| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
3. இட்ட²த⁴ம்மஸுத்தங்
3. Iṭṭhadhammasuttaṃ
73. ‘‘த³ஸயிமே, பி⁴க்க²வே, த⁴ம்மா இட்டா² கந்தா மனாபா து³ல்லபா⁴ லோகஸ்மிங். கதமே த³ஸ? போ⁴கா³ இட்டா² கந்தா மனாபா து³ல்லபா⁴ லோகஸ்மிங்; வண்ணோ இட்டோ² கந்தோ மனாபோ து³ல்லபோ⁴ லோகஸ்மிங்; ஆரொக்³யங் இட்ட²ங் கந்தங் மனாபங் து³ல்லப⁴ங் லோகஸ்மிங்; ஸீலங் இட்ட²ங் கந்தங் மனாபங் து³ல்லப⁴ங் லோகஸ்மிங்; ப்³ரஹ்மசரியங் இட்ட²ங் கந்தங் மனாபங் து³ல்லப⁴ங் லோகஸ்மிங்; மித்தா இட்டா² கந்தா மனாபா து³ல்லபா⁴ லோகஸ்மிங்; பா³ஹுஸச்சங் இட்ட²ங் கந்தங் மனாபங் து³ல்லப⁴ங் லோகஸ்மிங்; பஞ்ஞா இட்டா² கந்தா மனாபா து³ல்லபா⁴ லோகஸ்மிங்; த⁴ம்மா இட்டா² கந்தா மனாபா து³ல்லபா⁴ லோகஸ்மிங் ; ஸக்³கா³ இட்டா² கந்தா மனாபா து³ல்லபா⁴ லோகஸ்மிங்.
73. ‘‘Dasayime, bhikkhave, dhammā iṭṭhā kantā manāpā dullabhā lokasmiṃ. Katame dasa? Bhogā iṭṭhā kantā manāpā dullabhā lokasmiṃ; vaṇṇo iṭṭho kanto manāpo dullabho lokasmiṃ; ārogyaṃ iṭṭhaṃ kantaṃ manāpaṃ dullabhaṃ lokasmiṃ; sīlaṃ iṭṭhaṃ kantaṃ manāpaṃ dullabhaṃ lokasmiṃ; brahmacariyaṃ iṭṭhaṃ kantaṃ manāpaṃ dullabhaṃ lokasmiṃ; mittā iṭṭhā kantā manāpā dullabhā lokasmiṃ; bāhusaccaṃ iṭṭhaṃ kantaṃ manāpaṃ dullabhaṃ lokasmiṃ; paññā iṭṭhā kantā manāpā dullabhā lokasmiṃ; dhammā iṭṭhā kantā manāpā dullabhā lokasmiṃ ; saggā iṭṭhā kantā manāpā dullabhā lokasmiṃ.
‘‘இமேஸங் கோ², பி⁴க்க²வே, த³ஸன்னங் த⁴ம்மானங் இட்டா²னங் கந்தானங் மனாபானங் து³ல்லபா⁴னங் லோகஸ்மிங் த³ஸ த⁴ம்மா பரிபந்தா² 1 – ஆலஸ்யங் அனுட்டா²னங் போ⁴கா³னங் பரிபந்தோ², அமண்ட³னா அவிபூ⁴ஸனா வண்ணஸ்ஸ பரிபந்தோ², அஸப்பாயகிரியா ஆரொக்³யஸ்ஸ பரிபந்தோ², பாபமித்ததா ஸீலானங் பரிபந்தோ², இந்த்³ரியஅஸங்வரோ ப்³ரஹ்மசரியஸ்ஸ பரிபந்தோ², விஸங்வாத³னா மித்தானங் பரிபந்தோ², அஸஜ்ஜா²யகிரியா பா³ஹுஸச்சஸ்ஸ பரிபந்தோ², அஸுஸ்ஸூஸா அபரிபுச்சா² பஞ்ஞாய பரிபந்தோ², அனநுயோகோ³ அபச்சவெக்க²ணா த⁴ம்மானங் பரிபந்தோ², மிச்சா²படிபத்தி ஸக்³கா³னங் பரிபந்தோ². இமேஸங் கோ², பி⁴க்க²வே, த³ஸன்னங் இட்டா²னங் கந்தானங் மனாபானங் து³ல்லபா⁴னங் லோகஸ்மிங் இமே த³ஸ த⁴ம்மா பரிபந்தா².
‘‘Imesaṃ kho, bhikkhave, dasannaṃ dhammānaṃ iṭṭhānaṃ kantānaṃ manāpānaṃ dullabhānaṃ lokasmiṃ dasa dhammā paripanthā 2 – ālasyaṃ anuṭṭhānaṃ bhogānaṃ paripantho, amaṇḍanā avibhūsanā vaṇṇassa paripantho, asappāyakiriyā ārogyassa paripantho, pāpamittatā sīlānaṃ paripantho, indriyaasaṃvaro brahmacariyassa paripantho, visaṃvādanā mittānaṃ paripantho, asajjhāyakiriyā bāhusaccassa paripantho, asussūsā aparipucchā paññāya paripantho, ananuyogo apaccavekkhaṇā dhammānaṃ paripantho, micchāpaṭipatti saggānaṃ paripantho. Imesaṃ kho, bhikkhave, dasannaṃ iṭṭhānaṃ kantānaṃ manāpānaṃ dullabhānaṃ lokasmiṃ ime dasa dhammā paripanthā.
‘‘இமேஸங் கோ², பி⁴க்க²வே, த³ஸன்னங் த⁴ம்மானங் இட்டா²னங் கந்தானங் மனாபானங் து³ல்லபா⁴னங் லோகஸ்மிங் த³ஸ த⁴ம்மா ஆஹாரா – உட்டா²னங் அனாலஸ்யங் போ⁴கா³னங் ஆஹாரோ, மண்ட³னா விபூ⁴ஸனா வண்ணஸ்ஸ ஆஹாரோ, ஸப்பாயகிரியா ஆரொக்³யஸ்ஸ ஆஹாரோ, கல்யாணமித்ததா ஸீலானங் ஆஹாரோ, இந்த்³ரியஸங்வரோ ப்³ரஹ்மசரியஸ்ஸ ஆஹாரோ, அவிஸங்வாத³னா மித்தானங் ஆஹாரோ, ஸஜ்ஜா²யகிரியா பா³ஹுஸச்சஸ்ஸ ஆஹாரோ, ஸுஸ்ஸூஸா பரிபுச்சா² பஞ்ஞாய ஆஹாரோ, அனுயோகோ³ பச்சவெக்க²ணா த⁴ம்மானங் ஆஹாரோ, ஸம்மாபடிபத்தி ஸக்³கா³னங் ஆஹாரோ . இமேஸங் கோ², பி⁴க்க²வே, த³ஸன்னங் த⁴ம்மானங் இட்டா²னங் கந்தானங் மனாபானங் து³ல்லபா⁴னங் லோகஸ்மிங் இமே த³ஸ த⁴ம்மா ஆஹாரா’’தி. ததியங்.
‘‘Imesaṃ kho, bhikkhave, dasannaṃ dhammānaṃ iṭṭhānaṃ kantānaṃ manāpānaṃ dullabhānaṃ lokasmiṃ dasa dhammā āhārā – uṭṭhānaṃ anālasyaṃ bhogānaṃ āhāro, maṇḍanā vibhūsanā vaṇṇassa āhāro, sappāyakiriyā ārogyassa āhāro, kalyāṇamittatā sīlānaṃ āhāro, indriyasaṃvaro brahmacariyassa āhāro, avisaṃvādanā mittānaṃ āhāro, sajjhāyakiriyā bāhusaccassa āhāro, sussūsā paripucchā paññāya āhāro, anuyogo paccavekkhaṇā dhammānaṃ āhāro, sammāpaṭipatti saggānaṃ āhāro . Imesaṃ kho, bhikkhave, dasannaṃ dhammānaṃ iṭṭhānaṃ kantānaṃ manāpānaṃ dullabhānaṃ lokasmiṃ ime dasa dhammā āhārā’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3-4. இட்ட²த⁴ம்மஸுத்தாதி³வண்ணனா • 3-4. Iṭṭhadhammasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-4. ஆகங்க²ஸுத்தாதி³வண்ணனா • 1-4. Ākaṅkhasuttādivaṇṇanā
