| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. கூ³த²பா⁴ணீஸுத்தங்
8. Gūthabhāṇīsuttaṃ
28. ‘‘தயோமே, பி⁴க்க²வே, புக்³க³லா ஸந்தோ ஸங்விஜ்ஜமானா லோகஸ்மிங் . கதமே தயோ? கூ³த²பா⁴ணீ, புப்ப²பா⁴ணீ, மது⁴பா⁴ணீ. கதமோ ச, பி⁴க்க²வே, புக்³க³லோ கூ³த²பா⁴ணீ? இத⁴, பி⁴க்க²வே, ஏகச்சோ புக்³க³லோ ஸப⁴க்³க³தோ வா பரிஸக்³க³தோ வா 1 ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² – ‘ஏஹம்போ⁴ புரிஸ, யங் ஜானாஸி தங் வதே³ஹீ’தி. ஸோ அஜானங் வா ஆஹ ‘ஜானாமீ’தி, ஜானங் வா ஆஹ ‘ந ஜானாமீ’தி, அபஸ்ஸங் வா ஆஹ ‘பஸ்ஸாமீ’தி, பஸ்ஸங் வா ஆஹ ‘ந பஸ்ஸாமீ’தி 2; இதி அத்தஹேது வா பரஹேது வா ஆமிஸகிஞ்சிக்க²ஹேது வா ஸம்பஜானமுஸா பா⁴ஸிதா ஹோதி. அயங் வுச்சதி, பி⁴க்க²வே, புக்³க³லோ கூ³த²பா⁴ணீ.
28. ‘‘Tayome, bhikkhave, puggalā santo saṃvijjamānā lokasmiṃ . Katame tayo? Gūthabhāṇī, pupphabhāṇī, madhubhāṇī. Katamo ca, bhikkhave, puggalo gūthabhāṇī? Idha, bhikkhave, ekacco puggalo sabhaggato vā parisaggato vā 3 ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho – ‘ehambho purisa, yaṃ jānāsi taṃ vadehī’ti. So ajānaṃ vā āha ‘jānāmī’ti, jānaṃ vā āha ‘na jānāmī’ti, apassaṃ vā āha ‘passāmī’ti, passaṃ vā āha ‘na passāmī’ti 4; iti attahetu vā parahetu vā āmisakiñcikkhahetu vā sampajānamusā bhāsitā hoti. Ayaṃ vuccati, bhikkhave, puggalo gūthabhāṇī.
‘‘கதமோ ச, பி⁴க்க²வே, புக்³க³லோ புப்ப²பா⁴ணீ? இத⁴, பி⁴க்க²வே, ஏகச்சோ புக்³க³லோ ஸப⁴க்³க³தோ வா பரிஸக்³க³தோ வா ஞாதிமஜ்ஜ²க³தோ வா பூக³மஜ்ஜ²க³தோ வா ராஜகுலமஜ்ஜ²க³தோ வா அபி⁴னீதோ ஸக்கி²புட்டோ² – ‘ஏஹம்போ⁴ புரிஸ, யங் பஜானாஸி தங் வதே³ஹீ’தி, ஸோ அஜானங் வா ஆஹ ‘ந ஜானாமீ’தி, ஜானங் வா ஆஹ ‘ஜானாமீ’தி, அபஸ்ஸங் வா ஆஹ ‘ந பஸ்ஸாமீ’தி, பஸ்ஸங் வா ஆஹ ‘பஸ்ஸாமீ’தி; இதி அத்தஹேது வா பரஹேது வா ஆமிஸகிஞ்சிக்க²ஹேது வா ந ஸம்பஜானமுஸா பா⁴ஸிதா ஹோதி. அயங் வுச்சதி, பி⁴க்க²வே, புக்³க³லோ புப்ப²பா⁴ணீ.
‘‘Katamo ca, bhikkhave, puggalo pupphabhāṇī? Idha, bhikkhave, ekacco puggalo sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho – ‘ehambho purisa, yaṃ pajānāsi taṃ vadehī’ti, so ajānaṃ vā āha ‘na jānāmī’ti, jānaṃ vā āha ‘jānāmī’ti, apassaṃ vā āha ‘na passāmī’ti, passaṃ vā āha ‘passāmī’ti; iti attahetu vā parahetu vā āmisakiñcikkhahetu vā na sampajānamusā bhāsitā hoti. Ayaṃ vuccati, bhikkhave, puggalo pupphabhāṇī.
‘‘கதமோ ச, பி⁴க்க²வே, புக்³க³லோ மது⁴பா⁴ணீ? இத⁴, பி⁴க்க²வே, ஏகச்சோ புக்³க³லோ ப²ருஸங் வாசங் பஹாய ப²ருஸாய வாசாய படிவிரதோ ஹோதி; யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா ததா²ரூபிங் வாசங் பா⁴ஸிதா ஹோதி. அயங் வுச்சதி, பி⁴க்க²வே, புக்³க³லோ மது⁴பா⁴ணீ. இமே கோ², பி⁴க்க²வே, தயோ புக்³க³லா ஸந்தோ ஸங்விஜ்ஜமானா லோகஸ்மி’’ந்தி. அட்ட²மங்.
‘‘Katamo ca, bhikkhave, puggalo madhubhāṇī? Idha, bhikkhave, ekacco puggalo pharusaṃ vācaṃ pahāya pharusāya vācāya paṭivirato hoti; yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpiṃ vācaṃ bhāsitā hoti. Ayaṃ vuccati, bhikkhave, puggalo madhubhāṇī. Ime kho, bhikkhave, tayo puggalā santo saṃvijjamānā lokasmi’’nti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. கூ³த²பா⁴ணீஸுத்தவண்ணனா • 8. Gūthabhāṇīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8. கூ³த²பா⁴ணீஸுத்தவண்ணனா • 8. Gūthabhāṇīsuttavaṇṇanā
