| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
6. ஜராவக்³கோ³
6. Jarāvaggo
1. ஜராஸுத்தவண்ணனா
1. Jarāsuttavaṇṇanā
51. ஹிதஸ்ஸ ஸாத⁴னதோ ஸாது⁴, யங் கிஞ்சி அத்த²ஜாதங். தங் பன அத்த²காமேன லபி⁴தப்³ப³தோ உபஸேவிதப்³ப³தோ லத்³த⁴கங், கல்யாணட்டே²ன ப⁴த்³த³கந்தி வுச்சதீதி ஆஹ ‘‘ஸாதூ⁴தி லத்³த⁴கங் ப⁴த்³த³க’’ந்தி. ‘‘ஸீலங் யாவ ஜரா ஸாதூ⁴’’தி வுத்தமத்த²ங் ப்³யதிரேகதோ விபா⁴வேதுங் ‘‘இமினா இத³ங் த³ஸ்ஸேதீ’’தி வுத்தங். இத³ந்தி இத³ங் அத்த²ஜாதங்.
51. Hitassa sādhanato sādhu, yaṃ kiñci atthajātaṃ. Taṃ pana atthakāmena labhitabbato upasevitabbato laddhakaṃ, kalyāṇaṭṭhena bhaddakanti vuccatīti āha ‘‘sādhūti laddhakaṃ bhaddaka’’nti. ‘‘Sīlaṃ yāva jarā sādhū’’ti vuttamatthaṃ byatirekato vibhāvetuṃ ‘‘iminā idaṃ dassetī’’ti vuttaṃ. Idanti idaṃ atthajātaṃ.
பதிட்டி²தாதி சித்தஸந்தானே லத்³த⁴பதிட்டா², கேனசி அஸங்ஹாரியா. தேனாஹ ‘‘மக்³கே³ன ஆக³தா’’தி. சித்தீகதட்டா²தீ³ஹீதி பூஜனீயபா⁴வாதீ³ஹி. வுத்தங் ஹேதங் போராணட்ட²கதா²யங். சித்தீகதந்தி ரதனந்தி இத³ங் ரதனங் நாம லோகே சித்தீகதங் வத்தூ²னங் ஸஹஸ்ஸக்³க⁴னதாதி³வஸேன. யேபி லோகே சித்தீகதா க²த்தியபண்டி³த-சதுமஹாராஜ-ஸக்க-ஸுயாம-மஹாப்³ரஹ்மாத³யோ, தேஸங் சித்தீகதோ தேஹி ஸரணந்தி உபக³ந்தப்³ப³தாதி³வஸேன. ரதிகரந்தி பீதிஸுகா²வஹங். ஜா²னரதிஸுகே²னாதி து³விதே⁴னபி ஜா²னரதிஸுகே²ன. துலேதுந்தி பரிச்சி²ந்தி³துங். கு³ணபாரமிந்தி கு³ணானங் உக்கங்ஸபாரமிங். து³ல்லபோ⁴ அனேகானி அஸங்க்²யெய்யானி அதிதா⁴வித்வாபி லத்³து⁴ங் அஸக்குணெய்யத்தா. அனோமோதி அனூனோ பரிபுண்ணோ. தத்த² விஸேஸதோ அனோமஸத்தபரிபோ⁴க³தோ தேஹி ‘‘ஸம்மாஸம்பு³த்³தோ⁴ ப⁴க³வா’’தி அனுஸ்ஸரிதப்³ப³தோதி ஆஹ ‘‘ப⁴க³வா அனோமோ ஸீலேனா’’திஆதி³.
Patiṭṭhitāti cittasantāne laddhapatiṭṭhā, kenaci asaṃhāriyā. Tenāha ‘‘maggena āgatā’’ti. Cittīkataṭṭhādīhīti pūjanīyabhāvādīhi. Vuttaṃ hetaṃ porāṇaṭṭhakathāyaṃ. Cittīkatanti ratananti idaṃ ratanaṃ nāma loke cittīkataṃ vatthūnaṃ sahassagghanatādivasena. Yepi loke cittīkatā khattiyapaṇḍita-catumahārāja-sakka-suyāma-mahābrahmādayo, tesaṃ cittīkato tehi saraṇanti upagantabbatādivasena. Ratikaranti pītisukhāvahaṃ. Jhānaratisukhenāti duvidhenapi jhānaratisukhena. Tuletunti paricchindituṃ. Guṇapāraminti guṇānaṃ ukkaṃsapāramiṃ. Dullabho anekāni asaṅkhyeyyāni atidhāvitvāpi laddhuṃ asakkuṇeyyattā. Anomoti anūno paripuṇṇo. Tattha visesato anomasattaparibhogato tehi ‘‘sammāsambuddho bhagavā’’ti anussaritabbatoti āha ‘‘bhagavā anomo sīlenā’’tiādi.
அரியமக்³க³பஞ்ஞாயேவ இத⁴ அதி⁴ப்பேதாதி ‘‘இத⁴ பன து³ல்லப⁴பாதுபா⁴வட்டே²ன பஞ்ஞா ‘ரதன’ந்தி வுத்த’’ந்தி ஆஹ. புஜ்ஜப²லனிப்³ப³த்தனதோ, அத்தனோ ஸந்தானங் புனாதீதி ச புஞ்ஞசேதனா புஞ்ஞங், ஸா பன யஸ்ஸ உப்பன்னா, தஸ்ஸேவ ஆவேணிகதாய அனஞ்ஞஸாதா⁴ரணத்தா கேனசிபி அனாஹடா, அட்ட²கதா²யங் பன ‘‘அரூபத்தா’’தி வுத்தங்.
Ariyamaggapaññāyeva idha adhippetāti ‘‘idha pana dullabhapātubhāvaṭṭhena paññā ‘ratana’nti vutta’’nti āha. Pujjaphalanibbattanato, attano santānaṃ punātīti ca puññacetanā puññaṃ, sā pana yassa uppannā, tasseva āveṇikatāya anaññasādhāraṇattā kenacipi anāhaṭā, aṭṭhakathāyaṃ pana ‘‘arūpattā’’ti vuttaṃ.
ஜராஸுத்தவண்ணனா நிட்டி²தா.
Jarāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஜராஸுத்தங் • 1. Jarāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஜராஸுத்தவண்ணனா • 1. Jarāsuttavaṇṇanā
