| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
2. க³த்³ரப⁴ஸுத்தங்
2. Gadrabhasuttaṃ
83. ‘‘ஸெய்யதா²பி, பி⁴க்க²வே, க³த்³ரபோ⁴ கோ³க³ணங் பிட்டி²தோ பிட்டி²தோ அனுப³ந்தோ⁴ ஹோதி – ‘அஹம்பி த³ம்மோ, அஹம்பி த³ம்மோ’தி 1. தஸ்ஸ ந தாதி³ஸோ வண்ணோ ஹோதி ஸெய்யதா²பி கு³ன்னங், ந தாதி³ஸோ ஸரோ ஹோதி ஸெய்யதா²பி கு³ன்னங், ந தாதி³ஸங் பத³ங் ஹோதி ஸெய்யதா²பி கு³ன்னங். ஸோ கோ³க³ணங்யேவ பிட்டி²தோ பிட்டி²தோ அனுப³ந்தோ⁴ ஹோதி – ‘அஹம்பி த³ம்மோ, அஹம்பி த³ம்மோ’’’தி.
83. ‘‘Seyyathāpi, bhikkhave, gadrabho gogaṇaṃ piṭṭhito piṭṭhito anubandho hoti – ‘ahampi dammo, ahampi dammo’ti 2. Tassa na tādiso vaṇṇo hoti seyyathāpi gunnaṃ, na tādiso saro hoti seyyathāpi gunnaṃ, na tādisaṃ padaṃ hoti seyyathāpi gunnaṃ. So gogaṇaṃyeva piṭṭhito piṭṭhito anubandho hoti – ‘ahampi dammo, ahampi dammo’’’ti.
‘‘ஏவமேவங் கோ², பி⁴க்க²வே, இதே⁴கச்சோ பி⁴க்கு² பி⁴க்கு²ஸங்க⁴ங் பிட்டி²தோ பிட்டி²தோ அனுப³ந்தோ⁴ ஹோதி – ‘அஹம்பி பி⁴க்கு², அஹம்பி பி⁴க்கூ²’தி. தஸ்ஸ ந தாதி³ஸோ ச²ந்தோ³ ஹோதி அதி⁴ஸீலஸிக்கா²ஸமாதா³னே ஸெய்யதா²பி அஞ்ஞேஸங் பி⁴க்கூ²னங், ந தாதி³ஸோ ச²ந்தோ³ ஹோதி அதி⁴சித்தஸிக்கா²ஸமாதா³னே ஸெய்யதா²பி அஞ்ஞேஸங் பி⁴க்கூ²னங், ந தாதி³ஸோ ச²ந்தோ³ ஹோதி அதி⁴பஞ்ஞாஸிக்கா²ஸமாதா³னே ஸெய்யதா²பி அஞ்ஞேஸங் பி⁴க்கூ²னங். ஸோ பி⁴க்கு²ஸங்க⁴ங்யேவ பிட்டி²தோ பிட்டி²தோ அனுப³ந்தோ⁴ ஹோதி – ‘அஹம்பி பி⁴க்கு², அஹம்பி பி⁴க்கூ²’’’தி.
‘‘Evamevaṃ kho, bhikkhave, idhekacco bhikkhu bhikkhusaṅghaṃ piṭṭhito piṭṭhito anubandho hoti – ‘ahampi bhikkhu, ahampi bhikkhū’ti. Tassa na tādiso chando hoti adhisīlasikkhāsamādāne seyyathāpi aññesaṃ bhikkhūnaṃ, na tādiso chando hoti adhicittasikkhāsamādāne seyyathāpi aññesaṃ bhikkhūnaṃ, na tādiso chando hoti adhipaññāsikkhāsamādāne seyyathāpi aññesaṃ bhikkhūnaṃ. So bhikkhusaṅghaṃyeva piṭṭhito piṭṭhito anubandho hoti – ‘ahampi bhikkhu, ahampi bhikkhū’’’ti.
‘‘தஸ்மாதிஹ , பி⁴க்க²வே, ஏவங் ஸிக்கி²தப்³ப³ங் – ‘திப்³போ³ நோ ச²ந்தோ³ ப⁴விஸ்ஸதி அதி⁴ஸீலஸிக்கா²ஸமாதா³னே, திப்³போ³ நோ ச²ந்தோ³ ப⁴விஸ்ஸதி அதி⁴சித்தஸிக்கா²ஸமாதா³னே, திப்³போ³ நோ ச²ந்தோ³ ப⁴விஸ்ஸதி அதி⁴பஞ்ஞாஸிக்கா²ஸமாதா³னே’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. து³தியங்.
‘‘Tasmātiha , bhikkhave, evaṃ sikkhitabbaṃ – ‘tibbo no chando bhavissati adhisīlasikkhāsamādāne, tibbo no chando bhavissati adhicittasikkhāsamādāne, tibbo no chando bhavissati adhipaññāsikkhāsamādāne’ti. Evañhi vo, bhikkhave, sikkhitabba’’nti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. க³த்³ரப⁴ஸுத்தவண்ணனா • 2. Gadrabhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-5. ஸமணஸுத்தாதி³வண்ணனா • 1-5. Samaṇasuttādivaṇṇanā
