| Library / Tipiṭaka / તિપિટક • Tipiṭaka / પઞ્ચપકરણ-અટ્ઠકથા • Pañcapakaraṇa-aṭṭhakathā |
૪. ઇદ્ધિકથાવણ્ણના
4. Iddhikathāvaṇṇanā
૮૮૩-૮૮૪. ઇદાનિ ઇદ્ધિકથા નામ હોતિ. તત્થ ઇદ્ધિ નામેસા કત્થચિ ઇજ્ઝતિ, કત્થચિ ન ઇજ્ઝતિ, અનિચ્ચાદીનં નિચ્ચાદિકરણે એકન્તેનેવ ન ઇજ્ઝતિ. સભાગસન્તતિં પન પરિવત્તેત્વા વિસભાગસન્તતિકરણે વા સભાગસન્તતિવસેનેવ ચિરતરપ્પવત્તને વા યેસં અત્થાય કરિયતિ, તેસં પુઞ્ઞાદીનિ કારણાનિ નિસ્સાય કત્થચિ ઇજ્ઝતિ, ભિક્ખૂનં અત્થાય પાનીયસ્સ સપ્પિખીરાદિકરણે વિય મહાધાતુનિધાને દીપાદીનં ચિરસન્તાનપ્પવત્તને વિય ચાતિ ઇદં સકસમયે સન્નિટ્ઠાનં. યં પન આયસ્મા પિલિન્દવચ્છો રઞ્ઞો પાસાદં સુવણ્ણન્ત્વેવ અધિમુચ્ચિ, તં નિસ્સાય યેસં ‘‘અત્થિ અધિપ્પાયઇદ્ધી’’તિ લદ્ધિ, સેય્યથાપિ અન્ધકાનં; તે સન્ધાય અત્થિ અધિપ્પાયઇદ્ધીતિ પુચ્છા સકવાદિસ્સ. તત્થ અધિપ્પાયઇદ્ધીતિ અધિપ્પાયઇદ્ધિ, યથાધિપ્પાયં ઇજ્ઝનઇદ્ધીતિ અત્થો. આમન્તાતિ લદ્ધિમત્તે ઠત્વા પટિઞ્ઞા પરવાદિસ્સ. અથ નં અનિચ્ચાદીનં નિચ્ચાદિતાય અનુયુઞ્જિતું નિચ્ચપણ્ણા રુક્ખા હોન્તૂતિઆદિમાહ. સેસમેત્થ ઉત્તાનત્થમેવ. લદ્ધિપતિટ્ઠાપને સુવણ્ણો ચ પનાસીતિ રઞ્ઞો પુઞ્ઞૂપનિસ્સયેન આસિ, ન કેવલં થેરસ્સ અધિપ્પાયેનેવ. તસ્મા અસાધકમેતન્તિ.
883-884. Idāni iddhikathā nāma hoti. Tattha iddhi nāmesā katthaci ijjhati, katthaci na ijjhati, aniccādīnaṃ niccādikaraṇe ekanteneva na ijjhati. Sabhāgasantatiṃ pana parivattetvā visabhāgasantatikaraṇe vā sabhāgasantativaseneva ciratarappavattane vā yesaṃ atthāya kariyati, tesaṃ puññādīni kāraṇāni nissāya katthaci ijjhati, bhikkhūnaṃ atthāya pānīyassa sappikhīrādikaraṇe viya mahādhātunidhāne dīpādīnaṃ cirasantānappavattane viya cāti idaṃ sakasamaye sanniṭṭhānaṃ. Yaṃ pana āyasmā pilindavaccho rañño pāsādaṃ suvaṇṇantveva adhimucci, taṃ nissāya yesaṃ ‘‘atthi adhippāyaiddhī’’ti laddhi, seyyathāpi andhakānaṃ; te sandhāya atthi adhippāyaiddhīti pucchā sakavādissa. Tattha adhippāyaiddhīti adhippāyaiddhi, yathādhippāyaṃ ijjhanaiddhīti attho. Āmantāti laddhimatte ṭhatvā paṭiññā paravādissa. Atha naṃ aniccādīnaṃ niccāditāya anuyuñjituṃ niccapaṇṇā rukkhā hontūtiādimāha. Sesamettha uttānatthameva. Laddhipatiṭṭhāpane suvaṇṇo ca panāsīti rañño puññūpanissayena āsi, na kevalaṃ therassa adhippāyeneva. Tasmā asādhakametanti.
ઇદ્ધિકથાવણ્ણના.
Iddhikathāvaṇṇanā.
Related texts:
તિપિટક (મૂલ) • Tipiṭaka (Mūla) / અભિધમ્મપિટક • Abhidhammapiṭaka / કથાવત્થુપાળિ • Kathāvatthupāḷi / (૨૦૩) ૪. ઇદ્ધિકથા • (203) 4. Iddhikathā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-મૂલટીકા • Pañcapakaraṇa-mūlaṭīkā / ૪. ઇદ્ધિકથાવણ્ણના • 4. Iddhikathāvaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-અનુટીકા • Pañcapakaraṇa-anuṭīkā / ૪. ઇદ્ધિકથાવણ્ણના • 4. Iddhikathāvaṇṇanā
