| Library / Tipiṭaka / திபிடக • Tipiṭaka / உதா³ன-அட்ட²கதா² • Udāna-aṭṭhakathā |
6. க³ப்³பி⁴னீஸுத்தவண்ணனா
6. Gabbhinīsuttavaṇṇanā
16. ச²ட்டே² அஞ்ஞதரஸ்ஸ பரிப்³பா³ஜகஸ்ஸாதி ஏகஸ்ஸ குடும்பி³கஸ்ஸ பரிப்³பா³ஜகஸ்ஸ. த³ஹராதி தருணீ. மாணவிகாதி ப்³ராஹ்மணதீ⁴தாய வோஹாரோ. பஜாபதீதி ப⁴ரியா. க³ப்³பி⁴னீதி ஆபன்னஸத்தா. உபவிஜஞ்ஞாதி அஜ்ஜ ஸுவேதி பச்சுபட்டி²தவிஜாயனகாலா ஹோதீதி ஸம்ப³ந்தோ⁴. ஸோ கிர ப்³ராஹ்மணஜாதிகோ ஸப⁴ரியோ வாத³பத்த²ஸ்ஸமே டி²தோ, தேன நங் ஸபஜாபதிகங் பரிப்³பா³ஜகவோஹாரேன ஸமுதா³சரந்தி. ப⁴ரியா பனஸ்ஸ ப்³ராஹ்மணஜாதிகத்தா ப்³ராஹ்மணாதி ஆலபதி. தேலந்தி திலதேலங். தேலஸீஸேன செத்த² யங் யங் விஜாதாய பஸவது³க்க²ப்படிகாரத்த²ங் இச்சி²தப்³ப³ங், தங் ஸப்³ப³ங் ஸப்பிலோணாதி³ங் ஆஹராதி ஆணாபேதி. யங் மே விஜாதாய ப⁴விஸ்ஸதீதி யங் தேலாதி³ மய்ஹங் விஜாதாய ப³ஹினிக்க²ந்தக³ப்³பா⁴ய உபகாராய ப⁴விஸ்ஸதி. ‘‘பரிப்³பா³ஜிகாயா’’திபி பாடோ². குதோதி கஸ்மா டா²னா, யதோ ஞாதிகுலா வா மித்தகுலா வா தேலாதி³ங் ஆஹரெய்யங், தங் டா²னங் மே நத்தீ²தி அதி⁴ப்பாயோ. தேலங் ஆஹராமீதி வத்தமானஸமீபதாய வத்தமானங் கத்வா வுத்தங், தேலங் ஆஹரிஸ்ஸாமீதி அத்தோ². ஸமணஸ்ஸ வா ப்³ராஹ்மணஸ்ஸ வா ஸப்பிஸ்ஸ வா தேலஸ்ஸ வாதி ச ஸமுச்சயத்தோ² வா-ஸத்³தோ³ ‘‘அக்³கி³தோ வா உத³கதோ வா மிது²பே⁴தா³ வா’’திஆதீ³ஸு (மஹாவ॰ 286; தீ³॰ நி॰ 2.152; உதா³॰ 76) விய. ஸப்பிஸ்ஸ வா தேலஸ்ஸ வாதி பச்சத்தே ஸாமிவசனங், ஸப்பி ச தேலஞ்ச யாவத³த்த²ங் பாதுங் பிவிதுங் தீ³யதீதி அத்தோ². அபரே பன ‘‘ஸப்பிஸ்ஸ வா தேலஸ்ஸ வாதி அவயவஸம்ப³ந்தே⁴ ஸாமிவசனங். ஸப்பிதேலஸமுதா³யஸ்ஸ ஹி அவயவோ இத⁴ யாவத³த்த²ஸத்³தே³ன வுச்சதீ’’தி வத³ந்தி. நோ நீஹரிதுந்தி பா⁴ஜனேன வா ஹத்தே²ன வா ப³ஹி நேதுங் நோ தீ³யதி, உச்ச²த்³தி³த்வானாதி வமித்வா, யங்னூன த³தெ³ய்யந்தி ஸம்ப³ந்தோ⁴. ஏவங் கிரஸ்ஸ அஹோஸி ‘‘அஹங் ரஞ்ஞோ கொட்டா²கா³ரங் க³ந்த்வா தேலங் கண்ட²மத்தங் பிவித்வா தாவதே³வ க⁴ரங் ஆக³ந்த்வா ஏகஸ்மிங் பா⁴ஜனே யதா²பீதங் வமித்வா உத்³த⁴னங் ஆரோபெத்வா பசிஸ்ஸாமி, யங் பித்தஸெம்ஹாதி³மிஸ்ஸிதங், தங் அக்³கி³னா ஜா²யிஸ்ஸதி, தேலங் பன க³ஹெத்வா இமிஸ்ஸா பரிப்³பா³ஜிகாய கம்மே உபனெஸ்ஸாமீ’’தி.
16. Chaṭṭhe aññatarassa paribbājakassāti ekassa kuṭumbikassa paribbājakassa. Daharāti taruṇī. Māṇavikāti brāhmaṇadhītāya vohāro. Pajāpatīti bhariyā. Gabbhinīti āpannasattā. Upavijaññāti ajja suveti paccupaṭṭhitavijāyanakālā hotīti sambandho. So kira brāhmaṇajātiko sabhariyo vādapatthassame ṭhito, tena naṃ sapajāpatikaṃ paribbājakavohārena samudācaranti. Bhariyā panassa brāhmaṇajātikattā brāhmaṇāti ālapati. Telanti tilatelaṃ. Telasīsena cettha yaṃ yaṃ vijātāya pasavadukkhappaṭikāratthaṃ icchitabbaṃ, taṃ sabbaṃ sappiloṇādiṃ āharāti āṇāpeti. Yaṃ me vijātāya bhavissatīti yaṃ telādi mayhaṃ vijātāya bahinikkhantagabbhāya upakārāya bhavissati. ‘‘Paribbājikāyā’’tipi pāṭho. Kutoti kasmā ṭhānā, yato ñātikulā vā mittakulā vā telādiṃ āhareyyaṃ, taṃ ṭhānaṃ me natthīti adhippāyo. Telaṃāharāmīti vattamānasamīpatāya vattamānaṃ katvā vuttaṃ, telaṃ āharissāmīti attho. Samaṇassa vā brāhmaṇassa vā sappissa vā telassa vāti ca samuccayattho vā-saddo ‘‘aggito vā udakato vā mithubhedā vā’’tiādīsu (mahāva. 286; dī. ni. 2.152; udā. 76) viya. Sappissa vā telassa vāti paccatte sāmivacanaṃ, sappi ca telañca yāvadatthaṃ pātuṃ pivituṃ dīyatīti attho. Apare pana ‘‘sappissa vā telassa vāti avayavasambandhe sāmivacanaṃ. Sappitelasamudāyassa hi avayavo idha yāvadatthasaddena vuccatī’’ti vadanti. No nīharitunti bhājanena vā hatthena vā bahi netuṃ no dīyati, ucchadditvānāti vamitvā, yaṃnūna dadeyyanti sambandho. Evaṃ kirassa ahosi ‘‘ahaṃ rañño koṭṭhāgāraṃ gantvā telaṃ kaṇṭhamattaṃ pivitvā tāvadeva gharaṃ āgantvā ekasmiṃ bhājane yathāpītaṃ vamitvā uddhanaṃ āropetvā pacissāmi, yaṃ pittasemhādimissitaṃ, taṃ agginā jhāyissati, telaṃ pana gahetvā imissā paribbājikāya kamme upanessāmī’’ti.
உத்³த⁴ங் காதுந்தி வமனவஸேன உத்³த⁴ங் நீஹரிதுங். ந பன அதோ⁴தி விரிஞ்சனவஸேன ஹெட்டா² நீஹரிதுங் ந பன ஸக்கோதி. ஸோ ஹி ‘‘அதி⁴கங் பீதங் ஸயமேவ முக²தோ நிக்³க³மிஸ்ஸதீ’’தி பிவித்வா ஆஸயஸ்ஸ அரித்ததாய அனிக்³க³தே வமனவிரேசனயோக³ங் அஜானந்தோ அலப⁴ந்தோ வா கேவலங் து³க்கா²ஹி வேத³னாஹி பு²ட்டோ² ஆவட்டதி ச பரிவட்டதி ச. து³க்கா²ஹீதி து³க்க²மாஹி. திப்³பா³ஹீதி ப³ஹலாஹி திகி²ணாஹி வா. க²ராஹீதி கக்க²ளாஹி. கடுகாஹீதி அதிவிய அனிட்ட²பா⁴வேன தா³ருணாஹி. ஆவட்டதீதி ஏகஸ்மிங்யேவ டா²னே அனிபஜ்ஜித்வா அத்தனோ ஸரீரங் இதோ சிதோ ஆகட்³ட⁴ந்தோ ஆவட்டதி. பரிவட்டதீதி ஏகஸ்மிங் பதே³ஸே நிபன்னோபி அங்க³பச்சங்கா³னி பரிதோ கி²பந்தோ வட்டதி, அபி⁴முக²ங் வா வட்டந்தோ ஆவட்டதி, ஸமந்ததோ வட்டந்தோ பரிவட்டதி.
Uddhaṃ kātunti vamanavasena uddhaṃ nīharituṃ. Na pana adhoti viriñcanavasena heṭṭhā nīharituṃ na pana sakkoti. So hi ‘‘adhikaṃ pītaṃ sayameva mukhato niggamissatī’’ti pivitvā āsayassa arittatāya aniggate vamanavirecanayogaṃ ajānanto alabhanto vā kevalaṃ dukkhāhi vedanāhi phuṭṭho āvaṭṭati ca parivaṭṭati ca. Dukkhāhīti dukkhamāhi. Tibbāhīti bahalāhi tikhiṇāhi vā. Kharāhīti kakkhaḷāhi. Kaṭukāhīti ativiya aniṭṭhabhāvena dāruṇāhi. Āvaṭṭatīti ekasmiṃyeva ṭhāne anipajjitvā attano sarīraṃ ito cito ākaḍḍhanto āvaṭṭati. Parivaṭṭatīti ekasmiṃ padese nipannopi aṅgapaccaṅgāni parito khipanto vaṭṭati, abhimukhaṃ vā vaṭṭanto āvaṭṭati, samantato vaṭṭanto parivaṭṭati.
ஏதமத்த²ங் விதி³த்வாதி ‘‘ஸகிஞ்சனஸ்ஸ அப்படிஸங்கா²பரிபோ⁴க³ஹேதுகா அயங் து³க்கு²ப்பத்தி, அகிஞ்சனஸ்ஸ பன ஸப்³ப³ஸோ அயங் நத்தீ²’’தி ஏதமத்த²ங் ஸப்³பா³காரதோ ஜானித்வா தத³த்த²ப்பகாஸனங் இமங் உதா³னங் உதா³னேஸி.
Etamatthaṃ viditvāti ‘‘sakiñcanassa appaṭisaṅkhāparibhogahetukā ayaṃ dukkhuppatti, akiñcanassa pana sabbaso ayaṃ natthī’’ti etamatthaṃ sabbākārato jānitvā tadatthappakāsanaṃ imaṃ udānaṃ udānesi.
தத்த² ஸுகி²னோ வதாதி ஸுகி²னோ வத ஸப்புரிஸா. கே பன தேதி? யே அகிஞ்சனா, யே ராகா³தி³கிஞ்சனஸ்ஸ பரிக்³க³ஹகிஞ்சனஸ்ஸ ச அபா⁴வேன அகிஞ்சனா, கேஸங் பனித³ங் கிஞ்சனங் நத்தீ²தி ஆஹ – ‘‘வேத³கு³னோ ஹி ஜனா அகிஞ்சனா’’தி, யே அரியமக்³க³ஞாணஸங்கா²தங் வேத³ங் க³தா அதி⁴க³தா, தேன வா வேதே³ன நிப்³பா³னங் க³தாதி வேத³கு³னோ, தே அரியஜனா கீ²ணாஸவபுக்³க³லா அனவஸேஸராகா³தி³கிஞ்சனானங் அக்³க³மக்³கே³ன ஸமுச்சி²ன்னத்தா அகிஞ்சனா நாம. அஸதி ஹி ராகா³தி³கிஞ்சனே குதோ பரிக்³க³ஹகிஞ்சனஸ்ஸ ஸம்ப⁴வோ. ஏவங் கா³தா²ய புரிமபா⁴கே³ன அரஹந்தே பஸங்ஸித்வா அபரபா⁴கே³ன அந்த⁴புது²ஜ்ஜனே க³ரஹந்தோ ‘‘ஸகிஞ்சனங் பஸ்ஸா’’திஆதி³மாஹ. தங் புரிமஸுத்தே வுத்தத்த²மேவ. ஏவங் இமாயபி கா³தா²ய வட்டவிவட்டங் கதி²தங்.
Tattha sukhino vatāti sukhino vata sappurisā. Ke pana teti? Ye akiñcanā, ye rāgādikiñcanassa pariggahakiñcanassa ca abhāvena akiñcanā, kesaṃ panidaṃ kiñcanaṃ natthīti āha – ‘‘vedaguno hi janā akiñcanā’’ti, ye ariyamaggañāṇasaṅkhātaṃ vedaṃ gatā adhigatā, tena vā vedena nibbānaṃ gatāti vedaguno, te ariyajanā khīṇāsavapuggalā anavasesarāgādikiñcanānaṃ aggamaggena samucchinnattā akiñcanā nāma. Asati hi rāgādikiñcane kuto pariggahakiñcanassa sambhavo. Evaṃ gāthāya purimabhāgena arahante pasaṃsitvā aparabhāgena andhaputhujjane garahanto ‘‘sakiñcanaṃ passā’’tiādimāha. Taṃ purimasutte vuttatthameva. Evaṃ imāyapi gāthāya vaṭṭavivaṭṭaṃ kathitaṃ.
ச²ட்ட²ஸுத்தவண்ணனா நிட்டி²தா.
Chaṭṭhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / உதா³னபாளி • Udānapāḷi / 6. க³ப்³பி⁴னீஸுத்தங் • 6. Gabbhinīsuttaṃ
