| Library / Tipiṭaka / திபிடக • Tipiṭaka / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) |
5. ஜீவகஸுத்தவண்ணனா
5. Jīvakasuttavaṇṇanā
51. ஏவங் மே ஸுதந்தி ஜீவகஸுத்தங். தத்த² ஜீவகஸ்ஸ கோமாரப⁴ச்சஸ்ஸ அம்ப³வனேதி எத்த² ஜீவதீதி ஜீவகோ. குமாரேன ப⁴தோதி கோமாரப⁴ச்சோ. யதா²ஹ ‘‘கிங் ஏதங் ப⁴ணே காகேஹி ஸம்பரிகிண்ணந்தி? தா³ரகோ தே³வாதி. ஜீவதி ப⁴ணேதி? ஜீவதி தே³வாதி. தேன ஹி ப⁴ணே தங் தா³ரகங் அம்ஹாகங் அந்தேபுரங் நெத்வா தா⁴தீனங் தே³த² போஸேதுந்தி. தஸ்ஸ ஜீவதீதி ஜீவகோதி நாமங் அகங்ஸு, குமாரேன போஸாபிதோதி கோமாரப⁴ச்சோதி நாமங் அகங்ஸூ’’தி (மஹாவ॰ 328). அயமெத்த² ஸங்கே²போ. வித்தா²ரேன பன ஜீவகவத்து² க²ந்த⁴கே ஆக³தமேவ. வினிச்ச²யகதா²பிஸ்ஸ ஸமந்தபாஸாதி³காய வினயட்ட²கதா²ய வுத்தா.
51.Evaṃme sutanti jīvakasuttaṃ. Tattha jīvakassa komārabhaccassa ambavaneti ettha jīvatīti jīvako. Kumārena bhatoti komārabhacco. Yathāha ‘‘kiṃ etaṃ bhaṇe kākehi samparikiṇṇanti? Dārako devāti. Jīvati bhaṇeti? Jīvati devāti. Tena hi bhaṇe taṃ dārakaṃ amhākaṃ antepuraṃ netvā dhātīnaṃ detha posetunti. Tassa jīvatīti jīvakoti nāmaṃ akaṃsu, kumārena posāpitoti komārabhaccoti nāmaṃ akaṃsū’’ti (mahāva. 328). Ayamettha saṅkhepo. Vitthārena pana jīvakavatthu khandhake āgatameva. Vinicchayakathāpissa samantapāsādikāya vinayaṭṭhakathāya vuttā.
அயங் பன ஜீவகோ ஏகஸ்மிங் ஸமயே ப⁴க³வதோ தோ³ஸாபி⁴ஸன்னங் காயங் விரேசெத்வா ஸீவெய்யகங் து³ஸ்ஸயுக³ங் த³த்வா வத்தா²னுமோத³னபரியோஸானே ஸோதாபத்திப²லே பதிட்டா²ய சிந்தேஸி – ‘‘மயா தி³வஸஸ்ஸ த்³வத்திக்க²த்துங் பு³த்³து⁴பட்டா²னங் க³ந்தப்³ப³ங், இத³ஞ்ச வேளுவனங் அதிதூ³ரே, மய்ஹங் உய்யானங் அம்ப³வனங் ஆஸன்னதரங், யங்னூனாஹமெத்த² ப⁴க³வதோ விஹாரங் காரெய்ய’’ந்தி. ஸோ தஸ்மிங் அம்ப³வனே ரத்திட்டா²னதி³வாட்டா²னலேணகுடிமண்ட³பாதீ³னி ஸம்பாதெ³த்வா ப⁴க³வதோ அனுச்ச²விகங் க³ந்த⁴குடிங் காரெத்வா அம்ப³வனங் அட்டா²ரஸஹத்து²ப்³பே³தே⁴ன தம்ப³பட்டவண்ணேன பாகாரேன பரிக்கி²பாபெத்வா பு³த்³த⁴ப்பமுக²ங் பி⁴க்கு²ஸங்க⁴ங் சீவரப⁴த்தேன ஸந்தப்பெத்வா த³க்கி²ணோத³கங் பாதெத்வா விஹாரங் நிய்யாதேஸி. தங் ஸந்தா⁴ய வுத்தங் – ‘‘ஜீவகஸ்ஸ கோமாரப⁴ச்சஸ்ஸ அம்ப³வனே’’தி.
Ayaṃ pana jīvako ekasmiṃ samaye bhagavato dosābhisannaṃ kāyaṃ virecetvā sīveyyakaṃ dussayugaṃ datvā vatthānumodanapariyosāne sotāpattiphale patiṭṭhāya cintesi – ‘‘mayā divasassa dvattikkhattuṃ buddhupaṭṭhānaṃ gantabbaṃ, idañca veḷuvanaṃ atidūre, mayhaṃ uyyānaṃ ambavanaṃ āsannataraṃ, yaṃnūnāhamettha bhagavato vihāraṃ kāreyya’’nti. So tasmiṃ ambavane rattiṭṭhānadivāṭṭhānaleṇakuṭimaṇḍapādīni sampādetvā bhagavato anucchavikaṃ gandhakuṭiṃ kāretvā ambavanaṃ aṭṭhārasahatthubbedhena tambapaṭṭavaṇṇena pākārena parikkhipāpetvā buddhappamukhaṃ bhikkhusaṅghaṃ cīvarabhattena santappetvā dakkhiṇodakaṃ pātetvā vihāraṃ niyyātesi. Taṃ sandhāya vuttaṃ – ‘‘jīvakassa komārabhaccassa ambavane’’ti.
ஆரப⁴ந்தீதி கா⁴தெந்தி. உத்³தி³ஸ்ஸகதந்தி உத்³தி³ஸித்வா கதங். படிச்சகம்மந்தி அத்தானங் படிச்ச கதங். அத² வா படிச்சகம்மந்தி நிமித்தகம்மஸ்ஸேதங் அதி⁴வசனங், தங் படிச்ச கம்மமெத்த² அத்தீ²தி மங்ஸங் ‘‘படிச்சகம்ம’’ந்தி வுத்தங் ஹோதி யோ ஏவரூபங் மங்ஸங் பரிபு⁴ஞ்ஜதி, ஸோபி தஸ்ஸ கம்மஸ்ஸ தா³யாதோ³ ஹோதி, வத⁴கஸ்ஸ விய தஸ்ஸாபி பாணகா⁴தகம்மங் ஹோதீதி தேஸங் லத்³தி⁴. த⁴ம்மஸ்ஸ சானுத⁴ம்மங் ப்³யாகரொந்தீதி ப⁴க³வதா வுத்தகாரணஸ்ஸ அனுகாரணங் கதெ²ந்தி. எத்த² ச காரணங் நாம திகோடிபரிஸுத்³த⁴மச்ச²மங்ஸபரிபோ⁴கோ³, அனுகாரணங் நாம மஹாஜனஸ்ஸ ததா² ப்³யாகரணங். யஸ்மா பன ப⁴க³வா உத்³தி³ஸ்ஸகதங் ந பரிபு⁴ஞ்ஜதி, தஸ்மா நேவ தங் காரணங் ஹோதி, ந தித்தி²யானங் ததா² ப்³யாகரணங் அனுகாரணங். ஸஹத⁴ம்மிகோ வாதா³னுவாதோ³தி பரேஹி வுத்தகாரணேன ஸகாரணோ ஹுத்வா தும்ஹாகங் வாதோ³ வா அனுவாதோ³ வா விஞ்ஞூஹி க³ரஹிதப்³ப³காரணங் கோசி அப்பமத்தகோபி கிங் ந ஆக³ச்ச²தி . இத³ங் வுத்தங் ஹோதி – ‘‘கிங் ஸப்³பா³காரேனபி தும்ஹாகங் வாதே³ கா³ரய்ஹங் காரணங் நத்தீ²’’தி. அப்³பா⁴சிக்க²ந்தீதி அபி⁴ப⁴வித்வா ஆசிக்க²ந்தி.
Ārabhantīti ghātenti. Uddissakatanti uddisitvā kataṃ. Paṭiccakammanti attānaṃ paṭicca kataṃ. Atha vā paṭiccakammanti nimittakammassetaṃ adhivacanaṃ, taṃ paṭicca kammamettha atthīti maṃsaṃ ‘‘paṭiccakamma’’nti vuttaṃ hoti yo evarūpaṃ maṃsaṃ paribhuñjati, sopi tassa kammassa dāyādo hoti, vadhakassa viya tassāpi pāṇaghātakammaṃ hotīti tesaṃ laddhi. Dhammassa cānudhammaṃ byākarontīti bhagavatā vuttakāraṇassa anukāraṇaṃ kathenti. Ettha ca kāraṇaṃ nāma tikoṭiparisuddhamacchamaṃsaparibhogo, anukāraṇaṃ nāma mahājanassa tathā byākaraṇaṃ. Yasmā pana bhagavā uddissakataṃ na paribhuñjati, tasmā neva taṃ kāraṇaṃ hoti, na titthiyānaṃ tathā byākaraṇaṃ anukāraṇaṃ. Sahadhammiko vādānuvādoti parehi vuttakāraṇena sakāraṇo hutvā tumhākaṃ vādo vā anuvādo vā viññūhi garahitabbakāraṇaṃ koci appamattakopi kiṃ na āgacchati . Idaṃ vuttaṃ hoti – ‘‘kiṃ sabbākārenapi tumhākaṃ vāde gārayhaṃ kāraṇaṃ natthī’’ti. Abbhācikkhantīti abhibhavitvā ācikkhanti.
52. டா²னேஹீதி காரணேஹி. தி³ட்டா²தீ³ஸு தி³ட்ட²ங் நாம பி⁴க்கூ²னங் அத்தா²ய மிக³மச்சே² வதி⁴த்வா க³ய்ஹமானங் தி³ட்ட²ங். ஸுதங் நாம பி⁴க்கூ²னங் அத்தா²ய மிக³மச்சே² வதி⁴த்வா க³ஹிதந்தி ஸுதங். பரிஸங்கிதங் நாம தி³ட்ட²பரிஸங்கிதங் ஸுதபரிஸங்கிதங் தது³ப⁴யவிமுத்தபரிஸங்கிதந்தி திவித⁴ங் ஹோதி.
52.Ṭhānehīti kāraṇehi. Diṭṭhādīsu diṭṭhaṃ nāma bhikkhūnaṃ atthāya migamacche vadhitvā gayhamānaṃ diṭṭhaṃ. Sutaṃ nāma bhikkhūnaṃ atthāya migamacche vadhitvā gahitanti sutaṃ. Parisaṅkitaṃ nāma diṭṭhaparisaṅkitaṃ sutaparisaṅkitaṃ tadubhayavimuttaparisaṅkitanti tividhaṃ hoti.
தத்ராயங் ஸப்³ப³ஸங்கா³ஹகவினிச்ச²யோ – இத⁴ பி⁴க்கூ² பஸ்ஸந்தி மனுஸ்ஸே ஜாலவாகு³ராதி³ஹத்தே² கா³மதோ வா நிக்க²மந்தே அரஞ்ஞே வா விசரந்தே. து³தியதி³வஸே ச நேஸங் தங் கா³மங் பிண்டா³ய பவிட்டா²னங் ஸமச்ச²மங்ஸங் பிண்ட³பாதங் அபி⁴ஹரந்தி. தே தேன தி³ட்டே²ன பரிஸங்கந்தி ‘‘பி⁴க்கூ²னங் நு கோ² அத்தா²ய கத’’ந்தி, இத³ங் தி³ட்ட²பரிஸங்கிதங் நாம, ஏதங் க³ஹேதுங் ந வட்டதி. யங் ஏவங் அபரிஸங்கிதங், தங் வட்டதி. ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ங் ஸுத்வா ‘‘நயித³ங், ப⁴ந்தே, பி⁴க்கூ²னங் அத்தா²ய கதங், அம்ஹேஹி அத்தனோ அத்தா²ய வா ராஜயுத்தாதீ³னங் அத்தா²ய வா கத’’ந்தி வத³ந்தி, கப்பதி.
Tatrāyaṃ sabbasaṅgāhakavinicchayo – idha bhikkhū passanti manusse jālavāgurādihatthe gāmato vā nikkhamante araññe vā vicarante. Dutiyadivase ca nesaṃ taṃ gāmaṃ piṇḍāya paviṭṭhānaṃ samacchamaṃsaṃ piṇḍapātaṃ abhiharanti. Te tena diṭṭhena parisaṅkanti ‘‘bhikkhūnaṃ nu kho atthāya kata’’nti, idaṃ diṭṭhaparisaṅkitaṃ nāma, etaṃ gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ atthāya vā kata’’nti vadanti, kappati.
ந ஹேவ கோ² பி⁴க்கூ² பஸ்ஸந்தி, அபிச ஸுணந்தி ‘‘மனுஸ்ஸா கிர ஜாலவாகு³ராதி³ஹத்தா² கா³மதோ வா நிக்க²மந்தி அரஞ்ஞே வா விசரந்தீ’’தி. து³தியதி³வஸே ச நேஸங் தங் கா³மங் பிண்டா³ய பவிட்டா²னங் ஸமச்ச²மங்ஸங் பிண்ட³பாதங் அபி⁴ஹரந்தி. தே தேன ஸுதேன பரிஸங்கந்தி ‘‘பி⁴க்கூ²னங் நு கோ² அத்தா²ய கத’’ந்தி, இத³ங் ஸுதபரிஸங்கிதங் நாம, ஏதங் க³ஹேதுங் ந வட்டதி. யங் ஏவங் அபரிஸங்கிதங், தங் வட்டதி. ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ங் ஸுத்வா ‘‘நயித³ங், ப⁴ந்தே, பி⁴க்கூ²னங் அத்தா²ய கதங், அம்ஹேஹி அத்தனோ அத்தா²ய வா ராஜயுத்தாதீ³னங் அத்தா²ய வா கத’’ந்தி வத³ந்தி, கப்பதி.
Na heva kho bhikkhū passanti, apica suṇanti ‘‘manussā kira jālavāgurādihatthā gāmato vā nikkhamanti araññe vā vicarantī’’ti. Dutiyadivase ca nesaṃ taṃ gāmaṃ piṇḍāya paviṭṭhānaṃ samacchamaṃsaṃ piṇḍapātaṃ abhiharanti. Te tena sutena parisaṅkanti ‘‘bhikkhūnaṃ nu kho atthāya kata’’nti, idaṃ sutaparisaṅkitaṃ nāma, etaṃ gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ atthāya vā kata’’nti vadanti, kappati.
ந ஹேவ கோ² பன பஸ்ஸந்தி ந ஸுணந்தி, அபிச தேஸங் கா³மங் பிண்டா³ய பவிட்டா²னங் பத்தங் க³ஹெத்வா ஸமச்ச²மங்ஸங் பிண்ட³பாதங் அபி⁴ஸங்க²ரித்வா அபி⁴ஹரந்தி. தே பரிஸங்கந்தி ‘‘பி⁴க்கூ²னங் நு கோ² அத்தா²ய கத’’ந்தி, இத³ங் தது³ப⁴யவிமுத்தபரிஸங்கிதங் நாம. ஏதம்பி க³ஹேதுங் ந வட்டதி. யங் ஏவங் அபரிஸங்கிதங், தங் வட்டதி . ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ங் ஸுத்வா ‘‘நயித³ங், ப⁴ந்தே, பி⁴க்கூ²னங் அத்தா²ய கதங், அம்ஹேஹி அத்தனோ அத்தா²ய வா ராஜயுத்தாதீ³னங் அத்தா²ய வா கதங், பவத்தமங்ஸங் வா கதங், கப்பியமேவ லபி⁴த்வா பி⁴க்கூ²னங் அத்தா²ய ஸம்பாதி³த’’ந்தி வத³ந்தி, கப்பதி.
Na heva kho pana passanti na suṇanti, apica tesaṃ gāmaṃ piṇḍāya paviṭṭhānaṃ pattaṃ gahetvā samacchamaṃsaṃ piṇḍapātaṃ abhisaṅkharitvā abhiharanti. Te parisaṅkanti ‘‘bhikkhūnaṃ nu kho atthāya kata’’nti, idaṃ tadubhayavimuttaparisaṅkitaṃ nāma. Etampi gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati . Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ atthāya vā kataṃ, pavattamaṃsaṃ vā kataṃ, kappiyameva labhitvā bhikkhūnaṃ atthāya sampādita’’nti vadanti, kappati.
மதானங் பேதகிச்சத்தா²ய மங்க³லாதீ³னங் வா அத்தா²ய கதேபி ஏஸேவ நயோ. யங் யஞ்ஹி பி⁴க்கூ²னங்யேவ அத்தா²ய அகதங், யத்த² ச நிப்³பே³மதிகா ஹொந்தி, தங் ஸப்³ப³ங் கப்பதி. ஸசே பன ஏகஸ்மிங் விஹாரே பி⁴க்கூ² உத்³தி³ஸ்ஸ கதங் ஹோதி, தே ச அத்தனோ அத்தா²ய கதபா⁴வங் ந ஜானந்தி, அஞ்ஞே ஜானந்தி. யே ஜானந்தி, தேஸங் ந வட்டதி, இதரேஸங் வட்டதி. அஞ்ஞே ந ஜானந்தி, தேயேவ ஜானந்தி, தேஸங்யேவ ந வட்டதி, அஞ்ஞேஸங் வட்டதி. தேபி ‘‘அம்ஹாகங் அத்தா²ய கதங்’’தி ஜானந்தி அஞ்ஞேபி ‘‘ஏதேஸங் அத்தா²ய கத’’ந்தி ஜானந்தி, ஸப்³பே³ஸம்பி தங் ந வட்டதி. ஸப்³பே³ ந ஜானந்தி, ஸப்³பே³ஸங் வட்டதி. பஞ்சஸு ஹி ஸஹத⁴ம்மிகேஸு யஸ்ஸ கஸ்ஸசி வா அத்தா²ய உத்³தி³ஸ்ஸ கதங் ஸப்³பே³ஸங் ந கப்பதி.
Matānaṃ petakiccatthāya maṅgalādīnaṃ vā atthāya katepi eseva nayo. Yaṃ yañhi bhikkhūnaṃyeva atthāya akataṃ, yattha ca nibbematikā honti, taṃ sabbaṃ kappati. Sace pana ekasmiṃ vihāre bhikkhū uddissa kataṃ hoti, te ca attano atthāya katabhāvaṃ na jānanti, aññe jānanti. Ye jānanti, tesaṃ na vaṭṭati, itaresaṃ vaṭṭati. Aññe na jānanti, teyeva jānanti, tesaṃyeva na vaṭṭati, aññesaṃ vaṭṭati. Tepi ‘‘amhākaṃ atthāya kataṃ’’ti jānanti aññepi ‘‘etesaṃ atthāya kata’’nti jānanti, sabbesampi taṃ na vaṭṭati. Sabbe na jānanti, sabbesaṃ vaṭṭati. Pañcasu hi sahadhammikesu yassa kassaci vā atthāya uddissa kataṃ sabbesaṃ na kappati.
ஸசே பன கோசி ஏகங் பி⁴க்கு²ங் உத்³தி³ஸ்ஸ பாணங் வதி⁴த்வா தஸ்ஸ பத்தங் பூரெத்வா தே³தி, ஸோ சே அத்தனோ அத்தா²ய கதபா⁴வங் ஜானங்யேவ க³ஹெத்வா அஞ்ஞஸ்ஸ பி⁴க்கு²னோ தே³தி, ஸோ தஸ்ஸ ஸத்³தா⁴ய பரிபு⁴ஞ்ஜதி. கஸ்ஸாபத்தீதி? த்³வின்னம்பி அனாபத்தி. யஞ்ஹி உத்³தி³ஸ்ஸ கதங், தஸ்ஸ அபு⁴த்ததாய அனாபத்தி, இதரஸ்ஸ அஜானநதாய. கப்பியமங்ஸஸ்ஸ ஹி படிக்³க³ஹணே ஆபத்தி நத்தி². உத்³தி³ஸ்ஸகதஞ்ச அஜானித்வா பு⁴த்தஸ்ஸ பச்சா² ஞத்வா ஆபத்திதே³ஸனாகிச்சங் நாம நத்தி². அகப்பியமங்ஸங் பன அஜானித்வா பு⁴த்தேன பச்சா² ஞத்வாபி ஆபத்தி தே³ஸேதப்³பா³. உத்³தி³ஸ்ஸகதஞ்ஹி ஞத்வா பு⁴ஞ்ஜதோவ ஆபத்தி, அகப்பியமங்ஸங் அஜானித்வா பு⁴த்தஸ்ஸாபி ஆபத்தியேவ. தஸ்மா ஆபத்திபீ⁴ருகேன ரூபங் ஸல்லக்கெ²ந்தேனாபி புச்சி²த்வாவ மங்ஸங் படிக்³க³ஹேதப்³ப³ங், பரிபோ⁴க³காலே புச்சி²த்வா பரிபு⁴ஞ்ஜிஸ்ஸாமீதி வா க³ஹெத்வா புச்சி²த்வாவ பரிபு⁴ஞ்ஜிதப்³ப³ங். கஸ்மா? து³விஞ்ஞெய்யத்தா. அச்ச²மங்ஸஞ்ஹி ஸூகரமங்ஸஸதி³ஸங் ஹோதி, தீ³பிமங்ஸாதீ³னி ச மிக³மங்ஸஸதி³ஸானி, தஸ்மா புச்சி²த்வா க³ஹணமேவ வட்டதீதி வத³ந்தி.
Sace pana koci ekaṃ bhikkhuṃ uddissa pāṇaṃ vadhitvā tassa pattaṃ pūretvā deti, so ce attano atthāya katabhāvaṃ jānaṃyeva gahetvā aññassa bhikkhuno deti, so tassa saddhāya paribhuñjati. Kassāpattīti? Dvinnampi anāpatti. Yañhi uddissa kataṃ, tassa abhuttatāya anāpatti, itarassa ajānanatāya. Kappiyamaṃsassa hi paṭiggahaṇe āpatti natthi. Uddissakatañca ajānitvā bhuttassa pacchā ñatvā āpattidesanākiccaṃ nāma natthi. Akappiyamaṃsaṃ pana ajānitvā bhuttena pacchā ñatvāpi āpatti desetabbā. Uddissakatañhi ñatvā bhuñjatova āpatti, akappiyamaṃsaṃ ajānitvā bhuttassāpi āpattiyeva. Tasmā āpattibhīrukena rūpaṃ sallakkhentenāpi pucchitvāva maṃsaṃ paṭiggahetabbaṃ, paribhogakāle pucchitvā paribhuñjissāmīti vā gahetvā pucchitvāva paribhuñjitabbaṃ. Kasmā? Duviññeyyattā. Acchamaṃsañhi sūkaramaṃsasadisaṃ hoti, dīpimaṃsādīni ca migamaṃsasadisāni, tasmā pucchitvā gahaṇameva vaṭṭatīti vadanti.
அதி³ட்ட²ந்தி பி⁴க்கூ²னங் அத்தா²ய வதி⁴த்வா க³ய்ஹமானங் அதி³ட்ட²ங். அஸுதந்தி பி⁴க்கூ²னங் அத்தா²ய வதி⁴த்வா க³ஹிதந்தி அஸுதங். அபரிஸங்கிதந்தி தி³ட்ட²பரிஸங்கிதாதி³வஸேன அபரிஸங்கிதங். பரிபோ⁴க³ந்தி வதா³மீதி இமேஹி தீஹி காரணேஹி பரிஸுத்³த⁴ங் திகோடிபரிஸுத்³த⁴ங் நாம ஹோதி, தஸ்ஸ பரிபோ⁴கோ³ அரஞ்ஞே ஜாதஸூபெய்யஸாகபரிபோ⁴க³ஸதி³ஸோ ஹோதி, ததா²ரூபங் பரிபு⁴ஞ்ஜந்தஸ்ஸ மெத்தாவிஹாரிஸ்ஸ பி⁴க்கு²னோ தோ³ஸோ வா வஜ்ஜங் வா நத்தி², தஸ்மா தங் பரிபு⁴ஞ்ஜிதப்³ப³ந்தி வதா³மீதி அத்தோ².
Adiṭṭhanti bhikkhūnaṃ atthāya vadhitvā gayhamānaṃ adiṭṭhaṃ. Asutanti bhikkhūnaṃ atthāya vadhitvā gahitanti asutaṃ. Aparisaṅkitanti diṭṭhaparisaṅkitādivasena aparisaṅkitaṃ. Paribhoganti vadāmīti imehi tīhi kāraṇehi parisuddhaṃ tikoṭiparisuddhaṃ nāma hoti, tassa paribhogo araññe jātasūpeyyasākaparibhogasadiso hoti, tathārūpaṃ paribhuñjantassa mettāvihārissa bhikkhuno doso vā vajjaṃ vā natthi, tasmā taṃ paribhuñjitabbanti vadāmīti attho.
53. இதா³னி தாதி³ஸஸ்ஸ பரிபோ⁴கே³ மெத்தாவிஹாரினோபி அனவஜ்ஜதங் த³ஸ்ஸேதுங் இத⁴, ஜீவக, பி⁴க்கூ²திஆதி³மாஹ. தத்த² கிஞ்சாபி அனியமெத்வா பி⁴க்கூ²தி வுத்தங், அத² கோ² அத்தானமேவ ஸந்தா⁴ய ஏதங் வுத்தந்தி வேதி³தப்³ப³ங். ப⁴க³வதா ஹி மஹாவச்ச²கொ³த்தஸுத்தே, சங்கீஸுத்தே, இமஸ்மிங் ஸுத்தேதி தீஸு டா²னேஸு அத்தானங்யேவ ஸந்தா⁴ய தே³ஸனா கதா. பணீதேன பிண்ட³பாதேனாதி ஹெட்டா² அனங்க³ணஸுத்தே யோ கோசி மஹக்³கோ⁴ பிண்ட³பாதோ பணீதபிண்ட³பாதோதி அதி⁴ப்பேதோ, இத⁴ பன மங்ஸூபஸேசனோவ அதி⁴ப்பேதோ. அக³தி²தோதி தண்ஹாய அக³தி²தோ. அமுச்சி²தோதி தண்ஹாமுச்ச²னாய அமுச்சி²தோ. அனஜ்ஜோ²பன்னோதி ந அதி⁴ஓபன்னோ, ஸப்³ப³ங் ஆலும்பித்வா ஏகப்பஹாரேனேவ கி³லிதுகாமோ காகோ விய ந ஹோதீதி அத்தோ². ஆதீ³னவத³ஸ்ஸாவீதி ஏகரத்திவாஸேன உத³ரபடலங் பவிஸித்வா நவஹி வணமுகே²ஹி நிக்க²மிஸ்ஸதீதிஆதி³னா நயேன ஆதீ³னவங் பஸ்ஸந்தோ. நிஸ்ஸரணபஞ்ஞோ பரிபு⁴ஞ்ஜதீதி இத³மத்த²மாஹாரபரிபோ⁴கோ³தி பஞ்ஞாய பரிச்சி²ந்தி³த்வா பரிபு⁴ஞ்ஜதி. அத்தப்³யாபா³தா⁴ய வா சேதேதீதி அத்தது³க்கா²ய வா சிதேதி. ஸுதமேதந்தி ஸுதங் மயா ஏதங் புப்³பே³, ஏதங் மய்ஹங் ஸவனமத்தமேவாதி த³ஸ்ஸேதி. ஸசே கோ² தே, ஜீவக, இத³ங் ஸந்தா⁴ய பா⁴ஸிதந்தி, ஜீவக, மஹாப்³ரஹ்முனா விக்க²ம்ப⁴னப்பஹானேன ப்³யாபாதா³த³யோ பஹீனா, தேன ஸோ மெத்தாவிஹாரீ மய்ஹங் ஸமுச்சே²த³ப்பஹானேன, ஸசே தே இத³ங் ஸந்தா⁴ய பா⁴ஸிதங், ஏவங் ஸந்தே தவ இத³ங் வசனங் அனுஜானாமீதி அத்தோ². ஸோ ஸம்படிச்சி².
53. Idāni tādisassa paribhoge mettāvihārinopi anavajjataṃ dassetuṃ idha, jīvaka, bhikkhūtiādimāha. Tattha kiñcāpi aniyametvā bhikkhūti vuttaṃ, atha kho attānameva sandhāya etaṃ vuttanti veditabbaṃ. Bhagavatā hi mahāvacchagottasutte, caṅkīsutte, imasmiṃ sutteti tīsu ṭhānesu attānaṃyeva sandhāya desanā katā. Paṇītenapiṇḍapātenāti heṭṭhā anaṅgaṇasutte yo koci mahaggho piṇḍapāto paṇītapiṇḍapātoti adhippeto, idha pana maṃsūpasecanova adhippeto. Agathitoti taṇhāya agathito. Amucchitoti taṇhāmucchanāya amucchito. Anajjhopannoti na adhiopanno, sabbaṃ ālumpitvā ekappahāreneva gilitukāmo kāko viya na hotīti attho. Ādīnavadassāvīti ekarattivāsena udarapaṭalaṃ pavisitvā navahi vaṇamukhehi nikkhamissatītiādinā nayena ādīnavaṃ passanto. Nissaraṇapañño paribhuñjatīti idamatthamāhāraparibhogoti paññāya paricchinditvā paribhuñjati. Attabyābādhāya vā cetetīti attadukkhāya vā citeti. Sutametanti sutaṃ mayā etaṃ pubbe, etaṃ mayhaṃ savanamattamevāti dasseti. Sace kho te, jīvaka, idaṃ sandhāya bhāsitanti, jīvaka, mahābrahmunā vikkhambhanappahānena byāpādādayo pahīnā, tena so mettāvihārī mayhaṃ samucchedappahānena, sace te idaṃ sandhāya bhāsitaṃ, evaṃ sante tava idaṃ vacanaṃ anujānāmīti attho. So sampaṭicchi.
54. அத²ஸ்ஸ ப⁴க³வா ஸேஸப்³ரஹ்மவிஹாரவஸேனாபி உத்தரி தே³ஸனங் வட்³டெ⁴ந்தோ ‘‘இத⁴, ஜீவக, பி⁴க்கூ²’’திஆதி³மாஹ. தங் உத்தானத்த²மேவ.
54. Athassa bhagavā sesabrahmavihāravasenāpi uttari desanaṃ vaḍḍhento ‘‘idha, jīvaka, bhikkhū’’tiādimāha. Taṃ uttānatthameva.
55. யோ கோ² ஜீவகாதி அயங் பாடிஏக்கோ அனுஸந்தி⁴. இமஸ்மிஞ்ஹி டா²னே ப⁴க³வா த்³வாரங் த²கேதி, ஸத்தானுத்³த³யங் த³ஸ்ஸேதி. ஸசே ஹி கஸ்ஸசி ஏவமஸ்ஸ ‘‘ஏகங் ரஸபிண்ட³பாதங் த³த்வா கப்பஸதஸஹஸ்ஸங் ஸக்³க³ஸம்பத்திங் படிலப⁴ந்தி, யங்கிஞ்சி கத்வா பரங் மாரெத்வாபி ரஸபிண்ட³பாதோவ தா³தப்³போ³’’தி, தங் படிஸேதெ⁴ந்தோ ‘‘யோ கோ², ஜீவக, ததா²க³தங் வா’’திஆதி³மாஹ.
55.Yokho jīvakāti ayaṃ pāṭiekko anusandhi. Imasmiñhi ṭhāne bhagavā dvāraṃ thaketi, sattānuddayaṃ dasseti. Sace hi kassaci evamassa ‘‘ekaṃ rasapiṇḍapātaṃ datvā kappasatasahassaṃ saggasampattiṃ paṭilabhanti, yaṃkiñci katvā paraṃ māretvāpi rasapiṇḍapātova dātabbo’’ti, taṃ paṭisedhento ‘‘yo kho, jīvaka, tathāgataṃ vā’’tiādimāha.
தத்த² இமினா பட²மேன டா²னேனாதி இமினா ஆணத்திமத்தேனேவ தாவ பட²மேன காரணேன. க³லப்பவேத⁴கேனாதி யொத்தேன க³லே ப³ந்தி⁴த்வா கட்³டி⁴தோ க³லேன பவேதெ⁴ந்தேன. ஆரபி⁴யமானோதி மாரியமானோ. அகப்பியேன ஆஸாதே³தீதி அச்ச²மங்ஸங் ஸூகரமங்ஸந்தி, தீ³பிமங்ஸங் வா மிக³மங்ஸந்தி கா²தா³பெத்வா – ‘‘த்வங் கிங் ஸமணோ நாம, அகப்பியமங்ஸங் தே கா²தி³த’’ந்தி க⁴ட்டேதி. யே பன து³ப்³பி⁴க்கா²தீ³ஸு வா ப்³யாதி⁴னிக்³க³ஹணத்த²ங் வா ‘‘அச்ச²மங்ஸங் நாம ஸூகரமங்ஸஸதி³ஸங், தீ³பிமங்ஸங் மிக³மங்ஸஸதி³ஸ’’ந்தி ஜானந்தா ‘‘ஸூகரமங்ஸங் இத³ங், மிக³மங்ஸங் இத³’’ந்தி வத்வா ஹிதஜ்ஜா²ஸயேன கா²தா³பெந்தி, ந தே ஸந்தா⁴யேதங் வுத்தங். தேஸஞ்ஹி ப³ஹுபுஞ்ஞமேவ ஹோதி. ஏஸாஹங், ப⁴ந்தே, ப⁴க³வந்தங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்சாதி அயங் ஆக³தப²லோ விஞ்ஞாதஸாஸனோ தி³ட்ட²ஸச்சோ அரியஸாவகோ. இமங் பன த⁴ம்மதே³ஸனங் ஓகா³ஹந்தோ பஸாத³ங் உப்பாதெ³த்வா த⁴ம்மகதா²ய து²திங் கரொந்தோ ஏவமாஹ. ஸேஸங் ஸப்³ப³த்த² உத்தானமேவாதி.
Tattha iminā paṭhamena ṭhānenāti iminā āṇattimatteneva tāva paṭhamena kāraṇena. Galappavedhakenāti yottena gale bandhitvā kaḍḍhito galena pavedhentena. Ārabhiyamānoti māriyamāno. Akappiyena āsādetīti acchamaṃsaṃ sūkaramaṃsanti, dīpimaṃsaṃ vā migamaṃsanti khādāpetvā – ‘‘tvaṃ kiṃ samaṇo nāma, akappiyamaṃsaṃ te khādita’’nti ghaṭṭeti. Ye pana dubbhikkhādīsu vā byādhiniggahaṇatthaṃ vā ‘‘acchamaṃsaṃ nāma sūkaramaṃsasadisaṃ, dīpimaṃsaṃ migamaṃsasadisa’’nti jānantā ‘‘sūkaramaṃsaṃ idaṃ, migamaṃsaṃ ida’’nti vatvā hitajjhāsayena khādāpenti, na te sandhāyetaṃ vuttaṃ. Tesañhi bahupuññameva hoti. Esāhaṃ, bhante, bhagavantaṃ saraṇaṃ gacchāmi dhammañca bhikkhusaṅghañcāti ayaṃ āgataphalo viññātasāsano diṭṭhasacco ariyasāvako. Imaṃ pana dhammadesanaṃ ogāhanto pasādaṃ uppādetvā dhammakathāya thutiṃ karonto evamāha. Sesaṃ sabbattha uttānamevāti.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
ஜீவகஸுத்தவண்ணனா நிட்டி²தா.
Jīvakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. ஜீவகஸுத்தங் • 5. Jīvakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / மஜ்ஜி²மனிகாய (டீகா) • Majjhimanikāya (ṭīkā) / 5. ஜீவகஸுத்தவண்ணனா • 5. Jīvakasuttavaṇṇanā
