| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
6. ஏஸுகாரீஸுத்தவண்ணனா
6. Esukārīsuttavaṇṇanā
437. ஏவங் மே ஸுதந்தி ஏஸுகாரீஸுத்தங். தத்த² பி³லங் ஓலக்³கெ³ய்யுந்தி கொட்டா²ஸங் லக்³கா³பெய்யுங், இமினா ஸத்த²த⁴ம்மங் நாம த³ஸ்ஸேதி. ஸத்த²வாஹோ கிர மஹாகந்தாரபடிபன்னோ அந்தராமக்³கே³ கோ³ணே மதே மங்ஸங் க³ஹெத்வா ஸப்³பே³ஸங் ஸத்தி²கானங் ‘‘இத³ங் கா²தி³த்வா எத்தகங் மூலங் தா³தப்³ப³’’ந்தி கொட்டா²ஸங் ஓலக்³கே³தி, கோ³ணமங்ஸங் நாம கா²த³ந்தாபி அத்தி² அகா²த³ந்தாபி, மூலங் தா³துங் ஸக்கொந்தாபி அஸக்கொந்தாபி. ஸத்த²வாஹோ யேன மூலேன கோ³ணோ க³ஹிதோ, தஸ்ஸ நிக்க²மனத்த²ங் ஸப்³பே³ஸங் ப³லக்காரேன கொட்டா²ஸங் த³த்வா மூலங் க³ண்ஹாதி, அயங் ஸத்த²த⁴ம்மோ. ஏவமேவங் ப்³ராஹ்மணாபி லோகஸ்ஸ படிஞ்ஞங் அக்³க³ஹெத்வா அத்தனோவ த⁴ம்மதாய சதஸ்ஸோ பாரிசரியா பஞ்ஞபெந்தீதி த³ஸ்ஸேதுங் ஏவமேவ கோ²திஆதி³மாஹ. பாபியோ அஸ்ஸாதி பாபங் அஸ்ஸ. ஸெய்யோ அஸ்ஸாதி ஹிதங் அஸ்ஸ. அத² வா பாபியோதி பாபகோ லாமகோ அத்தபா⁴வோ அஸ்ஸ. ஸெய்யோதி ஸெட்டோ² உத்தமோ. ஸெய்யங்ஸோதி ஸெய்யோ. உச்சாகுலீனதாதி உச்சாகுலீனத்தேன ஸெய்யோ. பாபியங்ஸோதி பாபியோ. உச்சாகுலீனதா ச த்³வீஸு குலேஸு வட்³டே⁴தி க²த்தியகுலே ப்³ராஹ்மணகுலே ச, உளாரவண்ணதா தீஸு. வெஸ்ஸோபி ஹி உளாரவண்ணோ ஹோதி. உளாரபோ⁴க³தா சதூஸுபி. ஸுத்³தோ³பி ஹி அந்தமஸோ சண்டா³லோபி உளாரபோ⁴கோ³ ஹோதியேவ.
437.Evaṃme sutanti esukārīsuttaṃ. Tattha bilaṃ olaggeyyunti koṭṭhāsaṃ laggāpeyyuṃ, iminā satthadhammaṃ nāma dasseti. Satthavāho kira mahākantārapaṭipanno antarāmagge goṇe mate maṃsaṃ gahetvā sabbesaṃ satthikānaṃ ‘‘idaṃ khāditvā ettakaṃ mūlaṃ dātabba’’nti koṭṭhāsaṃ olaggeti, goṇamaṃsaṃ nāma khādantāpi atthi akhādantāpi, mūlaṃ dātuṃ sakkontāpi asakkontāpi. Satthavāho yena mūlena goṇo gahito, tassa nikkhamanatthaṃ sabbesaṃ balakkārena koṭṭhāsaṃ datvā mūlaṃ gaṇhāti, ayaṃ satthadhammo. Evamevaṃ brāhmaṇāpi lokassa paṭiññaṃ aggahetvā attanova dhammatāya catasso pāricariyā paññapentīti dassetuṃ evameva khotiādimāha. Pāpiyo assāti pāpaṃ assa. Seyyo assāti hitaṃ assa. Atha vā pāpiyoti pāpako lāmako attabhāvo assa. Seyyoti seṭṭho uttamo. Seyyaṃsoti seyyo. Uccākulīnatāti uccākulīnattena seyyo. Pāpiyaṃsoti pāpiyo. Uccākulīnatā ca dvīsu kulesu vaḍḍheti khattiyakule brāhmaṇakule ca, uḷāravaṇṇatā tīsu. Vessopi hi uḷāravaṇṇo hoti. Uḷārabhogatā catūsupi. Suddopi hi antamaso caṇḍālopi uḷārabhogo hotiyeva.
440. பி⁴க்கா²சரியந்தி கோடித⁴னேனபி ஹி ப்³ராஹ்மணேன பி⁴க்கா² சரிதப்³பா³வ, போராணகப்³ராஹ்மணா அஸீதிகோடித⁴னாபி ஏகவேலங் பி⁴க்க²ங் சரந்தி. கஸ்மா? து³க்³க³தகாலே சரந்தானங் இதா³னி பி⁴க்க²ங் சரிதுங் ஆரத்³தா⁴தி க³ரஹா ந ப⁴விஸ்ஸதீதி. அதிமஞ்ஞமானோதி யோ பி⁴க்கா²சரியவங்ஸங் ஹரித்வா ஸத்தஜீவகஸிகம்மவணிஜ்ஜாதீ³ஹி ஜீவிகங் கப்பேதி, அயங் அதிமஞ்ஞதி நாம. கோ³போ வாதி யதா² கோ³பகோ அத்தனா ரக்கி²தப்³ப³ங் ப⁴ண்ட³ங் தே²னெந்தோ அகிச்சகாரீ ஹோதி, ஏவந்தி அத்தோ². இமினா நயேன ஸப்³ப³வாரேஸு அத்தோ² வேதி³தப்³போ³. அஸிதப்³யாப⁴ங்கி³ந்தி திணலாயனஅஸிதஞ்சேவ காஜஞ்ச. அனுஸ்ஸரதோதி யத்த² ஜாதோ, தஸ்மிங் போராணே மாதாபெத்திகே குலவங்ஸே அனுஸ்ஸரியமானேதி அத்தோ². ஸேஸங் ஸப்³ப³த்த² உத்தானமேவாதி.
440.Bhikkhācariyanti koṭidhanenapi hi brāhmaṇena bhikkhā caritabbāva, porāṇakabrāhmaṇā asītikoṭidhanāpi ekavelaṃ bhikkhaṃ caranti. Kasmā? Duggatakāle carantānaṃ idāni bhikkhaṃ carituṃ āraddhāti garahā na bhavissatīti. Atimaññamānoti yo bhikkhācariyavaṃsaṃ haritvā sattajīvakasikammavaṇijjādīhi jīvikaṃ kappeti, ayaṃ atimaññati nāma. Gopo vāti yathā gopako attanā rakkhitabbaṃ bhaṇḍaṃ thenento akiccakārī hoti, evanti attho. Iminā nayena sabbavāresu attho veditabbo. Asitabyābhaṅginti tiṇalāyanaasitañceva kājañca. Anussaratoti yattha jāto, tasmiṃ porāṇe mātāpettike kulavaṃse anussariyamāneti attho. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஏஸுகாரீஸுத்தவண்ணனா நிட்டி²தா.
Esukārīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. ஏஸுகாரீஸுத்தங் • 6. Esukārīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 6. ஏஸுகாரீஸுத்தவண்ணனா • 6. Esukārīsuttavaṇṇanā
