Library / Tipiṭaka / તિપિટક • Tipiṭaka / ચૂળવગ્ગપાળિ • Cūḷavaggapāḷi

    ઇટ્ઠકાચયાદિઅનુજાનનં

    Iṭṭhakācayādianujānanaṃ

    ૩૦૦. તેન ખો પન સમયેન વિહારા નીચવત્થુકા હોન્તિ, ઉદકેન ઓત્થરિય્યન્તિ. ભગવતો એતમત્થં આરોચેસું. ‘‘અનુજાનામિ, ભિક્ખવે, ઉચ્ચવત્થુકં કાતુ’’ન્તિ. ચયો પરિપતતિ…પે॰… ‘‘અનુજાનામિ, ભિક્ખવે, ચિનિતું તયો ચયે – ઇટ્ઠકાચયં, સિલાચયં, દારુચય’’ન્તિ. આરોહન્તા વિહઞ્ઞન્તિ…પે॰… ‘‘અનુજાનામિ, ભિક્ખવે, તયો સોપાને – ઇટ્ઠકાસોપાનં, સિલાસોપાનં, દારુસોપાન’’ન્તિ. આરોહન્તા પરિપતન્તિ…પે॰… ‘‘અનુજાનામિ, ભિક્ખવે, આલમ્બનબાહ’’ન્તિ.

    300. Tena kho pana samayena vihārā nīcavatthukā honti, udakena otthariyyanti. Bhagavato etamatthaṃ ārocesuṃ. ‘‘Anujānāmi, bhikkhave, uccavatthukaṃ kātu’’nti. Cayo paripatati…pe… ‘‘anujānāmi, bhikkhave, cinituṃ tayo caye – iṭṭhakācayaṃ, silācayaṃ, dārucaya’’nti. Ārohantā vihaññanti…pe… ‘‘anujānāmi, bhikkhave, tayo sopāne – iṭṭhakāsopānaṃ, silāsopānaṃ, dārusopāna’’nti. Ārohantā paripatanti…pe… ‘‘anujānāmi, bhikkhave, ālambanabāha’’nti.

    તેન ખો પન સમયેન વિહારા આળકમન્દા હોન્તિ . ભિક્ખૂ હિરિયન્તિ નિપજ્જિતું. ભગવતો એતમત્થં આરોચેસું. ‘‘અનુજાનામિ, ભિક્ખવે, તિરોકરણિ’’ન્તિ. તિરોકરણિં ઉક્ખિપિત્વા ઓલોકેન્તિ…પે॰… ‘‘અનુજાનામિ, ભિક્ખવે , અડ્ઢકુટ્ટક’’ન્તિ. અડ્ઢકુટ્ટકા ઉપરિતો ઓલોકેન્તિ…પે॰… ‘‘અનુજાનામિ, ભિક્ખવે, તયો ગબ્ભે – સિવિકાગબ્ભં, નાળિકાગબ્ભં, હમ્મિયગબ્ભ’’ન્તિ.

    Tena kho pana samayena vihārā āḷakamandā honti . Bhikkhū hiriyanti nipajjituṃ. Bhagavato etamatthaṃ ārocesuṃ. ‘‘Anujānāmi, bhikkhave, tirokaraṇi’’nti. Tirokaraṇiṃ ukkhipitvā olokenti…pe… ‘‘anujānāmi, bhikkhave , aḍḍhakuṭṭaka’’nti. Aḍḍhakuṭṭakā uparito olokenti…pe… ‘‘anujānāmi, bhikkhave, tayo gabbhe – sivikāgabbhaṃ, nāḷikāgabbhaṃ, hammiyagabbha’’nti.

    તેન ખો પન સમયેન ભિક્ખૂ ખુદ્દકે વિહારે મજ્ઝે ગબ્ભં કરોન્તિ. ઉપચારો ન હોતિ. ભગવતો એતમત્થં આરોચેસું. ‘‘અનુજાનામિ, ભિક્ખવે, ખુદ્દકે વિહારે એકમન્તં ગબ્ભં કાતું, મહલ્લકે મજ્ઝે’’તિ.

    Tena kho pana samayena bhikkhū khuddake vihāre majjhe gabbhaṃ karonti. Upacāro na hoti. Bhagavato etamatthaṃ ārocesuṃ. ‘‘Anujānāmi, bhikkhave, khuddake vihāre ekamantaṃ gabbhaṃ kātuṃ, mahallake majjhe’’ti.

    તેન ખો પન સમયેન વિહારસ્સ કુટ્ટપાદો જીરતિ. ભગવતો એતમત્થં આરોચેસું. ‘‘અનુજાનામિ , ભિક્ખવે, કુલઙ્કપાદક’’ન્તિ 1. વિહારસ્સ કુટ્ટો ઓવસ્સતિ…પે॰…‘‘અનુજાનામિ, ભિક્ખવે, પરિત્તાણકિટિકં ઉદ્દસુધ’’ન્તિ 2.

    Tena kho pana samayena vihārassa kuṭṭapādo jīrati. Bhagavato etamatthaṃ ārocesuṃ. ‘‘Anujānāmi , bhikkhave, kulaṅkapādaka’’nti 3. Vihārassa kuṭṭo ovassati…pe…‘‘anujānāmi, bhikkhave, parittāṇakiṭikaṃ uddasudha’’nti 4.

    તેન ખો પન સમયેન અઞ્ઞતરસ્સ ભિક્ખુનો તિણચ્છદના અહિ ખન્ધે પતતિ. સો ભીતો વિસ્સરમકાસિ. ભિક્ખૂ ઉપધાવિત્વા તં ભિક્ખું એતદવોચું – ‘‘કિસ્સ ત્વં, આવુસો, વિસ્સરમકાસી’’તિ? અથ ખો સો ભિક્ખૂનં એતમત્થં આરોચેસિ. ભિક્ખૂ ભગવતો એતમત્થં આરોચેસું. ‘‘અનુજાનામિ, ભિક્ખવે, વિતાન’’ન્તિ.

    Tena kho pana samayena aññatarassa bhikkhuno tiṇacchadanā ahi khandhe patati. So bhīto vissaramakāsi. Bhikkhū upadhāvitvā taṃ bhikkhuṃ etadavocuṃ – ‘‘kissa tvaṃ, āvuso, vissaramakāsī’’ti? Atha kho so bhikkhūnaṃ etamatthaṃ ārocesi. Bhikkhū bhagavato etamatthaṃ ārocesuṃ. ‘‘Anujānāmi, bhikkhave, vitāna’’nti.

    તેન ખો પન સમયેન ભિક્ખૂ મઞ્ચપાદેપિ પીઠપાદેપિ થવિકાયો લગ્ગેન્તિ. ઉન્દૂરેહિપિ ઉપચિકાહિપિ ખજ્જન્તિ. ભગવતો એતમત્થં આરોચેસું. ‘‘અનુજાનામિ, ભિક્ખવે, ભિત્તિખિલં નાગદન્તક’’ન્તિ.

    Tena kho pana samayena bhikkhū mañcapādepi pīṭhapādepi thavikāyo laggenti. Undūrehipi upacikāhipi khajjanti. Bhagavato etamatthaṃ ārocesuṃ. ‘‘Anujānāmi, bhikkhave, bhittikhilaṃ nāgadantaka’’nti.

    તેન ખો પન સમયેન ભિક્ખૂ મઞ્ચેપિ પીઠેપિ ચીવરં નિક્ખિપન્તિ. ચીવરં પરિભિજ્જિતિ. ભગવતો એતમત્થં આરોચેસું. ‘‘અનુજાનામિ, ભિક્ખવે, વિહારે ચીવરવંસં ચીવરરજ્જુ’’ન્તિ .

    Tena kho pana samayena bhikkhū mañcepi pīṭhepi cīvaraṃ nikkhipanti. Cīvaraṃ paribhijjiti. Bhagavato etamatthaṃ ārocesuṃ. ‘‘Anujānāmi, bhikkhave, vihāre cīvaravaṃsaṃ cīvararajju’’nti .

    તેન ખો પન સમયેન વિહારા અનાળિન્દકા હોન્તિ અપ્પટિસ્સરણા. ભગવતો એતમત્થં આરોચેસું. ‘‘અનુજાનામિ, ભિક્ખવે, આળિન્દં પઘનં પકુટ્ટં 5 ઓસારક’’ન્તિ. આળિન્દા પાકટા હોન્તિ. ભિક્ખૂ હિરિયન્તિ નિપજ્જિતું…પે॰… ‘‘અનુજાનામિ, ભિક્ખવે, સંસરણકિટિકં ઉગ્ઘાટનકિટિક’’ન્તિ.

    Tena kho pana samayena vihārā anāḷindakā honti appaṭissaraṇā. Bhagavato etamatthaṃ ārocesuṃ. ‘‘Anujānāmi, bhikkhave, āḷindaṃ paghanaṃ pakuṭṭaṃ 6 osāraka’’nti. Āḷindā pākaṭā honti. Bhikkhū hiriyanti nipajjituṃ…pe… ‘‘anujānāmi, bhikkhave, saṃsaraṇakiṭikaṃ ugghāṭanakiṭika’’nti.







    Footnotes:
    1. કુળુઙ્કપાદકન્તિ (સી॰)
    2. ઉદ્ધાસુધન્તિ (સ્યા॰)
    3. kuḷuṅkapādakanti (sī.)
    4. uddhāsudhanti (syā.)
    5. પકુડ્ડં (સી॰)
    6. pakuḍḍaṃ (sī.)



    Related texts:



    અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / ચૂળવગ્ગ-અટ્ઠકથા • Cūḷavagga-aṭṭhakathā / વિહારાનુજાનનકથા • Vihārānujānanakathā

    ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ઇટ્ઠકાચયાદિઅનુજાનનકથાવણ્ણના • Iṭṭhakācayādianujānanakathāvaṇṇanā

    ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / વિહારાનુજાનનકથાવણ્ણના • Vihārānujānanakathāvaṇṇanā

    ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / વિહારાનુજાનનકથાવણ્ણના • Vihārānujānanakathāvaṇṇanā

    ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / વિહારાનુજાનનકથા • Vihārānujānanakathā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact