| Library / Tipiṭaka / તિપિટક • Tipiṭaka / સંયુત્તનિકાય • Saṃyuttanikāya |
૮. ગહટ્ઠવન્દનાસુત્તં
8. Gahaṭṭhavandanāsuttaṃ
૨૬૪. સાવત્થિયં. તત્ર…પે॰… એતદવોચ – ‘‘ભૂતપુબ્બં, ભિક્ખવે, સક્કો દેવાનમિન્દો માતલિં સઙ્ગાહકં આમન્તેસિ – ‘યોજેહિ, સમ્મ માતલિ, સહસ્સયુત્તં આજઞ્ઞરથં. ઉય્યાનભૂમિં ગચ્છામ સુભૂમિં દસ્સનાયા’તિ. ‘એવં ભદ્દન્તવા’તિ ખો, ભિક્ખવે, માતલિ સઙ્ગાહકો સક્કસ્સ દેવાનમિન્દસ્સ પટિસ્સુત્વા સહસ્સયુત્તં આજઞ્ઞરથં યોજેત્વા સક્કસ્સ દેવાનમિન્દસ્સ પટિવેદેસિ – ‘યુત્તો ખો તે, મારિસ, સહસ્સયુત્તો આજઞ્ઞરથો. યસ્સ દાનિ કાલં મઞ્ઞસી’’’તિ. અથ ખો, ભિક્ખવે, સક્કો દેવાનમિન્દો વેજયન્તપાસાદા ઓરોહન્તો અઞ્જલિં કત્વા 1 સુદં પુથુદ્દિસા નમસ્સતિ. અથ ખો, ભિક્ખવે, માતલિ સઙ્ગાહકો સક્કં દેવાનમિન્દં ગાથાય અજ્ઝભાસિ –
264. Sāvatthiyaṃ. Tatra…pe… etadavoca – ‘‘bhūtapubbaṃ, bhikkhave, sakko devānamindo mātaliṃ saṅgāhakaṃ āmantesi – ‘yojehi, samma mātali, sahassayuttaṃ ājaññarathaṃ. Uyyānabhūmiṃ gacchāma subhūmiṃ dassanāyā’ti. ‘Evaṃ bhaddantavā’ti kho, bhikkhave, mātali saṅgāhako sakkassa devānamindassa paṭissutvā sahassayuttaṃ ājaññarathaṃ yojetvā sakkassa devānamindassa paṭivedesi – ‘yutto kho te, mārisa, sahassayutto ājaññaratho. Yassa dāni kālaṃ maññasī’’’ti. Atha kho, bhikkhave, sakko devānamindo vejayantapāsādā orohanto añjaliṃ katvā 2 sudaṃ puthuddisā namassati. Atha kho, bhikkhave, mātali saṅgāhako sakkaṃ devānamindaṃ gāthāya ajjhabhāsi –
‘‘તં નમસ્સન્તિ તેવિજ્જા, સબ્બે ભુમ્મા ચ ખત્તિયા;
‘‘Taṃ namassanti tevijjā, sabbe bhummā ca khattiyā;
ચત્તારો ચ મહારાજા, તિદસા ચ યસસ્સિનો;
Cattāro ca mahārājā, tidasā ca yasassino;
અથ કો નામ સો યક્ખો, યં ત્વં સક્ક નમસ્સસી’’તિ.
Atha ko nāma so yakkho, yaṃ tvaṃ sakka namassasī’’ti.
‘‘મં નમસ્સન્તિ તેવિજ્જા, સબ્બે ભુમ્મા ચ ખત્તિયા;
‘‘Maṃ namassanti tevijjā, sabbe bhummā ca khattiyā;
ચત્તારો ચ મહારાજા, તિદસા ચ યસસ્સિનો.
Cattāro ca mahārājā, tidasā ca yasassino.
‘‘અહઞ્ચ સીલસમ્પન્ને, ચિરરત્તસમાહિતે;
‘‘Ahañca sīlasampanne, cirarattasamāhite;
સમ્માપબ્બજિતે વન્દે, બ્રહ્મચરિયપરાયને.
Sammāpabbajite vande, brahmacariyaparāyane.
‘‘યે ગહટ્ઠા પુઞ્ઞકરા, સીલવન્તો ઉપાસકા;
‘‘Ye gahaṭṭhā puññakarā, sīlavanto upāsakā;
ધમ્મેન દારં પોસેન્તિ, તે નમસ્સામિ માતલી’’તિ.
Dhammena dāraṃ posenti, te namassāmi mātalī’’ti.
‘‘સેટ્ઠા હિ કિર લોકસ્મિં, યે ત્વં સક્ક નમસ્સસિ;
‘‘Seṭṭhā hi kira lokasmiṃ, ye tvaṃ sakka namassasi;
અહમ્પિ તે નમસ્સામિ, યે નમસ્સસિ વાસવા’’તિ.
Ahampi te namassāmi, ye namassasi vāsavā’’ti.
‘‘ઇદં વત્વાન મઘવા, દેવરાજા સુજમ્પતિ;
‘‘Idaṃ vatvāna maghavā, devarājā sujampati;
પુથુદ્દિસા નમસ્સિત્વા, પમુખો રથમારુહી’’તિ.
Puthuddisā namassitvā, pamukho rathamāruhī’’ti.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૮. ગહટ્ઠવન્દનાસુત્તવણ્ણના • 8. Gahaṭṭhavandanāsuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૮. ગહટ્ઠવન્દનાસુત્તવણ્ણના • 8. Gahaṭṭhavandanāsuttavaṇṇanā
