| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. க³ந்த⁴ப்³ப³காயஸங்யுத்தவண்ணனா
10. Gandhabbakāyasaṃyuttavaṇṇanā
438-549. மூலக³ந்தா⁴தி³பே⁴த³ங் க³ந்த⁴ங் அவந்தி அபயுஞ்ஜந்தீதி க³ந்த⁴ப்³பா³, தேஸங் காயோ ஸமூஹோ க³ந்த⁴ப்³ப³காயோ, க³ந்த⁴ப்³ப³தே³வனிகாயோ. சாதுமஹாராஜிகேஸு ஏகியாவ தே த³ட்ட²ப்³பா³, தப்பரியாபன்னதாய தத்த² வா நியுத்தாதி க³ந்த⁴ப்³ப³காயிகா. தேஸங் தேஸங் ருக்க²க³ச்ச²லதானங் மூலங் படிச்ச பவத்தோ க³ந்தோ⁴ மூலக³ந்தோ⁴, தஸ்மிங் மூலக³ந்தே⁴. அதி⁴வத்தா²தி மூலக³ந்த⁴ங் அதி⁴ட்டா²ய, அபி⁴பு⁴ய்ய வா வஸந்தா. ஏஸ நயோ ஸேஸேஸுபி. தங் நிஸ்ஸாயாதி தங் மூலக³ந்த⁴ங் ருக்க²ங் பச்சயங் கத்வா நிப்³ப³த்தா. ந கேவலங் தத்த² க³ந்தோ⁴ ஏவ, மூலமேவ வா தேஸங் பச்சயோதி த³ஸ்ஸெந்தோ ‘‘ஸோ ஹீ’’திஆதி³மாஹ. உபகப்பதீதி நிவாஸட்டா²னபா⁴வேன வினியுஞ்ஜதி. க³ந்த⁴க³ந்தே⁴தி க³ந்தா⁴னங் க³ந்த⁴ஸமுதா³யே. மூலாதி³க³ந்தா⁴னங் க³ந்தே⁴தி மூலாதி³க³தஅவயவக³ந்தா⁴னங் க³ந்தே⁴, திமூலாதி³க³தஸமுதா³யபூ⁴தேதி அத்தோ². புப்³பே³ ஹி ‘‘மூலக³ந்தே⁴’’திஆதி³னா ருக்கா²னங் அவயவக³ந்தோ⁴ க³ஹிதோ, இத⁴ பன ஸப்³ப³ஸோ க³ஹிதத்தா ஸமுதா³யக³ந்தோ⁴ வேதி³தப்³போ³. தேனாஹ ‘‘யஸ்ஸ ஹி ருக்க²ஸ்ஸா’’திஆதி³. ஸோதி ஸோ ஸப்³போ³ மூலாதி³க³தோ க³ந்தோ⁴ க³ந்த⁴ஸமுதா³யோ இத⁴ க³ந்த⁴க³ந்தோ⁴ நாம. தஸ்ஸ க³ந்த⁴ஸ்ஸ க³ந்தே⁴தி தஸ்ஸ ஸமுதா³யக³ந்த⁴ஸ்ஸ ததா²பூ⁴தே க³ந்தே⁴. ஸரிக்க²ங் ஸதி³ஸங் படிதா³னங் ஏதிஸ்ஸாதி ஸரிக்க²தா³னங், பத்த²னா. யதா²தி⁴ப்பேதப²லானி ஸரிக்க²தா³னத்தாவ அதி⁴ப்பேதப²லங் தெ³ந்து, அஸரிக்க²தா³னங் கத²ந்தி? தம்பி தே³தியேவ புஞ்ஞஸ்ஸ ஸப்³ப³காமத³த³த்தாதி ஆஹ ‘‘அஸரிக்க²தா³னம்பீ’’திஆதி³.
438-549. Mūlagandhādibhedaṃ gandhaṃ avanti apayuñjantīti gandhabbā, tesaṃ kāyo samūho gandhabbakāyo, gandhabbadevanikāyo. Cātumahārājikesu ekiyāva te daṭṭhabbā, tappariyāpannatāya tattha vā niyuttāti gandhabbakāyikā. Tesaṃ tesaṃ rukkhagacchalatānaṃ mūlaṃ paṭicca pavatto gandho mūlagandho, tasmiṃ mūlagandhe. Adhivatthāti mūlagandhaṃ adhiṭṭhāya, abhibhuyya vā vasantā. Esa nayo sesesupi. Taṃ nissāyāti taṃ mūlagandhaṃ rukkhaṃ paccayaṃ katvā nibbattā. Na kevalaṃ tattha gandho eva, mūlameva vā tesaṃ paccayoti dassento ‘‘so hī’’tiādimāha. Upakappatīti nivāsaṭṭhānabhāvena viniyuñjati. Gandhagandheti gandhānaṃ gandhasamudāye. Mūlādigandhānaṃ gandheti mūlādigataavayavagandhānaṃ gandhe, timūlādigatasamudāyabhūteti attho. Pubbe hi ‘‘mūlagandhe’’tiādinā rukkhānaṃ avayavagandho gahito, idha pana sabbaso gahitattā samudāyagandho veditabbo. Tenāha ‘‘yassa hi rukkhassā’’tiādi. Soti so sabbo mūlādigato gandho gandhasamudāyo idha gandhagandho nāma. Tassa gandhassa gandheti tassa samudāyagandhassa tathābhūte gandhe. Sarikkhaṃ sadisaṃ paṭidānaṃ etissāti sarikkhadānaṃ, patthanā. Yathādhippetaphalāni sarikkhadānattāva adhippetaphalaṃ dentu, asarikkhadānaṃ kathanti? Tampi detiyeva puññassa sabbakāmadadattāti āha ‘‘asarikkhadānampī’’tiādi.
க³ந்த⁴ப்³ப³காயஸங்யுத்தவண்ணனா நிட்டி²தா.
Gandhabbakāyasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
1. ஸுத்³தி⁴கஸுத்தங் • 1. Suddhikasuttaṃ
2. ஸுசரிதஸுத்தங் • 2. Sucaritasuttaṃ
3. மூலக³ந்த⁴தா³தாஸுத்தங் • 3. Mūlagandhadātāsuttaṃ
4-12. ஸாரக³ந்தா⁴தி³தா³தாஸுத்தனவகங் • 4-12. Sāragandhādidātāsuttanavakaṃ
13-22. மூலக³ந்த⁴தா³னூபகாரஸுத்தத³ஸகங் • 13-22. Mūlagandhadānūpakārasuttadasakaṃ
23-112. ஸாரக³ந்தா⁴தி³தா³னூபகாரஸுத்தனவுதிகங் • 23-112. Sāragandhādidānūpakārasuttanavutikaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. க³ந்த⁴ப்³ப³காயஸங்யுத்தவண்ணனா • 10. Gandhabbakāyasaṃyuttavaṇṇanā
