| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
7. ஜிகு³ச்சி²தப்³ப³ஸுத்தங்
7. Jigucchitabbasuttaṃ
27. ‘‘தயோமே , பி⁴க்க²வே, புக்³க³லா ஸந்தோ ஸங்விஜ்ஜமானா லோகஸ்மிங். கதமே தயோ? அத்தி², பி⁴க்க²வே, புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. அத்தி², பி⁴க்க²வே, புக்³க³லோ அஜ்ஜு²பெக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. அத்தி², பி⁴க்க²வே, புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³. கதமோ ச, பி⁴க்க²வே, புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³? இத⁴ , பி⁴க்க²வே, ஏகச்சோ புக்³க³லோ து³ஸ்ஸீலோ ஹோதி பாபத⁴ம்மோ அஸுசி ஸங்கஸ்ஸரஸமாசாரோ படிச்ச²ன்னகம்மந்தோ, அஸ்ஸமணோ ஸமணபடிஞ்ஞோ, அப்³ரஹ்மசாரீ ப்³ரஹ்மசாரிபடிஞ்ஞோ, அந்தோபூதி அவஸ்ஸுதோ கஸம்பு³ஜாதோ. ஏவரூபோ, பி⁴க்க²வே, புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. தங் கிஸ்ஸ ஹேது? கிஞ்சாபி, பி⁴க்க²வே, ஏவரூபஸ்ஸ புக்³க³லஸ்ஸ ந தி³ட்டா²னுக³திங் ஆபஜ்ஜதி, அத² கோ² நங் பாபகோ கித்திஸத்³தோ³ அப்³பு⁴க்³க³ச்ச²தி – ‘பாபமித்தோ புரிஸபுக்³க³லோ பாபஸஹாயோ பாபஸம்பவங்கோ’தி. ஸெய்யதா²பி, பி⁴க்க²வே, அஹி கூ³த²க³தோ கிஞ்சாபி ந த³ங்ஸதி 1, அத² கோ² நங் மக்கே²தி; ஏவமேவங் கோ², பி⁴க்க²வே, கிஞ்சாபி ஏவரூபஸ்ஸ புக்³க³லஸ்ஸ ந தி³ட்டா²னுக³திங் ஆபஜ்ஜதி, அத² கோ² நங் பாபகோ கித்திஸத்³தோ³ அப்³பு⁴க்³க³ச்ச²தி – ‘பாபமித்தோ புரிஸபுக்³க³லோ பாபஸஹாயோ பாபஸம்பவங்கோ’தி. தஸ்மா ஏவரூபோ புக்³க³லோ ஜிகு³ச்சி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³.
27. ‘‘Tayome , bhikkhave, puggalā santo saṃvijjamānā lokasmiṃ. Katame tayo? Atthi, bhikkhave, puggalo jigucchitabbo na sevitabbo na bhajitabbo na payirupāsitabbo. Atthi, bhikkhave, puggalo ajjhupekkhitabbo na sevitabbo na bhajitabbo na payirupāsitabbo. Atthi, bhikkhave, puggalo sevitabbo bhajitabbo payirupāsitabbo. Katamo ca, bhikkhave, puggalo jigucchitabbo na sevitabbo na bhajitabbo na payirupāsitabbo? Idha , bhikkhave, ekacco puggalo dussīlo hoti pāpadhammo asuci saṅkassarasamācāro paṭicchannakammanto, assamaṇo samaṇapaṭiñño, abrahmacārī brahmacāripaṭiñño, antopūti avassuto kasambujāto. Evarūpo, bhikkhave, puggalo jigucchitabbo na sevitabbo na bhajitabbo na payirupāsitabbo. Taṃ kissa hetu? Kiñcāpi, bhikkhave, evarūpassa puggalassa na diṭṭhānugatiṃ āpajjati, atha kho naṃ pāpako kittisaddo abbhuggacchati – ‘pāpamitto purisapuggalo pāpasahāyo pāpasampavaṅko’ti. Seyyathāpi, bhikkhave, ahi gūthagato kiñcāpi na daṃsati 2, atha kho naṃ makkheti; evamevaṃ kho, bhikkhave, kiñcāpi evarūpassa puggalassa na diṭṭhānugatiṃ āpajjati, atha kho naṃ pāpako kittisaddo abbhuggacchati – ‘pāpamitto purisapuggalo pāpasahāyo pāpasampavaṅko’ti. Tasmā evarūpo puggalo jigucchitabbo na sevitabbo na bhajitabbo na payirupāsitabbo.
‘‘கதமோ ச, பி⁴க்க²வே, புக்³க³லோ அஜ்ஜு²பெக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³? இத⁴, பி⁴க்க²வே, ஏகச்சோ புக்³க³லோ கோத⁴னோ ஹோதி உபாயாஸப³ஹுலோ , அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி, கோபஞ்ச தோ³ஸஞ்ச அப்பச்சயஞ்ச பாதுகரோதி. ஸெய்யதா²பி, பி⁴க்க²வே, து³ட்டா²ருகோ கட்டே²ன வா கட²லாய வா க⁴ட்டிதோ பி⁴ய்யோஸோமத்தாய ஆஸவங் தே³தி; ஏவமேவங் கோ², பி⁴க்க²வே…பே॰… ஸெய்யதா²பி, பி⁴க்க²வே, திந்து³காலாதங் கட்டே²ன வா கட²லாய வா க⁴ட்டிதங் பி⁴ய்யோஸோமத்தாய சிச்சிடாயதி சிடிசிடாயதி; ஏவமேவங் கோ² பி⁴க்க²வே…பே॰… ஸெய்யதா²பி, பி⁴க்க²வே, கூ³த²கூபோ கட்டே²ன வா கட²லாய வா க⁴ட்டிதோ பி⁴ய்யோஸோமத்தாய து³க்³க³ந்தோ⁴ ஹோதி; ஏவமேவங் கோ², பி⁴க்க²வே, இதே⁴கச்சோ புக்³க³லோ கோத⁴னோ ஹோதி உபாயாஸப³ஹுலோ, அப்பம்பி வுத்தோ ஸமானோ அபி⁴ஸஜ்ஜதி குப்பதி ப்³யாபஜ்ஜதி பதித்தீ²யதி, கோபஞ்ச தோ³ஸஞ்ச அப்பச்சயஞ்ச பாதுகரோதி. ஏவரூபோ, பி⁴க்க²வே, புக்³க³லோ அஜ்ஜு²பெக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. தங் கிஸ்ஸ ஹேது? அக்கோஸெய்யபி மங் பரிபா⁴ஸெய்யபி மங் அனத்த²ம்பி மங் கரெய்யாதி. தஸ்மா ஏவரூபோ புக்³க³லோ அஜ்ஜு²பெக்கி²தப்³போ³ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³.
‘‘Katamo ca, bhikkhave, puggalo ajjhupekkhitabbo na sevitabbo na bhajitabbo na payirupāsitabbo? Idha, bhikkhave, ekacco puggalo kodhano hoti upāyāsabahulo , appampi vutto samāno abhisajjati kuppati byāpajjati patitthīyati, kopañca dosañca appaccayañca pātukaroti. Seyyathāpi, bhikkhave, duṭṭhāruko kaṭṭhena vā kaṭhalāya vā ghaṭṭito bhiyyosomattāya āsavaṃ deti; evamevaṃ kho, bhikkhave…pe… seyyathāpi, bhikkhave, tindukālātaṃ kaṭṭhena vā kaṭhalāya vā ghaṭṭitaṃ bhiyyosomattāya cicciṭāyati ciṭiciṭāyati; evamevaṃ kho bhikkhave…pe… seyyathāpi, bhikkhave, gūthakūpo kaṭṭhena vā kaṭhalāya vā ghaṭṭito bhiyyosomattāya duggandho hoti; evamevaṃ kho, bhikkhave, idhekacco puggalo kodhano hoti upāyāsabahulo, appampi vutto samāno abhisajjati kuppati byāpajjati patitthīyati, kopañca dosañca appaccayañca pātukaroti. Evarūpo, bhikkhave, puggalo ajjhupekkhitabbo na sevitabbo na bhajitabbo na payirupāsitabbo. Taṃ kissa hetu? Akkoseyyapi maṃ paribhāseyyapi maṃ anatthampi maṃ kareyyāti. Tasmā evarūpo puggalo ajjhupekkhitabbo na sevitabbo na bhajitabbo na payirupāsitabbo.
‘‘கதமோ ச, பி⁴க்க²வே, புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³? இத⁴, பி⁴க்க²வே, ஏகச்சோ புக்³க³லோ ஸீலவா ஹோதி கல்யாணத⁴ம்மோ. ஏவரூபோ, பி⁴க்க²வே, புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³. தங் கிஸ்ஸ ஹேது? கிஞ்சாபி, பி⁴க்க²வே, ஏவரூபஸ்ஸ புக்³க³லஸ்ஸ ந தி³ட்டா²னுக³திங் ஆபஜ்ஜதி, அத² கோ² நங் கல்யாணோ கித்திஸத்³தோ³ அப்³பு⁴க்³க³ச்ச²தி – ‘கல்யாணமித்தோ புரிஸபுக்³க³லோ கல்யாணஸஹாயோ கல்யாணஸம்பவங்கோ’தி. தஸ்மா ஏவரூபோ புக்³க³லோ ஸேவிதப்³போ³ ப⁴ஜிதப்³போ³ பயிருபாஸிதப்³போ³. ‘இமே கோ², பி⁴க்க²வே, தயோ புக்³க³லா ஸந்தோ ஸங்விஜ்ஜமானா லோகஸ்மி’’’ந்தி.
‘‘Katamo ca, bhikkhave, puggalo sevitabbo bhajitabbo payirupāsitabbo? Idha, bhikkhave, ekacco puggalo sīlavā hoti kalyāṇadhammo. Evarūpo, bhikkhave, puggalo sevitabbo bhajitabbo payirupāsitabbo. Taṃ kissa hetu? Kiñcāpi, bhikkhave, evarūpassa puggalassa na diṭṭhānugatiṃ āpajjati, atha kho naṃ kalyāṇo kittisaddo abbhuggacchati – ‘kalyāṇamitto purisapuggalo kalyāṇasahāyo kalyāṇasampavaṅko’ti. Tasmā evarūpo puggalo sevitabbo bhajitabbo payirupāsitabbo. ‘Ime kho, bhikkhave, tayo puggalā santo saṃvijjamānā lokasmi’’’nti.
‘‘நிஹீயதி புரிஸோ நிஹீனஸேவீ,
‘‘Nihīyati puriso nihīnasevī,
ந ச ஹாயேத² கதா³சி துல்யஸேவீ;
Na ca hāyetha kadāci tulyasevī;
ஸெட்ட²முபனமங் உதே³தி கி²ப்பங்,
Seṭṭhamupanamaṃ udeti khippaṃ,
தஸ்மா அத்தனோ உத்தரிங் ப⁴ஜேதா²’’தி. ஸத்தமங்;
Tasmā attano uttariṃ bhajethā’’ti. sattamaṃ;
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. ஜிகு³ச்சி²தப்³ப³ஸுத்தவண்ணனா • 7. Jigucchitabbasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. ஜிகு³ச்சி²தப்³ப³ஸுத்தவண்ணனா • 7. Jigucchitabbasuttavaṇṇanā
