| Library / Tipiṭaka / திபிடக • Tipiṭaka / ஸங்யுத்தனிகாய (டீகா) • Saṃyuttanikāya (ṭīkā) |
5. ஜிண்ணஸுத்தவண்ணனா
5. Jiṇṇasuttavaṇṇanā
148. சி²ன்னபி⁴ன்னட்டா²னே சி²த்³த³ஸ்ஸ அபுது²லத்தா அக்³க³ளங் அத³த்வாவ ஸுத்தேன ஸங்ஸிப்³ப³னமத்தேன அக்³க³ளதா³னேன ச சி²த்³தே³ புது²லே. நிப்³ப³ஸனானீதி சிரனிஸேவிதவஸனகிச்சானி, பரிபோ⁴க³ஜிண்ணானீதி அத்தோ². தேனாஹ ‘‘புப்³பே³…பே॰… லத்³த⁴னாமானீ’’தி, ஸஞ்ஞாபுப்³ப³கோ விதி⁴ அனிச்சோதி ‘‘க³ஹபதானீ’’தி வுத்தங் யதா² ‘‘வீரிய’’ந்தி.
148.Chinnabhinnaṭṭhāne chiddassa aputhulattā aggaḷaṃ adatvāva suttena saṃsibbanamattena aggaḷadānena ca chidde puthule. Nibbasanānīti ciranisevitavasanakiccāni, paribhogajiṇṇānīti attho. Tenāha ‘‘pubbe…pe… laddhanāmānī’’ti, saññāpubbako vidhi aniccoti ‘‘gahapatānī’’ti vuttaṃ yathā ‘‘vīriya’’nti.
ஸேனாபதிந்தி ஸேனாபதிபா⁴வினங், ஸேனாபச்சாரஹந்தி அத்தோ². அத்தனோ கம்மேனாதி அத்தனா காதப்³ப³கம்மேன. ஸோதி ஸத்தா². தஸ்மிந்தி மஹாகஸ்ஸபத்தே²ரே கரோதீதி ஸம்ப³ந்தோ⁴. ந கரோதீதி வுத்தமத்த²ங் விவரந்தோ ‘‘கஸ்மா’’திஆதி³மாஹ. யதி³ ஸத்தா² து⁴தங்கா³னி ந விஸ்ஸஜ்ஜாபேதுகாமோ, அத² கஸ்மா ‘‘ஜிண்ணோஸி தா³னி த்வ’’ந்திஆதி³மவோசாதி ஆஹ ‘‘யதா² பனா’’திஆதி³.
Senāpatinti senāpatibhāvinaṃ, senāpaccārahanti attho. Attano kammenāti attanā kātabbakammena. Soti satthā. Tasminti mahākassapatthere karotīti sambandho. Na karotīti vuttamatthaṃ vivaranto ‘‘kasmā’’tiādimāha. Yadi satthā dhutaṅgāni na vissajjāpetukāmo, atha kasmā ‘‘jiṇṇosi dāni tva’’ntiādimavocāti āha ‘‘yathā panā’’tiādi.
தி³ட்ட²த⁴ம்மஸுக²விஹாரந்தி இமஸ்மிங்யேவ அத்தபா⁴வே பா²ஸுவிஹாரங். அமானுஸிகா ஸவனரதீதி அதிக்கந்தமானுஸிகாய அரஞ்ஞஸத்³து³ப்பத்தியா அரஞ்ஞேஹங் வஸாமீதி விவேகவாஸூபனிஸ்ஸயாதீ⁴னஸத்³த³ஸவனபச்சயா த⁴ம்மரதி உப்பஜ்ஜதி. அபரோதி அஞ்ஞோ, து³தியோதி அத்தோ². தத்தே²வாதி தஸ்மிங்யேவ ஏகஸ்ஸ விஹரணட்டா²னே விஹரணஸமயே ச பா²ஸு ப⁴வதி சித்தவிவேகஸம்ப⁴வதோ. தேனாஹ ‘‘ஏகஸ்ஸ ரமதோ வனே’’தி.
Diṭṭhadhammasukhavihāranti imasmiṃyeva attabhāve phāsuvihāraṃ. Amānusikā savanaratīti atikkantamānusikāya araññasadduppattiyā araññehaṃ vasāmīti vivekavāsūpanissayādhīnasaddasavanapaccayā dhammarati uppajjati. Aparoti añño, dutiyoti attho. Tatthevāti tasmiṃyeva ekassa viharaṇaṭṭhāne viharaṇasamaye ca phāsu bhavati cittavivekasambhavato. Tenāha ‘‘ekassa ramato vane’’ti.
ததா²தி யதா² ஆரஞ்ஞிகஸ்ஸ ரதி, ததா² பிண்ட³பாதிகஸ்ஸ லப்³ப⁴தி தி³ட்ட²த⁴ம்மஸுக²விஹாரோ. ஏஸ நயோ ஸேஸேஸு. அபிண்ட³பாதிகாதீ⁴னோ இதரஸ்ஸ விஸேஸஜோதகோதி தமேவஸ்ஸ விஸேஸங் த³ஸ்ஸேதுங் ‘‘அகாலசாரீ’’திஆதி³ வுத்தங்.
Tathāti yathā āraññikassa rati, tathā piṇḍapātikassa labbhati diṭṭhadhammasukhavihāro. Esa nayo sesesu. Apiṇḍapātikādhīno itarassa visesajotakoti tamevassa visesaṃ dassetuṃ ‘‘akālacārī’’tiādi vuttaṃ.
அம்ஹாகங் ஸலாகங் க³ஹெத்வா ப⁴த்தத்தா²ய கே³ஹங் அனாக³ச்ச²ந்தஸ்ஸ ஸத்தாஹங் ந பாதேதப்³ப³ந்தி ஸாமிகேஹி தி³ன்னத்தா ஸத்தாஹங் ஸலாகங் ந லப⁴தி, ந கதிகவஸேன. பிண்ட³சாரிகவத்தே அவத்தனதோ ‘‘யஸ்ஸ சேஸா’’திஆதி³ வுத்தங்.
Amhākaṃ salākaṃ gahetvā bhattatthāya gehaṃ anāgacchantassa sattāhaṃ na pātetabbanti sāmikehi dinnattā sattāhaṃ salākaṃ na labhati, na katikavasena. Piṇḍacārikavatte avattanato ‘‘yassa cesā’’tiādi vuttaṃ.
பட²மதரங் காதப்³ப³ங் யங், தங் வத்தங், இதரங் படிவத்தங். மஹந்தங் வா வத்தங், கு²த்³த³கங் படிவத்தங். கேசி ‘‘வத்தபடிபத்தி’’ந்தி பட²ந்தி, வத்தஸ்ஸ கரணந்தி அத்தோ². உத்³த⁴ரண-அதிஹரண-வீதிஹரணவொஸ்ஸஜ்ஜன-ஸன்னிக்கே²பன-ஸன்னிரும்ப⁴னானங் வஸேன ச² கொட்டா²ஸே. க³ருபா⁴வேனாதி தி²ரபா⁴வேன.
Paṭhamataraṃ kātabbaṃ yaṃ, taṃ vattaṃ, itaraṃ paṭivattaṃ. Mahantaṃ vā vattaṃ, khuddakaṃ paṭivattaṃ. Keci ‘‘vattapaṭipatti’’nti paṭhanti, vattassa karaṇanti attho. Uddharaṇa-atiharaṇa-vītiharaṇavossajjana-sannikkhepana-sannirumbhanānaṃ vasena cha koṭṭhāse. Garubhāvenāti thirabhāvena.
‘‘அமுகஸ்மிங் ஸேனாஸனே வஸந்தா ப³ஹுங் வஸ்ஸவாஸிகங் லப⁴ந்தீ’’தி ததா² ந வஸ்ஸவாஸிகங் பரியேஸந்தோ சரதி வஸ்ஸவாஸிகஸ்ஸேவ அக்³க³ஹணதோ. தஸ்மா ஸேனாஸனபா²ஸுகங்யேவ சிந்தேதி. தேன ப³ஹுபரிக்கா²ரபா⁴வேன பா²ஸுவிஹாரோ நத்தி² பரிக்கா²ரானங் ரக்க²ணபடிஜக்³க³னாதி³து³க்க²ப³ஹுலதாய. அப்பிச்சா²தீ³னந்தி அப்பிச்ச²ஸந்துட்டா²தீ³னங்யேவ லப்³ப⁴தி தி³ட்ட²த⁴ம்மஸுக²விஹாரோ.
‘‘Amukasmiṃ senāsane vasantā bahuṃ vassavāsikaṃ labhantī’’ti tathā na vassavāsikaṃ pariyesanto carati vassavāsikasseva aggahaṇato. Tasmā senāsanaphāsukaṃyeva cinteti. Tena bahuparikkhārabhāvena phāsuvihāro natthi parikkhārānaṃ rakkhaṇapaṭijagganādidukkhabahulatāya. Appicchādīnanti appicchasantuṭṭhādīnaṃyeva labbhati diṭṭhadhammasukhavihāro.
ஜிண்ணஸுத்தவண்ணனா நிட்டி²தா.
Jiṇṇasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஜிண்ணஸுத்தங் • 5. Jiṇṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. ஜிண்ணஸுத்தவண்ணனா • 5. Jiṇṇasuttavaṇṇanā
