| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
2. பொ³ஜ்ஜ²ங்க³ஸங்யுத்தங்
2. Bojjhaṅgasaṃyuttaṃ
1. பப்³ப³தவக்³கோ³
1. Pabbatavaggo
1.ஹிமவந்தஸுத்தவண்ணனா
1.Himavantasuttavaṇṇanā
182. பு³ஜ்ஜ²தி சதுஸச்சங் அரியஸாவகோ ஏதாயாதி போ³த⁴ங், த⁴ம்மஸாமக்³கீ³, அரியஸாவகோ பன சதுஸச்சங் பு³ஜ்ஜ²தீதி போ³தி⁴. அங்கா³தி காரணா. யாய த⁴ம்மஸாமக்³கி³யாதி ஸம்ப³ந்தோ⁴. தண்ஹாவஸேன பதிட்டா²னங், தி³ட்டி²வஸேன ஆயூஹனா. ஸஸ்ஸததி³ட்டி²யா பதிட்டா²னங், உச்சே²த³தி³ட்டி²யா ஆயூஹனா. லீனவஸேன பதிட்டா²னங், உத்³த⁴ச்சவஸேன ஆயூஹனா. காமஸுகா²னுயோக³வஸேன பதிட்டா²னங், அத்தகிலமதா²னுயோக³வஸேன ஆயூஹனா. ஓக⁴தரணஸுத்தவண்ணனாயங் (ஸங்॰ நி॰ 1.1) –
182. Bujjhati catusaccaṃ ariyasāvako etāyāti bodhaṃ, dhammasāmaggī, ariyasāvako pana catusaccaṃ bujjhatīti bodhi. Aṅgāti kāraṇā. Yāya dhammasāmaggiyāti sambandho. Taṇhāvasena patiṭṭhānaṃ, diṭṭhivasena āyūhanā. Sassatadiṭṭhiyā patiṭṭhānaṃ, ucchedadiṭṭhiyā āyūhanā. Līnavasena patiṭṭhānaṃ, uddhaccavasena āyūhanā. Kāmasukhānuyogavasena patiṭṭhānaṃ, attakilamathānuyogavasena āyūhanā. Oghataraṇasuttavaṇṇanāyaṃ (saṃ. ni. 1.1) –
‘‘கிலேஸவஸேன பதிட்டா²னங், அபி⁴ஸங்கா²ரவஸேன ஆயூஹனா. தண்ஹாதி³ட்டீ²ஹி பதிட்டா²னங், அவஸேஸகிலேஸாபி⁴ஸங்கா²ரேஹி ஆயூஹனா, ஸப்³பா³குஸலாபி⁴ஸங்கா²ரவஸேன பதிட்டா²னங், ஸப்³ப³லோகியகுஸலாபி⁴ஸங்கா²ரவஸேன ஆயூஹனா’’தி –
‘‘Kilesavasena patiṭṭhānaṃ, abhisaṅkhāravasena āyūhanā. Taṇhādiṭṭhīhi patiṭṭhānaṃ, avasesakilesābhisaṅkhārehi āyūhanā, sabbākusalābhisaṅkhāravasena patiṭṭhānaṃ, sabbalokiyakusalābhisaṅkhāravasena āyūhanā’’ti –
வுத்தேஸு பகாரேஸு இத⁴ அவுத்தானங் வஸேன வேதி³தப்³போ³. கிலேஸஸந்தானநித்³தா³ய உட்ட²ஹதீதி ஏதேன ஸிகா²பத்தவிபஸ்ஸனாஸஹக³தானம்பி ஸதிஆதீ³னங் பொ³ஜ்ஜ²ங்க³பா⁴வங் த³ஸ்ஸேதி. சத்தாரீதிஆதி³னா மக்³க³ப²லேன ஸஹக³தானங். ஸத்தஹி பொ³ஜ்ஜ²ங்கே³ஹி பா⁴விதேஹி ஸச்சபடிவேதோ⁴ ஹோதீதி கத²மித³ங் ஜானிதப்³ப³ந்தி சோத³னங் ஸந்தா⁴யாஹ ‘‘யதா²ஹா’’திஆதி³. ஜா²னங்க³மக்³க³ங்கா³த³யோ வியாதி ஏதேன போ³தி⁴பொ³ஜ்ஜ²ங்க³ஸத்³தா³னங் ஸமுதா³யாவயவவிஸயதங் த³ஸ்ஸேதி. ஸேனங்க³ரத²ங்கா³த³யோ வியாதி ஏதேன புக்³க³லபஞ்ஞத்தியா அவிஜ்ஜமானபஞ்ஞத்திபா⁴வங் த³ஸ்ஸேதி.
Vuttesu pakāresu idha avuttānaṃ vasena veditabbo. Kilesasantānaniddāya uṭṭhahatīti etena sikhāpattavipassanāsahagatānampi satiādīnaṃ bojjhaṅgabhāvaṃ dasseti. Cattārītiādinā maggaphalena sahagatānaṃ. Sattahi bojjhaṅgehi bhāvitehi saccapaṭivedho hotīti kathamidaṃ jānitabbanti codanaṃ sandhāyāha ‘‘yathāhā’’tiādi. Jhānaṅgamaggaṅgādayo viyāti etena bodhibojjhaṅgasaddānaṃ samudāyāvayavavisayataṃ dasseti. Senaṅgarathaṅgādayo viyāti etena puggalapaññattiyā avijjamānapaññattibhāvaṃ dasseti.
போ³தா⁴ய ஸங்வத்தந்தீதி பொ³ஜ்ஜ²ங்கா³தி வுத்தங் ‘‘காரணத்தோ² அங்க³ஸத்³தோ³’’தி. பு³ஜ்ஜ²தீதி போ³தி⁴, போ³தி⁴யா ஏவ அங்கா³தி பொ³ஜ்ஜ²ங்கா³தி வுத்தங் ‘‘பு³ஜ்ஜ²ந்தீதி பொ³ஜ்ஜ²ங்கா³’’தி. விபஸ்ஸனாதீ³னங் காரணானங் பு³ஜ்ஜி²தப்³பா³னங் ஸச்சானங் அனுரூபங் பச்சக்க²பா⁴வேன படிமுக²ங் அவிபரீதங் ஸம்மா பு³ஜ்ஜ²ந்தீதி ஏவங் வத்து²விஸேஸதீ³பகேஹி உபரிமக்³கே³ஹி அனுபு³ஜ்ஜ²ந்தீதிஆதி³னா வுத்தபோ³தி⁴ஸத்³தே³ஹி நிப்பதே³ஸேன வுத்தங் ‘‘பு³ஜ்ஜ²னதாஸாமஞ்ஞேன ஸங்க³ண்ஹாதீ’’தி. எத்த² ச லீனபதிட்டா²ன-காமஸுக²ல்லிகானுயோக³-உச்சே²தா³பி⁴னிவேஸானங் த⁴ம்மவிசய-வீரியபீதிபதா⁴ன-த⁴ம்மஸாமக்³கீ³ படிபக்கோ². உத்³த⁴ச்சாயூஹனஅத்தகிலமதா²னுயோக³-ஸஸ்ஸதாபி⁴னிவேஸானங் பஸ்ஸத்³தி⁴ஸமாதி⁴-உபெக்கா²பதா⁴ன-த⁴ம்மஸாமக்³கீ³ படிபக்கோ². ஸதி பன உப⁴யத்தா²பி இச்சி²தப்³பா³. ததா² ஹி ஸா ஸப்³ப³த்தி²கா வுத்தா.
Bodhāya saṃvattantīti bojjhaṅgāti vuttaṃ ‘‘kāraṇattho aṅgasaddo’’ti. Bujjhatīti bodhi, bodhiyā eva aṅgāti bojjhaṅgāti vuttaṃ ‘‘bujjhantīti bojjhaṅgā’’ti. Vipassanādīnaṃ kāraṇānaṃ bujjhitabbānaṃ saccānaṃ anurūpaṃ paccakkhabhāvena paṭimukhaṃ aviparītaṃ sammā bujjhantīti evaṃ vatthuvisesadīpakehi uparimaggehi anubujjhantītiādinā vuttabodhisaddehi nippadesena vuttaṃ ‘‘bujjhanatāsāmaññena saṅgaṇhātī’’ti. Ettha ca līnapatiṭṭhāna-kāmasukhallikānuyoga-ucchedābhinivesānaṃ dhammavicaya-vīriyapītipadhāna-dhammasāmaggī paṭipakkho. Uddhaccāyūhanaattakilamathānuyoga-sassatābhinivesānaṃ passaddhisamādhi-upekkhāpadhāna-dhammasāmaggī paṭipakkho. Sati pana ubhayatthāpi icchitabbā. Tathā hi sā sabbatthikā vuttā.
ஸங்-ஸத்³தோ³ பஸங்ஸாயங். புனதே³வ ஸுந்த³ரோ ச அத்தோ²பீதி ஆஹ ‘‘பஸத்தோ² ஸுந்த³ரோ ச பொ³ஜ்ஜ²ங்கோ³’’தி. அபி⁴னிப்³ப³த்தேதீதி அபி⁴விஸிட்ட²பா⁴வேன நிப்³ப³த்தேதி ஸவிஸேஸபா⁴வங் வத³தி. ‘‘ஏகே வண்ணயந்தீ’’தி வத்வா தத்த² யதா²வுத்தவிவேகத்தயதோ அஞ்ஞங் விவேகத்³வயங் உத்³த⁴ரித்வா த³ஸ்ஸேதுங் ‘‘தே ஹீ’’திஆதி³ வுத்தங். தத்த² ஜா²னக்க²ணே தாவ கிச்சதோ விக்க²ம்ப⁴னவிவேகனிஸ்ஸிதங், விபஸ்ஸனாக்க²ணே அஜ்ஜா²ஸயதோ படிப்பஸ்ஸத்³தி⁴விவேகனிஸ்ஸிதங் பா⁴வேதீதி. தேனாஹ – ‘‘அனுத்தரங் விமொக்க²ங் உபஸம்பஜ்ஜ விஹரிஸ்ஸாமீ’’தி. தத்த² தத்த² நிச்ச²யதாய கஸிணஜ்ஜா²னக்³க³ஹணேன அனுப்பாதா³னம்பி க³ஹணங் த³ட்ட²ப்³ப³ங்.
Saṃ-saddo pasaṃsāyaṃ. Punadeva sundaro ca atthopīti āha ‘‘pasattho sundaro ca bojjhaṅgo’’ti. Abhinibbattetīti abhivisiṭṭhabhāvena nibbatteti savisesabhāvaṃ vadati. ‘‘Eke vaṇṇayantī’’ti vatvā tattha yathāvuttavivekattayato aññaṃ vivekadvayaṃ uddharitvā dassetuṃ ‘‘te hī’’tiādi vuttaṃ. Tattha jhānakkhaṇe tāva kiccato vikkhambhanavivekanissitaṃ, vipassanākkhaṇe ajjhāsayato paṭippassaddhivivekanissitaṃ bhāvetīti. Tenāha – ‘‘anuttaraṃ vimokkhaṃ upasampajja viharissāmī’’ti. Tattha tattha nicchayatāya kasiṇajjhānaggahaṇena anuppādānampi gahaṇaṃ daṭṭhabbaṃ.
ஹிமவந்தஸுத்தவண்ணனா நிட்டி²தா.
Himavantasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஹிமவந்தஸுத்தங் • 1. Himavantasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஹிமவந்தஸுத்தவண்ணனா • 1. Himavantasuttavaṇṇanā
