| Library / Tipiṭaka / તિપિટક • Tipiṭaka / સંયુત્તનિકાય (ટીકા) • Saṃyuttanikāya (ṭīkā) |
૫. જિણ્ણસુત્તવણ્ણના
5. Jiṇṇasuttavaṇṇanā
૧૪૮. છિન્નભિન્નટ્ઠાને છિદ્દસ્સ અપુથુલત્તા અગ્ગળં અદત્વાવ સુત્તેન સંસિબ્બનમત્તેન અગ્ગળદાનેન ચ છિદ્દે પુથુલે. નિબ્બસનાનીતિ ચિરનિસેવિતવસનકિચ્ચાનિ, પરિભોગજિણ્ણાનીતિ અત્થો. તેનાહ ‘‘પુબ્બે…પે॰… લદ્ધનામાની’’તિ, સઞ્ઞાપુબ્બકો વિધિ અનિચ્ચોતિ ‘‘ગહપતાની’’તિ વુત્તં યથા ‘‘વીરિય’’ન્તિ.
148.Chinnabhinnaṭṭhāne chiddassa aputhulattā aggaḷaṃ adatvāva suttena saṃsibbanamattena aggaḷadānena ca chidde puthule. Nibbasanānīti ciranisevitavasanakiccāni, paribhogajiṇṇānīti attho. Tenāha ‘‘pubbe…pe… laddhanāmānī’’ti, saññāpubbako vidhi aniccoti ‘‘gahapatānī’’ti vuttaṃ yathā ‘‘vīriya’’nti.
સેનાપતિન્તિ સેનાપતિભાવિનં, સેનાપચ્ચારહન્તિ અત્થો. અત્તનો કમ્મેનાતિ અત્તના કાતબ્બકમ્મેન. સોતિ સત્થા. તસ્મિન્તિ મહાકસ્સપત્થેરે કરોતીતિ સમ્બન્ધો. ન કરોતીતિ વુત્તમત્થં વિવરન્તો ‘‘કસ્મા’’તિઆદિમાહ. યદિ સત્થા ધુતઙ્ગાનિ ન વિસ્સજ્જાપેતુકામો, અથ કસ્મા ‘‘જિણ્ણોસિ દાનિ ત્વ’’ન્તિઆદિમવોચાતિ આહ ‘‘યથા પના’’તિઆદિ.
Senāpatinti senāpatibhāvinaṃ, senāpaccārahanti attho. Attano kammenāti attanā kātabbakammena. Soti satthā. Tasminti mahākassapatthere karotīti sambandho. Na karotīti vuttamatthaṃ vivaranto ‘‘kasmā’’tiādimāha. Yadi satthā dhutaṅgāni na vissajjāpetukāmo, atha kasmā ‘‘jiṇṇosi dāni tva’’ntiādimavocāti āha ‘‘yathā panā’’tiādi.
દિટ્ઠધમ્મસુખવિહારન્તિ ઇમસ્મિંયેવ અત્તભાવે ફાસુવિહારં. અમાનુસિકા સવનરતીતિ અતિક્કન્તમાનુસિકાય અરઞ્ઞસદ્દુપ્પત્તિયા અરઞ્ઞેહં વસામીતિ વિવેકવાસૂપનિસ્સયાધીનસદ્દસવનપચ્ચયા ધમ્મરતિ ઉપ્પજ્જતિ. અપરોતિ અઞ્ઞો, દુતિયોતિ અત્થો. તત્થેવાતિ તસ્મિંયેવ એકસ્સ વિહરણટ્ઠાને વિહરણસમયે ચ ફાસુ ભવતિ ચિત્તવિવેકસમ્ભવતો. તેનાહ ‘‘એકસ્સ રમતો વને’’તિ.
Diṭṭhadhammasukhavihāranti imasmiṃyeva attabhāve phāsuvihāraṃ. Amānusikā savanaratīti atikkantamānusikāya araññasadduppattiyā araññehaṃ vasāmīti vivekavāsūpanissayādhīnasaddasavanapaccayā dhammarati uppajjati. Aparoti añño, dutiyoti attho. Tatthevāti tasmiṃyeva ekassa viharaṇaṭṭhāne viharaṇasamaye ca phāsu bhavati cittavivekasambhavato. Tenāha ‘‘ekassa ramato vane’’ti.
તથાતિ યથા આરઞ્ઞિકસ્સ રતિ, તથા પિણ્ડપાતિકસ્સ લબ્ભતિ દિટ્ઠધમ્મસુખવિહારો. એસ નયો સેસેસુ. અપિણ્ડપાતિકાધીનો ઇતરસ્સ વિસેસજોતકોતિ તમેવસ્સ વિસેસં દસ્સેતું ‘‘અકાલચારી’’તિઆદિ વુત્તં.
Tathāti yathā āraññikassa rati, tathā piṇḍapātikassa labbhati diṭṭhadhammasukhavihāro. Esa nayo sesesu. Apiṇḍapātikādhīno itarassa visesajotakoti tamevassa visesaṃ dassetuṃ ‘‘akālacārī’’tiādi vuttaṃ.
અમ્હાકં સલાકં ગહેત્વા ભત્તત્થાય ગેહં અનાગચ્છન્તસ્સ સત્તાહં ન પાતેતબ્બન્તિ સામિકેહિ દિન્નત્તા સત્તાહં સલાકં ન લભતિ, ન કતિકવસેન. પિણ્ડચારિકવત્તે અવત્તનતો ‘‘યસ્સ ચેસા’’તિઆદિ વુત્તં.
Amhākaṃ salākaṃ gahetvā bhattatthāya gehaṃ anāgacchantassa sattāhaṃ na pātetabbanti sāmikehi dinnattā sattāhaṃ salākaṃ na labhati, na katikavasena. Piṇḍacārikavatte avattanato ‘‘yassa cesā’’tiādi vuttaṃ.
પઠમતરં કાતબ્બં યં, તં વત્તં, ઇતરં પટિવત્તં. મહન્તં વા વત્તં, ખુદ્દકં પટિવત્તં. કેચિ ‘‘વત્તપટિપત્તિ’’ન્તિ પઠન્તિ, વત્તસ્સ કરણન્તિ અત્થો. ઉદ્ધરણ-અતિહરણ-વીતિહરણવોસ્સજ્જન-સન્નિક્ખેપન-સન્નિરુમ્ભનાનં વસેન છ કોટ્ઠાસે. ગરુભાવેનાતિ થિરભાવેન.
Paṭhamataraṃ kātabbaṃ yaṃ, taṃ vattaṃ, itaraṃ paṭivattaṃ. Mahantaṃ vā vattaṃ, khuddakaṃ paṭivattaṃ. Keci ‘‘vattapaṭipatti’’nti paṭhanti, vattassa karaṇanti attho. Uddharaṇa-atiharaṇa-vītiharaṇavossajjana-sannikkhepana-sannirumbhanānaṃ vasena cha koṭṭhāse. Garubhāvenāti thirabhāvena.
‘‘અમુકસ્મિં સેનાસને વસન્તા બહું વસ્સવાસિકં લભન્તી’’તિ તથા ન વસ્સવાસિકં પરિયેસન્તો ચરતિ વસ્સવાસિકસ્સેવ અગ્ગહણતો. તસ્મા સેનાસનફાસુકંયેવ ચિન્તેતિ. તેન બહુપરિક્ખારભાવેન ફાસુવિહારો નત્થિ પરિક્ખારાનં રક્ખણપટિજગ્ગનાદિદુક્ખબહુલતાય. અપ્પિચ્છાદીનન્તિ અપ્પિચ્છસન્તુટ્ઠાદીનંયેવ લબ્ભતિ દિટ્ઠધમ્મસુખવિહારો.
‘‘Amukasmiṃ senāsane vasantā bahuṃ vassavāsikaṃ labhantī’’ti tathā na vassavāsikaṃ pariyesanto carati vassavāsikasseva aggahaṇato. Tasmā senāsanaphāsukaṃyeva cinteti. Tena bahuparikkhārabhāvena phāsuvihāro natthi parikkhārānaṃ rakkhaṇapaṭijagganādidukkhabahulatāya. Appicchādīnanti appicchasantuṭṭhādīnaṃyeva labbhati diṭṭhadhammasukhavihāro.
જિણ્ણસુત્તવણ્ણના નિટ્ઠિતા.
Jiṇṇasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / સંયુત્તનિકાય • Saṃyuttanikāya / ૫. જિણ્ણસુત્તં • 5. Jiṇṇasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / સંયુત્તનિકાય (અટ્ઠકથા) • Saṃyuttanikāya (aṭṭhakathā) / ૫. જિણ્ણસુત્તવણ્ણના • 5. Jiṇṇasuttavaṇṇanā
