| Library / Tipiṭaka / திபிடக • Tipiṭaka / இதிவுத்தக-அட்ட²கதா² • Itivuttaka-aṭṭhakathā |
2. ஜீவிகஸுத்தவண்ணனா
2. Jīvikasuttavaṇṇanā
91. து³தியங் அட்டு²ப்பத்திவஸேன தே³ஸிதங். ஏகஸ்மிஞ்ஹி ஸமயே ப⁴க³வதி கபிலவத்து²ஸ்மிங் நிக்³ரோதா⁴ராமே விஹரந்தே பி⁴க்கூ² ஆக³ந்துகபி⁴க்கூ²னங் ஸேனாஸனானி பஞ்ஞாபெந்தா பத்தசீவரானி படிஸாமெந்தா ஸாமணேரா ச லாப⁴பா⁴ஜனீயட்டா²னே ஸம்பத்தஸம்பத்தானங் லாப⁴ங் க³ண்ஹந்தா உச்சாஸத்³தா³ மஹாஸத்³தா³ அஹேஸுங். தங் ஸுத்வா ப⁴க³வா பி⁴க்கூ² பணாமேஸி. தே கிர ஸப்³பே³வ நவா அது⁴னாக³தா இமங் த⁴ம்மவினயங். தங் ஞத்வா மஹாப்³ரஹ்மா ஆக³ந்த்வா ‘‘அபி⁴னந்த³து, ப⁴ந்தே, ப⁴க³வா பி⁴க்கு²ஸங்க⁴’’ந்தி (ம॰ நி॰ 2.158) தேஸங் பணாமிதபி⁴க்கூ²னங் அனுக்³க³ண்ஹனங் யாசி. ப⁴க³வா தஸ்ஸ ஓகாஸங் அகாஸி. அத² மஹாப்³ரஹ்மா ‘‘கதாவகாஸோ கொ²ம்ஹி ப⁴க³வதா’’தி ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. அத² ப⁴க³வா ‘‘பி⁴க்கு²ஸங்கோ⁴ ஆக³ச்ச²தூ’’தி ஆனந்த³த்தே²ரஸ்ஸ ஆகாரங் த³ஸ்ஸேஸி. அத² தே பி⁴க்கூ² ஆனந்த³த்தே²ரேன பக்கோஸிதா ப⁴க³வந்தங் உபஸங்கமித்வா ஸாரஜ்ஜமானரூபா ஏகமந்தங் நிஸீதி³ங்ஸு. ப⁴க³வா தேஸங் ஸப்பாயதே³ஸனங் வீமங்ஸந்தோ ‘‘இமே ஆமிஸஹேது பணாமிதா, பிண்டி³யாலோபத⁴ம்மதே³ஸனா நேஸங் ஸப்பாயா’’தி சிந்தெத்வா ‘‘அந்தமித³ங், பி⁴க்க²வே’’தி இமங் தே³ஸனங் தே³ஸேஸி.
91. Dutiyaṃ aṭṭhuppattivasena desitaṃ. Ekasmiñhi samaye bhagavati kapilavatthusmiṃ nigrodhārāme viharante bhikkhū āgantukabhikkhūnaṃ senāsanāni paññāpentā pattacīvarāni paṭisāmentā sāmaṇerā ca lābhabhājanīyaṭṭhāne sampattasampattānaṃ lābhaṃ gaṇhantā uccāsaddā mahāsaddā ahesuṃ. Taṃ sutvā bhagavā bhikkhū paṇāmesi. Te kira sabbeva navā adhunāgatā imaṃ dhammavinayaṃ. Taṃ ñatvā mahābrahmā āgantvā ‘‘abhinandatu, bhante, bhagavā bhikkhusaṅgha’’nti (ma. ni. 2.158) tesaṃ paṇāmitabhikkhūnaṃ anuggaṇhanaṃ yāci. Bhagavā tassa okāsaṃ akāsi. Atha mahābrahmā ‘‘katāvakāso khomhi bhagavatā’’ti bhagavantaṃ abhivādetvā padakkhiṇaṃ katvā pakkāmi. Atha bhagavā ‘‘bhikkhusaṅgho āgacchatū’’ti ānandattherassa ākāraṃ dassesi. Atha te bhikkhū ānandattherena pakkositā bhagavantaṃ upasaṅkamitvā sārajjamānarūpā ekamantaṃ nisīdiṃsu. Bhagavā tesaṃ sappāyadesanaṃ vīmaṃsanto ‘‘ime āmisahetu paṇāmitā, piṇḍiyālopadhammadesanā nesaṃ sappāyā’’ti cintetvā ‘‘antamidaṃ, bhikkhave’’ti imaṃ desanaṃ desesi.
தத்ராயங் அந்தஸத்³தோ³ ‘‘ஸந்தி, பி⁴க்க²வே, ஏகே ஸமணப்³ராஹ்மணா புப்³ப³ந்தகப்பிகா புப்³ப³ந்தானுதி³ட்டி²னோ’’திஆதீ³ஸு (தீ³॰ நி॰ 1.29) கொட்டா²ஸே ஆக³தோ. ‘‘அந்தமகாஸி து³க்க²ஸ்ஸ, அந்தவா அயங் லோகோ பரிவடுமோ’’திஆதீ³ஸு (தீ³॰ நி॰ 1.55) பரிச்சே²தே³. ‘‘ஹரிதந்தங் வா பத²ந்தங் வா ஸேலந்தங் வா’’திஆதீ³ஸு (ம॰ நி॰ 1.304) மரியாதா³யங். ‘‘அந்தங் அந்தகு³ண’’ந்திஆதீ³ஸு (தீ³॰ நி॰ 2.377; கு²॰ பா॰ 3.த்³வத்திங்ஸாகார) ஸரீராவயவே ‘‘சரந்தி லோகே பரிவாரச²ன்னா, அந்தோ அஸுத்³தா⁴ ப³ஹி ஸோப⁴மானா’’திஆதீ³ஸு (ஸங்॰ நி॰ 1.122; மஹானி॰ 191) சித்தே. ‘‘அப்பேகச்சானி உப்பலானி வா பது³மானி வா புண்ட³ரீகானி வா உத³கே ஜாதானி உத³கே ஸங்வட்³டா⁴னி உத³கானுக்³க³தானி அந்தோ நிமுக்³க³போஸீனீ’’திஆதீ³ஸு (தீ³॰ நி॰ 2.69; ஸங்॰ நி॰ 1.172; மஹாவ॰ 9) அப்³ப⁴ந்தரே.
Tatrāyaṃ antasaddo ‘‘santi, bhikkhave, eke samaṇabrāhmaṇā pubbantakappikā pubbantānudiṭṭhino’’tiādīsu (dī. ni. 1.29) koṭṭhāse āgato. ‘‘Antamakāsi dukkhassa, antavā ayaṃ loko parivaṭumo’’tiādīsu (dī. ni. 1.55) paricchede. ‘‘Haritantaṃ vā pathantaṃ vā selantaṃ vā’’tiādīsu (ma. ni. 1.304) mariyādāyaṃ. ‘‘Antaṃ antaguṇa’’ntiādīsu (dī. ni. 2.377; khu. pā. 3.dvattiṃsākāra) sarīrāvayave ‘‘caranti loke parivārachannā, anto asuddhā bahi sobhamānā’’tiādīsu (saṃ. ni. 1.122; mahāni. 191) citte. ‘‘Appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakānuggatāni anto nimuggaposīnī’’tiādīsu (dī. ni. 2.69; saṃ. ni. 1.172; mahāva. 9) abbhantare.
‘‘மிகா³னங் கொட்டு²கோ அந்தோ, பக்கீ²னங் பன வாயஸோ;
‘‘Migānaṃ koṭṭhuko anto, pakkhīnaṃ pana vāyaso;
ஏரண்டோ³ அந்தோ ருக்கா²னங், தயோ அந்தா ஸமாக³தா’’தி. (ஜா॰ 1.3.135) –
Eraṇḍo anto rukkhānaṃ, tayo antā samāgatā’’ti. (jā. 1.3.135) –
ஆதீ³ஸு லாமகே. இதா⁴பி லாமகே ஏவ த³ட்ட²ப்³போ³. தஸ்மா அந்தமித³ங் பி⁴க்க²வே ஜீவிகானந்தி பி⁴க்க²வே இத³ங் ஜீவிகானங் அந்தங் பச்சி²மங் லாமகங், ஸப்³ப³னிஹீனங் ஜீவிதந்தி அத்தோ². யதி³த³ங் பிண்டொ³ல்யந்தி யங் இத³ங் பிண்ட³பரியேஸனேன பி⁴க்கா²சரியாய ஜீவிகங் கப்பெந்தஸ்ஸ ஜீவிதங். அயங் பனெத்த² பத³த்தோ² – பிண்டா³ய உலதீதி பிண்டோ³லோ, தஸ்ஸ கம்மங் பிண்டொ³ல்யங், பிண்ட³பரியேஸனேன ஜீவிகாதி அத்தோ².
Ādīsu lāmake. Idhāpi lāmake eva daṭṭhabbo. Tasmā antamidaṃ bhikkhave jīvikānanti bhikkhave idaṃ jīvikānaṃ antaṃ pacchimaṃ lāmakaṃ, sabbanihīnaṃ jīvitanti attho. Yadidaṃ piṇḍolyanti yaṃ idaṃ piṇḍapariyesanena bhikkhācariyāya jīvikaṃ kappentassa jīvitaṃ. Ayaṃ panettha padattho – piṇḍāya ulatīti piṇḍolo, tassa kammaṃ piṇḍolyaṃ, piṇḍapariyesanena jīvikāti attho.
அபி⁴ஸாபோதி அக்கோஸோ. குபிதா ஹி மனுஸ்ஸா அத்தனோ பச்சத்தி²கங் ‘‘பிலோதிகக²ண்ட³ங் நிவாஸெத்வா கபாலஹத்தோ² பிண்ட³ங் பரியேஸமானோ சரெய்யாஸீ’’தி அக்கோஸந்தி. அத² வா ‘‘கிங் துய்ஹங் அகாதப்³ப³ங் அத்தி², யோ த்வங் ஏவங் ப³லவீரியூபபன்னோபி ஹிரொத்தப்பங் பஹாய கபணோ பிண்டோ³லோ விசரஸி பத்தபாணீ’’தி ஏவம்பி அக்கோஸந்தியேவ. தஞ்ச கோ² ஏதந்தி தங் ஏதங் அபி⁴ஸபம்பி ஸமானங் பிண்டொ³ல்யங். குலபுத்தா உபெந்தி அத்த²வஸிகாதி மம ஸாஸனே ஜாதிகுலபுத்தா ச ஆசாரகுலபுத்தா ச அத்த²வஸிகா காரணவஸிகா ஹுத்வா காரணவஸங் படிச்ச உபெந்தி உபக³ச்ச²ந்தி.
Abhisāpoti akkoso. Kupitā hi manussā attano paccatthikaṃ ‘‘pilotikakhaṇḍaṃ nivāsetvā kapālahattho piṇḍaṃ pariyesamāno careyyāsī’’ti akkosanti. Atha vā ‘‘kiṃ tuyhaṃ akātabbaṃ atthi, yo tvaṃ evaṃ balavīriyūpapannopi hirottappaṃ pahāya kapaṇo piṇḍolo vicarasi pattapāṇī’’ti evampi akkosantiyeva. Tañcakho etanti taṃ etaṃ abhisapampi samānaṃ piṇḍolyaṃ. Kulaputtā upenti atthavasikāti mama sāsane jātikulaputtā ca ācārakulaputtā ca atthavasikā kāraṇavasikā hutvā kāraṇavasaṃ paṭicca upenti upagacchanti.
ராஜாபி⁴னீதாதிஆதீ³ஸு யே ரஞ்ஞோ ஸந்தகங் கா²தி³த்வா ரஞ்ஞா ப³ந்த⁴னாகா³ரே ப³ந்தா⁴பிதா பலாயித்வா பப்³ப³ஜந்தி, தே ரஞ்ஞா ப³ந்த⁴னங் அபி⁴னீதத்தா ராஜாபி⁴னீதா நாம. யே பன சோரேஹி அடவியங் க³ஹெத்வா ஏகச்சேஸு மாரியமானேஸு ஏகச்சே ‘‘மயங் ஸாமி தும்ஹேஹி விஸ்ஸட்டா² கே³ஹங் அனஜ்ஜா²வஸித்வா பப்³ப³ஜிஸ்ஸாம, தத்த² தத்த² யங் யங் பு³த்³த⁴பூஜாதி³புஞ்ஞங் கரிஸ்ஸாம, ததோ ததோ தும்ஹாகங் பத்திங் த³ஸ்ஸாமா’’தி தேஹி விஸ்ஸட்டா² பப்³ப³ஜந்தி, தே சோராபி⁴னீதா நாம சோரேஹி மாரேதப்³ப³தங் அபி⁴னீதத்தா. யே பன இணங் க³ஹெத்வா படிதா³துங் அஸக்கொந்தா பலாயித்வா பப்³ப³ஜந்தி, தே இணட்டா நாம. தஞ்ச கோ² ஏதங் பிண்டொ³ல்யங் குலபுத்தா மம ஸாஸனே நேவ ராஜாபி⁴னீதா…பே॰… ந ஆஜீவிகாபகதா உபெந்தி, அபிச கோ² ‘‘ஓதிண்ணம்ஹா ஜாதியா…பே॰… பஞ்ஞாயேதா²’’தி உபெந்தீதி பத³ஸம்ப³ந்தோ⁴.
Rājābhinītātiādīsu ye rañño santakaṃ khāditvā raññā bandhanāgāre bandhāpitā palāyitvā pabbajanti, te raññā bandhanaṃ abhinītattā rājābhinītā nāma. Ye pana corehi aṭaviyaṃ gahetvā ekaccesu māriyamānesu ekacce ‘‘mayaṃ sāmi tumhehi vissaṭṭhā gehaṃ anajjhāvasitvā pabbajissāma, tattha tattha yaṃ yaṃ buddhapūjādipuññaṃ karissāma, tato tato tumhākaṃ pattiṃ dassāmā’’ti tehi vissaṭṭhā pabbajanti, te corābhinītā nāma corehi māretabbataṃ abhinītattā. Ye pana iṇaṃ gahetvā paṭidātuṃ asakkontā palāyitvā pabbajanti, te iṇaṭṭā nāma. Tañca kho etaṃ piṇḍolyaṃ kulaputtā mama sāsane neva rājābhinītā…pe… na ājīvikāpakatā upenti, apica kho ‘‘otiṇṇamhā jātiyā…pe… paññāyethā’’ti upentīti padasambandho.
தத்த² ஓதிண்ணம்ஹாதி ஓதிண்ணா அம்ஹா. ஜாதியாதிஆதீ³ஸு தம்ஹி தம்ஹி ஸத்தனிகாயே க²ந்தா⁴னங் பட²மாபி⁴னிப்³ப³த்தி ஜாதி, பரிபாகோ ஜரா, பே⁴தோ³ மரணங். ஞாதிரோக³போ⁴க³ஸீலதி³ட்டி²ப்³யஸனேஹி பு²ட்ட²ஸ்ஸ ஸந்தாபோ அந்தோ நிஜ்ஜா²னங் ஸோகோ, தேஹி பு²ட்ட²ஸ்ஸ வசீவிப்பலாபோ பரிதே³வோ. அனிட்ட²பொ²ட்ட²ப்³ப³படிஹதகாயஸ்ஸ காயபீளனங் து³க்க²ங், ஆகா⁴தவத்தூ²ஸு உபஹதசித்தஸ்ஸ சேதோபீளனங் தோ³மனஸ்ஸங். ஞாதிப்³யஸனாதீ³ஹி ஏவ பு²ட்ட²ஸ்ஸ பரிதே³வேனபி அதி⁴வாஸேதுங் அஸமத்த²ஸ்ஸ சித்தஸந்தாபஸமுட்டி²தோ பு⁴ஸோ ஆயாஸோ உபாயாஸோ. ஏதேஹி ஜாதிஆதீ³ஹி ஓதிண்ணா து³க்கோ²திண்ணா, தேஹி ஜாதிஆதி³து³க்கே²ஹி அந்தோ அனுபவிட்டா². து³க்க²பரேதாதி தேஹி து³க்க²து³க்க²வத்தூ²ஹி அபி⁴பூ⁴தா. ஜாதிஆத³யோ ஹி து³க்க²ஸ்ஸ வத்து²பா⁴வதோ து³க்கா², து³க்க²பா⁴வதோ ச ஸோகபரிதே³வது³க்க²தோ³மனஸ்ஸுபாயாஸா து³க்கா²தி. அப்பேவ நாம…பே॰… பஞ்ஞாயேதா²தி இமஸ்ஸ ஸகலஸ்ஸ வட்டது³க்க²ராஸிஸ்ஸ பரிச்சே²த³கரணங் ஓஸானகிரியா அபி நாம பஞ்ஞாயெய்ய.
Tattha otiṇṇamhāti otiṇṇā amhā. Jātiyātiādīsu tamhi tamhi sattanikāye khandhānaṃ paṭhamābhinibbatti jāti, paripāko jarā, bhedo maraṇaṃ. Ñātirogabhogasīladiṭṭhibyasanehi phuṭṭhassa santāpo anto nijjhānaṃ soko, tehi phuṭṭhassa vacīvippalāpo paridevo. Aniṭṭhaphoṭṭhabbapaṭihatakāyassa kāyapīḷanaṃ dukkhaṃ, āghātavatthūsu upahatacittassa cetopīḷanaṃ domanassaṃ. Ñātibyasanādīhi eva phuṭṭhassa paridevenapi adhivāsetuṃ asamatthassa cittasantāpasamuṭṭhito bhuso āyāso upāyāso. Etehi jātiādīhi otiṇṇā dukkhotiṇṇā, tehi jātiādidukkhehi anto anupaviṭṭhā. Dukkhaparetāti tehi dukkhadukkhavatthūhi abhibhūtā. Jātiādayo hi dukkhassa vatthubhāvato dukkhā, dukkhabhāvato ca sokaparidevadukkhadomanassupāyāsā dukkhāti. Appeva nāma…pe… paññāyethāti imassa sakalassa vaṭṭadukkharāsissa paricchedakaraṇaṃ osānakiriyā api nāma paññāyeyya.
ஸோ ச ஹோதி அபி⁴ஜ்ஜா²லூதி இத³ங் யோ குலபுத்தோ ‘‘து³க்க²ஸ்ஸந்தங் கரிஸ்ஸாமீ’’தி புப்³பே³ சித்தங் உப்பாதெ³த்வா பப்³ப³ஜிதோ அபரபா⁴கே³ தங் பப்³ப³ஜ்ஜங் ததா²ரூபங் காதுங் ந ஸக்கோதி, தங் த³ஸ்ஸேதுங் வுத்தங். தத்த² அபி⁴ஜ்ஜா²லூதி பரப⁴ண்டா³னங் அபி⁴ஜ்ஜா²யிதா. திப்³ப³ஸாராகோ³தி ப³லவராகோ³. ப்³யாபன்னசித்தோதி ப்³யாபாதே³ன பூதிபூ⁴தத்தா விபன்னசித்தோ. பது³ட்ட²மனஸங்கப்போதி திகி²ணஸிங்கோ³ விய சண்ட³கோ³ணோ பரேஸங் உபகா⁴தவஸேன து³ட்ட²சித்தோ. முட்ட²ஸ்ஸதீதி ப⁴த்தனிக்கி²த்தகாகோ விய, மங்ஸனிக்கி²த்தஸுனகோ² விய ச நட்ட²ஸ்ஸதி, இத⁴ கதங் எத்த² ந ஸரதி. அஸம்பஜானோதி நிப்பஞ்ஞோ க²ந்தா⁴தி³பரிச்சே²த³ரஹிதோ. அஸமாஹிதோதி சண்ட³ஸோதே ப³த்³த⁴னாவா விய அஸண்டி²தோ. விப்³ப⁴ந்தசித்தோதி பந்தா²ருள்ஹமிகோ³ விய ப⁴ந்தமனோ. பாகதிந்த்³ரியோதி யதா² கி³ஹீ ஸங்வராபா⁴வேன பரிக்³க³ஹபரிஜனே ஓலோகெந்தி அஸங்வுதிந்த்³ரியா, ஏவங் அஸங்வுதிந்த்³ரியோ ஹோதி.
So ca hoti abhijjhālūti idaṃ yo kulaputto ‘‘dukkhassantaṃ karissāmī’’ti pubbe cittaṃ uppādetvā pabbajito aparabhāge taṃ pabbajjaṃ tathārūpaṃ kātuṃ na sakkoti, taṃ dassetuṃ vuttaṃ. Tattha abhijjhālūti parabhaṇḍānaṃ abhijjhāyitā. Tibbasārāgoti balavarāgo. Byāpannacittoti byāpādena pūtibhūtattā vipannacitto. Paduṭṭhamanasaṅkappoti tikhiṇasiṅgo viya caṇḍagoṇo paresaṃ upaghātavasena duṭṭhacitto. Muṭṭhassatīti bhattanikkhittakāko viya, maṃsanikkhittasunakho viya ca naṭṭhassati, idha kataṃ ettha na sarati. Asampajānoti nippañño khandhādiparicchedarahito. Asamāhitoti caṇḍasote baddhanāvā viya asaṇṭhito. Vibbhantacittoti panthāruḷhamigo viya bhantamano. Pākatindriyoti yathā gihī saṃvarābhāvena pariggahaparijane olokenti asaṃvutindriyā, evaṃ asaṃvutindriyo hoti.
ச²வாலாதந்தி ச²வானங் த³ட்³ட⁴ட்டா²னே அலாதங். உப⁴தோபதி³த்தங் மஜ்ஜே² கூ³த²க³தந்தி பமாணேன அட்ட²ங்கு³லமத்தங் உப⁴தோ த்³வீஸு கோடீஸு ஆதி³த்தங் மஜ்ஜே² கூ³த²மக்கி²தங். நேவ கா³மேதி ஸசே ஹி தங் யுக³னங்க³லகோ³பானஸிபக்க²பாஸகாதீ³னங் அத்தா²ய உபனேதுங் ஸக்கா அஸ்ஸ கா³மே கட்ட²த்த²ங் ப²ரெய்ய. ஸசே கெ²த்தகுடியா கட்ட²த்த²ரமஞ்சகாதீ³னங் அத்தா²ய உபனேதுங் ஸக்கா அஸ்ஸ, அரஞ்ஞே கட்ட²த்த²ங் ப²ரெய்ய. யஸ்மா பன உப⁴யத்தா²பி ந ஸக்கா, தஸ்மா ஏவங் வுத்தங். ததூ²பமாஹந்தி ததூ²பமங் ச²வாலாதஸதி³ஸங் அஹங் இமங் யதா²வுத்தபுக்³க³லங் வதா³மி. கி³ஹிபோ⁴கா³ ச பரிஹீனோதி யோ அகா³ரே வஸந்தேஹி கி³ஹீஹி தா³யஜ்ஜே பா⁴ஜியமானே அஞ்ஞதா² ச போ⁴கோ³ லத்³த⁴ப்³போ³ அஸ்ஸ, ததோ ச பரிஹீனோ. ஸாமஞ்ஞத்த²ஞ்சாதி ஆசரியுபஜ்ஜா²யானங் ஓவாதே³ ட²த்வா பரியத்திபடிவேத⁴வஸேன பத்தப்³ப³ங் ஸாமஞ்ஞத்த²ஞ்ச ந பரிபூரேதி. இமங் பன உபமங் ஸத்தா² ந து³ஸ்ஸீலஸ்ஸ வஸேன ஆஹரி , பரிஸுத்³த⁴ஸீலஸ்ஸ பன அலஸஸ்ஸ அபி⁴ஜ்ஜா²தீ³ஹி தோ³ஸேஹி தூ³ஸிதசித்தஸ்ஸ புக்³க³லஸ்ஸ வஸேன ஆஹரீதி வேதி³தப்³ப³ங்.
Chavālātanti chavānaṃ daḍḍhaṭṭhāne alātaṃ. Ubhatopadittaṃ majjhe gūthagatanti pamāṇena aṭṭhaṅgulamattaṃ ubhato dvīsu koṭīsu ādittaṃ majjhe gūthamakkhitaṃ. Neva gāmeti sace hi taṃ yuganaṅgalagopānasipakkhapāsakādīnaṃ atthāya upanetuṃ sakkā assa gāme kaṭṭhatthaṃ phareyya. Sace khettakuṭiyā kaṭṭhattharamañcakādīnaṃ atthāya upanetuṃ sakkā assa, araññe kaṭṭhatthaṃ phareyya. Yasmā pana ubhayatthāpi na sakkā, tasmā evaṃ vuttaṃ. Tathūpamāhanti tathūpamaṃ chavālātasadisaṃ ahaṃ imaṃ yathāvuttapuggalaṃ vadāmi. Gihibhogā ca parihīnoti yo agāre vasantehi gihīhi dāyajje bhājiyamāne aññathā ca bhogo laddhabbo assa, tato ca parihīno. Sāmaññatthañcāti ācariyupajjhāyānaṃ ovāde ṭhatvā pariyattipaṭivedhavasena pattabbaṃ sāmaññatthañca na paripūreti. Imaṃ pana upamaṃ satthā na dussīlassa vasena āhari , parisuddhasīlassa pana alasassa abhijjhādīhi dosehi dūsitacittassa puggalassa vasena āharīti veditabbaṃ.
கா³தா²ஸு கி³ஹிபோ⁴கா³தி காமஸுக²ஸம்போ⁴க³தோ. பரிஹீனோதி ஜீனோ. ஸாமஞ்ஞத்த²ந்தி படிவேத⁴பா³ஹுஸச்சஞ்சேவ பரியத்திபா³ஹுஸச்சஞ்ச. தாதி³ஸோ ஹி அஸுதங் ஸோதுங் ஸுதங் பரியோதா³பேதுங் ந ஸக்கோதி அலஸபா⁴வதோ. து³ட்டு² ப⁴கோ³தி து³ப்³ப⁴கோ³, அலக்கி²கோ காளகண்ணிபுரிஸோ. பரித⁴ங்ஸமானோதி வினஸ்ஸமானோ. பகிரேதீதி விகிரேதி வித்³த⁴ங்ஸேதி. ஸப்³ப³மேதங் பா⁴வினோ ஸாமஞ்ஞத்த²ஸ்ஸ அனுப்பாத³னமேவ ஸந்தா⁴ய வுத்தங். ச²வாலாதங்வ நஸ்ஸதீதி ஸோ தாதி³ஸோ புக்³க³லோ யதா²வுத்தங் ச²வாலாதங் விய கஸ்ஸசி அனுபயுஜ்ஜமானோ ஏவ நஸ்ஸதி உப⁴தோ பரிப⁴ட்ட²பா⁴வதோ. ஏவங் ‘‘காயவாசாஹி அகதவீதிக்கமோபி சித்தங் அவிஸோதெ⁴ந்தோ நஸ்ஸதி, பகே³வ கதவீதிக்கமோ து³ஸ்ஸீலோ’’தி தஸ்ஸ அபாயது³க்க²பா⁴கி³பா⁴வத³ஸ்ஸனேன து³ஸ்ஸீலே ஆதீ³னவங் த³ஸ்ஸெத்வா ததோ ஸத்தே விவேசேதுகாமோ ‘‘காஸாவகண்டா²’’திஆதி³னா கா³தா²த்³வயமாஹ. தஸ்ஸத்தோ² ஹெட்டா² வுத்தோ ஏவ.
Gāthāsu gihibhogāti kāmasukhasambhogato. Parihīnoti jīno. Sāmaññatthanti paṭivedhabāhusaccañceva pariyattibāhusaccañca. Tādiso hi asutaṃ sotuṃ sutaṃ pariyodāpetuṃ na sakkoti alasabhāvato. Duṭṭhu bhagoti dubbhago, alakkhiko kāḷakaṇṇipuriso. Paridhaṃsamānoti vinassamāno. Pakiretīti vikireti viddhaṃseti. Sabbametaṃ bhāvino sāmaññatthassa anuppādanameva sandhāya vuttaṃ. Chavālātaṃva nassatīti so tādiso puggalo yathāvuttaṃ chavālātaṃ viya kassaci anupayujjamāno eva nassati ubhato paribhaṭṭhabhāvato. Evaṃ ‘‘kāyavācāhi akatavītikkamopi cittaṃ avisodhento nassati, pageva katavītikkamo dussīlo’’ti tassa apāyadukkhabhāgibhāvadassanena dussīle ādīnavaṃ dassetvā tato satte vivecetukāmo ‘‘kāsāvakaṇṭhā’’tiādinā gāthādvayamāha. Tassattho heṭṭhā vutto eva.
து³தியஸுத்தவண்ணனா நிட்டி²தா.
Dutiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / இதிவுத்தகபாளி • Itivuttakapāḷi / 2. ஜீவிகஸுத்தங் • 2. Jīvikasuttaṃ
