| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
10. ஜனபத³கல்யாணீஸுத்தவண்ணனா
10. Janapadakalyāṇīsuttavaṇṇanā
386. ஜனபத³ஸ்மிங் கல்யாணீதி ஸகலஜனபதே³ ப⁴த்³தா³ ரூபஸம்பத்தியா ஸிக்கா²ஸம்பத்தியா ச ஸுந்த³ரா ஸெட்டா². ரூபஸம்பத்தி ச நாம ஸப்³ப³ஸோ ரூபதோ³ஸாபா⁴வேன ரூபகு³ணபாரிபூரியா ஹோதீதி தது³ப⁴யங் த³ஸ்ஸேதுங் ‘‘ச²ஸரீரதோ³ஸரஹிதா பஞ்சகல்யாணஸமன்னாக³தா’’தி வுத்தங். தங் து³வித⁴ம்பி விவரந்தோ ‘‘ஸா ஹீ’’திஆதி³மாஹ. பஞ்சகல்யாணஸமன்னாக³தாதி பஞ்சவித⁴ஸரீரகு³ணஸம்பதா³ஹி ஸமன்னாக³தா. நாதிதீ³கா⁴ நாதிரஸ்ஸாதி பமாணமஜ்ஜி²மா தீ³க⁴தரப்பமாணா ந ஹோதி, ந அதிரஸ்ஸா, லகுண்ட³கரூபா ந ஹோதி. நாதிகிஸாதி அதிவிய கிஸத²த்³த⁴மங்ஸலோஹிதா தி³ஸ்ஸமானா அட்டி²ஸரீரா ஜாலஸரீரா ந ஹோதி. நாதிதூ²லாதி பா⁴ரியமங்ஸா மஹோத³ரா ந ஹோதி. நாதிகாளா நாச்சோதா³தாதி அதிவிய காளவண்ணா ஜா²மங்கா³ரோ விய , த³தி⁴தக்காதீ³ஹி பமஜ்ஜிதமத்தகங்ஸலோஹவண்ணா ந ஹோதி. மனுஸ்ஸலோகே தாதி³ஸியா ரூபஸம்பத்தியா அபா⁴வதோ அதிக்கந்தா மனுஸ்ஸவண்ணங். யதா² பமாணயுத்தா, ஏவங் ஆரோஹபரிணாஹயோக³தோ ச பரேஸங் பஸாதா³வஹா நாதிதீ³க⁴தாத³யோ. ஏவங் மனுஸ்ஸானங் தி³ப்³ப³ரூபதாஸம்பத்தீபீதி வுத்தங் ‘‘அப்பத்தா தி³ப்³ப³வண்ண’’ந்தி. எத்த² ச நாதிதீ³க⁴னாதிரஸ்ஸதாவசனேன ஆரோஹஸம்பத்தி வுத்தா உப்³பே³தே⁴ன பாஸாதி³கபா⁴வதோ. கிஸதூ²லதோ³ஸாபா⁴வவசனேன பரிணாஹஸம்பத்தி வுத்தா. உப⁴யேனபி ஸண்டா²னஸம்பதா³ விபா⁴விதா, நாதிகாளதாவசனேன வண்ணஸம்பத்தி வுத்தா விவண்ணதாபா⁴வதோ. பியங்கு³ஸாமாதி பரிணதபியங்கு³புப்ப²ஸதி³ஸஸரீரனிபா⁴ஸா. முக²பரியோஸானந்தி அத⁴ரொட்ட²மாஹ. அயங் யதா²வுத்தா ஸரீரவண்ணஸம்பத்தி. அஸ்ஸாதி ஜனபத³கல்யாணியா. ச²விகல்யாணதா ச²விஸம்பத்திஹேதுகத்தா தஸ்ஸா. ஏஸ நயோ ஸேஸேஸுபி. நகா² ஏவ பத்தஸதி³ஸதாய நக²பத்தானி.
386.Janapadasmiṃ kalyāṇīti sakalajanapade bhaddā rūpasampattiyā sikkhāsampattiyā ca sundarā seṭṭhā. Rūpasampatti ca nāma sabbaso rūpadosābhāvena rūpaguṇapāripūriyā hotīti tadubhayaṃ dassetuṃ ‘‘chasarīradosarahitā pañcakalyāṇasamannāgatā’’ti vuttaṃ. Taṃ duvidhampi vivaranto ‘‘sā hī’’tiādimāha. Pañcakalyāṇasamannāgatāti pañcavidhasarīraguṇasampadāhi samannāgatā. Nātidīghā nātirassāti pamāṇamajjhimā dīghatarappamāṇā na hoti, na atirassā, lakuṇḍakarūpā na hoti. Nātikisāti ativiya kisathaddhamaṃsalohitā dissamānā aṭṭhisarīrā jālasarīrā na hoti. Nātithūlāti bhāriyamaṃsā mahodarā na hoti. Nātikāḷā nāccodātāti ativiya kāḷavaṇṇā jhāmaṅgāro viya , dadhitakkādīhi pamajjitamattakaṃsalohavaṇṇā na hoti. Manussaloke tādisiyā rūpasampattiyā abhāvato atikkantā manussavaṇṇaṃ. Yathā pamāṇayuttā, evaṃ ārohapariṇāhayogato ca paresaṃ pasādāvahā nātidīghatādayo. Evaṃ manussānaṃ dibbarūpatāsampattīpīti vuttaṃ ‘‘appattā dibbavaṇṇa’’nti. Ettha ca nātidīghanātirassatāvacanena ārohasampatti vuttā ubbedhena pāsādikabhāvato. Kisathūladosābhāvavacanena pariṇāhasampatti vuttā. Ubhayenapi saṇṭhānasampadā vibhāvitā, nātikāḷatāvacanena vaṇṇasampatti vuttā vivaṇṇatābhāvato. Piyaṅgusāmāti pariṇatapiyaṅgupupphasadisasarīranibhāsā. Mukhapariyosānanti adharoṭṭhamāha. Ayaṃ yathāvuttā sarīravaṇṇasampatti. Assāti janapadakalyāṇiyā. Chavikalyāṇatā chavisampattihetukattā tassā. Esa nayo sesesupi. Nakhā eva pattasadisatāya nakhapattāni.
(பஸாவோ ஸரீராவயவேன இரியனந்தி ஆஹ – ‘‘பவத்தீதி அத்தோ²’’தி, பஸாவோ யதா²பரிதமேவ கனதந்தி, ந ஸபா⁴வஸந்தா⁴னங். யதா²விபா⁴வஸேன உத்தமமேவ நச்சங் நச்சதி. தே வா வீஸதியாஸூதிரங் தா⁴னப்பத்தியா பவத்தியா பவத்திமகதமந்த³தா விபா⁴வஸுடதஸ்ஸ உத்தமமேவ கீ³தஞ்ச கா³யதீதி அத்தோ².) [எத்த²ந்தரே பாடோ² அஸுத்³தோ⁴ து³ஸ்ஸோத⁴னீயோ ச. ஸுத்³த⁴பாடோ² க³வேஸிதப்³போ³.] ஸமதித்திகோ தேலபத்தோதி முக²வத்திஸமங் தேலானங் பூரிதத்தா ஸமதித்திகமுக²ங் தேலபா⁴ஜனங். அந்தரேன ச மஹாஸமஜ்ஜங் அந்தரேன ச ஜனபத³கல்யாணிந்தி ஜனபத³கல்யாணியா, தஸ்ஸா ச நச்சகீ³தங் பெக்கி²துங் ஸன்னிபதிதமஹாஜனஸமூஹஸ்ஸ மஜ்ஜ²தோ பரிஹரிதப்³போ³ நேதப்³போ³. நந்தி தேலங். ஆஹரெய்யாதி ஆபஜ்ஜெய்ய. தத்ரித³ங் ஓபம்மஸங்ஸந்த³னங் – தேலபத்தங் விய காயக³தாஸதி, தஸ்ஸ பரிஹரணபுக்³க³லோ விய விபஸ்ஸகோ, ஜனகாயா விய புது²த்தாரம்மணானி, அஸிபுரிஸோ விய மனோ, தேலஸ்ஸ சஜனங் விய கிலேஸுப்பாத³னங், ஸீஸபாதனங் விய அரியமக்³க³ஞாணஸீஸானுப்பத்தி. ‘‘காயக³தா ஸதி நோ பா⁴விதா…பே॰… ஸிக்கி²தப்³ப³’’ந்தி வுத்தத்தா ‘‘புப்³ப³பா⁴க³விபஸ்ஸனாவ கதி²தா’’தி வுத்தங்.
(Pasāvo sarīrāvayavena iriyananti āha – ‘‘pavattīti attho’’ti, pasāvo yathāparitameva kanatanti, na sabhāvasandhānaṃ. Yathāvibhāvasena uttamameva naccaṃ naccati. Te vā vīsatiyāsūtiraṃ dhānappattiyā pavattiyā pavattimakatamandatā vibhāvasuṭatassa uttamameva gītañca gāyatīti attho.) [Etthantare pāṭho asuddho dussodhanīyo ca. Suddhapāṭho gavesitabbo.] Samatittiko telapattoti mukhavattisamaṃ telānaṃ pūritattā samatittikamukhaṃ telabhājanaṃ. Antarena ca mahāsamajjaṃ antarena ca janapadakalyāṇinti janapadakalyāṇiyā, tassā ca naccagītaṃ pekkhituṃ sannipatitamahājanasamūhassa majjhato pariharitabbo netabbo. Nanti telaṃ. Āhareyyāti āpajjeyya. Tatridaṃ opammasaṃsandanaṃ – telapattaṃ viya kāyagatāsati, tassa pariharaṇapuggalo viya vipassako, janakāyā viya puthuttārammaṇāni, asipuriso viya mano, telassa cajanaṃ viya kilesuppādanaṃ, sīsapātanaṃ viya ariyamaggañāṇasīsānuppatti. ‘‘Kāyagatā sati no bhāvitā…pe… sikkhitabba’’nti vuttattā ‘‘pubbabhāgavipassanāva kathitā’’ti vuttaṃ.
நாலந்த³வக்³க³வண்ணனா நிட்டி²தா.
Nālandavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ஜனபத³கல்யாணீஸுத்தங் • 10. Janapadakalyāṇīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. ஜனபத³கல்யாணீஸுத்தவண்ணனா • 10. Janapadakalyāṇīsuttavaṇṇanā
