| Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā) |
૨. હત્થિરાજવણ્ણસુત્તવણ્ણના
2. Hatthirājavaṇṇasuttavaṇṇanā
૧૩૮. દુતિયે રત્તન્ધકારતિમિસાયન્તિ રત્તિં અન્ધભાવકારકે મહાતમે ચતુરઙ્ગે તમસિ. અબ્ભોકાસે નિસિન્નો હોતીતિ ગન્ધકુટિતો નિક્ખમિત્વા ચઙ્કમનકોટિયં પાસાણફલકે મહાચીવરં સીસે ઠપેત્વા પધાનં પરિગ્ગણ્હમાનો નિસિન્નો હોતિ.
138. Dutiye rattandhakāratimisāyanti rattiṃ andhabhāvakārake mahātame caturaṅge tamasi. Abbhokāse nisinno hotīti gandhakuṭito nikkhamitvā caṅkamanakoṭiyaṃ pāsāṇaphalake mahācīvaraṃ sīse ṭhapetvā padhānaṃ pariggaṇhamāno nisinno hoti.
નનુ ચ તથાગતસ્સ અભાવિતો વા મગ્ગો, અપ્પહીના વા કિલેસા, અપ્પટિવિદ્ધં વા અકુપ્પં, અસચ્છિકતો વા નિરોધો નત્થિ, કસ્મા એવમકાસીતિ? અનાગતે કુલપુત્તાનં અઙ્કુસત્થં. ‘‘અનાગતે હિ કુલપુત્તા મયા ગતમગ્ગં આવજ્જિત્વા અબ્ભોકાસવાસં વસિતબ્બં મઞ્ઞમાના પધાનકમ્મં કરિસ્સન્તી’’તિ સમ્પસ્સમાનો સત્થા એવમકાસિ. મહાતિ મહન્તો. અરિટ્ઠકોતિ કાળકો. મણીતિ પાસાણો. એવમસ્સ સીસં હોતીતિ એવરૂપં તસ્સ કાળવણ્ણં કૂટાગારપ્પમાણં મહાપાસાણસદિસં સીસં હોતિ.
Nanu ca tathāgatassa abhāvito vā maggo, appahīnā vā kilesā, appaṭividdhaṃ vā akuppaṃ, asacchikato vā nirodho natthi, kasmā evamakāsīti? Anāgate kulaputtānaṃ aṅkusatthaṃ. ‘‘Anāgate hi kulaputtā mayā gatamaggaṃ āvajjitvā abbhokāsavāsaṃ vasitabbaṃ maññamānā padhānakammaṃ karissantī’’ti sampassamāno satthā evamakāsi. Mahāti mahanto. Ariṭṭhakoti kāḷako. Maṇīti pāsāṇo. Evamassa sīsaṃ hotīti evarūpaṃ tassa kāḷavaṇṇaṃ kūṭāgārappamāṇaṃ mahāpāsāṇasadisaṃ sīsaṃ hoti.
સુભાસુભન્તિ દીઘમદ્ધાનં સંસરન્તો સુન્દરાસુન્દરં વણ્ણં કત્વા આગતોસીતિ વદતિ. અથ વા સંસરન્તિ સંસરન્તો આગચ્છન્તો. દીઘમદ્ધાનન્તિ વસવત્તિટ્ઠાનતો યાવ ઉરુવેલાય દીઘમગ્ગં, પુરે બોધાય વા છબ્બસ્સાનિ દુક્કરકારિકસમયસઙ્ખાતં દીઘકાલં. વણ્ણં કત્વા સુભાસુભન્તિ સુન્દરઞ્ચ અસુન્દરઞ્ચ નાનપ્પકારં વણ્ણં કત્વા અનેકવારં મમ સન્તિકં આગતોસીતિ અત્થો. સો કિર વણ્ણો નામ નત્થિ, યેન વણ્ણેન મારો વિભિંસકત્થાય ભગવતો સન્તિકં ન આગતપુબ્બો. તેન તં ભગવા એવમાહ. અલં તે તેનાતિ અલં તુય્હં એતેન મારવિભિંસાકારદસ્સનબ્યાપારેન. દુતિયં.
Subhāsubhanti dīghamaddhānaṃ saṃsaranto sundarāsundaraṃ vaṇṇaṃ katvā āgatosīti vadati. Atha vā saṃsaranti saṃsaranto āgacchanto. Dīghamaddhānanti vasavattiṭṭhānato yāva uruvelāya dīghamaggaṃ, pure bodhāya vā chabbassāni dukkarakārikasamayasaṅkhātaṃ dīghakālaṃ. Vaṇṇaṃ katvā subhāsubhanti sundarañca asundarañca nānappakāraṃ vaṇṇaṃ katvā anekavāraṃ mama santikaṃ āgatosīti attho. So kira vaṇṇo nāma natthi, yena vaṇṇena māro vibhiṃsakatthāya bhagavato santikaṃ na āgatapubbo. Tena taṃ bhagavā evamāha. Alaṃ te tenāti alaṃ tuyhaṃ etena māravibhiṃsākāradassanabyāpārena. Dutiyaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૨. હત્થિરાજવણ્ણસુત્તં • 2. Hatthirājavaṇṇasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૨. હત્થિરાજવણ્ણસુત્તવણ્ણના • 2. Hatthirājavaṇṇasuttavaṇṇanā
