| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
8. ஜா²னஸுத்தங்
8. Jhānasuttaṃ
‘‘ஸத்³தோ⁴ ச, பி⁴க்க²வே, பி⁴க்கு² ஹோதி ஸீலவா ச, நோ ச ப³ஹுஸ்ஸுதோ…பே॰… ப³ஹுஸ்ஸுதோ ச, நோ ச த⁴ம்மகதி²கோ… த⁴ம்மகதி²கோ ச, நோ ச பரிஸாவசரோ… பரிஸாவசரோ ச, நோ ச விஸாரதோ³ பரிஸாய த⁴ம்மங் தே³ஸேதி… விஸாரதோ³ ச பரிஸாய த⁴ம்மங் தே³ஸேதி, நோ ச வினயத⁴ரோ… வினயத⁴ரோ ச, நோ ச ஆரஞ்ஞிகோ 5 பந்தஸேனாஸனோ… ஆரஞ்ஞிகோ ச பந்தஸேனாஸனோ, நோ ச சதுன்னங் ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴… சதுன்னஞ்ச ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴, நோ ச ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஏவங் ஸோ தேனங்கே³ன அபரிபூரோ ஹோதி. தேன தங் அங்க³ங் பரிபூரேதப்³ப³ங் – ‘கிந்தாஹங் ஸத்³தோ⁴ ச அஸ்ஸங், ஸீலவா ச, ப³ஹுஸ்ஸுதோ ச, த⁴ம்மகதி²கோ ச, பரிஸாவசரோ ச, விஸாரதோ³ ச பரிஸாய த⁴ம்மங் தே³ஸெய்யங், வினயத⁴ரோ ச, ஆரஞ்ஞிகோ ச பந்தஸேனாஸனோ, சதுன்னஞ்ச ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங் நிகாமலாபீ⁴ அஸ்ஸங் அகிச்ச²லாபீ⁴ அகஸிரலாபீ⁴, ஆஸவானஞ்ச க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரெய்ய’ந்தி.
‘‘Saddho ca, bhikkhave, bhikkhu hoti sīlavā ca, no ca bahussuto…pe… bahussuto ca, no ca dhammakathiko… dhammakathiko ca, no ca parisāvacaro… parisāvacaro ca, no ca visārado parisāya dhammaṃ deseti… visārado ca parisāya dhammaṃ deseti, no ca vinayadharo… vinayadharo ca, no ca āraññiko 6 pantasenāsano… āraññiko ca pantasenāsano, no ca catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī… catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī, no ca āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ so tenaṅgena aparipūro hoti. Tena taṃ aṅgaṃ paripūretabbaṃ – ‘kintāhaṃ saddho ca assaṃ, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṃ deseyyaṃ, vinayadharo ca, āraññiko ca pantasenāsano, catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī assaṃ akicchalābhī akasiralābhī, āsavānañca khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja vihareyya’nti.
‘‘யதோ ச கோ², பி⁴க்க²வே, பி⁴க்கு² ஸத்³தோ⁴ ச ஹோதி, ஸீலவா ச, ப³ஹுஸ்ஸுதோ ச, த⁴ம்மகதி²கோ ச, பரிஸாவசரோ ச, விஸாரதோ³ ச பரிஸாய த⁴ம்மங் தே³ஸேதி, வினயத⁴ரோ ச, ஆரஞ்ஞிகோ ச பந்தஸேனாஸனோ, சதுன்னஞ்ச ஜா²னானங் ஆபி⁴சேதஸிகானங் தி³ட்ட²த⁴ம்மஸுக²விஹாரானங் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴, ஆஸவானஞ்ச க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி; ஏவங் ஸோ தேனங்கே³ன பரிபூரோ ஹோதி. இமேஹி கோ², பி⁴க்க²வே, த³ஸஹி த⁴ம்மேஹி ஸமன்னாக³தோ பி⁴க்கு² ஸமந்தபாஸாதி³கோ ச ஹோதி ஸப்³பா³காரபரிபூரோ சா’’தி. அட்ட²மங்.
‘‘Yato ca kho, bhikkhave, bhikkhu saddho ca hoti, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṃ deseti, vinayadharo ca, āraññiko ca pantasenāsano, catunnañca jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī, āsavānañca khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; evaṃ so tenaṅgena paripūro hoti. Imehi kho, bhikkhave, dasahi dhammehi samannāgato bhikkhu samantapāsādiko ca hoti sabbākāraparipūro cā’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. ஜா²னஸுத்தவண்ணனா • 8. Jhānasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-7. அவிஜ்ஜாஸுத்தாதி³வண்ணனா • 1-7. Avijjāsuttādivaṇṇanā
