| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. இந்த்³ரியஸங்வரஸுத்தங்
8. Indriyasaṃvarasuttaṃ
50. 1 ‘‘இந்த்³ரியஸங்வரே , பி⁴க்க²வே, அஸதி இந்த்³ரியஸங்வரவிபன்னஸ்ஸ ஹதூபனிஸங் ஹோதி ஸீலங்; ஸீலே அஸதி ஸீலவிபன்னஸ்ஸ ஹதூபனிஸோ ஹோதி ஸம்மாஸமாதி⁴; ஸம்மாஸமாதி⁴ம்ஹி அஸதி ஸம்மாஸமாதி⁴விபன்னஸ்ஸ ஹதூபனிஸங் ஹோதி யதா²பூ⁴தஞாணத³ஸ்ஸனங்; யதா²பூ⁴தஞாணத³ஸ்ஸனே அஸதி யதா²பூ⁴தஞாணத³ஸ்ஸனவிபன்னஸ்ஸ ஹதூபனிஸோ ஹோதி நிப்³பி³தா³விராகோ³; நிப்³பி³தா³விராகே³ அஸதி நிப்³பி³தா³விராக³விபன்னஸ்ஸ ஹதூபனிஸங் ஹோதி விமுத்திஞாணத³ஸ்ஸனங். ஸெய்யதா²பி, பி⁴க்க²வே, ருக்கோ² ஸாகா²பலாஸவிபன்னோ. தஸ்ஸ பபடிகாபி ந பாரிபூரிங் க³ச்ச²தி, தசோபி ந பாரிபூரிங் க³ச்ச²தி, பெ²க்³கு³பி ந பாரிபூரிங் க³ச்ச²தி, ஸாரோபி ந பாரிபூரிங் க³ச்ச²தி. ஏவமேவங் கோ², பி⁴க்க²வே, இந்த்³ரியஸங்வரே அஸதி இந்த்³ரியஸங்வரவிபன்னஸ்ஸ ஹதூபனிஸங் ஹோதி ஸீலங்…பே॰… விமுத்திஞாணத³ஸ்ஸனங்.
50.2 ‘‘Indriyasaṃvare , bhikkhave, asati indriyasaṃvaravipannassa hatūpanisaṃ hoti sīlaṃ; sīle asati sīlavipannassa hatūpaniso hoti sammāsamādhi; sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ; yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo; nibbidāvirāge asati nibbidāvirāgavipannassa hatūpanisaṃ hoti vimuttiñāṇadassanaṃ. Seyyathāpi, bhikkhave, rukkho sākhāpalāsavipanno. Tassa papaṭikāpi na pāripūriṃ gacchati, tacopi na pāripūriṃ gacchati, pheggupi na pāripūriṃ gacchati, sāropi na pāripūriṃ gacchati. Evamevaṃ kho, bhikkhave, indriyasaṃvare asati indriyasaṃvaravipannassa hatūpanisaṃ hoti sīlaṃ…pe… vimuttiñāṇadassanaṃ.
‘‘இந்த்³ரியஸங்வரே , பி⁴க்க²வே, ஸதி இந்த்³ரியஸங்வரஸம்பன்னஸ்ஸ உபனிஸஸம்பன்னங் ஹோதி ஸீலங்; ஸீலே ஸதி ஸீலஸம்பன்னஸ்ஸ உபனிஸஸம்பன்னோ ஹோதி ஸம்மாஸமாதி⁴; ஸம்மாஸமாதி⁴ம்ஹி ஸதி ஸம்மாஸமாதி⁴ஸம்பன்னஸ்ஸ உபனிஸஸம்பன்னங் ஹோதி யதா²பூ⁴தஞாணத³ஸ்ஸனங்; யதா²பூ⁴தஞாணத³ஸ்ஸனே ஸதி யதா²பூ⁴தஞாணத³ஸ்ஸனஸம்பன்னஸ்ஸ உபனிஸஸம்பன்னோ ஹோதி நிப்³பி³தா³விராகோ³; நிப்³பி³தா³விராகே³ ஸதி நிப்³பி³தா³விராக³ஸம்பன்னஸ்ஸ உபனிஸஸம்பன்னங் ஹோதி விமுத்திஞாணத³ஸ்ஸனங். ஸெய்யதா²பி, பி⁴க்க²வே, ருக்கோ² ஸாகா²பலாஸஸம்பன்னோ. தஸ்ஸ பபடிகாபி பாரிபூரிங் க³ச்ச²தி, தசோபி பாரிபூரிங் க³ச்ச²தி, பெ²க்³கு³பி பாரிபூரிங் க³ச்ச²தி, ஸாரோபி பாரிபூரிங் க³ச்ச²தி . ஏவமேவங் கோ², பி⁴க்க²வே, இந்த்³ரியஸங்வரே ஸதி இந்த்³ரியஸங்வரஸம்பன்னஸ்ஸ உபனிஸஸம்பன்னங் ஹோதி ஸீலங்…பே॰… விமுத்திஞாணத³ஸ்ஸன’’ந்தி. அட்ட²மங்.
‘‘Indriyasaṃvare , bhikkhave, sati indriyasaṃvarasampannassa upanisasampannaṃ hoti sīlaṃ; sīle sati sīlasampannassa upanisasampanno hoti sammāsamādhi; sammāsamādhimhi sati sammāsamādhisampannassa upanisasampannaṃ hoti yathābhūtañāṇadassanaṃ; yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo; nibbidāvirāge sati nibbidāvirāgasampannassa upanisasampannaṃ hoti vimuttiñāṇadassanaṃ. Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṃ gacchati, tacopi pāripūriṃ gacchati, pheggupi pāripūriṃ gacchati, sāropi pāripūriṃ gacchati . Evamevaṃ kho, bhikkhave, indriyasaṃvare sati indriyasaṃvarasampannassa upanisasampannaṃ hoti sīlaṃ…pe… vimuttiñāṇadassana’’nti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. இந்த்³ரியஸங்வரஸுத்தவண்ணனா • 8. Indriyasaṃvarasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8. இந்த்³ரியஸங்வரஸுத்தவண்ணனா • 8. Indriyasaṃvarasuttavaṇṇanā
