Library / Tipiṭaka / திபிடக • Tipiṭaka / மஜ்ஜி²மனிகாய • Majjhimanikāya

    9. கோ³லியானிஸுத்தங்

    9. Goliyānisuttaṃ

    173. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன கோ³லியானி 1 நாம பி⁴க்கு² ஆரஞ்ஞிகோ 2 பத³ஸமாசாரோ 3 ஸங்க⁴மஜ்ஜே² ஓஸடோ ஹோதி கேனசிதே³வ கரணீயேன. தத்ர கோ² ஆயஸ்மா ஸாரிபுத்தோ கோ³லியானிங் பி⁴க்கு²ங் ஆரப்³ப⁴ பி⁴க்கூ² ஆமந்தேஸி –

    173. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena goliyāni 4 nāma bhikkhu āraññiko 5 padasamācāro 6 saṅghamajjhe osaṭo hoti kenacideva karaṇīyena. Tatra kho āyasmā sāriputto goliyāniṃ bhikkhuṃ ārabbha bhikkhū āmantesi –

    ‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ஸப்³ரஹ்மசாரீஸு ஸகா³ரவேன ப⁴விதப்³ப³ங் ஸப்பதிஸ்ஸேன. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ ஸப்³ரஹ்மசாரீஸு அகா³ரவோ ஹோதி அப்பதிஸ்ஸோ, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன, யோ அயமாயஸ்மா ஸப்³ரஹ்மசாரீஸு அகா³ரவோ ஹோதி அப்பதிஸ்ஸோ’தி – தஸ்ஸ 7 ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஸப்³ரஹ்மசாரீஸு ஸகா³ரவேன ப⁴விதப்³ப³ங் ஸப்பதிஸ்ஸேன.

    ‘‘Āraññikenāvuso, bhikkhunā saṅghagatena saṅghe viharantena sabrahmacārīsu sagāravena bhavitabbaṃ sappatissena. Sace, āvuso, āraññiko bhikkhu saṅghagato saṅghe viharanto sabrahmacārīsu agāravo hoti appatisso, tassa bhavanti vattāro. ‘Kiṃ panimassāyasmato āraññikassa ekassāraññe serivihārena, yo ayamāyasmā sabrahmacārīsu agāravo hoti appatisso’ti – tassa 8 bhavanti vattāro. Tasmā āraññikena bhikkhunā saṅghagatena saṅghe viharantena sabrahmacārīsu sagāravena bhavitabbaṃ sappatissena.

    ‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ஆஸனகுஸலேன ப⁴விதப்³ப³ங் – ‘இதி தே²ரே ச பி⁴க்கூ² நானுபக²ஜ்ஜ நிஸீதி³ஸ்ஸாமி நவே ச பி⁴க்கூ² ந ஆஸனேன படிபா³ஹிஸ்ஸாமீ’தி. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ ந ஆஸனகுஸலோ ஹோதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன, யோ அயமாயஸ்மா ஆஸனகுஸலோ ந ஹோதீ’தி 9 – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஆஸனகுஸலேன ப⁴விதப்³ப³ங்.

    ‘‘Āraññikenāvuso, bhikkhunā saṅghagatena saṅghe viharantena āsanakusalena bhavitabbaṃ – ‘iti there ca bhikkhū nānupakhajja nisīdissāmi nave ca bhikkhū na āsanena paṭibāhissāmī’ti. Sace, āvuso, āraññiko bhikkhu saṅghagato saṅghe viharanto na āsanakusalo hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena, yo ayamāyasmā āsanakusalo na hotī’ti 10 – tassa bhavanti vattāro. Tasmā āraññikena bhikkhunā saṅghagatena saṅghe viharantena āsanakusalena bhavitabbaṃ.

    ‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ஆபி⁴ஸமாசாரிகோபி த⁴ம்மோ ஜானிதப்³போ³. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ ஆபி⁴ஸமாசாரிகம்பி த⁴ம்மங் ந ஜானாதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா ஆபி⁴ஸமாசாரிகம்பி த⁴ம்மங் ந ஜானாதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஆபி⁴ஸமாசாரிகோபி த⁴ம்மோ ஜானிதப்³போ³ 11.

    ‘‘Āraññikenāvuso, bhikkhunā saṅghagatena saṅghe viharantena ābhisamācārikopi dhammo jānitabbo. Sace, āvuso, āraññiko bhikkhu saṅghagato saṅghe viharanto ābhisamācārikampi dhammaṃ na jānāti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā ābhisamācārikampi dhammaṃ na jānātī’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena ābhisamācārikopi dhammo jānitabbo 12.

    ‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன நாதிகாலேன கா³மோ பவிஸிதப்³போ³ நாதிதி³வா 13 படிக்கமிதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ அதிகாலேன கா³மங் பவிஸதி அதிதி³வா படிக்கமதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா அதிகாலேன கா³மங் பவிஸதி அதிதி³வா படிக்கமதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன நாதிகாலேன கா³மோ பவிஸிதப்³போ³, நாதிதி³வா படிக்கமிதப்³ப³ங்.

    ‘‘Āraññikenāvuso, bhikkhunā saṅghagatena saṅghe viharantena nātikālena gāmo pavisitabbo nātidivā 14 paṭikkamitabbaṃ. Sace, āvuso, āraññiko bhikkhu saṅghagato saṅghe viharanto atikālena gāmaṃ pavisati atidivā paṭikkamati, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā atikālena gāmaṃ pavisati atidivā paṭikkamatī’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena nātikālena gāmo pavisitabbo, nātidivā paṭikkamitabbaṃ.

    ‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ந புரேப⁴த்தங் பச்சா²ப⁴த்தங் குலேஸு சாரித்தங் ஆபஜ்ஜிதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ புரேப⁴த்தங் பச்சா²ப⁴த்தங் குலேஸு சாரித்தங் ஆபஜ்ஜதி, தஸ்ஸ ப⁴வந்தி வத்தாரோ. ‘அயங் நூனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன விஹரதோ விகாலசரியா ப³ஹுலீகதா, தமேனங் ஸங்க⁴க³தம்பி ஸமுதா³சரதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ந புரேப⁴த்தங் பச்சா²ப⁴த்தங் குலேஸு சாரித்தங் ஆபஜ்ஜிதப்³ப³ங்.

    ‘‘Āraññikenāvuso, bhikkhunā saṅghagatena saṅghe viharantena na purebhattaṃ pacchābhattaṃ kulesu cārittaṃ āpajjitabbaṃ. Sace, āvuso, āraññiko bhikkhu saṅghagato saṅghe viharanto purebhattaṃ pacchābhattaṃ kulesu cārittaṃ āpajjati, tassa bhavanti vattāro. ‘Ayaṃ nūnimassāyasmato āraññikassa ekassāraññe serivihārena viharato vikālacariyā bahulīkatā, tamenaṃ saṅghagatampi samudācaratī’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena na purebhattaṃ pacchābhattaṃ kulesu cārittaṃ āpajjitabbaṃ.

    ‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன அனுத்³த⁴தேன ப⁴விதப்³ப³ங் அசபலேன. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ உத்³த⁴தோ ஹோதி சபலோ, தஸ்ஸ ப⁴வந்தி வத்தாரோ. ‘இத³ங் நூனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன விஹரதோ உத்³த⁴ச்சங் சாபல்யங் ப³ஹுலீகதங், தமேனங் ஸங்க⁴க³தம்பி ஸமுதா³சரதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன அனுத்³த⁴தேன ப⁴விதப்³ப³ங் அசபலேன.

    ‘‘Āraññikenāvuso, bhikkhunā saṅghagatena saṅghe viharantena anuddhatena bhavitabbaṃ acapalena. Sace, āvuso, āraññiko bhikkhu saṅghagato saṅghe viharanto uddhato hoti capalo, tassa bhavanti vattāro. ‘Idaṃ nūnimassāyasmato āraññikassa ekassāraññe serivihārena viharato uddhaccaṃ cāpalyaṃ bahulīkataṃ, tamenaṃ saṅghagatampi samudācaratī’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena anuddhatena bhavitabbaṃ acapalena.

    ‘‘ஆரஞ்ஞிகேனாவுஸோ , பி⁴க்கு²னா ஸங்க⁴க³தேன ஸங்கே⁴ விஹரந்தேன அமுக²ரேன ப⁴விதப்³ப³ங் அவிகிண்ணவாசேன. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ முக²ரோ ஹோதி விகிண்ணவாசோ, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா முக²ரோ விகிண்ணவாசோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன அமுக²ரேன ப⁴விதப்³ப³ங் அவிகிண்ணவாசேன.

    ‘‘Āraññikenāvuso , bhikkhunā saṅghagatena saṅghe viharantena amukharena bhavitabbaṃ avikiṇṇavācena. Sace, āvuso, āraññiko bhikkhu saṅghagato saṅghe viharanto mukharo hoti vikiṇṇavāco, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā mukharo vikiṇṇavāco’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena amukharena bhavitabbaṃ avikiṇṇavācena.

    ‘‘ஆரஞ்ஞிகேனாவுஸோ, பி⁴க்கு²னா ஸங்க⁴க³தேன ஸங்கே⁴ விஹரந்தேன ஸுவசேன 15 ப⁴விதப்³ப³ங் கல்யாணமித்தேன. ஸசே, ஆவுஸோ, ஆரஞ்ஞிகோ பி⁴க்கு² ஸங்க⁴க³தோ ஸங்கே⁴ விஹரந்தோ து³ப்³ப³சோ ஹோதி பாபமித்தோ, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா து³ப்³ப³சோ பாபமித்தோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸங்க⁴க³தேன ஸங்கே⁴ விஹரந்தேன ஸுவசேன ப⁴விதப்³ப³ங் கல்யாணமித்தேன.

    ‘‘Āraññikenāvuso, bhikkhunā saṅghagatena saṅghe viharantena suvacena 16 bhavitabbaṃ kalyāṇamittena. Sace, āvuso, āraññiko bhikkhu saṅghagato saṅghe viharanto dubbaco hoti pāpamitto, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā dubbaco pāpamitto’ti – tassa bhavanti vattāro. Tasmā āraññikena bhikkhunā saṅghagatena saṅghe viharantena suvacena bhavitabbaṃ kalyāṇamittena.

    ‘‘ஆரஞ்ஞிகேனாவுஸோ, பி⁴க்கு²னா இந்த்³ரியேஸு கு³த்தத்³வாரேன ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² இந்த்³ரியேஸு அகு³த்தத்³வாரோ ஹோதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா இந்த்³ரியேஸு அகு³த்தத்³வாரோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா இந்த்³ரியேஸு கு³த்தத்³வாரேன ப⁴விதப்³ப³ங்.

    ‘‘Āraññikenāvuso, bhikkhunā indriyesu guttadvārena bhavitabbaṃ. Sace, āvuso, āraññiko bhikkhu indriyesu aguttadvāro hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā indriyesu aguttadvāro’ti – tassa bhavanti vattāro. Tasmā āraññikena bhikkhunā indriyesu guttadvārena bhavitabbaṃ.

    ‘‘ஆரஞ்ஞிகேனாவுஸோ, பி⁴க்கு²னா போ⁴ஜனே மத்தஞ்ஞுனா ப⁴விதப்³ப³ங். ஸசே, ஆவுஸோ, ஆரஞ்ஞிகோ போ⁴ஜனே அமத்தஞ்ஞூ ஹோதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா போ⁴ஜனே அமத்தஞ்ஞூ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா போ⁴ஜனே மத்தஞ்ஞுனா ப⁴விதப்³ப³ங்.

    ‘‘Āraññikenāvuso, bhikkhunā bhojane mattaññunā bhavitabbaṃ. Sace, āvuso, āraññiko bhojane amattaññū hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā bhojane amattaññū’ti – tassa bhavanti vattāro. Tasmā āraññikena bhikkhunā bhojane mattaññunā bhavitabbaṃ.

    ‘‘ஆரஞ்ஞிகேனாவுஸோ, பி⁴க்கு²னா ஜாக³ரியங் அனுயுத்தேன ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² ஜாக³ரியங் அனநுயுத்தோ ஹோதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா ஜாக³ரியங் அனநுயுத்தோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஜாக³ரியங் அனுயுத்தேன ப⁴விதப்³ப³ங்.

    ‘‘Āraññikenāvuso, bhikkhunā jāgariyaṃ anuyuttena bhavitabbaṃ. Sace, āvuso, āraññiko bhikkhu jāgariyaṃ ananuyutto hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā jāgariyaṃ ananuyutto’ti – tassa bhavanti vattāro. Tasmā āraññikena bhikkhunā jāgariyaṃ anuyuttena bhavitabbaṃ.

    ‘‘ஆரஞ்ஞிகேனாவுஸோ , பி⁴க்கு²னா ஆரத்³த⁴வீரியேன ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² குஸீதோ ஹோதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா குஸீதோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஆரத்³த⁴வீரியேன ப⁴விதப்³ப³ங்.

    ‘‘Āraññikenāvuso , bhikkhunā āraddhavīriyena bhavitabbaṃ. Sace, āvuso, āraññiko bhikkhu kusīto hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā kusīto’ti – tassa bhavanti vattāro. Tasmā āraññikena bhikkhunā āraddhavīriyena bhavitabbaṃ.

    ‘‘ஆரஞ்ஞிகேனாவுஸோ, பி⁴க்கு²னா உபட்டி²தஸ்ஸதினா ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² முட்ட²ஸ்ஸதீ ஹோதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா முட்ட²ஸ்ஸதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா உபட்டி²தஸ்ஸதினா ப⁴விதப்³ப³ங்.

    ‘‘Āraññikenāvuso, bhikkhunā upaṭṭhitassatinā bhavitabbaṃ. Sace, āvuso, āraññiko bhikkhu muṭṭhassatī hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā muṭṭhassatī’ti – tassa bhavanti vattāro. Tasmā āraññikena bhikkhunā upaṭṭhitassatinā bhavitabbaṃ.

    ‘‘ஆரஞ்ஞிகேனாவுஸோ, பி⁴க்கு²னா ஸமாஹிதேன ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² அஸமாஹிதோ ஹோதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா அஸமாஹிதோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா ஸமாஹிதேன ப⁴விதப்³ப³ங்.

    ‘‘Āraññikenāvuso, bhikkhunā samāhitena bhavitabbaṃ. Sace, āvuso, āraññiko bhikkhu asamāhito hoti, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā asamāhito’ti – tassa bhavanti vattāro. Tasmā āraññikena bhikkhunā samāhitena bhavitabbaṃ.

    ‘‘ஆரஞ்ஞிகேனாவுஸோ, பி⁴க்கு²னா பஞ்ஞவதா ப⁴விதப்³ப³ங். ஸசே, ஆவுஸோ, ஆரஞ்ஞிகோ பி⁴க்கு² து³ப்பஞ்ஞோ ஹோதி, தஸ்ஸ ப⁴வந்தி வத்தாரோ . ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா து³ப்பஞ்ஞோ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா பஞ்ஞவதா ப⁴விதப்³ப³ங்.

    ‘‘Āraññikenāvuso, bhikkhunā paññavatā bhavitabbaṃ. Sace, āvuso, āraññiko bhikkhu duppañño hoti, tassa bhavanti vattāro . ‘Kiṃ panimassāyasmato āraññikassa ekassāraññe serivihārena yo ayamāyasmā duppañño’ti – tassa bhavanti vattāro. Tasmā āraññikena bhikkhunā paññavatā bhavitabbaṃ.

    ‘‘ஆரஞ்ஞிகேனாவுஸோ, பி⁴க்கு²னா அபி⁴த⁴ம்மே அபி⁴வினயே யோகோ³ கரணீயோ. ஸந்தாவுஸோ, ஆரஞ்ஞிகங் பி⁴க்கு²ங் அபி⁴த⁴ம்மே அபி⁴வினயே பஞ்ஹங் புச்சி²தாரோ. ஸசே, ஆவுஸோ, ஆரஞ்ஞிகோ பி⁴க்கு² அபி⁴த⁴ம்மே அபி⁴வினயே பஞ்ஹங் புட்டோ² ந ஸம்பாயதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா அபி⁴த⁴ம்மே அபி⁴வினயே பஞ்ஹங் புட்டோ² ந ஸம்பாயதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா அபி⁴த⁴ம்மே அபி⁴வினயே யோகோ³ கரணீயோ.

    ‘‘Āraññikenāvuso, bhikkhunā abhidhamme abhivinaye yogo karaṇīyo. Santāvuso, āraññikaṃ bhikkhuṃ abhidhamme abhivinaye pañhaṃ pucchitāro. Sace, āvuso, āraññiko bhikkhu abhidhamme abhivinaye pañhaṃ puṭṭho na sampāyati, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā abhidhamme abhivinaye pañhaṃ puṭṭho na sampāyatī’ti – tassa bhavanti vattāro. Tasmā āraññikena bhikkhunā abhidhamme abhivinaye yogo karaṇīyo.

    ‘‘ஆரஞ்ஞிகேனாவுஸோ , பி⁴க்கு²னா யே தே ஸந்தா விமொக்கா² அதிக்கம்ம ரூபே ஆருப்பா தத்த² யோகோ³ கரணீயோ. ஸந்தாவுஸோ, ஆரஞ்ஞிகங் பி⁴க்கு²ங் யே தே ஸந்தா விமொக்கா² அதிக்கம்ம ரூபே ஆருப்பா தத்த² பஞ்ஹங் புச்சி²தாரோ. ஸசே, ஆவுஸோ, ஆரஞ்ஞிகோ பி⁴க்கு² யே தே ஸந்தா விமொக்கா² அதிக்கம்ம ரூபே ஆருப்பா தத்த² பஞ்ஹங் புட்டோ² ந ஸம்பாயதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா யே தே ஸந்தா விமொக்கா² அதிக்கம்ம ரூபே ஆருப்பா தத்த² பஞ்ஹங் புட்டோ² ந ஸம்பாயதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா யே தே ஸந்தா விமொக்கா² அதிக்கம்ம ரூபே ஆருப்பா தத்த² யோகோ³ கரணீயோ.

    ‘‘Āraññikenāvuso , bhikkhunā ye te santā vimokkhā atikkamma rūpe āruppā tattha yogo karaṇīyo. Santāvuso, āraññikaṃ bhikkhuṃ ye te santā vimokkhā atikkamma rūpe āruppā tattha pañhaṃ pucchitāro. Sace, āvuso, āraññiko bhikkhu ye te santā vimokkhā atikkamma rūpe āruppā tattha pañhaṃ puṭṭho na sampāyati, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā ye te santā vimokkhā atikkamma rūpe āruppā tattha pañhaṃ puṭṭho na sampāyatī’ti – tassa bhavanti vattāro. Tasmā āraññikena bhikkhunā ye te santā vimokkhā atikkamma rūpe āruppā tattha yogo karaṇīyo.

    ‘‘ஆரஞ்ஞிகேனாவுஸோ, பி⁴க்கு²னா உத்தரி மனுஸ்ஸத⁴ம்மே யோகோ³ கரணீயோ. ஸந்தாவுஸோ, ஆரஞ்ஞிகங் பி⁴க்கு²ங் உத்தரி மனுஸ்ஸத⁴ம்மே பஞ்ஹங் புச்சி²தாரோ. ஸசே, ஆவுஸோ, ஆரஞ்ஞிகோ பி⁴க்கு² உத்தரி மனுஸ்ஸத⁴ம்மே பஞ்ஹங் புட்டோ² ந ஸம்பாயதி, தஸ்ஸ ப⁴வந்தி வத்தாரோ. ‘கிங் பனிமஸ்ஸாயஸ்மதோ ஆரஞ்ஞிகஸ்ஸ ஏகஸ்ஸாரஞ்ஞே ஸேரிவிஹாரேன யோ அயமாயஸ்மா யஸ்ஸத்தா²ய பப்³ப³ஜிதோ தமத்த²ங் ந ஜானாதீ’தி – தஸ்ஸ ப⁴வந்தி வத்தாரோ. தஸ்மா ஆரஞ்ஞிகேன பி⁴க்கு²னா உத்தரி மனுஸ்ஸத⁴ம்மே யோகோ³ கரணீயோ’’தி.

    ‘‘Āraññikenāvuso, bhikkhunā uttari manussadhamme yogo karaṇīyo. Santāvuso, āraññikaṃ bhikkhuṃ uttari manussadhamme pañhaṃ pucchitāro. Sace, āvuso, āraññiko bhikkhu uttari manussadhamme pañhaṃ puṭṭho na sampāyati, tassa bhavanti vattāro. ‘Kiṃ panimassāyasmato āraññikassa ekassāraññe serivihārena yo ayamāyasmā yassatthāya pabbajito tamatthaṃ na jānātī’ti – tassa bhavanti vattāro. Tasmā āraññikena bhikkhunā uttari manussadhamme yogo karaṇīyo’’ti.

    ஏவங் வுத்தே, ஆயஸ்மா மஹாமொக்³க³ல்லானோ 17 ஆயஸ்மந்தங் ஸாரிபுத்தங் ஏதத³வோச – ‘‘ஆரஞ்ஞிகேனேவ நு கோ², ஆவுஸோ ஸாரிபுத்த, பி⁴க்கு²னா இமே த⁴ம்மா ஸமாதா³ய வத்திதப்³பா³ உதா³ஹு கா³மந்தவிஹாரினாபீ’’தி ? ‘‘ஆரஞ்ஞிகேனாபி கோ², ஆவுஸோ மொக்³க³ல்லான, பி⁴க்கு²னா இமே த⁴ம்மா ஸமாதா³ய வத்திதப்³பா³ பகே³வ கா³மந்தவிஹாரினா’’தி.

    Evaṃ vutte, āyasmā mahāmoggallāno 18 āyasmantaṃ sāriputtaṃ etadavoca – ‘‘āraññikeneva nu kho, āvuso sāriputta, bhikkhunā ime dhammā samādāya vattitabbā udāhu gāmantavihārināpī’’ti ? ‘‘Āraññikenāpi kho, āvuso moggallāna, bhikkhunā ime dhammā samādāya vattitabbā pageva gāmantavihārinā’’ti.

    கோ³லியானிஸுத்தங் நிட்டி²தங் நவமங்.

    Goliyānisuttaṃ niṭṭhitaṃ navamaṃ.




    Next: 10. கீடாகி³ரிஸுத்தங் • 10. Kīṭāgirisuttaṃ




    Footnotes:
    1. கு³லிஸ்ஸானி (ஸீ॰ பீ॰), கோ³லிஸ்ஸானி (ஸ்யா॰ கங்॰)
    2. ஆரஞ்ஞகோ (ஸப்³ப³த்த²)
    3. பத³ரஸமாசாரோ (ஸீ॰ ஸ்யா॰ கங்॰ பீ॰)
    4. gulissāni (sī. pī.), golissāni (syā. kaṃ.)
    5. āraññako (sabbattha)
    6. padarasamācāro (sī. syā. kaṃ. pī.)
    7. அப்பதிஸ்ஸோதிஸ்ஸ (ஸீ॰ பீ॰)
    8. appatissotissa (sī. pī.)
    9. யோ அயமாயஸ்மா ஆபி⁴ஸமாசாரிகம்பி த⁴ம்மங் ந ஜானாதீதி (ஸீ॰ ஸ்யா॰ கங்॰ பீ॰)
    10. yo ayamāyasmā ābhisamācārikampi dhammaṃ na jānātīti (sī. syā. kaṃ. pī.)
    11. அயங் ஆபி⁴ஸமாசாரிகததியவாரோ ஸீ॰ ஸ்யா॰ கங்॰ பீ॰ பொத்த²கேஸு ந தி³ஸ்ஸதி
    12. ayaṃ ābhisamācārikatatiyavāro sī. syā. kaṃ. pī. potthakesu na dissati
    13. ந தி³வா (ஸ்யா॰ கங்॰ பீ॰ க॰)
    14. na divā (syā. kaṃ. pī. ka.)
    15. ஸுப்³ப³சேன (ஸீ॰ க॰)
    16. subbacena (sī. ka.)
    17. மஹாமொக்³க³லானோ (க॰)
    18. mahāmoggalāno (ka.)



    Related texts:



    அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 9. கோ³லியானிஸுத்தவண்ணனா • 9. Goliyānisuttavaṇṇanā

    டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. கோ³லியானிஸுத்தவண்ணனா • 9. Goliyānisuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact