| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
8. கோ³பகமொக்³க³ல்லானஸுத்தவண்ணனா
8. Gopakamoggallānasuttavaṇṇanā
79. ஏவங் மே ஸுதந்தி கோ³பகமொக்³க³ல்லானஸுத்தங். தத்த² அசிரபரினிப்³பு³தே ப⁴க³வதீதி ப⁴க³வதி அசிரபரினிப்³பு³தே, தா⁴துபா⁴ஜனீயங் கத்வா த⁴ம்மஸங்கீ³திங் காதுங் ராஜக³ஹங் ஆக³தகாலே . ரஞ்ஞோ பஜ்ஜோதஸ்ஸ ஆஸங்கமானோதி சண்ட³பஜ்ஜோதோ நாமேஸ ராஜா பி³ம்பி³ஸாரமஹாராஜஸ்ஸ ஸஹாயோ அஹோஸி, ஜீவகங் பேஸெத்வா பே⁴ஸஜ்ஜகாரிதகாலதோ பட்டா²ய பன த³ள்ஹமித்தோவ ஜாதோ, ஸோ ‘‘அஜாதஸத்துனா தே³வத³த்தஸ்ஸ வசனங் க³ஹெத்வா பிதா கா⁴திதோ’’தி ஸுத்வா ‘‘மம பியமித்தங் கா⁴தெத்வா ஏஸ ரஜ்ஜங் கரிஸ்ஸாமீதி மஞ்ஞதி, மய்ஹங் ஸஹாயஸ்ஸ ஸஹாயானங் அத்தி²கபா⁴வங் ஜானாபெஸ்ஸாமீ’’தி பரிஸதி வாசங் அபா⁴ஸி. தங் ஸுத்வா தஸ்ஸ ஆஸங்கா உப்பன்னா. தேன வுத்தங் ‘‘ரஞ்ஞோ பஜ்ஜோதஸ்ஸ ஆஸங்கமானோ’’தி. கம்மந்தோதி ப³ஹினக³ரே நக³ரபடிஸங்கா²ராபனத்தா²ய கம்மந்தட்டா²னங்.
79.Evaṃme sutanti gopakamoggallānasuttaṃ. Tattha aciraparinibbute bhagavatīti bhagavati aciraparinibbute, dhātubhājanīyaṃ katvā dhammasaṅgītiṃ kātuṃ rājagahaṃ āgatakāle . Rañño pajjotassa āsaṅkamānoti caṇḍapajjoto nāmesa rājā bimbisāramahārājassa sahāyo ahosi, jīvakaṃ pesetvā bhesajjakāritakālato paṭṭhāya pana daḷhamittova jāto, so ‘‘ajātasattunā devadattassa vacanaṃ gahetvā pitā ghātito’’ti sutvā ‘‘mama piyamittaṃ ghātetvā esa rajjaṃ karissāmīti maññati, mayhaṃ sahāyassa sahāyānaṃ atthikabhāvaṃ jānāpessāmī’’ti parisati vācaṃ abhāsi. Taṃ sutvā tassa āsaṅkā uppannā. Tena vuttaṃ ‘‘rañño pajjotassa āsaṅkamāno’’ti. Kammantoti bahinagare nagarapaṭisaṅkhārāpanatthāya kammantaṭṭhānaṃ.
உபஸங்கமீதி மயங் த⁴ம்மவினயஸங்கீ³திங் காரெஸ்ஸாமாதி விசராம, அயஞ்ச மஹேஸக்கோ² ராஜவல்லபோ⁴ ஸங்க³ஹே கதே வேளுவனஸ்ஸ ஆரக்க²ங் கரெய்யாதி மஞ்ஞமானோ உபஸங்கமி. தேஹி த⁴ம்மேஹீதி தேஹி ஸப்³ப³ஞ்ஞுதஞ்ஞாணத⁴ம்மேஹி. ஸப்³பே³ன ஸப்³ப³ந்தி ஸப்³பா³காரேன ஸப்³ப³ங். ஸப்³ப³தா² ஸப்³ப³ந்தி ஸப்³ப³கொட்டா²ஸேஹி ஸப்³ப³ங். கிங் புச்சா²மீதி புச்ச²தி? ச² ஹி ஸத்தா²ரோ பட²மதரங் அப்பஞ்ஞாதகுலேஹி நிக்க²மித்வா பப்³ப³ஜிதா, தே ததா²க³தே த⁴ரமானேயேவ காலங்கதா, ஸாவகாபி நேஸங் அப்பஞ்ஞாதகுலேஹேவ பப்³ப³ஜிதா. தே தேஸங் அச்சயேன மஹாவிவாத³ங் அகங்ஸு. ஸமணோ பன கோ³தமோ மஹாகுலா பப்³ப³ஜிதோ, தஸ்ஸ அச்சயேன ஸாவகானங் மஹாவிவாதோ³ ப⁴விஸ்ஸதீதி அயங் கதா² ஸகலஜம்பு³தீ³பங் பத்த²ரமானா உத³பாதி³. ஸம்மாஸம்பு³த்³தே⁴ ச த⁴ரந்தே பி⁴க்கூ²னங் விவாதோ³ நாஹோஸி. யோபி அஹோஸி, ஸோபி தத்தே²வ வூபஸமிதோ. பரினிப்³பு³தகாலே பனஸ்ஸ – ‘‘அட்ட²ஸட்டி²யோஜனஸதஸஹஸ்ஸுப்³பே³த⁴ங் ஸினேருங் அபவாஹிதுங் ஸமத்த²ஸ்ஸ வாதஸ்ஸ புரதோ புராணபண்ணங் கிங் ட²ஸ்ஸதி, த³ஸ பாரமியோ பூரெத்வா ஸப்³ப³ஞ்ஞுதஞ்ஞாணங் பத்தஸ்ஸ ஸத்து² அலஜ்ஜமானோ மச்சுராஜா கஸ்ஸ லஜ்ஜிஸ்ஸதீ’’தி மஹாஸங்வேக³ங் ஜனெத்வா பி⁴ய்யோஸோமத்தாய பி⁴க்கூ² ஸமக்³கா³ ஜாதா அதிவிய உபஸந்துபஸந்தா, கிங் நு கோ² ஏதந்தி இத³ங் புச்சா²மீதி புச்ச²தி. அனுஸஞ்ஞாயமானோதி அனுஸஞ்ஜாயமானோ, கதாகதங் ஜனந்தோதி அத்தோ². அனுவிசரமானோ வா.
Upasaṅkamīti mayaṃ dhammavinayasaṅgītiṃ kāressāmāti vicarāma, ayañca mahesakkho rājavallabho saṅgahe kate veḷuvanassa ārakkhaṃ kareyyāti maññamāno upasaṅkami. Tehi dhammehīti tehi sabbaññutaññāṇadhammehi. Sabbena sabbanti sabbākārena sabbaṃ. Sabbathā sabbanti sabbakoṭṭhāsehi sabbaṃ. Kiṃ pucchāmīti pucchati? Cha hi satthāro paṭhamataraṃ appaññātakulehi nikkhamitvā pabbajitā, te tathāgate dharamāneyeva kālaṃkatā, sāvakāpi nesaṃ appaññātakuleheva pabbajitā. Te tesaṃ accayena mahāvivādaṃ akaṃsu. Samaṇo pana gotamo mahākulā pabbajito, tassa accayena sāvakānaṃ mahāvivādo bhavissatīti ayaṃ kathā sakalajambudīpaṃ pattharamānā udapādi. Sammāsambuddhe ca dharante bhikkhūnaṃ vivādo nāhosi. Yopi ahosi, sopi tattheva vūpasamito. Parinibbutakāle panassa – ‘‘aṭṭhasaṭṭhiyojanasatasahassubbedhaṃ sineruṃ apavāhituṃ samatthassa vātassa purato purāṇapaṇṇaṃ kiṃ ṭhassati, dasa pāramiyo pūretvā sabbaññutaññāṇaṃ pattassa satthu alajjamāno maccurājā kassa lajjissatī’’ti mahāsaṃvegaṃ janetvā bhiyyosomattāya bhikkhū samaggā jātā ativiya upasantupasantā, kiṃ nu kho etanti idaṃ pucchāmīti pucchati. Anusaññāyamānoti anusañjāyamāno, katākataṃ janantoti attho. Anuvicaramāno vā.
80. அத்தி² நு கோ²தி அயம்பி ஹெட்டி²மபுச்ச²மேவ புச்ச²தி. அப்படிஸரணேதி அப்படிஸரணே த⁴ம்மவினயே. கோ ஹேது ஸாமக்³கி³யாதி தும்ஹாகங் ஸமக்³க³பா⁴வஸ்ஸ கோ ஹேது கோ பச்சயோ. த⁴ம்மப்படிஸரணாதி த⁴ம்மோ அம்ஹாகங் படிஸரணங், த⁴ம்மோ அவஸ்ஸயோதி தீ³பேதி.
80.Atthinu khoti ayampi heṭṭhimapucchameva pucchati. Appaṭisaraṇeti appaṭisaraṇe dhammavinaye. Ko hetu sāmaggiyāti tumhākaṃ samaggabhāvassa ko hetu ko paccayo. Dhammappaṭisaraṇāti dhammo amhākaṃ paṭisaraṇaṃ, dhammo avassayoti dīpeti.
81. பவத்ததீதி பகு³ணங் ஹுத்வா ஆக³ச்ச²தி. ஆபத்தி ஹோதி வீதிக்கமோதி உப⁴யமேதங் பு³த்³த⁴ஸ்ஸ ஆணாதிக்கமனமேவ. யதா²த⁴ம்மங் யதா²னுஸிட்ட²ங் காரேமாதி யதா² த⁴ம்மோ ச அனுஸிட்டி² ச டி²தா, ஏவங் காரேமாதி அத்தோ².
81.Pavattatīti paguṇaṃ hutvā āgacchati. Āpatti hoti vītikkamoti ubhayametaṃ buddhassa āṇātikkamanameva. Yathādhammaṃ yathānusiṭṭhaṃ kāremāti yathā dhammo ca anusiṭṭhi ca ṭhitā, evaṃ kāremāti attho.
ந கிர நோ ப⁴வந்தோ காரெந்தி த⁴ம்மோ நோ காரேதீதி பத³த்³வயேபி நோ காரோ நிபாதமத்தங். ஏவங் ஸந்தே ந கிர ப⁴வந்தோ காரெந்தி, த⁴ம்மோவ காரேதீதி அயமெத்த² அத்தோ².
Na kira no bhavanto kārenti dhammo no kāretīti padadvayepi no kāro nipātamattaṃ. Evaṃ sante na kira bhavanto kārenti, dhammova kāretīti ayamettha attho.
83. தக்³கா⁴தி ஏகங்ஸே நிபாதோ. கஹங் பன ப⁴வங் ஆனந்தோ³தி கிங் தே²ரஸ்ஸ வேளுவனே வஸனபா⁴வங் ந ஜானாதீதி? ஜானாதி. வேளுவனஸ்ஸ பன அனேன ஆரக்கா² தி³ன்னா, தஸ்மா அத்தானங் உக்கங்ஸாபேதுகாமோ புச்ச²தி. கஸ்மா பன தேன தத்த² ஆரக்கா² தி³ன்னா? ஸோ கிர ஏகதி³வஸங் மஹாகச்சாயனத்தே²ரங் கி³ஜ்ஜ²கூடா ஓதரந்தங் தி³ஸ்வா – ‘‘மக்கடோ விய ஏஸோ’’தி ஆஹ. ப⁴க³வா தங் கத²ங் ஸுத்வா – ‘‘ஸசே க²மாபேதி, இச்சேதங் குஸலங். நோ சே க²மாபேதி, இமஸ்மிங் வேளுவனே கோ³னங்க³லமக்கடோ ப⁴விஸ்ஸதீ’’தி ஆஹ. ஸோ தங் கத²ங் ஸுத்வா – ‘‘ஸமணஸ்ஸ கோ³தமஸ்ஸ கதா²ய த்³வேதா⁴பா⁴வோ நாம நத்தி², பச்சா² மே மக்கடபூ⁴தகாலே கோ³சரட்டா²னங் ப⁴விஸ்ஸதீ’’தி வேளுவனே நானாவிதே⁴ ருக்கே² ரோபெத்வா ஆரக்க²ங் அதா³ஸி. அபரபா⁴கே³ காலங் கத்வா மக்கடோ ஹுத்வா நிப்³ப³த்தி. ‘‘வஸ்ஸகாரா’’தி வுத்தே ஆக³ந்த்வா ஸமீபே அட்டா²ஸி. தக்³கா⁴தி ஸப்³ப³வாரேஸு ஏகங்ஸவசனேயேவ நிபாதோ. தக்³க⁴, போ⁴ ஆனந்தா³தி ஏவங் தே²ரேன பரிஸமஜ்ஜே² அத்தனோ உக்கங்ஸிதபா⁴வங் ஞத்வா அஹம்பி தே²ரங் உக்கங்ஸிஸ்ஸாமீதி ஏவமாஹ.
83.Tagghāti ekaṃse nipāto. Kahaṃ pana bhavaṃ ānandoti kiṃ therassa veḷuvane vasanabhāvaṃ na jānātīti? Jānāti. Veḷuvanassa pana anena ārakkhā dinnā, tasmā attānaṃ ukkaṃsāpetukāmo pucchati. Kasmā pana tena tattha ārakkhā dinnā? So kira ekadivasaṃ mahākaccāyanattheraṃ gijjhakūṭā otarantaṃ disvā – ‘‘makkaṭo viya eso’’ti āha. Bhagavā taṃ kathaṃ sutvā – ‘‘sace khamāpeti, iccetaṃ kusalaṃ. No ce khamāpeti, imasmiṃ veḷuvane gonaṅgalamakkaṭo bhavissatī’’ti āha. So taṃ kathaṃ sutvā – ‘‘samaṇassa gotamassa kathāya dvedhābhāvo nāma natthi, pacchā me makkaṭabhūtakāle gocaraṭṭhānaṃ bhavissatī’’ti veḷuvane nānāvidhe rukkhe ropetvā ārakkhaṃ adāsi. Aparabhāge kālaṃ katvā makkaṭo hutvā nibbatti. ‘‘Vassakārā’’ti vutte āgantvā samīpe aṭṭhāsi. Tagghāti sabbavāresu ekaṃsavacaneyeva nipāto. Taggha, bho ānandāti evaṃ therena parisamajjhe attano ukkaṃsitabhāvaṃ ñatvā ahampi theraṃ ukkaṃsissāmīti evamāha.
84. ந ச கோ², ப்³ராஹ்மணாதி தே²ரோ கிர சிந்தேஸி ‘‘ஸம்மாஸம்பு³த்³தே⁴ன வண்ணிதஜ்ஜா²னம்பி அத்தி², அவண்ணிதஜ்ஜா²னம்பி அத்தி², அயங் பன ப்³ராஹ்மணோ ஸப்³ப³மேவ வண்ணேதீதி பஞ்ஹங் விஸங்வாதே³தி, ந கோ² பன ஸக்கா இமஸ்ஸ முக²ங் உல்லோகேதுங் ந பிண்ட³பாதங் ரக்கி²துங், பஞ்ஹங் உஜுங் கத்வா கதெ²ஸ்ஸாமீ’’தி இத³ங் வத்துங் ஆரத்³த⁴ங். அந்தரங் கரித்வாதி அப்³ப⁴ந்தரங் கரித்வா. ஏவரூபங் கோ², ப்³ராஹ்மண, ஸோ ப⁴க³வா ஜா²னங் வண்ணேஸீதி இத⁴ ஸப்³ப³ஸங்கா³ஹகஜ்ஜா²னங் நாம கதி²தங்.
84.Na ca kho, brāhmaṇāti thero kira cintesi ‘‘sammāsambuddhena vaṇṇitajjhānampi atthi, avaṇṇitajjhānampi atthi, ayaṃ pana brāhmaṇo sabbameva vaṇṇetīti pañhaṃ visaṃvādeti, na kho pana sakkā imassa mukhaṃ ulloketuṃ na piṇḍapātaṃ rakkhituṃ, pañhaṃ ujuṃ katvā kathessāmī’’ti idaṃ vattuṃ āraddhaṃ. Antaraṃ karitvāti abbhantaraṃ karitvā. Evarūpaṃ kho, brāhmaṇa, so bhagavā jhānaṃ vaṇṇesīti idha sabbasaṅgāhakajjhānaṃ nāma kathitaṃ.
யங் நோ மயந்தி அயங் கிர ப்³ராஹ்மணோ வஸ்ஸகாரப்³ராஹ்மணங் உஸூயதி, தேன புச்சி²தபஞ்ஹஸ்ஸ அகத²னங் பச்சாஸீஸமானோ கதி²தபா⁴வங் ஞத்வா ‘‘வஸ்ஸகாரேன புச்சி²தங் பஞ்ஹங் புனப்புனங் தஸ்ஸ நாமங் க³ண்ஹந்தோ வித்தா²ரெத்வா கதே²ஸி, மயா புச்சி²தபஞ்ஹங் பன யட்டி²கோடியா உப்பீளெந்தோ விய ஏகதே³ஸமேவ கதே²ஸீ’’தி அனத்தமனோ அஹோஸி, தஸ்மா ஏவமாஹ. ஸேஸங் ஸப்³ப³த்த² உத்தானமேவாதி.
Yaṃno mayanti ayaṃ kira brāhmaṇo vassakārabrāhmaṇaṃ usūyati, tena pucchitapañhassa akathanaṃ paccāsīsamāno kathitabhāvaṃ ñatvā ‘‘vassakārena pucchitaṃ pañhaṃ punappunaṃ tassa nāmaṃ gaṇhanto vitthāretvā kathesi, mayā pucchitapañhaṃ pana yaṭṭhikoṭiyā uppīḷento viya ekadesameva kathesī’’ti anattamano ahosi, tasmā evamāha. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
கோ³பகமொக்³க³ல்லானஸுத்தவண்ணனா நிட்டி²தா.
Gopakamoggallānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. கோ³பகமொக்³க³ல்லானஸுத்தங் • 8. Gopakamoggallānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 8. கோ³பகமொக்³க³ல்லானஸுத்தவண்ணனா • 8. Gopakamoggallānasuttavaṇṇanā
