| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. கா³ரவஸுத்தவண்ணனா
2. Gāravasuttavaṇṇanā
173. அயங் விதக்கோதி அயங் ‘‘கிந்தாஹங் விஹரெய்ய’’ந்தி ஏவங் பவத்திதவிதக்கோ. அஞ்ஞஸ்மிந்தி பரஸ்மிங். அத்தா ந ஹோதீதி ஹி அஞ்ஞோ, பரோ. ஸோ பனெத்த² ந யோ கோசி அதி⁴ப்பேதோ, அத² கோ² க³ருட்டா²னீயோ. தேனாஹ ‘‘கஞ்சி க³ருட்டா²னே அட்ட²பெத்வா’’தி. பதிஸ்ஸவதி க³ருனோ ‘‘ஆமா’’தி ஸம்படிச்ச²தீதி பதிஸ்ஸோ, ந பதிஸ்ஸோதி அப்பதிஸ்ஸோ. பதிஸ்ஸயரஹிதோ க³ருபஸ்ஸயரஹிதோதி அத்தோ².
173.Ayaṃvitakkoti ayaṃ ‘‘kintāhaṃ vihareyya’’nti evaṃ pavattitavitakko. Aññasminti parasmiṃ. Attā na hotīti hi añño, paro. So panettha na yo koci adhippeto, atha kho garuṭṭhānīyo. Tenāha ‘‘kañci garuṭṭhāne aṭṭhapetvā’’ti. Patissavati garuno ‘‘āmā’’ti sampaṭicchatīti patisso, na patissoti appatisso. Patissayarahito garupassayarahitoti attho.
ஸதே³வகேதி அவயவேன விக்³க³ஹோ ஸமுதா³யோ ஸமாஸத்தோ². ஸதே³வகக்³க³ஹணேன பஞ்சகாமாவசரதே³வக்³க³ஹணங் பாரிஸேஸஞாயேன இதரேஸங் பத³ந்தரேஹி ஸங்க³ஹிதத்தா, ஸமாரகக்³க³ஹணேன ச²ட்ட²காமாவசரதே³வக்³க³ஹணங் பச்சாஸத்திஞாயேன. தத்த² ஹி மாரோ ஜாதோ தன்னிவாஸீ ச ஹோதி. ஸப்³ரஹ்மகவசனேன ப்³ரஹ்மகாயிகாதி³ப்³ரஹ்மக்³க³ஹணங் பச்சாஸத்திஞாயேனேவ. ‘‘ஸஸ்ஸமணப்³ராஹ்மணியா பஜாயா’’தி ஸாஸனஸ்ஸ பச்சத்தி²கஸமணப்³ராஹ்மணக்³க³ஹணங். நித³ஸ்ஸனமத்தஞ்சேதங் அபச்சத்தி²கானங் அஸமிதபாபானங் அபா³ஹிதபாபானஞ்ச ஸமணப்³ராஹ்மணானங் தேனேவ வசனேன க³ஹிதத்தா. காமங் ‘‘ஸதே³வகே’’திஆதி³விஸேஸனானங் வஸேன ஸத்தவிஸயோ லோகஸத்³தோ³தி விஞ்ஞாயதி துல்யயோக³விஸயத்தா தேஸங். ‘‘ஸலோமகோ ஸபக்க²கோ’’திஆதீ³ஸு பன அதுல்யயோகே³பி அயங் ஸமாஸோ லப்³ப⁴தீதி ப்³யபி⁴சாரத³ஸ்ஸனதோ பஜாக³ஹணந்தி பஜாவசனேன ஸத்தலோகக்³க³ஹணங். தே³வபா⁴வஸாமஞ்ஞேன மாரப்³ரஹ்மேஸு க³ஹிதேஸுபி இதரேஹி தேஸங் லப்³ப⁴மானவிஸேஸத³ஸ்ஸனத்த²ங் விஸுங் க³ஹணந்தி த³ஸ்ஸெந்தோ ‘‘மாரோ நாமா’’திஆதி³மாஹ. மாரோ ப்³ரஹ்மானம்பி விசக்கு²கம்மாய பஹோதீதி ஆஹ ‘‘ஸப்³பே³ஸ’’ந்தி. உபரீதி உபரிபா⁴வே. ப்³ரஹ்மாதி த³ஸஸஹஸ்ஸிப்³ரஹ்மானங் ஸந்தா⁴யாஹ. ததா² சாஹ ‘‘த³ஸஹி அங்கு³லீஹீ’’திஆதி³. இத⁴ தீ³க⁴னிகாயாத³யோ விய பா³ஹிரகானம்பி க³ந்த²னிகாயோ லப்³ப⁴தீதி ஆஹ ‘‘ஏகனிகாயாதி³வஸேனா’’தி.
Sadevaketi avayavena viggaho samudāyo samāsattho. Sadevakaggahaṇena pañcakāmāvacaradevaggahaṇaṃ pārisesañāyena itaresaṃ padantarehi saṅgahitattā, samārakaggahaṇena chaṭṭhakāmāvacaradevaggahaṇaṃ paccāsattiñāyena. Tattha hi māro jāto tannivāsī ca hoti. Sabrahmakavacanena brahmakāyikādibrahmaggahaṇaṃ paccāsattiñāyeneva. ‘‘Sassamaṇabrāhmaṇiyā pajāyā’’ti sāsanassa paccatthikasamaṇabrāhmaṇaggahaṇaṃ. Nidassanamattañcetaṃ apaccatthikānaṃ asamitapāpānaṃ abāhitapāpānañca samaṇabrāhmaṇānaṃ teneva vacanena gahitattā. Kāmaṃ ‘‘sadevake’’tiādivisesanānaṃ vasena sattavisayo lokasaddoti viññāyati tulyayogavisayattā tesaṃ. ‘‘Salomako sapakkhako’’tiādīsu pana atulyayogepi ayaṃ samāso labbhatīti byabhicāradassanato pajāgahaṇanti pajāvacanena sattalokaggahaṇaṃ. Devabhāvasāmaññena mārabrahmesu gahitesupi itarehi tesaṃ labbhamānavisesadassanatthaṃ visuṃ gahaṇanti dassento ‘‘māro nāmā’’tiādimāha. Māro brahmānampi vicakkhukammāya pahotīti āha ‘‘sabbesa’’nti. Uparīti uparibhāve. Brahmāti dasasahassibrahmānaṃ sandhāyāha. Tathā cāha ‘‘dasahi aṅgulīhī’’tiādi. Idha dīghanikāyādayo viya bāhirakānampi ganthanikāyo labbhatīti āha ‘‘ekanikāyādivasenā’’ti.
வத்து²விஜ்ஜாதீ³தி ஆதி³-ஸத்³தே³ன விஜ்ஜாட்டா²னானி ஸங்க³ஹிதானி. யதா²ஸகங் கம்மகிலேஸேஹி பஜாதத்தா நிப்³ப³த்தத்தா பஜா, ஸத்தனிகாயோ. தஸ்ஸா பஜாய. ஸதே³வமனுஸ்ஸாயாதி வா இமினா ஸம்முதிதே³வக்³க³ஹணங் தத³வஸிட்ட²மனுஸ்ஸலோகக்³க³ஹணஞ்ச த³ட்ட²ப்³ப³ங். ஏவங் பா⁴க³ஸோ லோகங் க³ஹெத்வா யோஜனங் த³ஸ்ஸெத்வா இதா³னி அபா⁴க³ஸோ லோகங் க³ஹெத்வா யோஜனங் த³ஸ்ஸேதுங் ‘‘அபிசெத்தா²’’திஆதி³ வுத்தங். லோகவஸேன வுத்தானி ‘‘லோகீயந்தி எத்த² கம்மகம்மப²லானீ’’தி கத்வா, பஜாவஸேன ‘‘ஹேதுபச்சயேஹி பஜாயதீ’’தி கத்வா. ஸீலஸம்பன்னதரந்தி எத்த² பரிபுண்ணஸம்பன்னதா அதி⁴ப்பேதா ‘‘ஸம்பன்னங் ஸாலிகேதா³ர’’ந்திஆதீ³ஸு (ஜா॰ 1.14.1) விய. தேனாஹ ‘‘அதி⁴கதரந்தி அத்தோ²’’தி. பரிபுண்ணம்பி ‘‘அதி⁴கதர’’ந்தி வத்தப்³ப³தமரஹதி. ஸேஸேஸூதி ‘‘ஸமாதி⁴ஸம்பன்னதர’’ந்திஆதீ³ஸு.
Vatthuvijjādīti ādi-saddena vijjāṭṭhānāni saṅgahitāni. Yathāsakaṃ kammakilesehi pajātattā nibbattattā pajā, sattanikāyo. Tassā pajāya. Sadevamanussāyāti vā iminā sammutidevaggahaṇaṃ tadavasiṭṭhamanussalokaggahaṇañca daṭṭhabbaṃ. Evaṃ bhāgaso lokaṃ gahetvā yojanaṃ dassetvā idāni abhāgaso lokaṃ gahetvā yojanaṃ dassetuṃ ‘‘apicetthā’’tiādi vuttaṃ. Lokavasena vuttāni ‘‘lokīyanti ettha kammakammaphalānī’’ti katvā, pajāvasena ‘‘hetupaccayehi pajāyatī’’ti katvā. Sīlasampannataranti ettha paripuṇṇasampannatā adhippetā ‘‘sampannaṃ sālikedāra’’ntiādīsu (jā. 1.14.1) viya. Tenāha ‘‘adhikataranti attho’’ti. Paripuṇṇampi ‘‘adhikatara’’nti vattabbatamarahati. Sesesūti ‘‘samādhisampannatara’’ntiādīsu.
காரணந்திஆதீ³ஸு காரணந்தி யுத்திங். அத்த²ந்தி அவிபரீதத்த²ங். வுட்³டி⁴ந்தி அபி⁴வுட்³டி⁴னிமித்தங்.
Kāraṇantiādīsu kāraṇanti yuttiṃ. Atthanti aviparītatthaṃ. Vuḍḍhinti abhivuḍḍhinimittaṃ.
இமினா வசனேனாதி இமஸ்மிங் ஸுத்தே அனந்தரங் வுத்தவசனேன. ந கேவலங் இமினாவ, ஸுத்தந்தரம்பி ஆனெத்வா படிபா³ஹிதப்³போ³தி த³ஸ்ஸெந்தோ ‘‘ந மே ஆசரியோ அத்தீ²’’திஆதி³மாஹ. எத்த² யங் வத்தப்³ப³ங், தங் ஸுமங்க³லவிலாஸினியா தீ³க⁴னிகாயட்ட²கதா²ய (தீ³॰ நி॰ அட்ட²॰ 3.162) வுத்தமேவ. ஸரந்தி கரணே ஏதங் பச்சத்தவசனந்தி ஆஹ ‘‘ஸரந்தேனா’’தி, ஸரந்தி வா ஸரணஹேதூதி அத்தோ².
Iminā vacanenāti imasmiṃ sutte anantaraṃ vuttavacanena. Na kevalaṃ imināva, suttantarampi ānetvā paṭibāhitabboti dassento ‘‘na me ācariyo atthī’’tiādimāha. Ettha yaṃ vattabbaṃ, taṃ sumaṅgalavilāsiniyā dīghanikāyaṭṭhakathāya (dī. ni. aṭṭha. 3.162) vuttameva. Saranti karaṇe etaṃ paccattavacananti āha ‘‘sarantenā’’ti, saranti vā saraṇahetūti attho.
கா³ரவஸுத்தவண்ணனா நிட்டி²தா.
Gāravasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. கா³ரவஸுத்தங் • 2. Gāravasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. கா³ரவஸுத்தவண்ணனா • 2. Gāravasuttavaṇṇanā
