| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
3. கோ³தி⁴கஸுத்தவண்ணனா
3. Godhikasuttavaṇṇanā
159. பப்³ப³தஸ்ஸ பஸ்ஸேதி பப்³ப³தபாதே³ உபச்சகாயங். ஸமயே ஸமயே லத்³த⁴த்தா ஸாமயிகங். தேனாஹ ‘‘அப்பிதப்பிதக்க²ணே பச்சனீகத⁴ம்மேஹி விமுச்சதீ’’தி. லோகியவிமுத்தி ஹி அனச்சந்தபஹாயிதாய ஸமயவிமுத்தி நாம, லோகுத்தரவிமுத்தி அச்சந்தபஹாயிதாய அஸமயவிமுத்தி. தாஹி ஸமன்னாக³தா ‘‘ஸமயவிமுத்தா, அஸமயவிமுத்தா’’தி ச வுச்சந்தி. யாவ பட²மஜ்ஜா²னநிப்³ப³த்தனங், தாவ கஸ்மா பரிஹாயீதி அத்தோ²? ஸாபா³த⁴த்தாதி ஸரோக³த்தா. வாதபித்தஸெம்ஹவஸேனாதி கதா³சி வாதபித்தவஸேன, கதா³சி வாதஸெம்ஹவஸேன, உபி⁴ன்னம்பி ஸன்னிபாதவஸேன. அனுஸாயிகோதி காயங் அனுக³ந்த்வா ஸயிதோ, யாப்யாமயபா⁴வேன டி²தோதி அத்தோ². ஸமாதி⁴ஸ்ஸாதி ஸமாதி⁴பா⁴வனாய. உபகாரகத⁴ம்மே உதுபோ⁴ஜனாதி³கே. பூரேதுந்தி ஸமோதா⁴னேதுங். பரிஹாயீதி ஸரீரஸ்ஸ அகல்லபா⁴வதோ.
159.Pabbatassa passeti pabbatapāde upaccakāyaṃ. Samaye samaye laddhattā sāmayikaṃ. Tenāha ‘‘appitappitakkhaṇe paccanīkadhammehi vimuccatī’’ti. Lokiyavimutti hi anaccantapahāyitāya samayavimutti nāma, lokuttaravimutti accantapahāyitāya asamayavimutti. Tāhi samannāgatā ‘‘samayavimuttā, asamayavimuttā’’ti ca vuccanti. Yāva paṭhamajjhānanibbattanaṃ, tāva kasmā parihāyīti attho? Sābādhattāti sarogattā. Vātapittasemhavasenāti kadāci vātapittavasena, kadāci vātasemhavasena, ubhinnampi sannipātavasena. Anusāyikoti kāyaṃ anugantvā sayito, yāpyāmayabhāvena ṭhitoti attho. Samādhissāti samādhibhāvanāya. Upakārakadhamme utubhojanādike. Pūretunti samodhānetuṃ. Parihāyīti sarīrassa akallabhāvato.
ஆஹரெய்யந்தி ஜீவிதஹரணத்தா²ய உபனெய்யங். நிப³த்³தா⁴ க³தி ஹோதி கேவலங் ப்³ரஹ்மலோகூபபத்திதோ, ந ஸோதாபன்னாதீ³னங் விய பரிச்சி²ன்னபா⁴வேன. தேனாஹ ‘‘ப்³ரஹ்மலோகே நிப்³ப³த்ததீ’’தி.
Āhareyyanti jīvitaharaṇatthāya upaneyyaṃ. Nibaddhā gati hoti kevalaṃ brahmalokūpapattito, na sotāpannādīnaṃ viya paricchinnabhāvena. Tenāha ‘‘brahmaloke nibbattatī’’ti.
ஜலமானாதி ஸமுட்டி²தனியதஇத்³தி⁴யா அனஞ்ஞஸாதா⁴ரணபரிவாரஸம்பத்தியா ச ஸதே³வகே லோகே ஜலமானா. மங்ஸசக்கு² தி³ப்³ப³சக்கு² த⁴ம்மசக்கு² பஞ்ஞாசக்கு² ஸமந்தசக்கூ²தி பஞ்சஹி சக்கூ²ஹி சக்கு²மா. ஆனுபா⁴வத⁴ராதி அசிந்தெய்யாபரிமெய்யபு³த்³தா⁴னுபா⁴வஸம்பன்னா. ஆனுபா⁴வபரியாயோபி ஹி ஜுதி-ஸத்³தோ³ ஹோதி ‘‘இத்³தி⁴ஜுதிப³லவீரியூபபத்தீ’’திஆதீ³ஸு (ஜா॰ 2.22.1589, 1595) விய. அனவஸேஸதோ மானங் ஸியதி ஸமுச்சி²ந்த³தீதி அக்³க³மக்³கோ³ மானஸங். தன்னிப்³ப³த்தனா பன அரஹத்தஸ்ஸ மானஸதா த³ட்ட²ப்³பா³. ஸீலாதீ³னீதி அனுத்தரஸீலாதீ³னி. ஸிக்க²மானோதி ஸிக்கா²னி பா⁴வெந்தோ அத்தனோ ஸந்தானே உப்பாதெ³ந்தோ. ந சித்தபா⁴வனா. தேனாஹ ‘‘ஸகரணீயோ’’தி. ஜனேதி ஸத்தஸ்ஸ காயே, ஸதே³வகே லோகேதி அத்தோ². விஸ்ஸுதாதி அனஞ்ஞஸாதா⁴ரணேஹி ஸீலாதி³கு³ணேஹி விஸ்ஸுதா.
Jalamānāti samuṭṭhitaniyataiddhiyā anaññasādhāraṇaparivārasampattiyā ca sadevake loke jalamānā. Maṃsacakkhu dibbacakkhu dhammacakkhu paññācakkhu samantacakkhūti pañcahi cakkhūhi cakkhumā. Ānubhāvadharāti acinteyyāparimeyyabuddhānubhāvasampannā. Ānubhāvapariyāyopi hi juti-saddo hoti ‘‘iddhijutibalavīriyūpapattī’’tiādīsu (jā. 2.22.1589, 1595) viya. Anavasesato mānaṃ siyati samucchindatīti aggamaggo mānasaṃ. Tannibbattanā pana arahattassa mānasatā daṭṭhabbā. Sīlādīnīti anuttarasīlādīni. Sikkhamānoti sikkhāni bhāvento attano santāne uppādento. Na cittabhāvanā. Tenāha ‘‘sakaraṇīyo’’ti. Janeti sattassa kāye, sadevake loketi attho. Vissutāti anaññasādhāraṇehi sīlādiguṇehi vissutā.
வேத³னங் விக்க²ம்பெ⁴த்வாதி உப்பன்னங் து³க்க²வேத³னங் படிச்ச உப்பன்னஅத்தகிலமத²ங் அனுப்பாத³னவஸேன விக்க²ம்பெ⁴த்வா தங்யேவ வேத³னங் பரிக்³க³ஹெத்வா பவத்தவிபஸ்ஸனா வீதி²மேவ ஓதரதீதி கத்வா மூலகம்மட்டா²னந்தி வுத்தங். ‘‘ஸமஸீஸீ ஹுத்வா பரினிப்³பா³யீ’’தி வத்வா தஸ்ஸ பபே⁴த³ங் விப⁴ஜித்வா இதா⁴தி⁴ப்பேதங் த³ஸ்ஸேதுங் ‘‘ஸமஸீஸீ நாம திவிதோ⁴ ஹோதீ’’திஆதி³மாஹ. இரியாபத²வஸேன ஸமஸீஸீ இரியாபத²ஸமஸீஸீ. ஏஸ நயோ ஸேஸத்³வயேபி.
Vedanaṃ vikkhambhetvāti uppannaṃ dukkhavedanaṃ paṭicca uppannaattakilamathaṃ anuppādanavasena vikkhambhetvā taṃyeva vedanaṃ pariggahetvā pavattavipassanā vīthimeva otaratīti katvā mūlakammaṭṭhānanti vuttaṃ. ‘‘Samasīsī hutvā parinibbāyī’’ti vatvā tassa pabhedaṃ vibhajitvā idhādhippetaṃ dassetuṃ ‘‘samasīsī nāma tividho hotī’’tiādimāha. Iriyāpathavasena samasīsī iriyāpathasamasīsī. Esa nayo sesadvayepi.
இரியாபத²கோபனஞ்சாதி இரியாபதே²ஹி அஸமாயோகோ³. ஏகப்பஹாரேனேவாதி ஏகவேலாயமேவ. பரினிப்³பா³னவஸேனாதி அனுபாதி³ஸேஸபரினிப்³பா³னவஸேன, ந கிலேஸக்க²யமத்தேன. எத்தா²தி ஏதேஸு த்³வீஸு நயேஸு. ஏவங் ஸதி தேனேவ இரியாபதே²ன விபஸ்ஸனங் பட்ட²பெத்வா தேனேவ இரியாபதே²ன, ஏகஸ்மிங் அந்தோரோகே³யேவ விபஸ்ஸனங் பட்ட²பெத்வா அரஹத்தங் பத்வா தேனேவ ரோகே³ன பரினிப்³பா³யந்தா கீ²ணாஸவா ப³ஹவோபி ஸமஸீஸினோ ஏவ ஸம்ப⁴வெய்யுங். தஸ்மா வுத்தனயேனேவ அத்தோ² வேதி³தப்³போ³.
Iriyāpathakopanañcāti iriyāpathehi asamāyogo. Ekappahārenevāti ekavelāyameva. Parinibbānavasenāti anupādisesaparinibbānavasena, na kilesakkhayamattena. Etthāti etesu dvīsu nayesu. Evaṃ sati teneva iriyāpathena vipassanaṃ paṭṭhapetvā teneva iriyāpathena, ekasmiṃ antorogeyeva vipassanaṃ paṭṭhapetvā arahattaṃ patvā teneva rogena parinibbāyantā khīṇāsavā bahavopi samasīsino eva sambhaveyyuṃ. Tasmā vuttanayeneva attho veditabbo.
ஸீஸஞ்செத்த² தேரஸ – பலிபோ³த⁴ஸீஸங் தண்ஹா, ப³ந்த⁴னஸீஸங் மானோ, பராமாஸஸீஸங் தி³ட்டி², விக்கே²பஸீஸங் உத்³த⁴ச்சங், கிலேஸஸீஸங் அவிஜ்ஜா, அதி⁴மொக்க²ஸீஸங் ஸத்³தா⁴, பக்³க³ஹஸீஸங் வீரியங், உபட்டா²னஸீஸங் ஸதி, அவிக்கே²பஸீஸங் ஸமாதி⁴, த³ஸ்ஸனஸீஸங் பஞ்ஞா, பவத்திஸீஸங் ஜீவிதிந்த்³ரியங், கோ³சரஸீஸங் விமொக்கோ², ஸங்கா²ரஸீஸங் நிரோதோ⁴தி. இமேஸு தேரஸஸு ஸீஸேஸு பலிபோ³த⁴ஸீஸாதீ³னி பவத்திஸீஸஞ்ச பரியாதி³யிதப்³பா³னி, அதி⁴மொக்க²ஸீஸாதீ³னி பரியாதா³யகானி, பரியாதா³யகப²லங் கோ³சரஸீஸங். தஞ்ஹி விஸயஜ்ஜ²த்தங் ப²லங் விமொக்கோ², பரியாதா³யகஸ்ஸ மக்³க³ஸ்ஸ ப²லஸ்ஸ ச ஆரம்மணங் ஸங்கா²ரஸீஸங் ஸங்கா²ரவிவேகபூ⁴தோ நிரோதோ⁴தி பரியாதி³யிதப்³பா³னங் பரியாதா³யகப²லாரம்மணானங் ஸஹ விய ஸங்ஸித்³த⁴ங் த³ஸ்ஸனேன ஸமஸீஸிபா⁴வங் த³ஸ்ஸேதுங் படிஸம்பி⁴தா³யங் தேரஸ ஸீஸானி வுத்தானி. இத⁴ பன ‘‘அபுப்³ப³ங் அசரிமங் ஆஸவபரியாதா³னஞ்ச ஹோதி ஜீவிதபரியாதா³னஞ்சா’’தி (பு॰ ப॰ 16) வசனதோ தேஸு கிலேஸபவத்தஸீஸானமேவ வஸேன யோஜனங் கரொந்தோ ‘‘எத்த² ச பவத்திஸீஸ’’ந்திஆதி³மாஹ.
Sīsañcettha terasa – palibodhasīsaṃ taṇhā, bandhanasīsaṃ māno, parāmāsasīsaṃ diṭṭhi, vikkhepasīsaṃ uddhaccaṃ, kilesasīsaṃ avijjā, adhimokkhasīsaṃ saddhā, paggahasīsaṃ vīriyaṃ, upaṭṭhānasīsaṃ sati, avikkhepasīsaṃ samādhi, dassanasīsaṃ paññā, pavattisīsaṃ jīvitindriyaṃ, gocarasīsaṃ vimokkho, saṅkhārasīsaṃ nirodhoti. Imesu terasasu sīsesu palibodhasīsādīni pavattisīsañca pariyādiyitabbāni, adhimokkhasīsādīni pariyādāyakāni, pariyādāyakaphalaṃ gocarasīsaṃ. Tañhi visayajjhattaṃ phalaṃ vimokkho, pariyādāyakassa maggassa phalassa ca ārammaṇaṃ saṅkhārasīsaṃ saṅkhāravivekabhūto nirodhoti pariyādiyitabbānaṃ pariyādāyakaphalārammaṇānaṃ saha viya saṃsiddhaṃ dassanena samasīsibhāvaṃ dassetuṃ paṭisambhidāyaṃ terasa sīsāni vuttāni. Idha pana ‘‘apubbaṃ acarimaṃ āsavapariyādānañca hoti jīvitapariyādānañcā’’ti (pu. pa. 16) vacanato tesu kilesapavattasīsānameva vasena yojanaṃ karonto ‘‘ettha ca pavattisīsa’’ntiādimāha.
தத்த² பவத்திஸீஸங் பவத்ததோ வுட்ட²ஹந்தோ மக்³கோ³ சுதிதோ உத்³த⁴ங் அப்பவத்திகரணவஸேன யதி³பி பரியாதீ³யதி, யாவ பன சுதி, தாவ பவத்திஸப்³பா⁴வதோ ‘‘பவத்திஸீஸங் ஜீவிதிந்த்³ரியங் சுதிசித்தங் கே²பேதீ’’தி ஆஹ. கிலேஸபரியாதா³னேன பன மக்³க³சித்தேன அத்தனோ அனந்தரங் விய நிப்பா²தே³தப்³பா³ பச்சவெக்க²ணவாரா ச கிலேஸபரியாதா³னஸ்ஸேவ வாராதி வத்தப்³ப³தங் அரஹந்தி. ‘‘விமுத்தஸ்மிங் விமுத்தமிதி ஞாணங் ஹோதீ’’தி (ம॰ நி॰ 1.78; ஸங்॰ நி॰ 3.12) வசனதோ பச்சவெக்க²ணபரிஸமாபனேன கிலேஸபரியாதா³னங் ஸமாபிதங் நாம ஹோதி, தங் பன பரிஸமாபனங் யதி³ சுதிசித்தேன ஹோதி, தேனேவ ஜீவிதபரிஸமாபனஞ்ச ஹோதீதி இமாய வாரசுதிஸமதாய கிலேஸபரியாதா³னஜீவிதபரியாதா³னானங் அபுப்³பா³சரிமதா வேதி³தப்³பா³தி த³ஸ்ஸெந்தோ ‘‘த்³வின்னங் சித்தானங் ஏகதோ உப்பாதோ³ நத்தீ²’’திஆதி³மாஹ. த்³வின்னங் சித்தானந்தி சுதிசித்தமக்³க³சித்தானங். தந்தி பச்சவெக்க²ணங் பரிபுண்ணஜவனசித்தானங் ஸத்தக்க²த்துங் பவத்தியா, அபரிபுண்ணானங் வா பஞ்சக்க²த்துங் பவத்தியா. கிஞ்சாபி ‘‘ஏகோ வா த்³வே வா’’தி வுத்தங் யதா² ‘‘ஏகங் வா த்³வே வா ததா³ரம்மணசித்தானீ’’தி, ஹெட்டி²மந்தேன பன த்³வே பவத்தந்தி.
Tattha pavattisīsaṃ pavattato vuṭṭhahanto maggo cutito uddhaṃ appavattikaraṇavasena yadipi pariyādīyati, yāva pana cuti, tāva pavattisabbhāvato ‘‘pavattisīsaṃ jīvitindriyaṃ cuticittaṃ khepetī’’ti āha. Kilesapariyādānena pana maggacittena attano anantaraṃ viya nipphādetabbā paccavekkhaṇavārā ca kilesapariyādānasseva vārāti vattabbataṃ arahanti. ‘‘Vimuttasmiṃ vimuttamiti ñāṇaṃ hotī’’ti (ma. ni. 1.78; saṃ. ni. 3.12) vacanato paccavekkhaṇaparisamāpanena kilesapariyādānaṃ samāpitaṃ nāma hoti, taṃ pana parisamāpanaṃ yadi cuticittena hoti, teneva jīvitaparisamāpanañca hotīti imāya vāracutisamatāya kilesapariyādānajīvitapariyādānānaṃ apubbācarimatā veditabbāti dassento ‘‘dvinnaṃ cittānaṃ ekato uppādo natthī’’tiādimāha. Dvinnaṃ cittānanti cuticittamaggacittānaṃ. Tanti paccavekkhaṇaṃ paripuṇṇajavanacittānaṃ sattakkhattuṃ pavattiyā, aparipuṇṇānaṃ vā pañcakkhattuṃ pavattiyā. Kiñcāpi ‘‘eko vā dve vā’’ti vuttaṃ yathā ‘‘ekaṃ vā dve vā tadārammaṇacittānī’’ti, heṭṭhimantena pana dve pavattanti.
உப்பாடெத்வாதி உத்³த⁴ரித்வாதி அத்தோ². அனுபாதி³ஸேஸேனாதி அனுபாதி³ஸேஸனிப்³பா³னேன.
Uppāṭetvāti uddharitvāti attho. Anupādisesenāti anupādisesanibbānena.
தூ⁴மாயிதத்தந்தி தூ⁴மஸ்ஸ விய அயிதபா⁴வங் பவத்திஆகாரங். தூ⁴மஸதி³ஸா வலாஹகா தூ⁴மவலாஹகா, திமிரவலாஹகா, யே மஹிகா ‘‘திமிர’’ந்தி வுச்சந்தி. அப்பதிட்டி²தேனாதி பதிட்ட²ங் அலப⁴ந்தேன. இத்த²ம்பூ⁴தலக்க²ணே ஏதங் கரணவசனங், அனுப்பத்தித⁴ம்மேனாதி அத்தோ². ஸதி ஹி உப்பாதே³ பதிட்டி²தங் நாம ஸியா, அட்ட²கதா²யங் பன யதே³வ தஸ்ஸ விஞ்ஞாணஸ்ஸ அப்பதிட்டா²னகாரணங், ததே³வ பரினிப்³பா³னகாரணந்தி வுத்தங் ‘‘அப்பதிட்டி²தகாரணா’’தி.
Dhūmāyitattanti dhūmassa viya ayitabhāvaṃ pavattiākāraṃ. Dhūmasadisā valāhakā dhūmavalāhakā, timiravalāhakā, ye mahikā ‘‘timira’’nti vuccanti. Appatiṭṭhitenāti patiṭṭhaṃ alabhantena. Itthambhūtalakkhaṇe etaṃ karaṇavacanaṃ, anuppattidhammenāti attho. Sati hi uppāde patiṭṭhitaṃ nāma siyā, aṭṭhakathāyaṃ pana yadeva tassa viññāṇassa appatiṭṭhānakāraṇaṃ, tadeva parinibbānakāraṇanti vuttaṃ ‘‘appatiṭṭhitakāraṇā’’ti.
ஸோகேன பு²ட்ட²ஸ்ஸாதி ‘‘அப²லோ வத மே வாயாமோ ஜாதோ’’தி ஸோகேன அபி⁴பூ⁴தஸ்ஸ. அப⁴ஸ்ஸதா²தி ப³லவஸோகாபி⁴துன்னஸ்ஸ ஸதிஸம்மோஸா ஸிதி²லங் க³ஹிதா ப⁴ஸ்ஸி பதிதா ஸா கச்சா².
Sokena phuṭṭhassāti ‘‘aphalo vata me vāyāmo jāto’’ti sokena abhibhūtassa. Abhassathāti balavasokābhitunnassa satisammosā sithilaṃ gahitā bhassi patitā sā kacchā.
கோ³தி⁴கஸுத்தவண்ணனா நிட்டி²தா.
Godhikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. கோ³தி⁴கஸுத்தங் • 3. Godhikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. கோ³தி⁴கஸுத்தவண்ணனா • 3. Godhikasuttavaṇṇanā
