Library / Tipiṭaka / તિપિટક • Tipiṭaka / સંયુત્તનિકાય (અટ્ઠકથા) • Saṃyuttanikāya (aṭṭhakathā)

    ૬. જરાવગ્ગો

    6. Jarāvaggo

    ૧. જરાસુત્તવણ્ણના

    1. Jarāsuttavaṇṇanā

    ૫૧. જરાવગ્ગસ્સ પઠમે સાધૂતિ લદ્ધકં ભદ્દકં. સીલં યાવ જરાતિ ઇમિના ઇદં દસ્સેતિ – યથા મુત્તામણિરત્તવત્થાદીનિ આભરણાનિ તરુણકાલેયેવ સોભન્તિ, જરાજિણ્ણકાલે તાનિ ધારેન્તો ‘‘અયં અજ્જાપિ બાલભાવં પત્થેતિ, ઉમ્મત્તકો મઞ્ઞે’’તિ વત્તબ્બતં આપજ્જતિ , ન એવં સીલં. સીલઞ્હિ નિચ્ચકાલં સોભતિ. બાલકાલેપિ હિ સીલં રક્ખન્તં ‘‘કિં ઇમસ્સ સીલેના’’તિ? વત્તારો નત્થિ. મજ્ઝિમકાલેપિ મહલ્લકકાલેપીતિ.

    51. Jarāvaggassa paṭhame sādhūti laddhakaṃ bhaddakaṃ. Sīlaṃ yāva jarāti iminā idaṃ dasseti – yathā muttāmaṇirattavatthādīni ābharaṇāni taruṇakāleyeva sobhanti, jarājiṇṇakāle tāni dhārento ‘‘ayaṃ ajjāpi bālabhāvaṃ pattheti, ummattako maññe’’ti vattabbataṃ āpajjati , na evaṃ sīlaṃ. Sīlañhi niccakālaṃ sobhati. Bālakālepi hi sīlaṃ rakkhantaṃ ‘‘kiṃ imassa sīlenā’’ti? Vattāro natthi. Majjhimakālepi mahallakakālepīti.

    સદ્ધા સાધુ પતિટ્ઠિતાતિ હત્થાળવકચિત્તગહપતિઆદીનં વિય મગ્ગેન આગતા પતિટ્ઠિતસદ્ધા નામ સાધુ. પઞ્ઞા નરાનં રતનન્તિ એત્થ ચિત્તીકતટ્ઠાદીહિ રતનં વેદિતબ્બં. વુત્તઞ્હેતં –

    Saddhāsādhu patiṭṭhitāti hatthāḷavakacittagahapatiādīnaṃ viya maggena āgatā patiṭṭhitasaddhā nāma sādhu. Paññā narānaṃ ratananti ettha cittīkataṭṭhādīhi ratanaṃ veditabbaṃ. Vuttañhetaṃ –

    ‘‘યદિ ચિત્તીકતન્તિ રતનં, નનુ ભગવા ચિત્તીકતો પુરિસસીહો, યે ચ લોકે ચિત્તીકતા, તેસં ચિત્તીકતો ભગવા. યદિ રતિકરન્તિ રતનં, નનુ ભગવા રતિકરો પુરિસસીહો, તસ્સ વચનેન ચરન્તા ઝાનરતિસુખેન અભિરમન્તિ. યદિ અતુલ્યન્તિ રતનં, નનુ ભગવા અતુલો પુરિસસીહો. ન હિ સક્કા તુલેતું ગુણેહિ ગુણપારમિં ગતો. યદિ દુલ્લભન્તિ રતનં, નનુ ભગવા દુલ્લભો પુરિસસીહો. યદિ અનોમસત્તપરિભોગન્તિ રતનં, નનુ ભગવા અનોમો સીલેન સમાધિના પઞ્ઞાય વિમુત્તિયા વિમુત્તિઞાણદસ્સનેના’’તિ.

    ‘‘Yadi cittīkatanti ratanaṃ, nanu bhagavā cittīkato purisasīho, ye ca loke cittīkatā, tesaṃ cittīkato bhagavā. Yadi ratikaranti ratanaṃ, nanu bhagavā ratikaro purisasīho, tassa vacanena carantā jhānaratisukhena abhiramanti. Yadi atulyanti ratanaṃ, nanu bhagavā atulo purisasīho. Na hi sakkā tuletuṃ guṇehi guṇapāramiṃ gato. Yadi dullabhanti ratanaṃ, nanu bhagavā dullabho purisasīho. Yadi anomasattaparibhoganti ratanaṃ, nanu bhagavā anomo sīlena samādhinā paññāya vimuttiyā vimuttiñāṇadassanenā’’ti.

    ઇધ પન દુલ્લભપાતુભાવટ્ઠેન પઞ્ઞા ‘‘રતન’’ન્તિ વુત્તં. પુઞ્ઞન્તિ પુઞ્ઞચેતના, સા હિ અરૂપત્તા પરિહરિતું ન સક્કાતિ. પઠમં.

    Idha pana dullabhapātubhāvaṭṭhena paññā ‘‘ratana’’nti vuttaṃ. Puññanti puññacetanā, sā hi arūpattā pariharituṃ na sakkāti. Paṭhamaṃ.







    Related texts:



    તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૧. જરાસુત્તં • 1. Jarāsuttaṃ

    ટીકા • Tīkā / સુત્તપિટક (ટીકા) • Suttapiṭaka (ṭīkā) / સંયુત્તનિકાય (ટીકા) • Saṃyuttanikāya (ṭīkā) / ૧. જરાસુત્તવણ્ણના • 1. Jarāsuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact