| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૮. ગહટ્ઠવન્દનાસુત્તવણ્ણના
8. Gahaṭṭhavandanāsuttavaṇṇanā
૨૬૪. અટ્ઠમે પુથુદ્દિસાતિ ચતસ્સો દિસા ચતસ્સો અનુદિસા ચ. ભુમ્માતિ ભૂમિવાસિનો. ચિરરત્તસમાહિતેતિ ઉપચારપ્પનાહિ ચિરરત્તસમાહિતચિત્તે. વન્દેતિ વન્દામિ. બ્રહ્મચરિયપરાયણેતિ દસપિ વસ્સાનિ વીસતિપિ વસ્સાનિ…પે॰… સટ્ઠિપિ વસ્સાનિ આપાણકોટિકં એકસેય્યં એકભત્તન્તિઆદિકં સેટ્ઠચરિયં બ્રહ્મચરિયં ચરમાનેતિ અત્થો. પુઞ્ઞકરાતિ ચતુપચ્ચયદાનં કુસુમ્ભસુમનપૂજા દીપસહસ્સજાલન્તિ એવમાદિપુઞ્ઞકારકા. સીલવન્તોતિ ઉપાસકત્તે પતિટ્ઠાય પઞ્ચહિપિ દસહિપિ સીલેહિ સમન્નાગતા. ધમ્મેન દારં પોસેન્તીતિ ઉમઙ્ગભિન્દનાદીનિ અકત્વા ધમ્મિકેહિ કસિગોરક્ખવણિજ્જાદીહિ પુત્તદારં પોસેન્તિ. પમુખો રથમારુહીતિ દેવાનં પમુખો સેટ્ઠો રથં આરુહિ. અટ્ઠમં.
264. Aṭṭhame puthuddisāti catasso disā catasso anudisā ca. Bhummāti bhūmivāsino. Cirarattasamāhiteti upacārappanāhi cirarattasamāhitacitte. Vandeti vandāmi. Brahmacariyaparāyaṇeti dasapi vassāni vīsatipi vassāni…pe… saṭṭhipi vassāni āpāṇakoṭikaṃ ekaseyyaṃ ekabhattantiādikaṃ seṭṭhacariyaṃ brahmacariyaṃ caramāneti attho. Puññakarāti catupaccayadānaṃ kusumbhasumanapūjā dīpasahassajālanti evamādipuññakārakā. Sīlavantoti upāsakatte patiṭṭhāya pañcahipi dasahipi sīlehi samannāgatā. Dhammena dāraṃ posentīti umaṅgabhindanādīni akatvā dhammikehi kasigorakkhavaṇijjādīhi puttadāraṃ posenti. Pamukho rathamāruhīti devānaṃ pamukho seṭṭho rathaṃ āruhi. Aṭṭhamaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૮. ગહટ્ઠવન્દનાસુત્તં • 8. Gahaṭṭhavandanāsuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૮. ગહટ્ઠવન્દનાસુત્તવણ્ણના • 8. Gahaṭṭhavandanāsuttavaṇṇanā
