| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. ஏணிஜங்க⁴ஸுத்தவண்ணனா
10. Eṇijaṅghasuttavaṇṇanā
30. ஏணிமிக³ஸ்ஸ வியாதி ஏணிமிக³ஸ்ஸ ஜங்கா⁴ விய. அவயவீஸம்ப³ந்தே⁴ ஹி இத³ங் ஸாமிவசனங். பிண்டி³மங்ஸஸ்ஸ பரிதோ ஸமஸண்டி²தத்தா ஸுவட்டீதஜங்கோ⁴. கிஸந்தி தூ²லபா⁴வபடிக்கே²பபராஜோதனா, ந ஸுட்டு² கிஸபா⁴வதீ³பனபராதி ஆஹ ‘‘அதூ²லங் ஸமஸரீர’’ந்தி. ஆதபேன மிலாதந்தி தபஸா மிலாதகாயங் இந்த்³ரியஸந்தாபனபா⁴வதோ. தேனேவாஹ – ‘‘தபோ மிலாத’’ந்திஆதி³, ததா² சாஹ பாளியங் ‘‘அப்பாஹாரங் அலோலுப’’ந்தி. யதா² ‘‘வீரஸ்ஸ பா⁴வோ வீரிய’’ந்தி வீரபா⁴வேன வீரியங் லக்கீ²யதி, ஏவங் வீரியஸம்ப⁴வேன வீரபா⁴வோதி ஆஹ ‘‘வீரந்தி வீரியவந்த’’ந்தி. ‘‘சத்தாரோ பஞ்ச ஆலோபே, அபு⁴த்வா உத³கங் பிவே’’தி (தே²ரகா³॰ 983; மி॰ ப॰ 6.5.10) த⁴ம்மஸேனாபதிவுத்தனியாமேன பரிமிதபோ⁴ஜிதாய அப்பாஹாரதா போ⁴ஜனே மத்தஞ்ஞுதா. ‘‘மிதாஹார’’ந்தி வத்வா புன பரிச்சி²ன்னகாலபோ⁴ஜிதாயபி அப்பாஹாரதங் த³ஸ்ஸெந்தோ ‘‘விகால…பே॰… பரித்தாஹார’’ந்தி ஆஹ. சதூஸு பச்சயேஸு லோலுப்பவிரஹிதங் போ³தி⁴மூலே ஏவ ஸப்³ப³ஸோ லோலுப்பஸ்ஸ பஹீனத்தா. ‘‘சதூஸு பச்சயேஸூ’’தி ஹி இமினாவ ஸப்³ப³த்த² லோலுப்பவிக³மோ தீ³பிதோவாதி. ரஸதண்ஹாபடிக்கே²போ வா ஏஸ ‘‘அப்பாஹார’’ந்தி வத்வா ‘‘அலோலுப’’ந்தி வுத்தத்தா. ‘‘ஸீஹங் வா’’தி எத்த² ஏகசரஸத்³தோ³ விய இவ-ஸத்³தோ³ அத்த²தோ ‘‘நாக³’’ந்தி எத்தா²பி ஆனெத்வா, ஸம்ப³ந்தி⁴தப்³போ³தி ஆஹ – ‘‘ஏகசரங் ஸீஹங் விய, ஏகசரங் நாக³ங் வியா’’தி. ஏகசரா அப்பமத்தா ஏகீகதாய.
30.Eṇimigassa viyāti eṇimigassa jaṅghā viya. Avayavīsambandhe hi idaṃ sāmivacanaṃ. Piṇḍimaṃsassa parito samasaṇṭhitattā suvaṭṭītajaṅgho. Kisanti thūlabhāvapaṭikkhepaparājotanā, na suṭṭhu kisabhāvadīpanaparāti āha ‘‘athūlaṃ samasarīra’’nti. Ātapena milātanti tapasā milātakāyaṃ indriyasantāpanabhāvato. Tenevāha – ‘‘tapo milāta’’ntiādi, tathā cāha pāḷiyaṃ ‘‘appāhāraṃ alolupa’’nti. Yathā ‘‘vīrassa bhāvo vīriya’’nti vīrabhāvena vīriyaṃ lakkhīyati, evaṃ vīriyasambhavena vīrabhāvoti āha ‘‘vīranti vīriyavanta’’nti. ‘‘Cattāro pañca ālope, abhutvā udakaṃ pive’’ti (theragā. 983; mi. pa. 6.5.10) dhammasenāpativuttaniyāmena parimitabhojitāya appāhāratā bhojane mattaññutā. ‘‘Mitāhāra’’nti vatvā puna paricchinnakālabhojitāyapi appāhārataṃ dassento ‘‘vikāla…pe… parittāhāra’’nti āha. Catūsu paccayesu loluppavirahitaṃ bodhimūle eva sabbaso loluppassa pahīnattā. ‘‘Catūsu paccayesū’’ti hi imināva sabbattha loluppavigamo dīpitovāti. Rasataṇhāpaṭikkhepo vā esa ‘‘appāhāra’’nti vatvā ‘‘alolupa’’nti vuttattā. ‘‘Sīhaṃ vā’’ti ettha ekacarasaddo viya iva-saddo atthato ‘‘nāga’’nti etthāpi ānetvā, sambandhitabboti āha – ‘‘ekacaraṃ sīhaṃ viya, ekacaraṃ nāgaṃ viyā’’ti. Ekacarā appamattā ekīkatāya.
பஞ்சகாமகு³ணவஸேன ரூபங் க³ஹிதங் தேஸங் ரூபஸபா⁴வத்தா. மனேன நாமங் க³ஹிதங் மனஸ்ஸ நாமஸபா⁴வத்தா. அவினிபு⁴த்தத⁴ம்மேதி அவினாபா⁴வத⁴ம்மே க³ஹெத்வா. ஆதி³-ஸத்³தே³ன ஆயதனதா⁴துஆத³யோ க³ஹிதா. காமகு³ணக்³க³ஹணேன ஹெத்த² ரூபபா⁴வஸாமஞ்ஞேன பஞ்ச வத்தூ²னி க³ஹிதானேவ ஹொந்தி, மனோக³ஹணேன த⁴ம்மாயதனங், ஏவங் த்³வாத³ஸாயதனானி க³ஹிதானி ஹொந்தி. இமினா நயேன தா⁴துஆதீ³னம்பி க³ஹிததா யோஜேதப்³பா³. தேனாஹ ‘‘பஞ்சக்க²ந்தா⁴தி³வஸேனபெத்த² பு⁴ம்மங் யோஜேதப்³ப³’’ந்தி. எத்தா²தி பாளியங். காமவத்து² பு⁴ம்மங்.
Pañcakāmaguṇavasena rūpaṃ gahitaṃ tesaṃ rūpasabhāvattā. Manena nāmaṃ gahitaṃ manassa nāmasabhāvattā. Avinibhuttadhammeti avinābhāvadhamme gahetvā. Ādi-saddena āyatanadhātuādayo gahitā. Kāmaguṇaggahaṇena hettha rūpabhāvasāmaññena pañca vatthūni gahitāneva honti, manogahaṇena dhammāyatanaṃ, evaṃ dvādasāyatanāni gahitāni honti. Iminā nayena dhātuādīnampi gahitatā yojetabbā. Tenāha ‘‘pañcakkhandhādivasenapettha bhummaṃ yojetabba’’nti. Etthāti pāḷiyaṃ. Kāmavatthu bhummaṃ.
ஏணிஜங்க⁴ஸுத்தவண்ணனா நிட்டி²தா.
Eṇijaṅghasuttavaṇṇanā niṭṭhitā.
ஸத்திவக்³க³வண்ணனா நிட்டி²தா.
Sattivaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ஏணிஜங்க⁴ஸுத்தங் • 10. Eṇijaṅghasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. ஏணிஜங்க⁴ஸுத்தவண்ணனா • 10. Eṇijaṅghasuttavaṇṇanā
