| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
6. இஸிகி³லிஸுத்தவண்ணனா
6. Isigilisuttavaṇṇanā
133. ஏவங் மே ஸுதந்தி இஸிகி³லிஸுத்தங். தத்த² அஞ்ஞாவ ஸமஞ்ஞா அஹோஸீதி இஸிகி³லிஸ்ஸ இஸிகி³லீதி ஸமஞ்ஞாய உப்பன்னகாலே வேபா⁴ரோ ந வேபா⁴ரோதி பஞ்ஞாயித்த², அஞ்ஞாயேவஸ்ஸ ஸமஞ்ஞா அஹோஸி. அஞ்ஞா பஞ்ஞத்தீதி இத³ங் புரிமபத³ஸ்ஸேவ வேவசனங். ஸேஸேஸுபி ஏஸேவ நயோ.
133.Evaṃme sutanti isigilisuttaṃ. Tattha aññāva samaññā ahosīti isigilissa isigilīti samaññāya uppannakāle vebhāro na vebhāroti paññāyittha, aññāyevassa samaññā ahosi. Aññā paññattīti idaṃ purimapadasseva vevacanaṃ. Sesesupi eseva nayo.
ததா³ கிர ப⁴க³வா ஸாயன்ஹஸமயே ஸமாபத்திதோ வுட்டா²ய க³ந்த⁴குடிதோ நிக்க²மித்வா யஸ்மிங் டா²னே நிஸின்னானங் பஞ்ச பப்³ப³தா பஞ்ஞாயந்தி, தத்த² பி⁴க்கு²ஸங்க⁴பரிவுதோ நிஸீதி³த்வா இமே பஞ்ச பப்³ப³தே படிபாடியா ஆசிக்கி². தத்த² ந ப⁴க³வதோ பப்³ப³தேஹி அத்தோ² அத்தி², இதி இமேஸு பன பப்³ப³தேஸு படிபாடியா கதி²யமானேஸு இஸிகி³லிஸ்ஸ இஸிகி³லிபா⁴வோ கதே²தப்³போ³ ஹோதி. தஸ்மிங் கதி²யமானே பது³மவதியா புத்தானங் பஞ்சஸதானங் பச்சேகபு³த்³தா⁴னங் நாமானி சேவ பது³மவதியா ச பத்த²னா கதே²தப்³பா³ ப⁴விஸ்ஸதீதி ப⁴க³வா இமங் பஞ்ச பப்³ப³தபடிபாடிங் ஆசிக்கி².
Tadā kira bhagavā sāyanhasamaye samāpattito vuṭṭhāya gandhakuṭito nikkhamitvā yasmiṃ ṭhāne nisinnānaṃ pañca pabbatā paññāyanti, tattha bhikkhusaṅghaparivuto nisīditvā ime pañca pabbate paṭipāṭiyā ācikkhi. Tattha na bhagavato pabbatehi attho atthi, iti imesu pana pabbatesu paṭipāṭiyā kathiyamānesu isigilissa isigilibhāvo kathetabbo hoti. Tasmiṃ kathiyamāne padumavatiyā puttānaṃ pañcasatānaṃ paccekabuddhānaṃ nāmāni ceva padumavatiyā ca patthanā kathetabbā bhavissatīti bhagavā imaṃ pañca pabbatapaṭipāṭiṃ ācikkhi.
பவிஸந்தா தி³ஸ்ஸந்தி பவிட்டா² ந தி³ஸ்ஸந்தீதி யதா²பா²ஸுகட்டா²னே பிண்டா³ய சரித்வா கதப⁴த்தகிச்சா ஆக³ந்த்வா சேதியக³ப்³பே⁴ யமகமஹாத்³வாரங் விவரந்தா விய தங் பப்³ப³தங் த்³வேதா⁴ கத்வா அந்தோ பவிஸித்வா ரத்திட்டா²னதி³வாட்டா²னானி மாபெத்வா தத்த² வஸிங்ஸு, தஸ்மா ஏவமாஹ. இமே இஸீதி இமே பச்சேகபு³த்³த⁴இஸீ.
Pavisantādissanti paviṭṭhā na dissantīti yathāphāsukaṭṭhāne piṇḍāya caritvā katabhattakiccā āgantvā cetiyagabbhe yamakamahādvāraṃ vivarantā viya taṃ pabbataṃ dvedhā katvā anto pavisitvā rattiṭṭhānadivāṭṭhānāni māpetvā tattha vasiṃsu, tasmā evamāha. Ime isīti ime paccekabuddhaisī.
கதா³ பன தே தத்த² வஸிங்ஸு? அதீதே கிர அனுப்பன்னே ததா²க³தே பா³ராணஸிங் உபனிஸ்ஸாய ஏகஸ்மிங் கா³மகே ஏகா குலதீ⁴தா கெ²த்தங் ரக்க²மானா ஏகஸ்ஸ பச்சேகபு³த்³த⁴ஸ்ஸ பஞ்சஹி லாஜாஸதேஹி ஸத்³தி⁴ங் ஏகங் பது³மபுப்ப²ங் த³த்வா பஞ்ச புத்தஸதானி பத்தே²ஸி. தஸ்மிங்யேவ ச க²ணே பஞ்சஸதா மிக³லுத்³த³கா மது⁴ரமங்ஸங் த³த்வா ‘‘ஏதிஸ்ஸா புத்தா ப⁴வெய்யாமா’’தி பத்த²யிங்ஸு. ஸா யாவதாயுகங் ட²த்வா தே³வலோகே நிப்³ப³த்தா, ததோ சுதா ஜாதஸ்ஸரே பது³மக³ப்³பே⁴ நிப்³ப³த்தி. தமேகோ தாபஸோ தி³ஸ்வா படிஜக்³கி³, தஸ்ஸா விசரந்தியாவ பாது³த்³தா⁴ரே பாது³த்³தா⁴ரே பூ⁴மிதோ பது³மானி உட்ட²ஹந்தி. ஏகோ வனசரகோ தி³ஸ்வா பா³ராணஸிரஞ்ஞோ ஆரோசேஸி. ராஜா நங் ஆஹராபெத்வா அக்³க³மஹேஸிங் அகாஸி, தஸ்ஸா க³ப்³போ⁴ ஸண்டா²ஸி. மஹாபது³மகுமாரோ மாதுகுச்சி²யங் வஸி, ஸேஸா க³ப்³ப⁴மலங் நிஸ்ஸா நிப்³ப³த்தா. வயப்பத்தா உய்யானே பது³மஸ்ஸரே கீளந்தா ஏகேகஸ்மிங் பது³மே நிஸீதி³த்வா க²யவயங் பட்ட²பெத்வா பச்சேகபோ³தி⁴ஞாணங் நிப்³ப³த்தயிங்ஸு. அயங் தேஸங் ப்³யாகரணகா³தா² அஹோஸி –
Kadā pana te tattha vasiṃsu? Atīte kira anuppanne tathāgate bārāṇasiṃ upanissāya ekasmiṃ gāmake ekā kuladhītā khettaṃ rakkhamānā ekassa paccekabuddhassa pañcahi lājāsatehi saddhiṃ ekaṃ padumapupphaṃ datvā pañca puttasatāni patthesi. Tasmiṃyeva ca khaṇe pañcasatā migaluddakā madhuramaṃsaṃ datvā ‘‘etissā puttā bhaveyyāmā’’ti patthayiṃsu. Sā yāvatāyukaṃ ṭhatvā devaloke nibbattā, tato cutā jātassare padumagabbhe nibbatti. Tameko tāpaso disvā paṭijaggi, tassā vicarantiyāva pāduddhāre pāduddhāre bhūmito padumāni uṭṭhahanti. Eko vanacarako disvā bārāṇasirañño ārocesi. Rājā naṃ āharāpetvā aggamahesiṃ akāsi, tassā gabbho saṇṭhāsi. Mahāpadumakumāro mātukucchiyaṃ vasi, sesā gabbhamalaṃ nissā nibbattā. Vayappattā uyyāne padumassare kīḷantā ekekasmiṃ padume nisīditvā khayavayaṃ paṭṭhapetvā paccekabodhiñāṇaṃ nibbattayiṃsu. Ayaṃ tesaṃ byākaraṇagāthā ahosi –
‘‘ஸரோருஹங் பது³மபலாஸபத்தஜங், ஸுபுப்பி²தங் ப⁴மரக³ணானுசிண்ணங்;
‘‘Saroruhaṃ padumapalāsapattajaṃ, supupphitaṃ bhamaragaṇānuciṇṇaṃ;
அனிச்சதாயுபக³தங் விதி³த்வா, ஏகோ சரே க²க்³க³விஸாணகப்போ’’தி.
Aniccatāyupagataṃ viditvā, eko care khaggavisāṇakappo’’ti.
தஸ்மிங் காலே தே தத்த² வஸிங்ஸு, ததா³ சஸ்ஸ பப்³ப³தஸ்ஸ இஸிகி³லீதி ஸமஞ்ஞா உத³பாதி³.
Tasmiṃ kāle te tattha vasiṃsu, tadā cassa pabbatassa isigilīti samaññā udapādi.
135. யே ஸத்தஸாராதி அரிட்டோ² உபரிட்டோ² தக³ரஸிகீ² யஸஸ்ஸீ ஸுத³ஸ்ஸனோ பியத³ஸ்ஸீ க³ந்தா⁴ரோ பிண்டோ³லோ உபாஸபோ⁴ நீதோ ததோ² ஸுதவா பா⁴விதத்தோதி தேரஸன்னங் பச்சேகபு³த்³தா⁴னங் நாமானி வத்வா இதா³னி தேஸஞ்ச அஞ்ஞேஸஞ்ச கா³தா²ப³ந்தே⁴ன நாமானி ஆசிக்க²ந்தோ யே ஸத்தஸாராதிஆதி³மாஹ . தத்த² ஸத்தஸாராதி ஸத்தானங் ஸாரபூ⁴தா. அனீகா⁴தி நித்³து³க்கா². நிராஸாதி நித்தண்ஹா.
135.Ye sattasārāti ariṭṭho upariṭṭho tagarasikhī yasassī sudassano piyadassī gandhāro piṇḍolo upāsabho nīto tatho sutavā bhāvitattoti terasannaṃ paccekabuddhānaṃ nāmāni vatvā idāni tesañca aññesañca gāthābandhena nāmāni ācikkhanto ye sattasārātiādimāha . Tattha sattasārāti sattānaṃ sārabhūtā. Anīghāti niddukkhā. Nirāsāti nittaṇhā.
த்³வே ஜாலினோதி சூளஜாலி மஹாஜாலீதி த்³வே ஜாலினாமகா. ஸந்தசித்தோதி இத³ம்பி ஏகஸ்ஸ நாமமேவ. பஸ்ஸி ஜஹி உபதி⁴து³க்க²மூலந்தி எத்த² பஸ்ஸி நாம ஸோ பச்சேகபு³த்³தோ⁴, து³க்க²ஸ்ஸ பன மூலங் உபதி⁴ங் ஜஹீதி அயமஸ்ஸ து²தி. அபராஜிதோதிபி ஏகஸ்ஸ நாமமேவ.
Dve jālinoti cūḷajāli mahājālīti dve jālināmakā. Santacittoti idampi ekassa nāmameva. Passi jahi upadhidukkhamūlanti ettha passi nāma so paccekabuddho, dukkhassa pana mūlaṃ upadhiṃ jahīti ayamassa thuti. Aparājitotipi ekassa nāmameva.
ஸத்தா² பவத்தா ஸரப⁴ங்கோ³ லோமஹங்ஸோ உச்சங்க³மாயோதி இமே பஞ்ச ஜனா. அஸிதோ அனாஸவோ மனோமயோதி இமேபி தயோ ஜனா. மானச்சி²தோ³ ச ப³ந்து⁴மாதி ப³ந்து⁴மா நாம ஏகோ, மானஸ்ஸ பன சி²ன்னத்தா மானச்சி²தோ³தி வுத்தோ. ததா³தி⁴முத்தோதிபி நாமமேவ.
Satthā pavattā sarabhaṅgo lomahaṃso uccaṅgamāyoti ime pañca janā. Asito anāsavo manomayoti imepi tayo janā. Mānacchido ca bandhumāti bandhumā nāma eko, mānassa pana chinnattā mānacchidoti vutto. Tadādhimuttotipi nāmameva.
கேதும்ப⁴ராகோ³ ச மாதங்கோ³ அரியோதி இமே தயோ ஜனா. அத²ச்சுதோதி அத² அச்சுதோ. அச்சுதகா³மப்³யாமங்கோதி இமே த்³வே ஜனா. கே²மாபி⁴ரதோ ச ஸோரதோதி இமே த்³வேயேவ.
Ketumbharāgo ca mātaṅgo ariyoti ime tayo janā. Athaccutoti atha accuto. Accutagāmabyāmaṅkoti ime dve janā. Khemābhirato ca soratoti ime dveyeva.
ஸய்ஹோ அனோமனிக்கமோதி ஸய்ஹோ நாம ஸோ பு³த்³தோ⁴, அனோமவீரியத்தா பன அனோமனிக்கமோதி வுத்தோ. ஆனந்தோ³ நந்தோ³ உபனந்தோ³ த்³வாத³ஸாதி சத்தாரோ ஆனந்தா³, சத்தாரோ நந்தா³ சத்தாரோ உபனந்தா³தி ஏவங் த்³வாத³ஸ. பா⁴ரத்³வாஜோ அந்திமதே³ஹதா⁴ரீதி பா⁴ரத்³வாஜோ நாம ஸோ பு³த்³தோ⁴. அந்திமதே³ஹதா⁴ரீதி து²தி.
Sayho anomanikkamoti sayho nāma so buddho, anomavīriyattā pana anomanikkamoti vutto. Ānando nando upanando dvādasāti cattāro ānandā, cattāro nandā cattāro upanandāti evaṃ dvādasa. Bhāradvājoantimadehadhārīti bhāradvājo nāma so buddho. Antimadehadhārīti thuti.
தண்ஹச்சி²தோ³தி ஸிக²ரிஸ்ஸாயங் து²தி. வீதராகோ³தி மங்க³லஸ்ஸ து²தி. உஸப⁴ச்சி²தா³ ஜாலினிங் து³க்க²மூலந்தி உஸபோ⁴ நாம ஸோ பு³த்³தோ⁴ து³க்க²மூலபூ⁴தங் ஜாலினிங் அச்சி²தா³தி அத்தோ². ஸந்தங் பத³ங் அஜ்ஜ²க³மோபனீதோதி உபனீதோ நாம ஸோ பு³த்³தோ⁴ ஸந்தங் பத³ங் அஜ்ஜ²க³மா. வீதராகோ³திபி ஏகஸ்ஸ நாமமேவ. ஸுவிமுத்தசித்தோதி அயங் கண்ஹஸ்ஸ து²தி.
Taṇhacchidoti sikharissāyaṃ thuti. Vītarāgoti maṅgalassa thuti. Usabhacchidā jāliniṃ dukkhamūlanti usabho nāma so buddho dukkhamūlabhūtaṃ jāliniṃ acchidāti attho. Santaṃ padaṃ ajjhagamopanītoti upanīto nāma so buddho santaṃ padaṃ ajjhagamā. Vītarāgotipi ekassa nāmameva. Suvimuttacittoti ayaṃ kaṇhassa thuti.
ஏதே ச அஞ்ஞே சாதி ஏதே பாளியங் ஆக³தா ச பாளியங் அனாக³தா அஞ்ஞே ச ஏதேஸங் ஏகனாமகாயேவ. இமேஸு ஹி பஞ்சஸு பச்சேகபு³த்³த⁴ஸதேஸு த்³வேபி தயோபி த³ஸபி த்³வாத³ஸபி ஆனந்தா³த³யோ விய ஏகனாமகா அஹேஸுங். இதி பாளியங் ஆக³தனாமேஹேவ ஸப்³பே³ஸங் நாமானி வுத்தானி ஹொந்தீதி இதோ பரங் விஸுங் விஸுங் அவத்வா ‘‘ஏதே ச அஞ்ஞே சா’’தி ஆஹ. ஸேஸங் ஸப்³ப³த்த² உத்தானமேவாதி.
Ete ca aññe cāti ete pāḷiyaṃ āgatā ca pāḷiyaṃ anāgatā aññe ca etesaṃ ekanāmakāyeva. Imesu hi pañcasu paccekabuddhasatesu dvepi tayopi dasapi dvādasapi ānandādayo viya ekanāmakā ahesuṃ. Iti pāḷiyaṃ āgatanāmeheva sabbesaṃ nāmāni vuttāni hontīti ito paraṃ visuṃ visuṃ avatvā ‘‘ete ca aññe cā’’ti āha. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
இஸிகி³லிஸுத்தவண்ணனா நிட்டி²தா.
Isigilisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. இஸிகி³லிஸுத்தங் • 6. Isigilisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 6. இஸிகி³லிஸுத்தவண்ணனா • 6. Isigilisuttavaṇṇanā
