| Library / Tipiṭaka / திபிடக • Tipiṭaka / அங்கு³த்தரனிகாய • Aṅguttaranikāya |
6. ஜீவகஸுத்தங்
6. Jīvakasuttaṃ
26. ஏகங் ஸமயங் ப⁴க³வா ராஜக³ஹே விஹரதி ஜீவகம்ப³வனே. அத² கோ² ஜீவகோ கோமாரப⁴ச்சோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஜீவகோ கோமாரப⁴ச்சோ ப⁴க³வந்தங் ஏதத³வோச – ‘‘கித்தாவதா நு கோ², ப⁴ந்தே, உபாஸகோ ஹோதீ’’தி? ‘‘யதோ கோ², ஜீவக, பு³த்³த⁴ங் ஸரணங் க³தோ ஹோதி, த⁴ம்மங் ஸரணங் க³தோ ஹோதி, ஸங்க⁴ங் ஸரணங் க³தோ ஹோதி; எத்தாவதா கோ² ஜீவக, உபாஸகோ ஹோதீ’’தி.
26. Ekaṃ samayaṃ bhagavā rājagahe viharati jīvakambavane. Atha kho jīvako komārabhacco yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho jīvako komārabhacco bhagavantaṃ etadavoca – ‘‘kittāvatā nu kho, bhante, upāsako hotī’’ti? ‘‘Yato kho, jīvaka, buddhaṃ saraṇaṃ gato hoti, dhammaṃ saraṇaṃ gato hoti, saṅghaṃ saraṇaṃ gato hoti; ettāvatā kho jīvaka, upāsako hotī’’ti.
‘‘கித்தாவதா பன, ப⁴ந்தே, உபாஸகோ ஸீலவா ஹோதீ’’தி? ‘‘யதோ கோ², ஜீவக, உபாஸகோ பாணாதிபாதா படிவிரதோ ஹோதி…பே॰… ஸுராமேரயமஜ்ஜபமாத³ட்டா²னா படிவிரதோ ஹோதி; எத்தாவதா கோ², ஜீவக, உபாஸகோ ஸீலவா ஹோதீ’’தி.
‘‘Kittāvatā pana, bhante, upāsako sīlavā hotī’’ti? ‘‘Yato kho, jīvaka, upāsako pāṇātipātā paṭivirato hoti…pe… surāmerayamajjapamādaṭṭhānā paṭivirato hoti; ettāvatā kho, jīvaka, upāsako sīlavā hotī’’ti.
‘‘கித்தாவதா பன, ப⁴ந்தே, உபாஸகோ அத்தஹிதாய படிபன்னோ ஹோதி, நோ பரஹிதாயா’’தி? ‘‘யதோ கோ², ஜீவக, உபாஸகோ அத்தனாவ ஸத்³தா⁴ஸம்பன்னோ ஹோதி, நோ பரங் ஸத்³தா⁴ஸம்பதா³ய ஸமாத³பேதி…பே॰… அத்தனாவ அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி, நோ பரங் த⁴ம்மானுத⁴ம்மப்படிபத்தியா ஸமாத³பேதி. எத்தாவதா கோ², ஜீவக, உபாஸகோ அத்தஹிதாய படிபன்னோ ஹோதி, நோ பரஹிதாயா’’தி.
‘‘Kittāvatā pana, bhante, upāsako attahitāya paṭipanno hoti, no parahitāyā’’ti? ‘‘Yato kho, jīvaka, upāsako attanāva saddhāsampanno hoti, no paraṃ saddhāsampadāya samādapeti…pe… attanāva atthamaññāya dhammamaññāya dhammānudhammappaṭipanno hoti, no paraṃ dhammānudhammappaṭipattiyā samādapeti. Ettāvatā kho, jīvaka, upāsako attahitāya paṭipanno hoti, no parahitāyā’’ti.
‘‘கித்தாவதா பன, ப⁴ந்தே, உபாஸகோ அத்தஹிதாய ச படிபன்னோ ஹோதி பரஹிதாய சா’’தி? ‘‘யதோ கோ², ஜீவக, உபாஸகோ அத்தனா ச ஸத்³தா⁴ஸம்பன்னோ ஹோதி, பரஞ்ச ஸத்³தா⁴ஸம்பதா³ய ஸமாத³பேதி; அத்தனா ச ஸீலஸம்பன்னோ ஹோதி, பரஞ்ச ஸீலஸம்பதா³ய ஸமாத³பேதி; அத்தனா ச சாக³ஸம்பன்னோ ஹோதி, பரஞ்ச சாக³ஸம்பதா³ய ஸமாத³பேதி; அத்தனா ச பி⁴க்கூ²னங் த³ஸ்ஸனகாமோ ஹோதி, பரஞ்ச பி⁴க்கூ²னங் த³ஸ்ஸனே ஸமாத³பேதி; அத்தனா ச ஸத்³த⁴ம்மங் ஸோதுகாமோ ஹோதி, பரஞ்ச ஸத்³த⁴ம்மஸ்ஸவனே ஸமாத³பேதி; அத்தனா ச ஸுதானங் த⁴ம்மானங் தா⁴ரணஜாதிகோ ஹோதி, பரஞ்ச த⁴ம்மதா⁴ரணாய ஸமாத³பேதி; அத்தனா ச ஸுதானங் த⁴ம்மானங் அத்தூ²பபரிக்கி²தா ஹோதி, பரஞ்ச அத்தூ²பபரிக்கா²ய ஸமாத³பேதி; அத்தனா ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி, பரஞ்ச த⁴ம்மானுத⁴ம்மப்படிபத்தியா ஸமாத³பேதி. எத்தாவதா கோ², ஜீவக, உபாஸகோ அத்தஹிதாய ச படிபன்னோ ஹோதி பரஹிதாய சா’’தி. ச²ட்ட²ங்.
‘‘Kittāvatā pana, bhante, upāsako attahitāya ca paṭipanno hoti parahitāya cā’’ti? ‘‘Yato kho, jīvaka, upāsako attanā ca saddhāsampanno hoti, parañca saddhāsampadāya samādapeti; attanā ca sīlasampanno hoti, parañca sīlasampadāya samādapeti; attanā ca cāgasampanno hoti, parañca cāgasampadāya samādapeti; attanā ca bhikkhūnaṃ dassanakāmo hoti, parañca bhikkhūnaṃ dassane samādapeti; attanā ca saddhammaṃ sotukāmo hoti, parañca saddhammassavane samādapeti; attanā ca sutānaṃ dhammānaṃ dhāraṇajātiko hoti, parañca dhammadhāraṇāya samādapeti; attanā ca sutānaṃ dhammānaṃ atthūpaparikkhitā hoti, parañca atthūpaparikkhāya samādapeti; attanā ca atthamaññāya dhammamaññāya dhammānudhammappaṭipanno hoti, parañca dhammānudhammappaṭipattiyā samādapeti. Ettāvatā kho, jīvaka, upāsako attahitāya ca paṭipanno hoti parahitāya cā’’ti. Chaṭṭhaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5-6. மஹானாமஸுத்தாதி³வண்ணனா • 5-6. Mahānāmasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-7. பட²மஉக்³க³ஸுத்தாதி³வண்ணனா • 1-7. Paṭhamauggasuttādivaṇṇanā
