṇhaṃ ariyamaggañāṇakudālena khaṇanti, lesamattampi anavasesantā ummūlayantīti. Svāyamattho –
‘‘அப்பமாதோ³ அமதபத³ங், பமாதோ³ மச்சுனோ பத³ங்;
‘‘Appamādo amatapadaṃ, pamādo maccuno padaṃ;
அப்பமத்தா ந மீயந்தி, யே பமத்தா யதா² மதா’’தி. (த⁴॰ ப॰ 21) –
Appamattā na mīyanti, ye pamattā yathā matā’’ti. (dha. pa. 21) –
ஆதீ³ஹி ஸுத்தபதே³ஹி வித்தா²ரேதப்³போ³தி.
Ādīhi suttapadehi vitthāretabboti.
ஸத்தமஸுத்தவண்ணனா நிட்டி²தா.
Sattamasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 7. ஏகபுத்தகஸுத்தங் • 7. Ekaputtakasuttaṃ
