| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
7. க³ணகமொக்³க³ல்லானஸுத்தவண்ணனா
7. Gaṇakamoggallānasuttavaṇṇanā
74. ஏவங் மே ஸுதந்தி க³ணகமொக்³க³ல்லானஸுத்தங். தத்த² யாவ பச்சி²மஸோபானகளேவராதி யாவ பட²மஸோபானப²லகா ஏகதி³வஸேனேவ ஸத்தபூ⁴மிகோ பாஸாதோ³ ந ஸக்கா காதுங், வத்து²ங் ஸோதெ⁴த்வா த²ம்பு⁴ஸ்ஸாபனதோ பட்டா²ய பன யாவ சித்தகம்மகரணா அனுபுப்³ப³கிரியா செத்த² பஞ்ஞாயதீதி த³ஸ்ஸேதி. யதி³த³ங் அஜ்ஜே²னேதி தயோபி வேதா³ ந ஸக்கா ஏகதி³வஸேனேவ அதீ⁴யிதுங், ஏதேஸங் அஜ்ஜே²னேபி பன அனுபுப்³ப³கிரியாவ பஞ்ஞாயதீதி த³ஸ்ஸேதி. இஸ்ஸத்தே²தி ஆவுத⁴விஜ்ஜாயபி ஏகதி³வஸேனேவ வாலவேதி⁴ நாம ந ஸக்கா காதுங், டா²னஸம்பாத³னமுட்டி²கரணாதீ³ஹி பன எத்தா²பி அனுபுப்³ப³கிரியா பஞ்ஞாயதீதி த³ஸ்ஸேதி. ஸங்கா²னேதி க³ணனாய. தத்த² அனுபுப்³ப³கிரியங் அத்தனாவ த³ஸ்ஸெந்தோ ஏவங் க³ணாபேமாதிஆதி³மாஹ.
74.Evaṃme sutanti gaṇakamoggallānasuttaṃ. Tattha yāva pacchimasopānakaḷevarāti yāva paṭhamasopānaphalakā ekadivaseneva sattabhūmiko pāsādo na sakkā kātuṃ, vatthuṃ sodhetvā thambhussāpanato paṭṭhāya pana yāva cittakammakaraṇā anupubbakiriyā cettha paññāyatīti dasseti. Yadidaṃ ajjheneti tayopi vedā na sakkā ekadivaseneva adhīyituṃ, etesaṃ ajjhenepi pana anupubbakiriyāva paññāyatīti dasseti. Issattheti āvudhavijjāyapi ekadivaseneva vālavedhi nāma na sakkā kātuṃ, ṭhānasampādanamuṭṭhikaraṇādīhi pana etthāpi anupubbakiriyā paññāyatīti dasseti. Saṅkhāneti gaṇanāya. Tattha anupubbakiriyaṃ attanāva dassento evaṃ gaṇāpemātiādimāha.
75. ஸெய்யதா²பி ப்³ராஹ்மணாதி இத⁴ ப⁴க³வா யஸ்மா பா³ஹிரஸமயே யதா² யதா² ஸிப்பங் உக்³க³ண்ஹந்தி, ததா² ததா² கேராடிகா ஹொந்தி, தஸ்மா அத்தனோ ஸாஸனங் பா³ஹிரஸமயேன அனுபமெத்வா ப⁴த்³ரஅஸ்ஸாஜானீயேன உபமெந்தோ ஸெய்யதா²பீதிஆதி³மாஹ. ப⁴த்³ரோ ஹி அஸ்ஸாஜானீயோ யஸ்மிங் காரணே த³மிதோ ஹோதி, தங் ஜீவிதஹேதுபி நாதிக்கமதி. ஏவமேவ ஸாஸனே ஸம்மாபடிபன்னோ குலபுத்தோ ஸீலவேலங் நாதிக்கமதி. முகா²தா⁴னேதி முக²ட்ட²பனே.
75.Seyyathāpi brāhmaṇāti idha bhagavā yasmā bāhirasamaye yathā yathā sippaṃ uggaṇhanti, tathā tathā kerāṭikā honti, tasmā attano sāsanaṃ bāhirasamayena anupametvā bhadraassājānīyena upamento seyyathāpītiādimāha. Bhadro hi assājānīyo yasmiṃ kāraṇe damito hoti, taṃ jīvitahetupi nātikkamati. Evameva sāsane sammāpaṭipanno kulaputto sīlavelaṃ nātikkamati. Mukhādhāneti mukhaṭṭhapane.
76. ஸதிஸம்பஜஞ்ஞாய சாதி ஸதிஸம்பஜஞ்ஞாஹி ஸமங்கி³பா⁴வத்தா²ய . த்³வே ஹி கீ²ணாஸவா ஸததவிஹாரீ ச நோஸததவிஹாரீ ச. தத்த² ஸததவிஹாரீ யங்கிஞ்சி கம்மங் கத்வாபி ப²லஸமாபத்திங் ஸமாபஜ்ஜிதுங் ஸக்கோதி, நோ ஸததவிஹாரீ பன அப்பமத்தகேபி கிச்சே கிச்சப்பஸுதோ ஹுத்வா ப²லஸமாபத்திங் அப்பேதுங் ந ஸக்கோதி.
76.Satisampajaññāya cāti satisampajaññāhi samaṅgibhāvatthāya . Dve hi khīṇāsavā satatavihārī ca nosatatavihārī ca. Tattha satatavihārī yaṃkiñci kammaṃ katvāpi phalasamāpattiṃ samāpajjituṃ sakkoti, no satatavihārī pana appamattakepi kicce kiccappasuto hutvā phalasamāpattiṃ appetuṃ na sakkoti.
தத்ரித³ங் வத்து² – ஏகோ கிர கீ²ணாஸவத்தே²ரோ கீ²ணாஸவஸாமணேரங் க³ஹெத்வா அரஞ்ஞவாஸங் க³தோ, தத்த² மஹாதே²ரஸ்ஸ ஸேனாஸனங் பத்தங், ஸாமணேரஸ்ஸ ந பாபுணாதி, தங் விதக்கெந்தோ தே²ரோ ஏகதி³வஸம்பி ப²லஸமாபத்திங் அப்பேதுங் நாஸக்கி². ஸாமணேரோ பன தேமாஸங் ப²லஸமாபத்திரதியா வீதினாமெத்வா ‘‘ஸப்பாயோ , ப⁴ந்தே, அரஞ்ஞவாஸோ ஜாதோ’’தி தே²ரங் புச்சி². தே²ரோ ‘‘ந ஜாதோ, ஆவுஸோ’’தி ஆஹ. இதி யோ ஏவரூபோ கீ²ணாஸவோ, ஸோ இமே த⁴ம்மே ஆதி³தோ பட்டா²ய ஆவஜ்ஜித்வாவ ஸமாபஜ்ஜிதுங் ஸக்கி²ஸ்ஸதீதி த³ஸ்ஸெந்தோ ‘‘ஸதிஸம்பஜஞ்ஞாய சா’’தி ஆஹ.
Tatridaṃ vatthu – eko kira khīṇāsavatthero khīṇāsavasāmaṇeraṃ gahetvā araññavāsaṃ gato, tattha mahātherassa senāsanaṃ pattaṃ, sāmaṇerassa na pāpuṇāti, taṃ vitakkento thero ekadivasampi phalasamāpattiṃ appetuṃ nāsakkhi. Sāmaṇero pana temāsaṃ phalasamāpattiratiyā vītināmetvā ‘‘sappāyo , bhante, araññavāso jāto’’ti theraṃ pucchi. Thero ‘‘na jāto, āvuso’’ti āha. Iti yo evarūpo khīṇāsavo, so ime dhamme ādito paṭṭhāya āvajjitvāva samāpajjituṃ sakkhissatīti dassento ‘‘satisampajaññāya cā’’ti āha.
78. யேமே, போ⁴ கோ³தமாதி ததா²க³தே கிர கத²யந்தேவ ப்³ராஹ்மணஸ்ஸ ‘‘இமே புக்³க³லா ந ஆராதெ⁴ந்தி, இமே ஆராதெ⁴ந்தீ’’தி நயோ உத³பாதி³, தங் த³ஸ்ஸெந்தோ ஏவங் வத்துமாரத்³தோ⁴.
78.Yeme, bho gotamāti tathāgate kira kathayanteva brāhmaṇassa ‘‘ime puggalā na ārādhenti, ime ārādhentī’’ti nayo udapādi, taṃ dassento evaṃ vattumāraddho.
பரமஜ்ஜத⁴ம்மேஸூதி அஜ்ஜத⁴ம்மா நாம ச²ஸத்தா²ரத⁴ம்மா, தேஸு கோ³தமவாதோ³வ, பரமோ உத்தமோதி அத்தோ². ஸேஸங் ஸப்³ப³த்த² உத்தானமேவாதி.
Paramajjadhammesūti ajjadhammā nāma chasatthāradhammā, tesu gotamavādova, paramo uttamoti attho. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
க³ணகமொக்³க³ல்லானஸுத்தவண்ணனா நிட்டி²தா.
Gaṇakamoggallānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. க³ணகமொக்³க³ல்லானஸுத்தங் • 7. Gaṇakamoggallānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 7. க³ணகமொக்³க³ல்லானஸுத்தவண்ணனா • 7. Gaṇakamoggallānasuttavaṇṇanā
