| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
4. ஜாணுஸ்ஸோணிப்³ராஹ்மணஸுத்தவண்ணனா
4. Jāṇussoṇibrāhmaṇasuttavaṇṇanā
4. வளவாபி⁴-ஸத்³தோ³ வளவாபரியாயோதி ஆஹ ‘‘சதூஹி வளவாஹி யுத்தரதே²னா’’தி. யோத⁴ரதோ²தி யோதே⁴ஹி யுஜ்ஜ²னத்த²ங் ஆரோஹிதப்³ப³ரதோ². அலங்காரரதோ² மங்க³லதி³வஸேஸு அலங்கதபடியத்தேஹி ஆரோஹிதப்³ப³ரதோ². க⁴னது³குலேன பரிவாரிதோதி ரஜதபட்டவண்ணேன ஸேதது³குலேன படிச்சா²தி³தோ. படிச்சா²த³னத்தோ² ஹி இத⁴ பரிவாரஸத்³தோ³. ரஜதபனாளிஸுபரிக்கி²த்தா ஸேதபா⁴வகரணத்த²ங்.
4.Vaḷavābhi-saddo vaḷavāpariyāyoti āha ‘‘catūhi vaḷavāhi yuttarathenā’’ti. Yodharathoti yodhehi yujjhanatthaṃ ārohitabbaratho. Alaṅkāraratho maṅgaladivasesu alaṅkatapaṭiyattehi ārohitabbaratho. Ghanadukulena parivāritoti rajatapaṭṭavaṇṇena setadukulena paṭicchādito. Paṭicchādanattho hi idha parivārasaddo. Rajatapanāḷisuparikkhittā setabhāvakaraṇatthaṃ.
ச²ன்னங் ச²ன்னங் மாஸானந்தி நித்³தா⁴ரணே ஸாமிவசனங். ஏகவாரங் நக³ரங் பத³க்கி²ணங் கரோதீதி இத³ங் தஸ்மிங் டா²னந்தரே டி²தேன காதப்³ப³ங் சாரித்தங். நக³ரதோ ந பக்கந்தாதி நக³ரதோ ப³ஹி ந க³தா. மங்க³லவசனே நியுத்தா மங்க³லிகா, ஸுவத்தி²வசனே நியுத்தா ஸோவத்தி²கா. ஆதி³-ஸத்³தே³ன து²திமாக³த⁴வந்தி³காசரியகே ஸங்க³ண்ஹாதி. ஸுகபத்தஸதி³ஸானி வண்ணதோ.
Channaṃ channaṃ māsānanti niddhāraṇe sāmivacanaṃ. Ekavāraṃ nagaraṃ padakkhiṇaṃ karotīti idaṃ tasmiṃ ṭhānantare ṭhitena kātabbaṃ cārittaṃ. Nagarato na pakkantāti nagarato bahi na gatā. Maṅgalavacane niyuttā maṅgalikā, suvatthivacane niyuttā sovatthikā. Ādi-saddena thutimāgadhavandikācariyake saṅgaṇhāti. Sukapattasadisāni vaṇṇato.
வண்ணகீ³தந்தி து²திகீ³தங். ப்³ரஹ்மபூ⁴தங் ஸெட்ட²பூ⁴தங் யானங், ப்³ரஹ்மபூ⁴தானங் ஸெட்ட²பூ⁴தானங் யானந்தி வா ப்³ரஹ்மயானங். விஜிதத்தா விஸேஸேன ஜினநதோ. ராக³ங் வினயமானா பரியோஸாபேதீதி ஸப்³ப³ம்பி ராக³ங் ஸமுச்சே²த³வினயவஸேன வினேதி, அத்தனோ கிச்சங் பரியோஸாபேதி. கிச்சபரியோஸாபனேனேவ ஹி ஸயம்பி பரியோஸானங் நிப்ப²த்திங் உபக³ச்ச²தி. தேனாஹ ‘‘பரியோஸானங் க³ச்ச²தி நிப்ப²ஜ்ஜதீ’’தி.
Vaṇṇagītanti thutigītaṃ. Brahmabhūtaṃ seṭṭhabhūtaṃ yānaṃ, brahmabhūtānaṃ seṭṭhabhūtānaṃ yānanti vā brahmayānaṃ. Vijitattā visesena jinanato. Rāgaṃ vinayamānā pariyosāpetīti sabbampi rāgaṃ samucchedavinayavasena vineti, attano kiccaṃ pariyosāpeti. Kiccapariyosāpaneneva hi sayampi pariyosānaṃ nipphattiṃ upagacchati. Tenāha ‘‘pariyosānaṃ gacchati nipphajjatī’’ti.
து⁴ரந்தி பு⁴ம்மத்தே² உபயோக³வசனந்தி ஆஹ ‘‘தத்ரமஜ்ஜ²த்ததாயுகே³ யுத்தா’’தி. ஈஸாதி யுக³ஸந்தா⁴ரிகா தா³ருயுக³ளா. யதா² வா பா³ஹிரங் யுக³ங் தா⁴ரேதி, தஸ்ஸா டி²தாய ஏவ கிச்சஸித்³தி⁴, ஏவங் கிரியாவஸேன லத்³த⁴ப³லேன தத்ரமஜ்ஜ²த்ததாயுகே³ தி²ரங் தா⁴ரேதி, தேஹேவ அரியமக்³க³ரத²ஸ்ஸ பவத்தனங். ஹிரிக்³க³ஹணேன செத்த² தங்ஸஹசரணதோ ஒத்தப்பம்பி க³ஹிதங்யேவ ஹோதி. தேனாஹ ‘‘அத்தனா ஸத்³தி⁴’’ந்திஆதி³. நாளியா மினமானோ புரிஸோ விய ஆரம்மணங் மினாதீதி மனோ. கதரங் பன தங் மனோ, கத²ஞ்சஸ்ஸ யொத்தஸதி³ஸதாதி ஆஹ ‘‘விபஸ்ஸனாசித்த’’ந்திஆதி³. தேன யொத்தங் வியாதி யொத்தந்தி த³ஸ்ஸேதி. லோகியவிபஸ்ஸனாசித்தங் அதிரேகபஞ்ஞாஸ குஸலத⁴ம்மே ஏகாப³த்³தே⁴ ஏகஸங்க³ஹிதே கரோதீதி ஸம்ப³ந்தோ⁴. தே பன ‘‘ப²ஸ்ஸோ ஹோதி…பே॰… அவிக்கே²போ ஹோதீ’’தி சித்தங்க³வஸேன த⁴ம்மஸங்க³ஹே (த⁴॰ ஸ॰ 1) ஆக³தனயேனேவ வேதி³தப்³பா³. லோகுத்தரவிபஸ்ஸனாசித்தந்தி மக்³க³சித்தங் ஆஹ. அதிரேகஸட்டீ²தி தே ஏவ ஸம்மாகம்மந்தாஜீவேஹி அனஞ்ஞாதஞ்ஞஸ்ஸாமீதிந்த்³ரியாதீ³ஹி ச ஸத்³தி⁴ங் அதிரேகஸட்டி² குஸலத⁴ம்மே. ஏகாப³த்³தே⁴தி ஏகஸ்மிங் ஏவ ஆரம்மணே ஆப³த்³தே⁴. ஏகஸங்க³ஹேதி ததே²வ விபஸ்ஸனாகிச்சவஸேன ஏகஸங்க³ஹே கரோதி. புப்³ப³ங்க³மபா⁴வேன ஆரக்க²ங் ஸாரேதீதி ஆரக்க²ஸாரதீ². ‘‘யதா² ஹி ரத²ஸ்ஸ…பே॰… ஸாரதீ²’’தி வத்வா தங் த³ஸ்ஸேதுங் ‘‘யொக்³கி³யோ’’தி வுத்தங். து⁴ரங் வாஹேதி யொக்³கே³. யோஜேதி யொக்³கே³ ஸமக³தியஞ்ச. அக்க²ங் அப்³ப⁴ஞ்ஜதி ஸுக²ப்பவத்தனத்த²ங். ரத²ங் பேஸேதி யொக்³க³சோத³னேன. நிப்³பி³ஸேவனே கரோதி க³மனவீதி²யங் படிபாத³னேன ஸன்னியோஜேதி. ஆரக்க²பச்சுபட்டா²னாதி ஆரக்க²ங் பச்சுபட்ட²பேதி அஸம்மோஸஸபா⁴வத்தா. க³தியோதி பவத்தியோ, நிப்ப²த்தியோ வா. ஸமன்வேஸதீதி க³வேஸதி.
Dhuranti bhummatthe upayogavacananti āha ‘‘tatramajjhattatāyuge yuttā’’ti. Īsāti yugasandhārikā dāruyugaḷā. Yathā vā bāhiraṃ yugaṃ dhāreti, tassā ṭhitāya eva kiccasiddhi, evaṃ kiriyāvasena laddhabalena tatramajjhattatāyuge thiraṃ dhāreti, teheva ariyamaggarathassa pavattanaṃ. Hiriggahaṇena cettha taṃsahacaraṇato ottappampi gahitaṃyeva hoti. Tenāha ‘‘attanā saddhi’’ntiādi. Nāḷiyā minamāno puriso viya ārammaṇaṃ minātīti mano. Kataraṃ pana taṃ mano, kathañcassa yottasadisatāti āha ‘‘vipassanācitta’’ntiādi. Tena yottaṃ viyāti yottanti dasseti. Lokiyavipassanācittaṃ atirekapaññāsa kusaladhamme ekābaddhe ekasaṅgahite karotīti sambandho. Te pana ‘‘phasso hoti…pe… avikkhepo hotī’’ti cittaṅgavasena dhammasaṅgahe (dha. sa. 1) āgatanayeneva veditabbā. Lokuttaravipassanācittanti maggacittaṃ āha. Atirekasaṭṭhīti te eva sammākammantājīvehi anaññātaññassāmītindriyādīhi ca saddhiṃ atirekasaṭṭhi kusaladhamme. Ekābaddheti ekasmiṃ eva ārammaṇe ābaddhe. Ekasaṅgaheti tatheva vipassanākiccavasena ekasaṅgahe karoti. Pubbaṅgamabhāvena ārakkhaṃ sāretīti ārakkhasārathī. ‘‘Yathā hi rathassa…pe… sārathī’’ti vatvā taṃ dassetuṃ ‘‘yoggiyo’’ti vuttaṃ. Dhuraṃ vāheti yogge. Yojeti yogge samagatiyañca. Akkhaṃ abbhañjati sukhappavattanatthaṃ. Rathaṃ peseti yoggacodanena. Nibbisevane karoti gamanavīthiyaṃ paṭipādanena sanniyojeti. Ārakkhapaccupaṭṭhānāti ārakkhaṃ paccupaṭṭhapeti asammosasabhāvattā. Gatiyoti pavattiyo, nipphattiyo vā. Samanvesatīti gavesati.
அரியபுக்³க³லஸ்ஸ நிப்³பா³னங் படிமுக²ங் ஸம்பாபனே ரதோ² வியாதி ரதோ². பரிகரோதி விபூ⁴ஸயதீதி பரிக்கா²ரோ, விபூ⁴ஸனங், ஸீலஞ்ச அரியமக்³க³ஸ்ஸ விபூ⁴ஸனட்டா²னியங். தேன வுத்தங் ‘‘சதுபாரிஸுத்³தி⁴ஸீலாலங்காரோ’’தி, ஸீலபூ⁴ஸனோதி அத்தோ². விபஸ்ஸனாஸம்பயுத்தானந்தி லோகியாய லோகுத்தராய ச விபஸ்ஸனாய ஸம்பயுத்தானங். விதி⁴னா ஈரேதப்³ப³தோ பவத்தேதப்³ப³தோ வீரியங், ஸம்மாவாயாமோ. ஸமங் ஸம்மா ச தி⁴யதீதி ஸமாதி⁴, து⁴ரஞ்ச தங் ஸமாதி⁴ சாதி து⁴ரஸமாதி⁴, உபெக்கா² து⁴ரஸமாதி⁴ ஏதஸ்ஸாதி உபெக்கா²து⁴ரஸமாதி⁴, அரியமக்³கோ³ உபெக்கா²ஸங்கா²தது⁴ரஸமாதீ⁴தி அத்தோ². அட்ட²கதா²யங் பன ப்³யஞ்ஜனங் அனாதி³யித்வா து⁴ரஸமாதி⁴ஸத்³தா³னங் பி⁴ன்னாதி⁴கரணதா வுத்தா. பயோக³மஜ்ஜ²த்தேதி வீரியஸமதாய. அனிச்சா²தி இச்சா²படிபக்கா². தேனாஹ ‘‘அலோப⁴ஸங்கா²தா’’தி. பரிவாரணந்தி பரிவாரோ, பரிச்ச²தோ³தி அத்தோ².
Ariyapuggalassa nibbānaṃ paṭimukhaṃ sampāpane ratho viyāti ratho. Parikaroti vibhūsayatīti parikkhāro, vibhūsanaṃ, sīlañca ariyamaggassa vibhūsanaṭṭhāniyaṃ. Tena vuttaṃ ‘‘catupārisuddhisīlālaṅkāro’’ti, sīlabhūsanoti attho. Vipassanāsampayuttānanti lokiyāya lokuttarāya ca vipassanāya sampayuttānaṃ. Vidhinā īretabbato pavattetabbato vīriyaṃ, sammāvāyāmo. Samaṃ sammā ca dhiyatīti samādhi, dhurañca taṃ samādhi cāti dhurasamādhi, upekkhā dhurasamādhi etassāti upekkhādhurasamādhi, ariyamaggo upekkhāsaṅkhātadhurasamādhīti attho. Aṭṭhakathāyaṃ pana byañjanaṃ anādiyitvā dhurasamādhisaddānaṃ bhinnādhikaraṇatā vuttā. Payogamajjhatteti vīriyasamatāya. Anicchāti icchāpaṭipakkhā. Tenāha ‘‘alobhasaṅkhātā’’ti. Parivāraṇanti parivāro, paricchadoti attho.
மெத்தாதி மெத்தாசேதோவிமுத்தி. ததா² கருணா. புப்³ப³பா⁴கோ³தி உபி⁴ன்னம்பி உபசாரோ. த்³வேபி காயசித்தவிவேகா விய புப்³ப³பா⁴க³த⁴ம்மவஸேன வுத்தா. அரியமக்³க³ரதே²தி பரிஸுத்³த⁴மக்³க³ஸங்கா²தே ரதே². அரியமக்³க³ரதோ² ச மக்³க³ரதோ² சாதி அரியமக்³க³ரதோ², ஏவங் ஏகஸேஸனயேன வா அத்தோ² வேதி³தப்³போ³. தேனாஹ ‘‘இமஸ்மிங் லோகியலோகுத்தரமக்³க³ரதே² டி²தோ’’தி. ஸன்னத்³த⁴சம்மோதி யோகா³வசரஸ்ஸ படிமுக்கசம்மங். ந நங் தே விஜ்ஜ²ந்தீதி வசனபதா² ந நங் விஜ்ஜ²ந்தி. த⁴ம்மபே⁴த³னவஸேன ந ப⁴ஞ்ஜதி, தஸ்ஸ அரியமக்³க³ஸ்ஸ ரத²ஸ்ஸ ஸம்மா யோஜிதஸ்ஸ அந்தரா ப⁴ங்கோ³ நத்தீ²தி அத்தோ².
Mettāti mettācetovimutti. Tathā karuṇā. Pubbabhāgoti ubhinnampi upacāro. Dvepi kāyacittavivekā viya pubbabhāgadhammavasena vuttā. Ariyamaggaratheti parisuddhamaggasaṅkhāte rathe. Ariyamaggaratho ca maggaratho cāti ariyamaggaratho, evaṃ ekasesanayena vā attho veditabbo. Tenāha ‘‘imasmiṃ lokiyalokuttaramaggarathe ṭhito’’ti. Sannaddhacammoti yogāvacarassa paṭimukkacammaṃ. Na naṃ te vijjhantīti vacanapathā na naṃ vijjhanti. Dhammabhedanavasena na bhañjati, tassa ariyamaggassa rathassa sammā yojitassa antarā bhaṅgo natthīti attho.
அத்தனோ புரிஸகாரங் நிஸ்ஸாய லத்³த⁴த்தா அத்தனோ ஸந்தானேதி அதி⁴ப்பாயோ. அனுத்தரந்தி உத்தரரஹிதங். ததோ ஏவ ஸெட்ட²யானங், நஸ்ஸ கேனசி ஸதி³ஸந்தி அஸதி³ஸங். தி⁴திஸம்பன்னதாய தீ⁴ரா பண்டி³தபுரிஸா லோகம்ஹா நிய்யந்தி க³ச்ச²ந்தி. ‘‘ஜயங் ஜய’’ந்தி கா³தா²யங் வசனவிபல்லாஸேன வுத்தந்தி ஆஹ ‘‘ஜினந்தா ஜினந்தா’’தி.
Attano purisakāraṃ nissāya laddhattā attano santāneti adhippāyo. Anuttaranti uttararahitaṃ. Tato eva seṭṭhayānaṃ, nassa kenaci sadisanti asadisaṃ. Dhitisampannatāya dhīrā paṇḍitapurisālokamhā niyyanti gacchanti. ‘‘Jayaṃ jaya’’nti gāthāyaṃ vacanavipallāsena vuttanti āha ‘‘jinantā jinantā’’ti.
ஜாணுஸ்ஸோணிப்³ராஹ்மணஸுத்தவண்ணனா நிட்டி²தா.
Jāṇussoṇibrāhmaṇasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ஜாணுஸ்ஸோணிப்³ராஹ்மணஸுத்தங் • 4. Jāṇussoṇibrāhmaṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. ஜாணுஸ்ஸோணிப்³ராஹ்மணஸுத்தவண்ணனா • 4. Jāṇussoṇibrāhmaṇasuttavaṇṇanā
