| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. கி³ஞ்ஜகாவஸத²ஸுத்தவண்ணனா
3. Giñjakāvasathasuttavaṇṇanā
97. இதோ பட்டா²யாதி ‘‘தா⁴துங், பி⁴க்க²வே’’தி இமஸ்மா ததியஸுத்ததோ பட்டா²ய. யாவ கம்மவக்³கோ³, தாவ நெத்வா உபக³ந்த்வா ஸேதி எத்தா²தி ஆஸயோ, ஹீனாதி³பா⁴வேன அதீ⁴னோ ஆஸயோ அஜ்ஜா²ஸயோ, தங் அஜ்ஜா²ஸயங், அதி⁴முத்தந்தி அத்தோ². ஸஞ்ஞா உப்பஜ்ஜதீதிஆதீ³ஸு ஹீனாதி³பே⁴த³ங் அஜ்ஜா²ஸயங் படிச்ச ஹீனாதி³பே⁴தா³ ஸஞ்ஞா, தன்னிஸ்ஸயதி³ட்டி²விகப்பனா, விதக்கோ ச உப்பஜ்ஜதி ஸஹஜாதகோடியா உபனிஸ்ஸயகோடியா ச. ஸத்தா²ரேஸூதி தேஸங் ஸத்து²படிஞ்ஞதாய வுத்தங், ந ஸத்து²லக்க²ணஸப்³பா⁴வதோ. அஸம்மாஸம்பு³த்³தே⁴ஸூதி ஆதா⁴ரே விஸயே ச பு⁴ம்மங் ஏகதோ கத்வா வுத்தந்தி பட²மங் தாவ த³ஸ்ஸெந்தோ ‘‘மயங் ஸம்மாஸம்பு³த்³தா⁴’’திஆதி³ங் வத்வா இதரங் த³ஸ்ஸெந்தோ ‘‘தேஸு ஸம்மாஸம்பு³த்³தா⁴ ஏதே’’திஆதி³மாஹ. தேஸங் ‘‘மயங் ஸம்மாஸம்பு³த்³தா⁴’’தி உப்பன்னதி³ட்டி² இத⁴ மூலபா⁴வேன புச்சி²தா, இதரா அனுஸங்கிதாதி புச்ச²தியேவாதி ஸாஸங்கங் வத³தி.
97.Ito paṭṭhāyāti ‘‘dhātuṃ, bhikkhave’’ti imasmā tatiyasuttato paṭṭhāya. Yāva kammavaggo, tāva netvā upagantvā seti etthāti āsayo, hīnādibhāvena adhīno āsayo ajjhāsayo, taṃ ajjhāsayaṃ, adhimuttanti attho. Saññā uppajjatītiādīsu hīnādibhedaṃ ajjhāsayaṃ paṭicca hīnādibhedā saññā, tannissayadiṭṭhivikappanā, vitakko ca uppajjati sahajātakoṭiyā upanissayakoṭiyā ca. Satthāresūti tesaṃ satthupaṭiññatāya vuttaṃ, na satthulakkhaṇasabbhāvato. Asammāsambuddhesūti ādhāre visaye ca bhummaṃ ekato katvā vuttanti paṭhamaṃ tāva dassento ‘‘mayaṃ sammāsambuddhā’’tiādiṃ vatvā itaraṃ dassento ‘‘tesu sammāsambuddhā ete’’tiādimāha. Tesaṃ ‘‘mayaṃ sammāsambuddhā’’ti uppannadiṭṭhi idha mūlabhāvena pucchitā, itarā anusaṅkitāti pucchatiyevāti sāsaṅkaṃ vadati.
‘‘மஹதீ’’தி எத்த² மஹாஸத்³தோ³ ‘‘மஹாஜனோ’’திஆதீ³ஸு விய ப³ஹுஅத்த²வாசகோதி த³ட்ட²ப்³போ³. அவிஜ்ஜாபி ஹீனஹீனதரஹீனதமாதி³பே⁴தே³ன ப³ஹுபகாரா. தஸ்ஸாதி தி³ட்டி²யா. கஸ்மா பனெத்த² ‘‘யதி³த³ங் அவிஜ்ஜா தா⁴தூ’’தி அவிஜ்ஜங் உத்³த⁴ரித்வா ‘‘ஹீனங் தா⁴துங் படிச்சா’’தி அஜ்ஜா²ஸயதா⁴து நித்³தி³ட்டா²தி? ந கோ² பனேதங் ஏவங் த³ட்ட²ப்³ப³ங், ‘‘அஞ்ஞங் உத்³த⁴ரித்வா அஞ்ஞங் நித்³தி³ட்டா²’’தி, யதோ அவிஜ்ஜாஸீஸேன அஜ்ஜா²ஸயதா⁴து ஏவ க³ஹிதா. அவிஜ்ஜாக³ஹிதோ ஹி புரிஸபுக்³க³லோ தி³ட்ட²ஜ்ஜா²ஸயோ ஹீனாதி³பே⁴த³ங் அவிஜ்ஜாதா⁴துங் நிஸ்ஸாய ததோ ஸஞ்ஞாதி³ட்டி²ஆதி³கே ஸங்கப்பேதி. பணிதி⁴ பத்த²னா, ஸா பன ததா² ததா² சித்தஸ்ஸ ட²பனவஸேன ஹோதீதி ஆஹ ‘‘சித்தட்ட²பன’’ந்தி. தேனாஹ ‘‘ஸா பனேஸா’’திஆதி³. ஏதேதி ஹீனபச்சயா ஸஞ்ஞாதி³ட்டி²விதக்கசேதனா பத்த²னா பணிதி⁴ஸங்கா²தா ஹீனா த⁴ம்மா. ஹீனோ நாம ஹீனத⁴ம்மஸமாயோக³தோ. ஸப்³ப³பதா³னீதி ‘‘பஞ்ஞபேதீ’’திஆதீ³னி பதா³னி யோஜேதப்³பா³னி ஹீனஸத்³தே³ன மஜ்ஜி²முத்தமட்டா²னந்தரஸ்ஸ அஸம்ப⁴வதோ. உபபஜ்ஜனங் ‘‘உபபத்தீ’’தி ஆஹ ‘‘த்³வே உபபத்தியோ படிலாபோ⁴ ச நிப்³ப³த்தி சா’’தி. தத்த² ஹீனகுலாதீ³தி ஆதி³-ஸத்³தே³ன ஹீனரூபபோ⁴க³பரிஸாதீ³னங் ஸங்க³ஹோ. ஹீனத்திகவஸேனாதி ஹீனத்திகே வுத்தத்திகபத³வஸேனாதி அதி⁴ப்பாயோ. சித்துப்பாத³க்க²ணேதி இத³ங் ஹீனத்திகபரியாபன்னானங் சித்துப்பாதா³னங் வஸேன தத்த² தத்த² லத்³த⁴த்தா வுத்தங். பஞ்சஸு நீசகுலேஸூதி சண்டா³லவேனநேஸாத³ரத²காரபுக்குஸகுலேஸு. த்³வாத³ஸஅகுஸலசித்துப்பாதா³னங் பன யோ கோசி படிலாபோ⁴ ஹீனோதி யோஜனா. ஸேஸத்³வயேபி ஏஸேவ நயோ. இமஸ்மிங் டா²னேதி ‘‘யாயங், ப⁴ந்தே, தி³ட்டீ²’’திஆதி³னா ஆக³தே இமஸ்மிங் டா²னே. ‘‘தா⁴துங், பி⁴க்க²வே, படிச்ச உப்பஜ்ஜதீ’’திஆதி³னா ஆக³தத்தா நிப்³ப³த்தியேவ அதி⁴ப்பேதா, ந படிலாபோ⁴.
‘‘Mahatī’’ti ettha mahāsaddo ‘‘mahājano’’tiādīsu viya bahuatthavācakoti daṭṭhabbo. Avijjāpi hīnahīnatarahīnatamādibhedena bahupakārā. Tassāti diṭṭhiyā. Kasmā panettha ‘‘yadidaṃ avijjā dhātū’’ti avijjaṃ uddharitvā ‘‘hīnaṃ dhātuṃ paṭiccā’’ti ajjhāsayadhātu niddiṭṭhāti? Na kho panetaṃ evaṃ daṭṭhabbaṃ, ‘‘aññaṃ uddharitvā aññaṃ niddiṭṭhā’’ti, yato avijjāsīsena ajjhāsayadhātu eva gahitā. Avijjāgahito hi purisapuggalo diṭṭhajjhāsayo hīnādibhedaṃ avijjādhātuṃ nissāya tato saññādiṭṭhiādike saṅkappeti. Paṇidhi patthanā, sā pana tathā tathā cittassa ṭhapanavasena hotīti āha ‘‘cittaṭṭhapana’’nti. Tenāha ‘‘sā panesā’’tiādi. Eteti hīnapaccayā saññādiṭṭhivitakkacetanā patthanā paṇidhisaṅkhātā hīnā dhammā. Hīno nāma hīnadhammasamāyogato. Sabbapadānīti ‘‘paññapetī’’tiādīni padāni yojetabbāni hīnasaddena majjhimuttamaṭṭhānantarassa asambhavato. Upapajjanaṃ ‘‘upapattī’’ti āha ‘‘dve upapattiyo paṭilābho ca nibbatti cā’’ti. Tattha hīnakulādīti ādi-saddena hīnarūpabhogaparisādīnaṃ saṅgaho. Hīnattikavasenāti hīnattike vuttattikapadavasenāti adhippāyo. Cittuppādakkhaṇeti idaṃ hīnattikapariyāpannānaṃ cittuppādānaṃ vasena tattha tattha laddhattā vuttaṃ. Pañcasu nīcakulesūti caṇḍālavenanesādarathakārapukkusakulesu. Dvādasaakusalacittuppādānaṃ pana yo koci paṭilābho hīnoti yojanā. Sesadvayepi eseva nayo. Imasmiṃ ṭhāneti ‘‘yāyaṃ, bhante, diṭṭhī’’tiādinā āgate imasmiṃ ṭhāne. ‘‘Dhātuṃ, bhikkhave, paṭicca uppajjatī’’tiādinā āgatattā nibbattiyeva adhippetā, na paṭilābho.
கி³ஞ்ஜகாவஸத²ஸுத்தவண்ணனா நிட்டி²தா.
Giñjakāvasathasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. கி³ஞ்ஜகாவஸத²ஸுத்தங் • 3. Giñjakāvasathasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. கி³ஞ்ஜகாவஸத²ஸுத்தவண்ணனா • 3. Giñjakāvasathasuttavaṇṇanā
