| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
9. கோ³லியானிஸுத்தவண்ணனா
9. Goliyānisuttavaṇṇanā
173. ஏவங் மே ஸுதந்தி கோ³லியானிஸுத்தங். தத்த² பத³ஸமாசாரோதி து³ப்³ப³லஸமாசாரோ ஓளாரிகாசாரோ, பச்சயேஸு ஸாபெக்கோ² மஹாரக்கி²தத்தே²ரோ விய. தங் கிர உபட்டா²ககுலே நிஸின்னங் உபட்டா²கோ ஆஹ ‘‘அஸுகத்தே²ரஸ்ஸ மே, ப⁴ந்தே, சீவரங் தி³ன்ன’’ந்தி. ஸாது⁴ தே கதங் தங்யேவ தக்கெத்வா விஹரந்தஸ்ஸ சீவரங் தெ³ந்தேனாதி. தும்ஹாகம்பி, ப⁴ந்தே, த³ஸ்ஸாமீதி. ஸாது⁴ கரிஸ்ஸஸி தங்யேவ தக்கெந்தஸ்ஸாதி ஆஹ. அயம்பி ஏவரூபோ ஓளாரிகாசாரோ அஹோஸி. ஸப்பதிஸ்ஸேனாதி ஸஜெட்ட²கேன, ந அத்தானங் ஜெட்ட²கங் கத்வா விஹரிதப்³ப³ங். ஸேரிவிஹாரேனாதி ஸச்ச²ந்த³விஹாரேன நிரங்குஸவிஹாரேன.
173.Evaṃme sutanti goliyānisuttaṃ. Tattha padasamācāroti dubbalasamācāro oḷārikācāro, paccayesu sāpekkho mahārakkhitatthero viya. Taṃ kira upaṭṭhākakule nisinnaṃ upaṭṭhāko āha ‘‘asukattherassa me, bhante, cīvaraṃ dinna’’nti. Sādhu te kataṃ taṃyeva takketvā viharantassa cīvaraṃ dentenāti. Tumhākampi, bhante, dassāmīti. Sādhu karissasi taṃyeva takkentassāti āha. Ayampi evarūpo oḷārikācāro ahosi. Sappatissenāti sajeṭṭhakena, na attānaṃ jeṭṭhakaṃ katvā viharitabbaṃ. Serivihārenāti sacchandavihārena niraṅkusavihārena.
நானூபக²ஜ்ஜாதி ந அனுபக²ஜ்ஜ ந அனுபவிஸித்வா. தத்த² யோ த்³வீஸு மஹாதே²ரேஸு உப⁴தோ நிஸின்னேஸு தே அனாபுச்சி²த்வாவ சீவரேன வா ஜாணுனா வா க⁴ட்டெந்தோ நிஸீத³தி, அயங் அனுபக²ஜ்ஜ நிஸீத³தி நாம. ஏவங் அகத்வா பன அத்தனோ பத்தஆஸனஸந்திகே ட²த்வா நிஸீதா³வுஸோதி வுத்தே நிஸீதி³தப்³ப³ங். ஸசே ந வத³ந்தி, நிஸீதா³மி, ப⁴ந்தேதி ஆபுச்சி²த்வா நிஸீதி³தப்³ப³ங் ஆபுச்சி²தகாலதோ பட்டா²ய நிஸீதா³தி வுத்தேபி அவுத்தேபி நிஸீதி³துங் வட்டதியேவ. ந படிபா³ஹிஸ்ஸாமீதி எத்த² யோ அத்தனோ பத்தாஸனங் அதிக்கமித்வா நவகானங் பாபுணனட்டா²னே நிஸீத³தி, அயங் நவே பி⁴க்கூ² ஆஸனேன படிபா³ஹதி நாம. தஸ்மிஞ்ஹி ததா² நிஸின்னே நவா பி⁴க்கூ² ‘‘அம்ஹாகங் நிஸீதி³துங் ந தே³தீ’’தி உஜ்ஜா²யந்தா திட்ட²ந்தி வா ஆஸனங் வா பரியேஸந்தா ஆஹிண்ட³ந்தி. தஸ்மா அத்தனோ பத்தாஸனேயேவ நிஸீதி³தப்³ப³ங். ஏவங் ந படிபா³ஹதி நாம.
Nānūpakhajjāti na anupakhajja na anupavisitvā. Tattha yo dvīsu mahātheresu ubhato nisinnesu te anāpucchitvāva cīvarena vā jāṇunā vā ghaṭṭento nisīdati, ayaṃ anupakhajja nisīdati nāma. Evaṃ akatvā pana attano pattaāsanasantike ṭhatvā nisīdāvusoti vutte nisīditabbaṃ. Sace na vadanti, nisīdāmi, bhanteti āpucchitvā nisīditabbaṃ āpucchitakālato paṭṭhāya nisīdāti vuttepi avuttepi nisīdituṃ vaṭṭatiyeva. Na paṭibāhissāmīti ettha yo attano pattāsanaṃ atikkamitvā navakānaṃ pāpuṇanaṭṭhāne nisīdati, ayaṃ nave bhikkhū āsanena paṭibāhati nāma. Tasmiñhi tathā nisinne navā bhikkhū ‘‘amhākaṃ nisīdituṃ na detī’’ti ujjhāyantā tiṭṭhanti vā āsanaṃ vā pariyesantā āhiṇḍanti. Tasmā attano pattāsaneyeva nisīditabbaṃ. Evaṃ na paṭibāhati nāma.
ஆபி⁴ஸமாசாரிகம்பி த⁴ம்மந்தி அபி⁴ஸமாசாரிகங் வத்தபடிபத்திமத்தம்பி. நாதிகாலேனாதி ந அதிபாதோ பவிஸிதப்³ப³ங், ந அதிதி³வா படிக்கமிதப்³ப³ங், பி⁴க்கு²ஸங்கே⁴ன ஸத்³தி⁴ங்யேவ பவிஸிதப்³ப³ஞ்ச நிக்க²மிதப்³ப³ஞ்ச. அதிபாதோ பவிஸித்வா அதிதி³வா நிக்க²மந்தஸ்ஸ ஹி சேதியங்க³ணபோ³தி⁴யங்க³ணவத்தாதீ³னி பரிஹாயந்தி. காலஸ்ஸேவ முக²ங் தோ⁴வித்வா மக்கடகஸுத்தானி சி²ந்த³ந்தேன உஸ்ஸாவபி³ந்தூ³ நிபாதெந்தேன கா³மங் பவிஸித்வா யாகு³ங் பரியேஸித்வா யாவ பி⁴க்கா²காலா அந்தோகா³மேயேவ நானப்பகாரங் திரச்சா²னகத²ங் கதெ²ந்தேன நிஸீதி³த்வா ப⁴த்தகிச்சங் கத்வா தி³வா நிக்க²ம்ம பி⁴க்கூ²னங் பாத³தோ⁴வனவேலாய விஹாரங் பச்சாக³ந்தப்³ப³ங் ஹோதி. ந புரேப⁴த்தங் பச்சா²ப⁴த்தங் குலேஸு சாரித்தங் ஆபஜ்ஜிதப்³ப³ந்தி ‘‘யோ பன பி⁴க்கு² நிமந்திதோ ஸப⁴த்தோ ஸமானோ ஸந்தங் பி⁴க்கு²ங் அனாபுச்சா² புரேப⁴த்தங் வா பச்சா²ப⁴த்தங் வா குலேஸு சாரித்தங் ஆபஜ்ஜெய்ய, அஞ்ஞத்ர ஸமயா பாசித்திய’’ந்தி (பாசி॰ 299) இமங் ஸிக்கா²பத³ங் ரக்க²ந்தேன தஸ்ஸ விப⁴ங்கே³ வுத்தங் புரேப⁴த்தஞ்ச பச்சா²ப⁴த்தஞ்ச சாரித்தங் ந ஆபஜ்ஜிதப்³ப³ங். உத்³த⁴தோ ஹோதி சபலோதி உத்³த⁴ச்சபகதிகோ சேவ ஹோதி சீவரமண்ட³ன-பத்தமண்ட³ன-ஸேனாஸனமண்ட³னா இமஸ்ஸ வா பூதிகாயஸ்ஸ கேலாயனா மண்ட³னாதி ஏவங் வுத்தேன ச தருணதா³ரகாவசாபல்யேன ஸமன்னாக³தோ.
Ābhisamācārikampi dhammanti abhisamācārikaṃ vattapaṭipattimattampi. Nātikālenāti na atipāto pavisitabbaṃ, na atidivā paṭikkamitabbaṃ, bhikkhusaṅghena saddhiṃyeva pavisitabbañca nikkhamitabbañca. Atipāto pavisitvā atidivā nikkhamantassa hi cetiyaṅgaṇabodhiyaṅgaṇavattādīni parihāyanti. Kālasseva mukhaṃ dhovitvā makkaṭakasuttāni chindantena ussāvabindū nipātentena gāmaṃ pavisitvā yāguṃ pariyesitvā yāva bhikkhākālā antogāmeyeva nānappakāraṃ tiracchānakathaṃ kathentena nisīditvā bhattakiccaṃ katvā divā nikkhamma bhikkhūnaṃ pādadhovanavelāya vihāraṃ paccāgantabbaṃ hoti. Na purebhattaṃ pacchābhattaṃ kulesu cārittaṃ āpajjitabbanti ‘‘yo pana bhikkhu nimantito sabhatto samāno santaṃ bhikkhuṃ anāpucchā purebhattaṃ vā pacchābhattaṃ vā kulesu cārittaṃ āpajjeyya, aññatra samayā pācittiya’’nti (pāci. 299) imaṃ sikkhāpadaṃ rakkhantena tassa vibhaṅge vuttaṃ purebhattañca pacchābhattañca cārittaṃ na āpajjitabbaṃ. Uddhato hoti capaloti uddhaccapakatiko ceva hoti cīvaramaṇḍana-pattamaṇḍana-senāsanamaṇḍanā imassa vā pūtikāyassa kelāyanā maṇḍanāti evaṃ vuttena ca taruṇadārakāvacāpalyena samannāgato.
பஞ்ஞவதா ப⁴விதப்³ப³ந்தி சீவரகம்மாதீ³ஸு இதிகத்தப்³பே³ஸு உபாயபஞ்ஞாய ஸமன்னாக³தேன ப⁴விதப்³ப³ங். அபி⁴த⁴ம்மே அபி⁴வினயேதி அபி⁴த⁴ம்மபிடகே சேவ வினயபிடகே ச பாளிவஸேன சேவ அட்ட²கதா²வஸேன ச யோகோ³ கரணீயோ. ஸப்³ப³ந்திமேன ஹி பரிச்சே²தே³ன அபி⁴த⁴ம்மே து³கதிகமாதிகாஹி ஸத்³தி⁴ங் த⁴ம்மஹத³யவிப⁴ங்க³ங் வினா ந வட்டதி. வினயே பன கம்மாகம்மவினிச்ச²யேன ஸத்³தி⁴ங் ஸுவினிச்சி²தானி த்³வே பாதிமொக்கா²னி வினா ந வட்டதி.
Paññavatābhavitabbanti cīvarakammādīsu itikattabbesu upāyapaññāya samannāgatena bhavitabbaṃ. Abhidhamme abhivinayeti abhidhammapiṭake ceva vinayapiṭake ca pāḷivasena ceva aṭṭhakathāvasena ca yogo karaṇīyo. Sabbantimena hi paricchedena abhidhamme dukatikamātikāhi saddhiṃ dhammahadayavibhaṅgaṃ vinā na vaṭṭati. Vinaye pana kammākammavinicchayena saddhiṃ suvinicchitāni dve pātimokkhāni vinā na vaṭṭati.
ஆருப்பாதி எத்தாவதா அட்ட²பி ஸமாபத்தியோ வுத்தா ஹொந்தி. தா பன ஸப்³பே³ன ஸப்³ப³ங் அஸக்கொந்தேன ஸத்தஸுபி யோகோ³ கரணீயோ, ச²ஸுபி…பே॰… பஞ்சஸுபி. ஸப்³ப³ந்திமேன பரிச்சே²தே³ன ஏகங் கஸிணே பரிகம்மகம்மட்டா²னங் பகு³ணங் கத்வா ஆதா³ய விசரிதப்³ப³ங், எத்தகங் வினா ந வட்டதி. உத்தரிமனுஸ்ஸத⁴ம்மேதி இமினா ஸப்³பே³பி லோகுத்தரத⁴ம்மே த³ஸ்ஸேதி. தஸ்மா அரஹந்தேன ஹுத்வா விஹாதப்³ப³ங், அரஹத்தங் அனபி⁴ஸம்பு⁴ணந்தேன அனாகா³மிப²லே ஸகதா³கா³மிப²லே ஸோதாபத்திப²லே வா பதிட்டா²தப்³ப³ங். ஸப்³ப³ந்திமேன பரியாயேன ஏகங் விபஸ்ஸனாமுக²ங் யாவ அரஹத்தா பகு³ணங் கத்வா ஆதா³ய விசரிதப்³ப³ங். ஸேஸங் ஸப்³ப³த்த² உத்தானமேவ. இமங் பன தே³ஸனங் ஆயஸ்மா ஸாரிபுத்தோ நெய்யபுக்³க³லஸ்ஸ வஸேன ஆபி⁴ஸமாசாரிகவத்ததோ பட்டா²ய அனுபுப்³பே³ன அரஹத்தங் பாபெத்வா நிட்டா²பேஸீதி.
Āruppāti ettāvatā aṭṭhapi samāpattiyo vuttā honti. Tā pana sabbena sabbaṃ asakkontena sattasupi yogo karaṇīyo, chasupi…pe… pañcasupi. Sabbantimena paricchedena ekaṃ kasiṇe parikammakammaṭṭhānaṃ paguṇaṃ katvā ādāya vicaritabbaṃ, ettakaṃ vinā na vaṭṭati. Uttarimanussadhammeti iminā sabbepi lokuttaradhamme dasseti. Tasmā arahantena hutvā vihātabbaṃ, arahattaṃ anabhisambhuṇantena anāgāmiphale sakadāgāmiphale sotāpattiphale vā patiṭṭhātabbaṃ. Sabbantimena pariyāyena ekaṃ vipassanāmukhaṃ yāva arahattā paguṇaṃ katvā ādāya vicaritabbaṃ. Sesaṃ sabbattha uttānameva. Imaṃ pana desanaṃ āyasmā sāriputto neyyapuggalassa vasena ābhisamācārikavattato paṭṭhāya anupubbena arahattaṃ pāpetvā niṭṭhāpesīti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
கோ³லியானிஸுத்தவண்ணனா நிட்டி²தா.
Goliyānisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. கோ³லியானிஸுத்தங் • 9. Goliyānisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 9. கோ³லியானிஸுத்தவண்ணனா • 9. Goliyānisuttavaṇṇanā
