| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. ஜந்துஸுத்தவண்ணனா
5. Jantusuttavaṇṇanā
106. யே வினயே அபகதஞ்ஞுனோ ஸங்கிலேஸிகேஸு வோதா³னியேஸு த⁴ம்மேஸு ந குஸலா யங் கிஞ்சி ந காரினோ விப்படிஸாரப³ஹுலா. தேஸங் அனுப்பன்னஞ்ச உத்³த⁴ச்சங் உப்பஜ்ஜதி, உப்பன்னஞ்ச பி⁴ய்யோபா⁴வங் வேபுல்லங் ஆபஜ்ஜதீதி ஆஹ ‘‘அகப்பியே கப்பியஸஞ்ஞிதாய…பே॰… உத்³த⁴ச்சபகதிகா’’தி. ஸாராபா⁴வேன துச்ச²த்தா ச நளோ வியாதி நளோ, மானோதி ஆஹ ‘‘உன்னளாதி உக்³க³தனளா’’தி. தேனாஹ ‘‘உட்டி²ததுச்ச²மானா’’தி. மானோ ஹி ஸெய்யஸ்ஸ ஸெய்யோதி ஸதி³ஸோதி ச பவத்தியா விஸேஸதோ துச்சோ². சாபல்லேனாதி சபலபா⁴வேன, தண்ஹாலோலுப்பேனாதி அத்தோ². முக²க²ராதி முகே²ன ப²ருஸா, ப²ருஸவாதி³னோதி அத்தோ². விகிண்ணவாசாதி விஸடவசனா, ஸம்ப²ப்பலாபதாய அபரியந்தவசனா. தேனாஹ ‘‘அஸங்யதவசனா’’திஆதி³. சண்ட³ஸோதே ப³த்³த⁴னாவாஸதி³ஸாதி ஏதேன அனவட்டி²தகிரியதங் த³ஸ்ஸேதி. யேன ஸமன்னாக³தா ஸத்தா ஏகஸ்மிங் டா²னே டா²துங் வா நிஸீதி³துங் வா ந ஸக்கொந்தி, இதோ சிதோ ச விசரந்தி. அனவட்டி²தசித்தாதி ஏகஸ்மிங் ஆரம்மணே ந அவட்டி²தசித்தா. விவடஇந்த்³ரியாதி அஸங்வுதசக்கா²தி³இந்த்³ரியா.
106. Ye vinaye apakataññuno saṃkilesikesu vodāniyesu dhammesu na kusalā yaṃ kiñci na kārino vippaṭisārabahulā. Tesaṃ anuppannañca uddhaccaṃ uppajjati, uppannañca bhiyyobhāvaṃ vepullaṃ āpajjatīti āha ‘‘akappiye kappiyasaññitāya…pe… uddhaccapakatikā’’ti. Sārābhāvena tucchattā ca naḷo viyāti naḷo, mānoti āha ‘‘unnaḷāti uggatanaḷā’’ti. Tenāha ‘‘uṭṭhitatucchamānā’’ti. Māno hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukhakharāti mukhena pharusā, pharusavādinoti attho. Vikiṇṇavācāti visaṭavacanā, samphappalāpatāya apariyantavacanā. Tenāha ‘‘asaṃyatavacanā’’tiādi. Caṇḍasote baddhanāvāsadisāti etena anavaṭṭhitakiriyataṃ dasseti. Yena samannāgatā sattā ekasmiṃ ṭhāne ṭhātuṃ vā nisīdituṃ vā na sakkonti, ito cito ca vicaranti. Anavaṭṭhitacittāti ekasmiṃ ārammaṇe na avaṭṭhitacittā. Vivaṭaindriyāti asaṃvutacakkhādiindriyā.
கு³ணகதா²ய ஸத்³தி⁴ங் கதி²யமானோ நிக்³கு³ணஸ்ஸ அகு³ணோ பாகடோ ஹோதி ஜாதிமணிஸமீபே டி²தஸ்ஸ விய காசமணினோ தோ³ஸோ. ஸுக²ஜீவினோதி ஸுகே² டி²தா. யதா² தா³யகானங் ஸுப⁴ரங் ஹோதி, ஏவங் ஸுகே²ன அகிச்சே²ன பவத்தஜீவிகா. தேனாஹ ‘‘புப்³பே³ பி⁴க்கூ²’’திஆதி³.
Guṇakathāya saddhiṃ kathiyamāno nigguṇassa aguṇo pākaṭo hoti jātimaṇisamīpe ṭhitassa viya kācamaṇino doso. Sukhajīvinoti sukhe ṭhitā. Yathā dāyakānaṃ subharaṃ hoti, evaṃ sukhena akicchena pavattajīvikā. Tenāha ‘‘pubbe bhikkhū’’tiādi.
அத்தனோ ருசிவஸேன கா³மகிச்சங் நேதீதி கா³மணி, தே பன ஹீளெந்தோ வத³தி ‘‘கா³மணிகா’’தி. விஸ்ஸஜ்ஜெத்வாதி ஸதிவொஸ்ஸக்³க³வஸேன விஸ்ஸஜ்ஜெத்வா கிலேஸமுச்சா²யாதி மஹிச்சா²ஸங்கா²தாய தண்ஹாமுச்சா²ய. ஸீலவந்தானங்யேவ ஹி து³ப்படிபத்திங் ஸந்தா⁴ய தே³வபுத்தோ வத³தி. வத்தப்³ப³யுத்தகேயேவாதி ஓவாதே³ன மயா அனுக்³க³ஹேதப்³ப³மேவ. ச²ட்³டி³தகாதி பரிச்சத்தா ஆசரியுபஜ்ஜா²யாதீ³ஹி. ததோ ஏவ அனாதா² அப்பதிட்டா². பேதாதி விக³தஜீவிதா மதா. யதா² பேதா, ததே²வ ஹொந்தி அத்தஹிதாஸமத்த²தாய விஞ்ஞூனங் ஜிகு³ச்சி²தப்³ப³தாய ச.
Attano rucivasena gāmakiccaṃ netīti gāmaṇi, te pana hīḷento vadati ‘‘gāmaṇikā’’ti. Vissajjetvāti sativossaggavasena vissajjetvā kilesamucchāyāti mahicchāsaṅkhātāya taṇhāmucchāya. Sīlavantānaṃyeva hi duppaṭipattiṃ sandhāya devaputto vadati. Vattabbayuttakeyevāti ovādena mayā anuggahetabbameva. Chaḍḍitakāti pariccattā ācariyupajjhāyādīhi. Tato eva anāthā appatiṭṭhā. Petāti vigatajīvitā matā. Yathā petā, tatheva honti attahitāsamatthatāya viññūnaṃ jigucchitabbatāya ca.
ஜந்துஸுத்தவண்ணனா நிட்டி²தா.
Jantusuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஜந்துஸுத்தங் • 5. Jantusuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. ஜந்துஸுத்தவண்ணனா • 5. Jantusuttavaṇṇanā
