| Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya |
6. ஏஸுகாரீஸுத்தங்
6. Esukārīsuttaṃ
436. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஏஸுகாரீ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஏஸுகாரீ ப்³ராஹ்மணோ ப⁴க³வந்தங் ஏதத³வோச – ‘‘ப்³ராஹ்மணா, போ⁴ கோ³தம, சதஸ்ஸோ பாரிசரியா பஞ்ஞபெந்தி – ப்³ராஹ்மணஸ்ஸ பாரிசரியங் பஞ்ஞபெந்தி, க²த்தியஸ்ஸ பாரிசரியங் பஞ்ஞபெந்தி, வெஸ்ஸஸ்ஸ பாரிசரியங் பஞ்ஞபெந்தி, ஸுத்³த³ஸ்ஸ பாரிசரியங் பஞ்ஞபெந்தி. தத்ரித³ங், போ⁴ கோ³தம, ப்³ராஹ்மணா ப்³ராஹ்மணஸ்ஸ பாரிசரியங் பஞ்ஞபெந்தி – ‘ப்³ராஹ்மணோ வா ப்³ராஹ்மணங் பரிசரெய்ய, க²த்தியோ வா ப்³ராஹ்மணங் பரிசரெய்ய, வெஸ்ஸோ வா ப்³ராஹ்மணங் பரிசரெய்ய, ஸுத்³தோ³ வா ப்³ராஹ்மணங் பரிசரெய்யா’தி. இத³ங் கோ², போ⁴ கோ³தம, ப்³ராஹ்மணா ப்³ராஹ்மணஸ்ஸ பாரிசரியங் பஞ்ஞபெந்தி. தத்ரித³ங், போ⁴ கோ³தம, ப்³ராஹ்மணா க²த்தியஸ்ஸ பாரிசரியங் பஞ்ஞபெந்தி – ‘க²த்தியோ வா க²த்தியங் பரிசரெய்ய, வெஸ்ஸோ வா க²த்தியங் பரிசரெய்ய, ஸுத்³தோ³ வா க²த்தியங் பரிசரெய்யா’தி. இத³ங் கோ², போ⁴ கோ³தம, ப்³ராஹ்மணா க²த்தியஸ்ஸ பாரிசரியங் பஞ்ஞபெந்தி. தத்ரித³ங், போ⁴ கோ³தம, ப்³ராஹ்மணா வெஸ்ஸஸ்ஸ பாரிசரியங் பஞ்ஞபெந்தி – ‘வெஸ்ஸோ வா வெஸ்ஸங் பரிசரெய்ய, ஸுத்³தோ³ வா வெஸ்ஸங் பரிசரெய்யா’தி. இத³ங் கோ², போ⁴ கோ³தம, ப்³ராஹ்மணா வெஸ்ஸஸ்ஸ பாரிசரியங் பஞ்ஞபெந்தி . தத்ரித³ங், போ⁴ கோ³தம, ப்³ராஹ்மணா ஸுத்³த³ஸ்ஸ பாரிசரியங் பஞ்ஞபெந்தி – ‘ஸுத்³தோ³வ ஸுத்³த³ங் பரிசரெய்ய. கோ பனஞ்ஞோ ஸுத்³த³ங் பரிசரிஸ்ஸதீ’தி? இத³ங் கோ², போ⁴ கோ³தம, ப்³ராஹ்மணா ஸுத்³த³ஸ்ஸ பாரிசரியங் பஞ்ஞபெந்தி. ப்³ராஹ்மணா, போ⁴ கோ³தம, இமா சதஸ்ஸோ பாரிசரியா பஞ்ஞபெந்தி. இத⁴ ப⁴வங் கோ³தமோ கிமாஹா’’தி?
436. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho esukārī brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho esukārī brāhmaṇo bhagavantaṃ etadavoca – ‘‘brāhmaṇā, bho gotama, catasso pāricariyā paññapenti – brāhmaṇassa pāricariyaṃ paññapenti, khattiyassa pāricariyaṃ paññapenti, vessassa pāricariyaṃ paññapenti, suddassa pāricariyaṃ paññapenti. Tatridaṃ, bho gotama, brāhmaṇā brāhmaṇassa pāricariyaṃ paññapenti – ‘brāhmaṇo vā brāhmaṇaṃ paricareyya, khattiyo vā brāhmaṇaṃ paricareyya, vesso vā brāhmaṇaṃ paricareyya, suddo vā brāhmaṇaṃ paricareyyā’ti. Idaṃ kho, bho gotama, brāhmaṇā brāhmaṇassa pāricariyaṃ paññapenti. Tatridaṃ, bho gotama, brāhmaṇā khattiyassa pāricariyaṃ paññapenti – ‘khattiyo vā khattiyaṃ paricareyya, vesso vā khattiyaṃ paricareyya, suddo vā khattiyaṃ paricareyyā’ti. Idaṃ kho, bho gotama, brāhmaṇā khattiyassa pāricariyaṃ paññapenti. Tatridaṃ, bho gotama, brāhmaṇā vessassa pāricariyaṃ paññapenti – ‘vesso vā vessaṃ paricareyya, suddo vā vessaṃ paricareyyā’ti. Idaṃ kho, bho gotama, brāhmaṇā vessassa pāricariyaṃ paññapenti . Tatridaṃ, bho gotama, brāhmaṇā suddassa pāricariyaṃ paññapenti – ‘suddova suddaṃ paricareyya. Ko panañño suddaṃ paricarissatī’ti? Idaṃ kho, bho gotama, brāhmaṇā suddassa pāricariyaṃ paññapenti. Brāhmaṇā, bho gotama, imā catasso pāricariyā paññapenti. Idha bhavaṃ gotamo kimāhā’’ti?
437. ‘‘கிங் பன, ப்³ராஹ்மண, ஸப்³போ³ லோகோ ப்³ராஹ்மணானங் ஏதத³ப்³ப⁴னுஜானாதி – ‘இமா சதஸ்ஸோ பாரிசரியா பஞ்ஞபெந்தூ’’’தி 1? ‘‘நோ ஹித³ங், போ⁴ கோ³தம’’. ‘‘ஸெய்யதா²பி, ப்³ராஹ்மண, புரிஸோ த³லித்³தோ³ 2 அஸ்ஸகோ அனாள்ஹியோ. தஸ்ஸ அகாமஸ்ஸ பி³லங் ஓலக்³கெ³ய்யுங் – ‘இத³ங் தே, அம்போ⁴ புரிஸ, மங்ஸங் கா²தி³தப்³ப³ங், மூலஞ்ச அனுப்பதா³தப்³ப³’ந்தி. ஏவமேவ கோ², ப்³ராஹ்மண, ப்³ராஹ்மணா அப்படிஞ்ஞாய தேஸங் ஸமணப்³ராஹ்மணானங், அத² ச பனிமா சதஸ்ஸோ பாரிசரியா பஞ்ஞபெந்தி. நாஹங், ப்³ராஹ்மண, ‘ஸப்³ப³ங் பரிசரிதப்³ப³’ந்தி வதா³மி; நாஹங், ப்³ராஹ்மண, ‘ஸப்³ப³ங் ந பரிசரிதப்³ப³’ந்தி வதா³மி. யங் ஹிஸ்ஸ, ப்³ராஹ்மண, பரிசரதோ பாரிசரியாஹேது பாபியோ அஸ்ஸ ந ஸெய்யோ, நாஹங் தங் ‘பரிசரிதப்³ப³’ந்தி வதா³மி; யஞ்ச க்²வாஸ்ஸ, ப்³ராஹ்மண, பரிசரதோ பாரிசரியாஹேது ஸெய்யோ அஸ்ஸ ந பாபியோ தமஹங் ‘பரிசரிதப்³ப³’ந்தி வதா³மி. க²த்தியங் சேபி, ப்³ராஹ்மண, ஏவங் புச்செ²ய்யுங் – ‘யங் வா தே பரிசரதோ பாரிசரியாஹேது பாபியோ அஸ்ஸ ந ஸெய்யோ, யங் வா தே பரிசரதோ பாரிசரியாஹேது ஸெய்யோ அஸ்ஸ ந பாபியோ; கமெத்த² பரிசரெய்யாஸீ’தி, க²த்தியோபி ஹி, ப்³ராஹ்மண , ஸம்மா ப்³யாகரமானோ ஏவங் ப்³யாகரெய்ய – ‘யஞ்ஹி மே பரிசரதோ பாரிசரியாஹேது பாபியோ அஸ்ஸ ந ஸெய்யோ, நாஹங் தங் பரிசரெய்யங்; யஞ்ச கோ² மே பரிசரதோ பாரிசரியாஹேது ஸெய்யோ அஸ்ஸ ந பாபியோ தமஹங் பரிசரெய்ய’ந்தி. ப்³ராஹ்மணங் சேபி, ப்³ராஹ்மண…பே॰… வெஸ்ஸங் சேபி, ப்³ராஹ்மண…பே॰… ஸுத்³த³ங் சேபி, ப்³ராஹ்மண, ஏவங் புச்செ²ய்யுங் – ‘யங் வா தே பரிசரதோ பாரிசரியாஹேது பாபியோ அஸ்ஸ ந ஸெய்யோ, யங் வா தே பரிசரதோ பாரிசரியாஹேது ஸெய்யோ அஸ்ஸ ந பாபியோ; கமெத்த² பரிசரெய்யாஸீ’தி, ஸுத்³தோ³பி ஹி, ப்³ராஹ்மண, ஸம்மா ப்³யாகரமானோ ஏவங் ப்³யாகரெய்ய – ‘யஞ்ஹி மே பரிசரதோ பாரிசரியாஹேது பாபியோ அஸ்ஸ ந ஸெய்யோ, நாஹங் தங் பரிசரெய்யங்; யஞ்ச கோ² மே பரிசரதோ பாரிசரியாஹேது ஸெய்யோ அஸ்ஸ ந பாபியோ தமஹங் பரிசரெய்ய’ந்தி. நாஹங், ப்³ராஹ்மண, ‘உச்சாகுலீனதா ஸெய்யங்ஸோ’தி வதா³மி, ந பனாஹங், ப்³ராஹ்மண, ‘உச்சாகுலீனதா பாபியங்ஸோ’தி வதா³மி; நாஹங், ப்³ராஹ்மண, ‘உளாரவண்ணதா ஸெய்யங்ஸோ’தி வதா³மி, ந பனாஹங், ப்³ராஹ்மண, ‘உளாரவண்ணதா பாபியங்ஸோ’தி வதா³மி; நாஹங், ப்³ராஹ்மண, ‘உளாரபோ⁴க³தா ஸெய்யங்ஸோ’தி வதா³மி, ந பனாஹங், ப்³ராஹ்மண, ‘உளாரபோ⁴க³தா பாபியங்ஸோ’தி வதா³மி.
437. ‘‘Kiṃ pana, brāhmaṇa, sabbo loko brāhmaṇānaṃ etadabbhanujānāti – ‘imā catasso pāricariyā paññapentū’’’ti 3? ‘‘No hidaṃ, bho gotama’’. ‘‘Seyyathāpi, brāhmaṇa, puriso daliddo 4 assako anāḷhiyo. Tassa akāmassa bilaṃ olaggeyyuṃ – ‘idaṃ te, ambho purisa, maṃsaṃ khāditabbaṃ, mūlañca anuppadātabba’nti. Evameva kho, brāhmaṇa, brāhmaṇā appaṭiññāya tesaṃ samaṇabrāhmaṇānaṃ, atha ca panimā catasso pāricariyā paññapenti. Nāhaṃ, brāhmaṇa, ‘sabbaṃ paricaritabba’nti vadāmi; nāhaṃ, brāhmaṇa, ‘sabbaṃ na paricaritabba’nti vadāmi. Yaṃ hissa, brāhmaṇa, paricarato pāricariyāhetu pāpiyo assa na seyyo, nāhaṃ taṃ ‘paricaritabba’nti vadāmi; yañca khvāssa, brāhmaṇa, paricarato pāricariyāhetu seyyo assa na pāpiyo tamahaṃ ‘paricaritabba’nti vadāmi. Khattiyaṃ cepi, brāhmaṇa, evaṃ puccheyyuṃ – ‘yaṃ vā te paricarato pāricariyāhetu pāpiyo assa na seyyo, yaṃ vā te paricarato pāricariyāhetu seyyo assa na pāpiyo; kamettha paricareyyāsī’ti, khattiyopi hi, brāhmaṇa , sammā byākaramāno evaṃ byākareyya – ‘yañhi me paricarato pāricariyāhetu pāpiyo assa na seyyo, nāhaṃ taṃ paricareyyaṃ; yañca kho me paricarato pāricariyāhetu seyyo assa na pāpiyo tamahaṃ paricareyya’nti. Brāhmaṇaṃ cepi, brāhmaṇa…pe… vessaṃ cepi, brāhmaṇa…pe… suddaṃ cepi, brāhmaṇa, evaṃ puccheyyuṃ – ‘yaṃ vā te paricarato pāricariyāhetu pāpiyo assa na seyyo, yaṃ vā te paricarato pāricariyāhetu seyyo assa na pāpiyo; kamettha paricareyyāsī’ti, suddopi hi, brāhmaṇa, sammā byākaramāno evaṃ byākareyya – ‘yañhi me paricarato pāricariyāhetu pāpiyo assa na seyyo, nāhaṃ taṃ paricareyyaṃ; yañca kho me paricarato pāricariyāhetu seyyo assa na pāpiyo tamahaṃ paricareyya’nti. Nāhaṃ, brāhmaṇa, ‘uccākulīnatā seyyaṃso’ti vadāmi, na panāhaṃ, brāhmaṇa, ‘uccākulīnatā pāpiyaṃso’ti vadāmi; nāhaṃ, brāhmaṇa, ‘uḷāravaṇṇatā seyyaṃso’ti vadāmi, na panāhaṃ, brāhmaṇa, ‘uḷāravaṇṇatā pāpiyaṃso’ti vadāmi; nāhaṃ, brāhmaṇa, ‘uḷārabhogatā seyyaṃso’ti vadāmi, na panāhaṃ, brāhmaṇa, ‘uḷārabhogatā pāpiyaṃso’ti vadāmi.
438. ‘‘உச்சாகுலீனோபி ஹி, ப்³ராஹ்மண, இதே⁴கச்சோ பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, பிஸுணாவாசோ ஹோதி, ப²ருஸாவாசோ ஹோதி, ஸம்ப²ப்பலாபீ ஹோதி, அபி⁴ஜ்ஜா²லு ஹோதி , ப்³யாபன்னசித்தோ ஹோதி, மிச்சா²தி³ட்டி² ஹோதி. தஸ்மா ‘ந உச்சாகுலீனதா ஸெய்யங்ஸோ’தி வதா³மி. உச்சாகுலீனோபி ஹி, ப்³ராஹ்மண, இதே⁴கச்சோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, பிஸுணாய வாசாய படிவிரதோ ஹோதி, ப²ருஸாய வாசாய படிவிரதோ ஹோதி, ஸம்ப²ப்பலாபா படிவிரதோ ஹோதி, அனபி⁴ஜ்ஜா²லு ஹோதி, அப்³யாபன்னசித்தோ ஹோதி, ஸம்மாதி³ட்டி² ஹோதி. தஸ்மா ‘ந உச்சாகுலீனதா பாபியங்ஸோ’தி வதா³மி.
438. ‘‘Uccākulīnopi hi, brāhmaṇa, idhekacco pāṇātipātī hoti, adinnādāyī hoti, kāmesumicchācārī hoti, musāvādī hoti, pisuṇāvāco hoti, pharusāvāco hoti, samphappalāpī hoti, abhijjhālu hoti , byāpannacitto hoti, micchādiṭṭhi hoti. Tasmā ‘na uccākulīnatā seyyaṃso’ti vadāmi. Uccākulīnopi hi, brāhmaṇa, idhekacco pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhi hoti. Tasmā ‘na uccākulīnatā pāpiyaṃso’ti vadāmi.
439. ‘‘உளாரவண்ணோபி ஹி, ப்³ராஹ்மண…பே॰… உளாரபோ⁴கோ³பி ஹி, ப்³ராஹ்மண, இதே⁴கச்சோ பாணாதிபாதீ ஹோதி…பே॰… மிச்சா²தி³ட்டி² ஹோதி. தஸ்மா ‘ந உளாரபோ⁴க³தா ஸெய்யங்ஸோ’தி வதா³மி. உளாரபோ⁴கோ³பி ஹி, ப்³ராஹ்மண, இதே⁴கச்சோ பாணாதிபாதா படிவிரதோ ஹோதி…பே॰… ஸம்மாதி³ட்டி² ஹோதி. தஸ்மா ‘ந உளாரபோ⁴க³தா பாபியங்ஸோ’தி வதா³மி. நாஹங், ப்³ராஹ்மண, ‘ஸப்³ப³ங் பரிசரிதப்³ப³’ந்தி வதா³மி, ந பனாஹங், ப்³ராஹ்மண, ‘ஸப்³ப³ங் ந பரிசரிதப்³ப³’ந்தி வதா³மி. யங் ஹிஸ்ஸ, ப்³ராஹ்மண, பரிசரதோ பாரிசரியாஹேது ஸத்³தா⁴ வட்³ட⁴தி, ஸீலங் வட்³ட⁴தி, ஸுதங் வட்³ட⁴தி, சாகோ³ வட்³ட⁴தி, பஞ்ஞா வட்³ட⁴தி, தமஹங் ‘பரிசரிதப்³ப³’ந்தி (வதா³மி. யங் ஹிஸ்ஸ, ப்³ராஹ்மண, பரிசரதோ பாரிசரியாஹேது ந ஸத்³தா⁴ வட்³ட⁴தி, ந ஸீலங் வட்³ட⁴தி, ந ஸுதங் வட்³ட⁴தி, ந சாகோ³ வட்³ட⁴தி, ந பஞ்ஞா வட்³ட⁴தி, நாஹங் தங் ‘பரிசரிதப்³ப³’ந்தி) 5 வதா³மீ’’தி.
439. ‘‘Uḷāravaṇṇopi hi, brāhmaṇa…pe… uḷārabhogopi hi, brāhmaṇa, idhekacco pāṇātipātī hoti…pe… micchādiṭṭhi hoti. Tasmā ‘na uḷārabhogatā seyyaṃso’ti vadāmi. Uḷārabhogopi hi, brāhmaṇa, idhekacco pāṇātipātā paṭivirato hoti…pe… sammādiṭṭhi hoti. Tasmā ‘na uḷārabhogatā pāpiyaṃso’ti vadāmi. Nāhaṃ, brāhmaṇa, ‘sabbaṃ paricaritabba’nti vadāmi, na panāhaṃ, brāhmaṇa, ‘sabbaṃ na paricaritabba’nti vadāmi. Yaṃ hissa, brāhmaṇa, paricarato pāricariyāhetu saddhā vaḍḍhati, sīlaṃ vaḍḍhati, sutaṃ vaḍḍhati, cāgo vaḍḍhati, paññā vaḍḍhati, tamahaṃ ‘paricaritabba’nti (vadāmi. Yaṃ hissa, brāhmaṇa, paricarato pāricariyāhetu na saddhā vaḍḍhati, na sīlaṃ vaḍḍhati, na sutaṃ vaḍḍhati, na cāgo vaḍḍhati, na paññā vaḍḍhati, nāhaṃ taṃ ‘paricaritabba’nti) 6 vadāmī’’ti.
440. ஏவங் வுத்தே, ஏஸுகாரீ ப்³ராஹ்மணோ ப⁴க³வந்தங் ஏதத³வோச – ‘‘ப்³ராஹ்மணா, போ⁴ கோ³தம, சத்தாரி த⁴னானி பஞ்ஞபெந்தி – ப்³ராஹ்மணஸ்ஸ ஸந்த⁴னங் பஞ்ஞபெந்தி, க²த்தியஸ்ஸ ஸந்த⁴னங் பஞ்ஞபெந்தி, வெஸ்ஸஸ்ஸ ஸந்த⁴னங் பஞ்ஞபெந்தி, ஸுத்³த³ஸ்ஸ ஸந்த⁴னங் பஞ்ஞபெந்தி. தத்ரித³ங், போ⁴ கோ³தம, ப்³ராஹ்மணா ப்³ராஹ்மணஸ்ஸ ஸந்த⁴னங் பஞ்ஞபெந்தி பி⁴க்கா²சரியங்; பி⁴க்கா²சரியஞ்ச பன ப்³ராஹ்மணோ ஸந்த⁴னங் அதிமஞ்ஞமானோ அகிச்சகாரீ ஹோதி கோ³போவ அதி³ன்னங் ஆதி³யமானோதி. இத³ங் கோ², போ⁴ கோ³தம, ப்³ராஹ்மணா ப்³ராஹ்மணஸ்ஸ ஸந்த⁴னங் பஞ்ஞபெந்தி. தத்ரித³ங், போ⁴ கோ³தம, ப்³ராஹ்மணா க²த்தியஸ்ஸ ஸந்த⁴னங் பஞ்ஞபெந்தி த⁴னுகலாபங்; த⁴னுகலாபஞ்ச பன க²த்தியோ ஸந்த⁴னங் அதிமஞ்ஞமானோ அகிச்சகாரீ ஹோதி கோ³போவ அதி³ன்னங் ஆதி³யமானோதி. இத³ங் கோ², போ⁴ கோ³தம, ப்³ராஹ்மணா க²த்தியஸ்ஸ ஸந்த⁴னங் பஞ்ஞபெந்தி. தத்ரித³ங், போ⁴ கோ³தம, ப்³ராஹ்மணா வெஸ்ஸஸ்ஸ ஸந்த⁴னங் பஞ்ஞபெந்தி கஸிகோ³ரக்க²ங்; கஸிகோ³ரக்க²ஞ்ச பன வெஸ்ஸோ ஸந்த⁴னங் அதிமஞ்ஞமானோ அகிச்சகாரீ ஹோதி கோ³போவ அதி³ன்னங் ஆதி³யமானோதி. இத³ங் கோ², போ⁴ கோ³தம, ப்³ராஹ்மணா வெஸ்ஸஸ்ஸ ஸந்த⁴னங் பஞ்ஞபெந்தி. தத்ரித³ங், போ⁴ கோ³தம, ப்³ராஹ்மணா ஸுத்³த³ஸ்ஸ ஸந்த⁴னங் பஞ்ஞபெந்தி அஸிதப்³யாப⁴ங்கி³ங்; அஸிதப்³யாப⁴ங்கி³ஞ்ச பன ஸுத்³தோ³ ஸந்த⁴னங் அதிமஞ்ஞமானோ அகிச்சகாரீ ஹோதி கோ³போவ அதி³ன்னங் ஆதி³யமானோதி. இத³ங் கோ², போ⁴ கோ³தம, ப்³ராஹ்மணா ஸுத்³த³ஸ்ஸ ஸந்த⁴னங் பஞ்ஞபெந்தி. ப்³ராஹ்மணா, போ⁴ கோ³தம, இமானி சத்தாரி த⁴னானி பஞ்ஞபெந்தி. இத⁴ ப⁴வங் கோ³தமோ கிமாஹா’’தி?
440. Evaṃ vutte, esukārī brāhmaṇo bhagavantaṃ etadavoca – ‘‘brāhmaṇā, bho gotama, cattāri dhanāni paññapenti – brāhmaṇassa sandhanaṃ paññapenti, khattiyassa sandhanaṃ paññapenti, vessassa sandhanaṃ paññapenti, suddassa sandhanaṃ paññapenti. Tatridaṃ, bho gotama, brāhmaṇā brāhmaṇassa sandhanaṃ paññapenti bhikkhācariyaṃ; bhikkhācariyañca pana brāhmaṇo sandhanaṃ atimaññamāno akiccakārī hoti gopova adinnaṃ ādiyamānoti. Idaṃ kho, bho gotama, brāhmaṇā brāhmaṇassa sandhanaṃ paññapenti. Tatridaṃ, bho gotama, brāhmaṇā khattiyassa sandhanaṃ paññapenti dhanukalāpaṃ; dhanukalāpañca pana khattiyo sandhanaṃ atimaññamāno akiccakārī hoti gopova adinnaṃ ādiyamānoti. Idaṃ kho, bho gotama, brāhmaṇā khattiyassa sandhanaṃ paññapenti. Tatridaṃ, bho gotama, brāhmaṇā vessassa sandhanaṃ paññapenti kasigorakkhaṃ; kasigorakkhañca pana vesso sandhanaṃ atimaññamāno akiccakārī hoti gopova adinnaṃ ādiyamānoti. Idaṃ kho, bho gotama, brāhmaṇā vessassa sandhanaṃ paññapenti. Tatridaṃ, bho gotama, brāhmaṇā suddassa sandhanaṃ paññapenti asitabyābhaṅgiṃ; asitabyābhaṅgiñca pana suddo sandhanaṃ atimaññamāno akiccakārī hoti gopova adinnaṃ ādiyamānoti. Idaṃ kho, bho gotama, brāhmaṇā suddassa sandhanaṃ paññapenti. Brāhmaṇā, bho gotama, imāni cattāri dhanāni paññapenti. Idha bhavaṃ gotamo kimāhā’’ti?
441. ‘‘கிங் பன, ப்³ராஹ்மண, ஸப்³போ³ லோகோ ப்³ராஹ்மணானங் ஏதத³ப்³ப⁴னுஜானாதி – ‘இமானி சத்தாரி த⁴னானி பஞ்ஞபெந்தூ’’’தி? ‘‘நோ ஹித³ங், போ⁴ கோ³தம’’. ‘‘ஸெய்யதா²பி, ப்³ராஹ்மண, புரிஸோ த³லித்³தோ³ அஸ்ஸகோ அனாள்ஹியோ. தஸ்ஸ அகாமஸ்ஸ பி³லங் ஓலக்³கெ³ய்யுங் – ‘இத³ங் தே, அம்போ⁴ புரிஸ, மங்ஸங் கா²தி³தப்³ப³ங், மூலஞ்ச அனுப்பதா³தப்³ப³’ந்தி. ஏவமேவ கோ², ப்³ராஹ்மண, ப்³ராஹ்மணா அப்படிஞ்ஞாய தேஸங் ஸமணப்³ராஹ்மணானங், அத² ச பனிமானி சத்தாரி த⁴னானி பஞ்ஞபெந்தி. அரியங் கோ² அஹங், ப்³ராஹ்மண, லோகுத்தரங் த⁴ம்மங் புரிஸஸ்ஸ ஸந்த⁴னங் பஞ்ஞபேமி. போராணங் கோ² பனஸ்ஸ மாதாபெத்திகங் குலவங்ஸங் அனுஸ்ஸரதோ யத்த² யத்தே²வ அத்தபா⁴வஸ்ஸ அபி⁴னிப்³ப³த்தி ஹோதி தேன தேனேவ ஸங்க்²யங் க³ச்ச²தி. க²த்தியகுலே சே அத்தபா⁴வஸ்ஸ அபி⁴னிப்³ப³த்தி ஹோதி ‘க²த்தியோ’த்வேவ ஸங்க்²யங் க³ச்ச²தி; ப்³ராஹ்மணகுலே சே அத்தபா⁴வஸ்ஸ அபி⁴னிப்³ப³த்தி ஹோதி ‘ப்³ராஹ்மணோ’த்வேவ ஸங்க்²யங் க³ச்ச²தி; வெஸ்ஸகுலே சே அத்தபா⁴வஸ்ஸ அபி⁴னிப்³ப³த்தி ஹோதி ‘வெஸ்ஸோ’த்வேவ ஸங்க்²யங் க³ச்ச²தி; ஸுத்³த³குலே சே அத்தபா⁴வஸ்ஸ அபி⁴னிப்³ப³த்தி ஹோதி ‘ஸுத்³தோ³’த்வேவ ஸங்க்²யங் க³ச்ச²தி. ஸெய்யதா²பி, ப்³ராஹ்மண, யங்யதே³வ பச்சயங் படிச்ச அக்³கி³ ஜலதி தேன தேனேவ ஸங்க்²யங் க³ச்ச²தி. கட்ட²ஞ்சே படிச்ச அக்³கி³ ஜலதி ‘கட்ட²க்³கி³’த்வேவ ஸங்க்²யங் க³ச்ச²தி; ஸகலிகஞ்சே படிச்ச அக்³கி³ ஜலதி ‘ஸகலிகக்³கி³’த்வேவ ஸங்க்²யங் க³ச்ச²தி; திணஞ்சே படிச்ச அக்³கி³ ஜலதி ‘திணக்³கி³’த்வேவ ஸங்க்²யங் க³ச்ச²தி; கோ³மயஞ்சே படிச்ச அக்³கி³ ஜலதி ‘கோ³மயக்³கி³’த்வேவ ஸங்க்²யங் க³ச்ச²தி. ஏவமேவ கோ² அஹங், ப்³ராஹ்மண, அரியங் லோகுத்தரங் த⁴ம்மங் புரிஸஸ்ஸ ஸந்த⁴னங் பஞ்ஞபேமி. போராணங் கோ² பனஸ்ஸ மாதாபெத்திகங் குலவங்ஸங் அனுஸ்ஸரதோ யத்த² யத்தே²வ அத்தபா⁴வஸ்ஸ அபி⁴னிப்³ப³த்தி ஹோதி தேன தேனேவ ஸங்க்²யங் க³ச்ச²தி.
441. ‘‘Kiṃ pana, brāhmaṇa, sabbo loko brāhmaṇānaṃ etadabbhanujānāti – ‘imāni cattāri dhanāni paññapentū’’’ti? ‘‘No hidaṃ, bho gotama’’. ‘‘Seyyathāpi, brāhmaṇa, puriso daliddo assako anāḷhiyo. Tassa akāmassa bilaṃ olaggeyyuṃ – ‘idaṃ te, ambho purisa, maṃsaṃ khāditabbaṃ, mūlañca anuppadātabba’nti. Evameva kho, brāhmaṇa, brāhmaṇā appaṭiññāya tesaṃ samaṇabrāhmaṇānaṃ, atha ca panimāni cattāri dhanāni paññapenti. Ariyaṃ kho ahaṃ, brāhmaṇa, lokuttaraṃ dhammaṃ purisassa sandhanaṃ paññapemi. Porāṇaṃ kho panassa mātāpettikaṃ kulavaṃsaṃ anussarato yattha yattheva attabhāvassa abhinibbatti hoti tena teneva saṅkhyaṃ gacchati. Khattiyakule ce attabhāvassa abhinibbatti hoti ‘khattiyo’tveva saṅkhyaṃ gacchati; brāhmaṇakule ce attabhāvassa abhinibbatti hoti ‘brāhmaṇo’tveva saṅkhyaṃ gacchati; vessakule ce attabhāvassa abhinibbatti hoti ‘vesso’tveva saṅkhyaṃ gacchati; suddakule ce attabhāvassa abhinibbatti hoti ‘suddo’tveva saṅkhyaṃ gacchati. Seyyathāpi, brāhmaṇa, yaṃyadeva paccayaṃ paṭicca aggi jalati tena teneva saṅkhyaṃ gacchati. Kaṭṭhañce paṭicca aggi jalati ‘kaṭṭhaggi’tveva saṅkhyaṃ gacchati; sakalikañce paṭicca aggi jalati ‘sakalikaggi’tveva saṅkhyaṃ gacchati; tiṇañce paṭicca aggi jalati ‘tiṇaggi’tveva saṅkhyaṃ gacchati; gomayañce paṭicca aggi jalati ‘gomayaggi’tveva saṅkhyaṃ gacchati. Evameva kho ahaṃ, brāhmaṇa, ariyaṃ lokuttaraṃ dhammaṃ purisassa sandhanaṃ paññapemi. Porāṇaṃ kho panassa mātāpettikaṃ kulavaṃsaṃ anussarato yattha yattheva attabhāvassa abhinibbatti hoti tena teneva saṅkhyaṃ gacchati.
‘‘க²த்தியகுலே சே அத்தபா⁴வஸ்ஸ அபி⁴னிப்³ப³த்தி ஹோதி ‘க²த்தியோ’த்வேவ ஸங்க்²யங் க³ச்ச²தி; ப்³ராஹ்மணகுலே சே அத்தபா⁴வஸ்ஸ அபி⁴னிப்³ப³த்தி ஹோதி ‘ப்³ராஹ்மணோ’த்வேவ ஸங்க்²யங் க³ச்ச²தி; வெஸ்ஸகுலே சே அத்தபா⁴வஸ்ஸ அபி⁴னிப்³ப³த்தி ஹோதி ‘வெஸ்ஸோ’த்வேவ ஸங்க்²யங் க³ச்ச²தி; ஸுத்³த³குலே சே அத்தபா⁴வஸ்ஸ அபி⁴னிப்³ப³த்தி ஹோதி ‘ஸுத்³தோ³’த்வேவ ஸங்க்²யங் க³ச்ச²தி.
‘‘Khattiyakule ce attabhāvassa abhinibbatti hoti ‘khattiyo’tveva saṅkhyaṃ gacchati; brāhmaṇakule ce attabhāvassa abhinibbatti hoti ‘brāhmaṇo’tveva saṅkhyaṃ gacchati; vessakule ce attabhāvassa abhinibbatti hoti ‘vesso’tveva saṅkhyaṃ gacchati; suddakule ce attabhāvassa abhinibbatti hoti ‘suddo’tveva saṅkhyaṃ gacchati.
‘‘க²த்தியகுலா சேபி, ப்³ராஹ்மண, அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங் த⁴ம்மவினயங் ஆக³ம்ம பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, அப்³ரஹ்மசரியா படிவிரதோ ஹோதி, முஸாவாதா³ படிவிரதோ ஹோதி, பிஸுணாய வாசாய படிவிரதோ ஹோதி, ப²ருஸாய வாசாய படிவிரதோ ஹோதி, ஸம்ப²ப்பலாபா படிவிரதோ ஹோதி, அனபி⁴ஜ்ஜா²லு ஹோதி, அப்³யாபன்னசித்தோ ஹோதி, ஸம்மாதி³ட்டி² ஹோதி, ஆராத⁴கோ ஹோதி ஞாயங் த⁴ம்மங் குஸலங்.
‘‘Khattiyakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti, adinnādānā paṭivirato hoti, abrahmacariyā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhi hoti, ārādhako hoti ñāyaṃ dhammaṃ kusalaṃ.
‘‘ப்³ராஹ்மணகுலா சேபி, ப்³ராஹ்மண, அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங் த⁴ம்மவினயங் ஆக³ம்ம பாணாதிபாதா படிவிரதோ ஹோதி…பே॰… ஸம்மாதி³ட்டி² ஹோதி, ஆராத⁴கோ ஹோதி ஞாயங் த⁴ம்மங் குஸலங்.
‘‘Brāhmaṇakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
‘‘வெஸ்ஸகுலா சேபி, ப்³ராஹ்மண, அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங் த⁴ம்மவினயங் ஆக³ம்ம பாணாதிபாதா படிவிரதோ ஹோதி…பே॰… ஸம்மாதி³ட்டி² ஹோதி, ஆராத⁴கோ ஹோதி ஞாயங் த⁴ம்மங் குஸலங்.
‘‘Vessakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
‘‘ஸுத்³த³குலா சேபி, ப்³ராஹ்மண, அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங் த⁴ம்மவினயங் ஆக³ம்ம பாணாதிபாதா படிவிரதோ ஹோதி…பே॰… ஸம்மாதி³ட்டி² ஹோதி, ஆராத⁴கோ ஹோதி ஞாயங் த⁴ம்மங் குஸலங்.
‘‘Suddakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
442. ‘‘தங் கிங் மஞ்ஞஸி, ப்³ராஹ்மண, ப்³ராஹ்மணோவ நு கோ² பஹோதி அஸ்மிங் பதே³ஸே அவேரங் அப்³யாப³ஜ்ஜ²ங் மெத்தசித்தங் பா⁴வேதுங், நோ க²த்தியோ நோ வெஸ்ஸோ நோ ஸுத்³தோ³’’தி? ‘‘நோ ஹித³ங், போ⁴ கோ³தம. க²த்தியோபி ஹி, போ⁴ கோ³தம, பஹோதி அஸ்மிங் பதே³ஸே அவேரங் அப்³யாப³ஜ்ஜ²ங் மெத்தசித்தங் பா⁴வேதுங்; ப்³ராஹ்மணோபி ஹி, போ⁴ கோ³தம… வெஸ்ஸோபி ஹி, போ⁴ கோ³தம… ஸுத்³தோ³பி ஹி, போ⁴ கோ³தம… ஸப்³பே³பி ஹி, போ⁴ கோ³தம, சத்தாரோ வண்ணா பஹொந்தி அஸ்மிங் பதே³ஸே அவேரங் அப்³யாப³ஜ்ஜ²ங் மெத்தசித்தங் பா⁴வேது’’ந்தி. ‘‘ஏவமேவ கோ², ப்³ராஹ்மண, க²த்தியகுலா சேபி அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங் த⁴ம்மவினயங் ஆக³ம்ம பாணாதிபாதா படிவிரதோ ஹோதி…பே॰… ஸம்மாதி³ட்டி² ஹோதி, ஆராத⁴கோ ஹோதி ஞாயங் த⁴ம்மங் குஸலங்.
442. ‘‘Taṃ kiṃ maññasi, brāhmaṇa, brāhmaṇova nu kho pahoti asmiṃ padese averaṃ abyābajjhaṃ mettacittaṃ bhāvetuṃ, no khattiyo no vesso no suddo’’ti? ‘‘No hidaṃ, bho gotama. Khattiyopi hi, bho gotama, pahoti asmiṃ padese averaṃ abyābajjhaṃ mettacittaṃ bhāvetuṃ; brāhmaṇopi hi, bho gotama… vessopi hi, bho gotama… suddopi hi, bho gotama… sabbepi hi, bho gotama, cattāro vaṇṇā pahonti asmiṃ padese averaṃ abyābajjhaṃ mettacittaṃ bhāvetu’’nti. ‘‘Evameva kho, brāhmaṇa, khattiyakulā cepi agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
‘‘ப்³ராஹ்மணகுலா சேபி, ப்³ராஹ்மண… வெஸ்ஸகுலா சேபி, ப்³ராஹ்மண… ஸுத்³த³குலா சேபி, ப்³ராஹ்மண, அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங் த⁴ம்மவினயங் ஆக³ம்ம பாணாதிபாதா படிவிரதோ ஹோதி…பே॰… ஸம்மாதி³ட்டி² ஹோதி, ஆராத⁴கோ ஹோதி ஞாயங் த⁴ம்மங் குஸலங்.
‘‘Brāhmaṇakulā cepi, brāhmaṇa… vessakulā cepi, brāhmaṇa… suddakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
443. ‘‘தங் கிங் மஞ்ஞஸி, ப்³ராஹ்மண, ப்³ராஹ்மணோவ நு கோ² பஹோதி ஸொத்திஸினானிங் ஆதா³ய நதி³ங் க³ந்த்வா ரஜோஜல்லங் பவாஹேதுங், நோ க²த்தியோ நோ வெஸ்ஸோ நோ ஸுத்³தோ³’’தி? ‘‘நோ ஹித³ங், போ⁴ கோ³தம . க²த்தியோபி ஹி, போ⁴ கோ³தம, பஹோதி ஸொத்திஸினானிங் ஆதா³ய நதி³ங் க³ந்த்வா ரஜோஜல்லங் பவாஹேதுங்; ப்³ராஹ்மணோபி ஹி, போ⁴ கோ³தம… வெஸ்ஸோபி ஹி, போ⁴ கோ³தம … ஸுத்³தோ³பி ஹி, போ⁴ கோ³தம… ஸப்³பே³பி ஹி, போ⁴ கோ³தம, சத்தாரோ வண்ணா பஹொந்தி ஸொத்திஸினானிங் ஆதா³ய நதி³ங் க³ந்த்வா ரஜோஜல்லங் பவாஹேது’’ந்தி. ‘‘ஏவமேவ கோ², ப்³ராஹ்மண, க²த்தியகுலா சேபி அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங் த⁴ம்மவினயங் ஆக³ம்ம பாணாதிபாதா படிவிரதோ ஹோதி…பே॰… ஸம்மாதி³ட்டி² ஹோதி, ஆராத⁴கோ ஹோதி ஞாயங் த⁴ம்மங் குஸலங்.
443. ‘‘Taṃ kiṃ maññasi, brāhmaṇa, brāhmaṇova nu kho pahoti sottisināniṃ ādāya nadiṃ gantvā rajojallaṃ pavāhetuṃ, no khattiyo no vesso no suddo’’ti? ‘‘No hidaṃ, bho gotama . Khattiyopi hi, bho gotama, pahoti sottisināniṃ ādāya nadiṃ gantvā rajojallaṃ pavāhetuṃ; brāhmaṇopi hi, bho gotama… vessopi hi, bho gotama … suddopi hi, bho gotama… sabbepi hi, bho gotama, cattāro vaṇṇā pahonti sottisināniṃ ādāya nadiṃ gantvā rajojallaṃ pavāhetu’’nti. ‘‘Evameva kho, brāhmaṇa, khattiyakulā cepi agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
‘‘ப்³ராஹ்மணகுலா சேபி, ப்³ராஹ்மண… வெஸ்ஸகுலா சேபி, ப்³ராஹ்மண… ஸுத்³த³குலா சேபி , ப்³ராஹ்மண, அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங் த⁴ம்மவினயங் ஆக³ம்ம பாணாதிபாதா படிவிரதோ ஹோதி…பே॰… ஸம்மாதி³ட்டி² ஹோதி, ஆராத⁴கோ ஹோதி ஞாயங் த⁴ம்மங் குஸலங்.
‘‘Brāhmaṇakulā cepi, brāhmaṇa… vessakulā cepi, brāhmaṇa… suddakulā cepi , brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ.
444. ‘‘தங் கிங் மஞ்ஞஸி, ப்³ராஹ்மண, இத⁴ ராஜா க²த்தியோ முத்³தா⁴வஸித்தோ நானாஜச்சானங் புரிஸானங் புரிஸஸதங் ஸன்னிபாதெய்ய – ‘ஆயந்து பொ⁴ந்தோ யே தத்த² க²த்தியகுலா ப்³ராஹ்மணகுலா ராஜஞ்ஞகுலா உப்பன்னா ஸாகஸ்ஸ வா ஸாலஸ்ஸ வா ஸலளஸ்ஸ வா சந்த³னஸ்ஸ வா பது³மகஸ்ஸ வா உத்தராரணிங் ஆதா³ய அக்³கி³ங் அபி⁴னிப்³ப³த்தெந்து, தேஜோ பாதுகரொந்து; ஆயந்து பன பொ⁴ந்தோ யே தத்த² சண்டா³லகுலா நேஸாத³குலா வேனகுலா ரத²காரகுலா புக்குஸகுலா உப்பன்னா ஸாபானதோ³ணியா வா ஸூகரதோ³ணியா வா ரஜகதோ³ணியா வா ஏரண்ட³கட்ட²ஸ்ஸ வா உத்தராரணிங் ஆதா³ய அக்³கி³ங் அபி⁴னிப்³ப³த்தெந்து, தேஜோ பாதுகரொந்தூ’’’தி?
444. ‘‘Taṃ kiṃ maññasi, brāhmaṇa, idha rājā khattiyo muddhāvasitto nānājaccānaṃ purisānaṃ purisasataṃ sannipāteyya – ‘āyantu bhonto ye tattha khattiyakulā brāhmaṇakulā rājaññakulā uppannā sākassa vā sālassa vā salaḷassa vā candanassa vā padumakassa vā uttarāraṇiṃ ādāya aggiṃ abhinibbattentu, tejo pātukarontu; āyantu pana bhonto ye tattha caṇḍālakulā nesādakulā venakulā rathakārakulā pukkusakulā uppannā sāpānadoṇiyā vā sūkaradoṇiyā vā rajakadoṇiyā vā eraṇḍakaṭṭhassa vā uttarāraṇiṃ ādāya aggiṃ abhinibbattentu, tejo pātukarontū’’’ti?
‘‘தங் கிங் மஞ்ஞஸி, ப்³ராஹ்மண, யோ ஏவங் நு கோ² ஸோ க²த்தியகுலா ப்³ராஹ்மணகுலா ராஜஞ்ஞகுலா உப்பன்னேஹி ஸாகஸ்ஸ வா ஸாலஸ்ஸ வா ஸலளஸ்ஸ வா சந்த³னஸ்ஸ வா பது³மகஸ்ஸ வா உத்தராரணிங் ஆதா³ய அக்³கி³ அபி⁴னிப்³ப³த்தோ தேஜோ பாதுகதோ ஸோ ஏவ நு க்²வாஸ்ஸ அக்³கி³ அச்சிமா சேவ வண்ணவா ச பப⁴ஸ்ஸரோ ச தேன ச ஸக்கா அக்³கி³னா அக்³கி³கரணீயங் காதுங்; யோ பன ஸோ சண்டா³லகுலா நேஸாத³குலா வேனகுலா ரத²காரகுலா புக்குஸகுலா உப்பன்னேஹி ஸாபானதோ³ணியா வா ஸூகரதோ³ணியா வா ரஜகதோ³ணியா வா ஏரண்ட³கட்ட²ஸ்ஸ வா உத்தராரணிங் ஆதா³ய அக்³கி³ அபி⁴னிப்³ப³த்தோ தேஜோ பாதுகதோ ஸ்வாஸ்ஸ அக்³கி³ ந சேவ அச்சிமா ந ச வண்ணவா ந ச பப⁴ஸ்ஸரோ ந ச தேன ஸக்கா அக்³கி³னா அக்³கி³கரணீயங் காது’’ந்தி? ‘‘நோ ஹித³ங், போ⁴ கோ³தம. யோபி ஹி ஸோ, போ⁴ கோ³தம, க²த்தியகுலா ப்³ராஹ்மணகுலா ராஜஞ்ஞகுலா உப்பன்னேஹி ஸாகஸ்ஸ வா ஸாலஸ்ஸ வா ஸலளஸ்ஸ வா சந்த³னஸ்ஸ வா பது³மகஸ்ஸ வா உத்தராரணிங் ஆதா³ய அக்³கி³ அபி⁴னிப்³ப³த்தோ தேஜோ பாதுகதோ ஸ்வாஸ்ஸ அக்³கி³ அச்சிமா சேவ வண்ணவா ச பப⁴ஸ்ஸரோ ச தேன ச ஸக்கா அக்³கி³னா அக்³கி³கரணீயங் காதுங்; யோபி ஸோ சண்டா³லகுலா நேஸாத³குலா வேனகுலா ரத²காரகுலா புக்குஸகுலா உப்பன்னேஹி ஸாபானதோ³ணியா வா ஸூகரதோ³ணியா வா ரஜகதோ³ணியா வா ஏரண்ட³கட்ட²ஸ்ஸ வா உத்தராரணிங் ஆதா³ய அக்³கி³ அபி⁴னிப்³ப³த்தோ தேஜோ பாதுகதோ ஸ்வாஸ்ஸ அக்³கி³ அச்சிமா சேவ வண்ணவா ச பப⁴ஸ்ஸரோ ச தேன ச ஸக்கா அக்³கி³னா அக்³கி³கரணீயங் காதுங். ஸப்³போ³பி ஹி, போ⁴ கோ³தம, அக்³கி³ அச்சிமா சேவ வண்ணவா ச பப⁴ஸ்ஸரோ ச ஸப்³பே³னபி ஸக்கா அக்³கி³னா அக்³கி³கரணீயங் காது’’ந்தி.
‘‘Taṃ kiṃ maññasi, brāhmaṇa, yo evaṃ nu kho so khattiyakulā brāhmaṇakulā rājaññakulā uppannehi sākassa vā sālassa vā salaḷassa vā candanassa vā padumakassa vā uttarāraṇiṃ ādāya aggi abhinibbatto tejo pātukato so eva nu khvāssa aggi accimā ceva vaṇṇavā ca pabhassaro ca tena ca sakkā agginā aggikaraṇīyaṃ kātuṃ; yo pana so caṇḍālakulā nesādakulā venakulā rathakārakulā pukkusakulā uppannehi sāpānadoṇiyā vā sūkaradoṇiyā vā rajakadoṇiyā vā eraṇḍakaṭṭhassa vā uttarāraṇiṃ ādāya aggi abhinibbatto tejo pātukato svāssa aggi na ceva accimā na ca vaṇṇavā na ca pabhassaro na ca tena sakkā agginā aggikaraṇīyaṃ kātu’’nti? ‘‘No hidaṃ, bho gotama. Yopi hi so, bho gotama, khattiyakulā brāhmaṇakulā rājaññakulā uppannehi sākassa vā sālassa vā salaḷassa vā candanassa vā padumakassa vā uttarāraṇiṃ ādāya aggi abhinibbatto tejo pātukato svāssa aggi accimā ceva vaṇṇavā ca pabhassaro ca tena ca sakkā agginā aggikaraṇīyaṃ kātuṃ; yopi so caṇḍālakulā nesādakulā venakulā rathakārakulā pukkusakulā uppannehi sāpānadoṇiyā vā sūkaradoṇiyā vā rajakadoṇiyā vā eraṇḍakaṭṭhassa vā uttarāraṇiṃ ādāya aggi abhinibbatto tejo pātukato svāssa aggi accimā ceva vaṇṇavā ca pabhassaro ca tena ca sakkā agginā aggikaraṇīyaṃ kātuṃ. Sabbopi hi, bho gotama, aggi accimā ceva vaṇṇavā ca pabhassaro ca sabbenapi sakkā agginā aggikaraṇīyaṃ kātu’’nti.
‘‘ஏவமேவ கோ², ப்³ராஹ்மண, க²த்தியகுலா சேபி அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங் த⁴ம்மவினயங் ஆக³ம்ம பாணாதிபாதா படிவிரதோ ஹோதி…பே॰… ஸம்மாதி³ட்டி² ஹோதி, ஆராத⁴கோ ஹோதி ஞாயங் த⁴ம்மங் குஸலங். ப்³ராஹ்மணகுலா சேபி, ப்³ராஹ்மண… வெஸ்ஸகுலா சேபி, ப்³ராஹ்மண… ஸுத்³த³குலா சேபி, ப்³ராஹ்மண, அகா³ரஸ்மா அனகா³ரியங் பப்³ப³ஜிதோ ஹோதி, ஸோ ச ததா²க³தப்பவேதி³தங் த⁴ம்மவினயங் ஆக³ம்ம பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, அப்³ரஹ்மசரியா படிவிரதோ ஹோதி, முஸாவாதா³ படிவிரதோ ஹோதி, பிஸுணாய வாசாய படிவிரதோ ஹோதி, ப²ருஸாய வாசாய படிவிரதோ ஹோதி, ஸம்ப²ப்பலாபா படிவிரதோ ஹோதி, அனபி⁴ஜ்ஜா²லு ஹோதி, அப்³யாபன்னசித்தோ ஹோதி, ஸம்மாதி³ட்டி² ஹோதி, ஆராத⁴கோ ஹோதி ஞாயங் த⁴ம்மங் குஸல’’ந்தி.
‘‘Evameva kho, brāhmaṇa, khattiyakulā cepi agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti…pe… sammādiṭṭhi hoti, ārādhako hoti ñāyaṃ dhammaṃ kusalaṃ. Brāhmaṇakulā cepi, brāhmaṇa… vessakulā cepi, brāhmaṇa… suddakulā cepi, brāhmaṇa, agārasmā anagāriyaṃ pabbajito hoti, so ca tathāgatappaveditaṃ dhammavinayaṃ āgamma pāṇātipātā paṭivirato hoti, adinnādānā paṭivirato hoti, abrahmacariyā paṭivirato hoti, musāvādā paṭivirato hoti, pisuṇāya vācāya paṭivirato hoti, pharusāya vācāya paṭivirato hoti, samphappalāpā paṭivirato hoti, anabhijjhālu hoti, abyāpannacitto hoti, sammādiṭṭhi hoti, ārādhako hoti ñāyaṃ dhammaṃ kusala’’nti.
ஏவங் வுத்தே, ஏஸுகாரீ ப்³ராஹ்மணோ ப⁴க³வந்தங் ஏதத³வோச – ‘‘அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தம…பே॰… உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி.
Evaṃ vutte, esukārī brāhmaṇo bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
ஏஸுகாரீஸுத்தங் நிட்டி²தங் ச²ட்ட²ங்.
Esukārīsuttaṃ niṭṭhitaṃ chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 6. ஏஸுகாரீஸுத்தவண்ணனா • 6. Esukārīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 6. ஏஸுகாரீஸுத்தவண்ணனா • 6. Esukārīsuttavaṇṇanā
