| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. ஜாக³ரஸுத்தவண்ணனா
6. Jāgarasuttavaṇṇanā
6. ஜாக³ரதந்தி அனாத³ரே ஸாமிவசனங். தேனாஹ ‘‘இந்த்³ரியேஸு ஜாக³ரந்தேஸூ’’தி. ‘‘விஸ்ஸஜ்ஜனகா³தா²யங் பனா’’தி இமஸ்ஸ பத³ஸ்ஸ ‘‘அயமத்தோ² வேதி³தப்³போ³’’தி இமினா ஸம்ப³ந்தோ⁴. புச்சா²கா³தா²ய பன அத்தோ² இமினாவ நயேன விஞ்ஞாயதீதி அதி⁴ப்பாயோ. பஞ்ச ஜாக³ரதங் ஸுத்தாதி எத்த² ‘‘ஸுத்தா’’தி பத³ங் அபெக்கி²த்வா பஞ்சாதி பச்சத்தவசனங் ‘‘ஜாக³ரத’’ந்தி பத³ங் அபெக்கி²த்வா ஸாமிவஸேன பரிணாமேதப்³ப³ங் ‘‘பஞ்சன்னங் ஜாக³ரத’’ந்தி. தேனாஹ – ‘‘பஞ்சஸு இந்த்³ரியேஸு ஜாக³ரந்தேஸூ’’தி, ஜாக³ரந்தேஸு ப³த்³தா⁴பா⁴வேன ஸகிச்சப்பஸுததாய ஸகிச்சஸமத்த²தாய சாதி அத்தோ². ஸொத்தங்வ ஸுத்தா பமாத³னித்³தா³பா⁴வதோ. தமேவ ஸுத்தபா⁴வங் புக்³க³லாதி⁴ட்டா²னாய கதா²ய த³ஸ்ஸேதுங் ‘‘கஸ்மா’’திஆதி³ வுத்தங். பமஜ்ஜதி, பமாதோ³ வா ஏதஸ்ஸ அத்தீ²தி பமாதோ³, தஸ்ஸ பா⁴வோ பமாத³தா, தாய, பமத்தபா⁴வேனாதி அத்தோ².
6.Jāgaratanti anādare sāmivacanaṃ. Tenāha ‘‘indriyesu jāgarantesū’’ti. ‘‘Vissajjanagāthāyaṃ panā’’ti imassa padassa ‘‘ayamattho veditabbo’’ti iminā sambandho. Pucchāgāthāya pana attho imināva nayena viññāyatīti adhippāyo. Pañca jāgarataṃ suttāti ettha ‘‘suttā’’ti padaṃ apekkhitvā pañcāti paccattavacanaṃ ‘‘jāgarata’’nti padaṃ apekkhitvā sāmivasena pariṇāmetabbaṃ ‘‘pañcannaṃ jāgarata’’nti. Tenāha – ‘‘pañcasu indriyesu jāgarantesū’’ti, jāgarantesu baddhābhāvena sakiccappasutatāya sakiccasamatthatāya cāti attho. Sottaṃva suttā pamādaniddābhāvato. Tameva suttabhāvaṃ puggalādhiṭṭhānāya kathāya dassetuṃ ‘‘kasmā’’tiādi vuttaṃ. Pamajjati, pamādo vā etassa atthīti pamādo, tassa bhāvo pamādatā, tāya, pamattabhāvenāti attho.
ஏவங் கா³தா²ய பட²மஸ்ஸ பாத³ஸ்ஸ அத்த²ங் வத்வா து³தியஸ்ஸ வத்துங் ‘‘ஏவங் ஸுத்தேஸூ’’திஆதி³ வுத்தங். தஸ்ஸத்தோ² வுத்தனயேன வேதி³தப்³போ³. யஸ்மா அப்பஹீனஸுபனகிரியாவஸேன ஸனீவரணஸ்ஸ புக்³க³லஸ்ஸ அனுப்பன்னராக³ரஜாத³யோ உப்பஜ்ஜந்தி, உப்பன்னா பவட்³ட⁴ந்தி, தஸ்மா வுத்தங் ‘‘நீவரணேஹேவ கிலேஸரஜங் ஆதி³யதீ’’தி. தேனேவாஹ ‘‘புரிமா’’திஆதி³. புரிமானங் பச்சி²மானங் அபராபருப்பத்தியா பச்சயபா⁴வோ ஹெத்த² ஆதி³யனங். பஞ்சஹி இந்த்³ரியேஹி பரிஸுஜ்ஜ²தீதி மக்³க³பரியாபன்னேஹி ஸத்³தா⁴தீ³ஹி பஞ்சஹி இந்த்³ரியேஹி ஸகலஸங்கிலேஸதோ விஸுஜ்ஜ²தி. பஞ்ஞிந்த்³ரியமேவ ஹி அனஞ்ஞாதஞ்ஞஸ்ஸாமீதிந்த்³ரியாதீ³னி, இதரானி ச அன்வயானீதி.
Evaṃ gāthāya paṭhamassa pādassa atthaṃ vatvā dutiyassa vattuṃ ‘‘evaṃ suttesū’’tiādi vuttaṃ. Tassattho vuttanayena veditabbo. Yasmā appahīnasupanakiriyāvasena sanīvaraṇassa puggalassa anuppannarāgarajādayo uppajjanti, uppannā pavaḍḍhanti, tasmā vuttaṃ ‘‘nīvaraṇeheva kilesarajaṃ ādiyatī’’ti. Tenevāha ‘‘purimā’’tiādi. Purimānaṃ pacchimānaṃ aparāparuppattiyā paccayabhāvo hettha ādiyanaṃ. Pañcahi indriyehi parisujjhatīti maggapariyāpannehi saddhādīhi pañcahi indriyehi sakalasaṃkilesato visujjhati. Paññindriyameva hi anaññātaññassāmītindriyādīni, itarāni ca anvayānīti.
ஜாக³ரஸுத்தவண்ணனா நிட்டி²தா.
Jāgarasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ஜாக³ரஸுத்தங் • 6. Jāgarasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. ஜாக³ரஸுத்தவண்ணனா • 6. Jāgarasuttavaṇṇanā
