| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. யக்க²ஸங்யுத்தங்
10. Yakkhasaṃyuttaṃ
1. இந்த³கஸுத்தவண்ணனா
1. Indakasuttavaṇṇanā
235. அத்தனோ பரிணாயகத்தேன இந்தோ³ நாம மஹேஸக்கோ², இந்தோ³தி ஸமஞ்ஞா அஸ்ஸாதி கத்வா ‘‘இந்த³கோ’’திபி வுச்சதி, தஸ்ஸ இந்த³கஸ்ஸ. இந்த³கூடே பப்³ப³தே நிவஸதீதி இந்த³கூடனிவாஸீ, தஸ்ஸ இந்த³கூடனிவாஸினோ. ப³லிகம்மேஹி யஜிதப்³ப³தோ பூஜிதப்³ப³தோ யக்கோ², தஸ்ஸ யக்க²ஸ்ஸ. இந்த³ஸ்ஸ நிவாஸட்டா²னபூ⁴தங் கூடங் இந்த³கூடந்தி யக்க²தோ கூடேன நாமங் லத்³த⁴ங். இந்த³கூடோ இந்தோ³ உத்தரபத³லோபேன யதா² ‘‘கேலாஸகூடோ கேலாஸோ’’தி. இந்தோ³ யக்கோ²தி கூடதோ யக்கே²ன நாமங் லத்³த⁴ங். ந செத்த² இதரீதரனிஸ்ஸயதோ³ஸோ அஞ்ஞமஞ்ஞூபலக்க²ணபா⁴வதோ யதா² தங் ‘‘காயகம்மட்டா²ன’’ந்தி. ரூபந்தி ஸகலங் ரூபக்க²ந்த⁴மாஹ, ந ரூபாயதனந்தி. இமங் ஸரீரங் பேச்ச அயங் கிந்தி படிலப⁴தீதி சோதே³தி.
235. Attano pariṇāyakattena indo nāma mahesakkho, indoti samaññā assāti katvā ‘‘indako’’tipi vuccati, tassa indakassa. Indakūṭe pabbate nivasatīti indakūṭanivāsī, tassa indakūṭanivāsino. Balikammehi yajitabbato pūjitabbato yakkho, tassa yakkhassa. Indassa nivāsaṭṭhānabhūtaṃ kūṭaṃ indakūṭanti yakkhato kūṭena nāmaṃ laddhaṃ. Indakūṭo indo uttarapadalopena yathā ‘‘kelāsakūṭo kelāso’’ti. Indo yakkhoti kūṭato yakkhena nāmaṃ laddhaṃ. Na cettha itarītaranissayadoso aññamaññūpalakkhaṇabhāvato yathā taṃ ‘‘kāyakammaṭṭhāna’’nti. Rūpanti sakalaṃ rūpakkhandhamāha, na rūpāyatananti. Imaṃ sarīraṃ pecca ayaṃ kinti paṭilabhatīti codeti.
குதோ ஆக³ச்ச²தீதி பராதா⁴ரரூபே ஜீவே அத்தனி மாதுகுச்சி²மோக்கந்தே ரூபஸ்ஸ ஸம்ப⁴வோதி குதோ நாம டா²னதோ ஆக³ச்ச²தி. தேனாஹ ‘‘இமானி ச அட்டீ²னி இமா ச மங்ஸபேஸியோ’’திஆதி³. கத²ங் ந்வயந்தி அயங் குச்சி²ஸங்கா²தே க³ப்³ப⁴ரே கத²ங் ஸஜ்ஜதீதி புச்ச²தி. ‘‘ஸீஹானங்வ நத³ந்தானங், தா³டீ²னங் கி³ரிக³ப்³ப⁴ரே’’திஆதி³னா (தே²ரகா³॰ நிதா³னகா³தா²) க³ப்³ப⁴ரோ ச குச்சி²வாசகோ ஆக³தோ. தேனாஹ ‘‘க³ப்³ப⁴ரஸ்மிந்தி மாதுகுச்சி²ஸ்மி’’ந்தி. புக்³க³லவாதீ³தி அத்தவாது³பாதா³னோ. யதா² ஹி மச்ச²மங்ஸங் பு⁴த்தங் பே²ணங் விய ஹுத்வா விலீயதி, ந ச பஞ்ஞாயதி ஸத்தபா⁴வேன அப்பவத்தனதோ, ஏவமேவங் யதி³ மாதுகுச்சி²ஸ்மிங் க³ப்³ப⁴பா⁴வேன உப்பன்னங் ரூபங் ஸத்தோ ந ப⁴வெய்ய நோ வட்³டெ⁴ய்ய, விலீயித்வா க³ச்செ²ய்ய, பஞ்ஞாயதி ச தங் ரூபங், தஸ்மா ஜீவோதி இமாய லத்³தி⁴யா. ஏவமாஹாதி ‘‘ரூபங்…பே॰… க³ப்³ப⁴ரஸ்மி’’ந்தி ஏவமவோச. பட²மந்தி ஏதேஸங் பஞ்சன்னங் பட²மங். தேனாஹ ‘‘பட²மேன படிஸந்தி⁴விஞ்ஞாணேன ஸத்³தி⁴’’ந்தி. ‘‘ஜாதிஉண்ணங்ஸூஹீதி ஜாதிஏளகாய உண்ணங்ஸூஹீ’’தி வத³ந்தி. ‘‘க³ப்³ப⁴ங் பா²லெத்வா க³ஹிதஉண்ணா ஜாதிஉண்ணா. தஸ்ஸா அங்ஸூஹி தீஹி கதஸுத்தக்³கே³’’தி ஸங்யுத்தபா⁴ணகானங் அதி⁴ப்பாயோ.
Kuto āgacchatīti parādhārarūpe jīve attani mātukucchimokkante rūpassa sambhavoti kuto nāma ṭhānato āgacchati. Tenāha ‘‘imāni ca aṭṭhīni imā ca maṃsapesiyo’’tiādi. Kathaṃ nvayanti ayaṃ kucchisaṅkhāte gabbhare kathaṃ sajjatīti pucchati. ‘‘Sīhānaṃva nadantānaṃ, dāṭhīnaṃ girigabbhare’’tiādinā (theragā. nidānagāthā) gabbharo ca kucchivācako āgato. Tenāha ‘‘gabbharasminti mātukucchismi’’nti. Puggalavādīti attavādupādāno. Yathā hi macchamaṃsaṃ bhuttaṃ pheṇaṃ viya hutvā vilīyati, na ca paññāyati sattabhāvena appavattanato, evamevaṃ yadi mātukucchismiṃ gabbhabhāvena uppannaṃ rūpaṃ satto na bhaveyya no vaḍḍheyya, vilīyitvā gaccheyya, paññāyati ca taṃ rūpaṃ, tasmā jīvoti imāya laddhiyā. Evamāhāti ‘‘rūpaṃ…pe… gabbharasmi’’nti evamavoca. Paṭhamanti etesaṃ pañcannaṃ paṭhamaṃ. Tenāha ‘‘paṭhamena paṭisandhiviññāṇena saddhi’’nti. ‘‘Jātiuṇṇaṃsūhīti jātieḷakāya uṇṇaṃsūhī’’ti vadanti. ‘‘Gabbhaṃ phāletvā gahitauṇṇā jātiuṇṇā. Tassā aṃsūhi tīhi katasuttagge’’ti saṃyuttabhāṇakānaṃ adhippāyo.
அனாவிலோதி அச்சோ², ஸுப்பஸன்னோதி அத்தோ². ஏவங்வண்ணப்படிபா⁴க³ந்தி வுத்தப்பமாணஸண்டா²னஸம்பரிச்சி²ன்னங். கலலங் ஸம்பவுச்சதீதி அத்தபா⁴வோ பூ⁴துபாதா³ரூபஸங்கா²தோ ஸந்தானவஸேன பவத்தமானோ கலலங் நாமாதி கதீ²யதி.
Anāviloti accho, suppasannoti attho. Evaṃvaṇṇappaṭibhāganti vuttappamāṇasaṇṭhānasamparicchinnaṃ. Kalalaṃ sampavuccatīti attabhāvo bhūtupādārūpasaṅkhāto santānavasena pavattamāno kalalaṃ nāmāti kathīyati.
கலலாதி யதா²வுத்தகலலரூபஹேது தங் நிஸ்ஸாய பச்சயங் கத்வா. மங்ஸதோ⁴வனஉத³கவண்ணந்தி வண்ணதோ மங்ஸதோ⁴வனஉத³கவண்ணங், ஸண்டா²னதோ பன விலீனதிபுஸதி³ஸங்.
Kalalāti yathāvuttakalalarūpahetu taṃ nissāya paccayaṃ katvā. Maṃsadhovanaudakavaṇṇanti vaṇṇato maṃsadhovanaudakavaṇṇaṃ, saṇṭhānato pana vilīnatipusadisaṃ.
பரிபக்கந்தி பரிபாககலலபா⁴வதோ பரிபாகங் க³தங் ஸுபரிபாகங் க³தங். ஸமூஹதந்தி ஸமூஹபூ⁴தங் ஸங்க³தங். விவட்டமானந்தி பரிணமந்தங். தப்³பா⁴வந்தி கரணே ஏதங் உபயோக³வசனங், தப்³பா⁴வேன பரிணமந்தந்தி அத்தோ². நிஸ்ஸக்கே வா உபயோக³வசனங், தப்³பா⁴வதோ கலலபா⁴வதோ கலலங் விபரிணமந்தங். அப்³பு³த³ங் நாம ஜாயதி, அப்³பு³த³ங் நாம ஸம்பஜ்ஜதீதி அத்தோ².
Paripakkanti paripākakalalabhāvato paripākaṃ gataṃ suparipākaṃ gataṃ. Samūhatanti samūhabhūtaṃ saṅgataṃ. Vivaṭṭamānanti pariṇamantaṃ. Tabbhāvanti karaṇe etaṃ upayogavacanaṃ, tabbhāvena pariṇamantanti attho. Nissakke vā upayogavacanaṃ, tabbhāvato kalalabhāvato kalalaṃ vipariṇamantaṃ. Abbudaṃ nāma jāyati, abbudaṃ nāma sampajjatīti attho.
விலீனதிபுஸதி³ஸா ஸண்டா²னவஸேன, வண்ணவஸேன பன ஸிதா அரத்தாவ ஹோதீதி வத³ந்தி. மண்ட³ந்தி தா³ரிகானங் ததா² பீளனதோ நிப்³ப³த்தமரிசபக்கஸ்ஸ ஸாரபூ⁴தங் ரஸங். ஸப்³ப³பா⁴கே³ஹி முச்சதீதி ஸோ மண்டோ³ கபாலே அலக்³கோ³ ஹுத்வா தஸ்ஸ ஸப்³ப³பா⁴கே³ஹி முச்சி²த்வா பிண்டி³தோ ஹுத்வா திட்ட²தி. ஏவரூபா பேஸி ஹோதீதி ஸா பேஸி க³ப்³பா⁴ஸயே கத்த²சி அலக்³கா³ யதா²வுத்தமண்டோ³ விய பிண்டி³தோ ஹுத்வா திட்ட²தி. தேனாஹ ‘‘விலீனதிபுஸதி³ஸா’’தி.
Vilīnatipusadisā saṇṭhānavasena, vaṇṇavasena pana sitā arattāva hotīti vadanti. Maṇḍanti dārikānaṃ tathā pīḷanato nibbattamaricapakkassa sārabhūtaṃ rasaṃ. Sabbabhāgehi muccatīti so maṇḍo kapāle alaggo hutvā tassa sabbabhāgehi mucchitvā piṇḍito hutvā tiṭṭhati. Evarūpā pesi hotīti sā pesi gabbhāsaye katthaci alaggā yathāvuttamaṇḍo viya piṇḍito hutvā tiṭṭhati. Tenāha ‘‘vilīnatipusadisā’’ti.
பேஸி நிப்³ப³த்ததீதி எத்த² பேஸீதி நிஸ்ஸக்கே பச்சத்தவசனந்தி ஆஹ ‘‘ததோ பேஸிதோ’’தி.
Pesi nibbattatīti ettha pesīti nissakke paccattavacananti āha ‘‘tato pesito’’ti.
க⁴னஸ்ஸ ஸண்டா²னங். நிப்³ப³த்தங் கம்மபச்சயாதி தங்ஸண்டா²னங் ரூபத⁴ம்மனிப்³ப³த்தியா ஜாயதி. ‘‘ஜராமரணங் அனிச்சங் ஸங்க²தங் படிச்சஸமுப்பன்ன’’ந்தி (ஸங்॰ நி॰ 2.20) ஹி வுத்தங்.
Ghanassa saṇṭhānaṃ. Nibbattaṃ kammapaccayāti taṃsaṇṭhānaṃ rūpadhammanibbattiyā jāyati. ‘‘Jarāmaraṇaṃ aniccaṃ saṅkhataṃ paṭiccasamuppanna’’nti (saṃ. ni. 2.20) hi vuttaṃ.
பீளகாதி பீளகஸதி³ஸா மங்ஸபிண்டா³ ஜாயந்தி.
Pīḷakāti pīḷakasadisā maṃsapiṇḍā jāyanti.
ஸத்தமாதீ³னீதி ஆதி³-ஸத்³தே³ன அட்ட²மஸத்தாஹதோ பட்டா²ய யாவ ஏகசத்தாலீஸா சதுத்திங்ஸ ஸத்தாஹானி ஸங்க³ண்ஹாதி. பரிணதகாலந்தி க³ப்³ப⁴ஸ்ஸ பரிணதகாலங். நவமாஸதோ ப³ஹி பரிபக்கோ நாம ஹோதி கேஸலோமாதி³னிப்³ப³த்திதோ. தேனாஹ ‘‘த்³வாசத்தாலீஸே ஸத்தாஹே ஏதானி ஜாயந்தீ’’தி.
Sattamādīnīti ādi-saddena aṭṭhamasattāhato paṭṭhāya yāva ekacattālīsā catuttiṃsa sattāhāni saṅgaṇhāti. Pariṇatakālanti gabbhassa pariṇatakālaṃ. Navamāsato bahi paripakko nāma hoti kesalomādinibbattito. Tenāha ‘‘dvācattālīse sattāhe etāni jāyantī’’ti.
தஸ்ஸாதி க³ப்³ப⁴ஸெய்யகஸத்தஸ்ஸ. மாதுஉத³ரபடலேன ஏகாப³த்³தோ⁴ ஹோதி யதோ மாதரா பரிபு⁴த்தஆஹாரோ ஆமாஸயே பதிட்டி²தே க³ப்³ப⁴ஸ்ஸ நாபி⁴னாளானுஸாரேன க³ப்³ப⁴க³தஸ்ஸ ஸரீரங் ஸம்பத்வா ஆஹாரகிச்சங் கரோதி. ஆஹாரஸமுட்டா²னரூபங் ஸமுட்டா²பேதீதி க³ப்³ப⁴க³தஸ்ஸ காயே ஓஜாய பச்சயோ ஹோதி. ஸா ச தங் பச்சயங் லபி⁴த்வா ஓஜட்ட²மகங் ரூபங் ஸமுட்டா²பேதி. ஏவங் மாதரா பரிபு⁴த்தஆஹாரபச்சயேன க³ப்³ப⁴க³தோ த³ஸ மாஸே யாபேதி அத்தனோ நாபி⁴னாளானுஸாரக³தேனேவ தேன யாவ ஆஹாரஸமுட்டா²னஸத்தாஹோ, ததோ பட்டா²ய ஆஹரணதோ. கேசி பன ‘‘மாதரா பரிபு⁴த்தஆஹாரோ பா³ஹிரவக்³கோ³ விய தஸ்ஸ காயங் அபி⁴ஸன்னேதி பரிஸன்னேதி, தேன ஸோ யாபேதீ’’தி வத³ந்தி. குச்சி²க³தங் உத³ரபடலேன திரோஹிதத்தா ப³ஹி டி²தந்தி வத்தப்³ப³தங் ந அரஹதீதி ‘‘குச்சி²யா அப்³ப⁴ந்தரக³தோ’’தி ஆஹ. மாதுகுச்சி²க³தோ நரோதி மாது திரோகுச்சி²க³தோ. ஏவங் கோ²தி இமினா யதா²வுத்தாகாரேன அயங் ஸத்தோ…பே॰… நிப்³ப³த்ததி, தஸ்மா ரூபங் ந ஜீவோ. ந ஹி தி³ட்டி²க³தஸ்ஸ ஸத்தாஹக்கமேன வுட்³டி⁴ப்பத்தோ இச்சி²தோ அனிச்சதாபத்திதோ.
Tassāti gabbhaseyyakasattassa. Mātuudarapaṭalena ekābaddho hoti yato mātarā paribhuttaāhāro āmāsaye patiṭṭhite gabbhassa nābhināḷānusārena gabbhagatassa sarīraṃ sampatvā āhārakiccaṃ karoti. Āhārasamuṭṭhānarūpaṃ samuṭṭhāpetīti gabbhagatassa kāye ojāya paccayo hoti. Sā ca taṃ paccayaṃ labhitvā ojaṭṭhamakaṃ rūpaṃ samuṭṭhāpeti. Evaṃ mātarā paribhuttaāhārapaccayena gabbhagato dasa māse yāpeti attano nābhināḷānusāragateneva tena yāva āhārasamuṭṭhānasattāho, tato paṭṭhāya āharaṇato. Keci pana ‘‘mātarā paribhuttaāhāro bāhiravaggo viya tassa kāyaṃ abhisanneti parisanneti, tena so yāpetī’’ti vadanti. Kucchigataṃ udarapaṭalena tirohitattā bahi ṭhitanti vattabbataṃ na arahatīti ‘‘kucchiyā abbhantaragato’’ti āha. Mātukucchigato naroti mātu tirokucchigato. Evaṃ khoti iminā yathāvuttākārena ayaṃ satto…pe… nibbattati, tasmā rūpaṃ na jīvo. Na hi diṭṭhigatassa sattāhakkamena vuḍḍhippatto icchito aniccatāpattito.
இந்த³கஸுத்தவண்ணனா நிட்டி²தா.
Indakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. இந்த³கஸுத்தங் • 1. Indakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. இந்த³கஸுத்தவண்ணனா • 1. Indakasuttavaṇṇanā
