| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
14. க³ந்த⁴த்தே²னஸுத்தவண்ணனா
14. Gandhatthenasuttavaṇṇanā
234. க³ந்தா⁴ரம்மணங் உபனிஜ்ஜா²யதீதி க³ந்த⁴ஸங்கா²தங் ஆரம்மணங் உபேச்ச நிஜ்ஜா²யதி, ரூபாரம்மணேன விய விஞ்ஞாணேன ரூபங், க³ந்தா⁴ரம்மணேன தங் உபேச்ச நிஜ்ஜா²யதி பச்சக்க²தோ, யாதா²வதோ ஸபா⁴வதோ படிவிஜ்ஜ²தீதி அத்தோ². உபஸிங்கி⁴ஸ்ஸதீதி தண்ஹாவஸேன உபக³ந்த்வா ஸிங்கி⁴ஸ்ஸதி.
234.Gandhārammaṇaṃupanijjhāyatīti gandhasaṅkhātaṃ ārammaṇaṃ upecca nijjhāyati, rūpārammaṇena viya viññāṇena rūpaṃ, gandhārammaṇena taṃ upecca nijjhāyati paccakkhato, yāthāvato sabhāvato paṭivijjhatīti attho. Upasiṅghissatīti taṇhāvasena upagantvā siṅghissati.
ஏகங்க³மேதங் தெ²ய்யானந்தி ஆரம்மணவஸேன தெ²ய்யவத்தூ²ஸு விப⁴ஜியமானேஸு ஏகமங்க³மேதங் க³ந்தா⁴ரம்மணந்தி ஆஹ ‘‘தே²னிதப்³பா³ன’’ந்திஆதி³. ஓஜாபெக்கா²ய தெ²ய்யாய பவத்தமானாய த⁴ம்மாரம்மணதாபி தஸ்ஸா ஸியா, ஸா பன ந மது⁴ரா தெ²ய்யகதா சாதி ‘‘பஞ்சகொட்டா²ஸான’’ந்தி வுத்தங். காமஞ்ச தங் க³ந்தா⁴ரம்மணங் கேனசி பரிக்³க³ஹிதங் ந ஹோதீதி ஆதி³யிதுங் ஸக்கா, ஸத்தா²ரா பன அனநுஞ்ஞாதத்தா ந யுத்தோ தஸ்ஸ பரிபோ⁴கோ³. யங் பன தேன பி⁴க்கு²னா வுத்தங் ‘‘ந ஹராமி ந ப⁴ஞ்ஜாமீ’’தி, தஸ்ஸபி அயமேவ பரிஹாரோ. வண்ணீயதி ப²லங் ஏதேனாதி வண்ணங், காரணந்தி வுத்தங் ‘‘வண்ணேனாதி காரணேனா’’தி.
Ekaṅgametaṃtheyyānanti ārammaṇavasena theyyavatthūsu vibhajiyamānesu ekamaṅgametaṃ gandhārammaṇanti āha ‘‘thenitabbāna’’ntiādi. Ojāpekkhāya theyyāya pavattamānāya dhammārammaṇatāpi tassā siyā, sā pana na madhurā theyyakatā cāti ‘‘pañcakoṭṭhāsāna’’nti vuttaṃ. Kāmañca taṃ gandhārammaṇaṃ kenaci pariggahitaṃ na hotīti ādiyituṃ sakkā, satthārā pana ananuññātattā na yutto tassa paribhogo. Yaṃ pana tena bhikkhunā vuttaṃ ‘‘na harāmi na bhañjāmī’’ti, tassapi ayameva parihāro. Vaṇṇīyati phalaṃ etenāti vaṇṇaṃ, kāraṇanti vuttaṃ ‘‘vaṇṇenāti kāraṇenā’’ti.
தஸ்மிந்தி தஸ்மிங் பி⁴க்கு²ஸ்மிங். ஆகிண்ணகம்மந்தோதி தண்ஹாதி³ட்டி²ஆதி³வஸேன அகுஸலகம்மந்தோ தி³ட்டி²மோஹதண்ஹாதி³வஸேன ஆதி³தோ பட்டா²ய குஸலகம்மானங் படிக்கே²பனதோ. தி³ட்டி²வஸேன ச கதி²னகக்க²ளக²ரிக³தத்தா ‘‘அகீ²ணகம்மந்தோ கக்க²ளகம்மந்தோ’’தி வுத்தங்.
Tasminti tasmiṃ bhikkhusmiṃ. Ākiṇṇakammantoti taṇhādiṭṭhiādivasena akusalakammanto diṭṭhimohataṇhādivasena ādito paṭṭhāya kusalakammānaṃ paṭikkhepanato. Diṭṭhivasena ca kathinakakkhaḷakharigatattā ‘‘akhīṇakammanto kakkhaḷakammanto’’ti vuttaṃ.
ஆகிண்ணலுத்³தோ³தி ஆகிண்ணோ ஹுத்வா கக்க²ளோ. தேனாஹ ‘‘ப³ஹுபாபோ’’திஆதி³. மக்கி²தோதி லித்தோ. தந்தி தே³வதாசோத³னங். தஸ்மாதி அதிக்கம்ம டி²தத்தா‘‘த்வஞ்சாரஹாமி வத்தவே’’தி ஏவமாஹ.
Ākiṇṇaluddoti ākiṇṇo hutvā kakkhaḷo. Tenāha ‘‘bahupāpo’’tiādi. Makkhitoti litto. Tanti devatācodanaṃ. Tasmāti atikkamma ṭhitattā‘‘tvañcārahāmi vattave’’ti evamāha.
க³வேஸந்தஸ்ஸ அத்தனோ ஸந்தானே உப்பாத³னவஸேன பரியேஸந்தஸ்ஸ. அனேகயோஜனாயாமவித்தா²ரங் க³க³னதலங் ப்³யாபெத்வா உப்பன்னவலாஹககூடப்பமாணங் விய. ஸுத்³தோ⁴தி ஸீலேன பரிஸுத்³தோ⁴ அயந்தி ஜானாஸி. ஸுக³திந்தி ஸுந்த³ரனிப்³ப³த்திங். தேன நிப்³பா³னஸ்ஸபி ஸங்க³ஹோ ஸித்³தோ⁴.
Gavesantassa attano santāne uppādanavasena pariyesantassa. Anekayojanāyāmavitthāraṃ gaganatalaṃ byāpetvā uppannavalāhakakūṭappamāṇaṃ viya. Suddhoti sīlena parisuddho ayanti jānāsi. Sugatinti sundaranibbattiṃ. Tena nibbānassapi saṅgaho siddho.
க³ந்த⁴த்தே²னஸுத்தவண்ணனா நிட்டி²தா.
Gandhatthenasuttavaṇṇanā niṭṭhitā.
ஸாரத்த²ப்பகாஸினியா ஸங்யுத்தனிகாய-அட்ட²கதா²ய
Sāratthappakāsiniyā saṃyuttanikāya-aṭṭhakathāya
வனஸங்யுத்தவண்ணனாய லீனத்த²ப்பகாஸனா ஸமத்தா.
Vanasaṃyuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 14. க³ந்த⁴த்தே²னஸுத்தங் • 14. Gandhatthenasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 14. க³ந்த⁴த்தே²னஸுத்தவண்ணனா • 14. Gandhatthenasuttavaṇṇanā
