| Library / Tipiṭaka / તિપિટક • Tipiṭaka / કથાવત્થુપાળિ • Kathāvatthupāḷi |
૧૨. દ્વાદસમવગ્ગો
12. Dvādasamavaggo
(૧૨૩) ૮. જીવિતા વોરોપનકથા
(123) 8. Jīvitā voropanakathā
૬૪૮. દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યાતિ? આમન્તા. દિટ્ઠિસમ્પન્નો પુગ્ગલો સઞ્ચિચ્ચ માતરં જીવિતા વોરોપેય્ય…પે॰… પિતરં જીવિતા વોરોપેય્ય …પે॰… અરહન્તં જીવિતા વોરોપેય્ય…પે॰… દુટ્ઠેન ચિત્તેન તથાગતસ્સ લોહિતં ઉપ્પાદેય્ય…પે॰… સઙ્ઘં ભિન્દેય્યાતિ? ન હેવં વત્તબ્બે…પે॰….
648. Diṭṭhisampanno puggalo sañcicca pāṇaṃ jīvitā voropeyyāti? Āmantā. Diṭṭhisampanno puggalo sañcicca mātaraṃ jīvitā voropeyya…pe… pitaraṃ jīvitā voropeyya …pe… arahantaṃ jīvitā voropeyya…pe… duṭṭhena cittena tathāgatassa lohitaṃ uppādeyya…pe… saṅghaṃ bhindeyyāti? Na hevaṃ vattabbe…pe….
દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યાતિ? આમન્તા. દિટ્ઠિસમ્પન્નો પુગ્ગલો સત્થરિ અગારવોતિ? ન હેવં વત્તબ્બે…પે॰… ધમ્મે…પે॰… સઙ્ઘે…પે॰… સિક્ખાય અગારવોતિ? ન હેવં વત્તબ્બે…પે॰….
Diṭṭhisampanno puggalo sañcicca pāṇaṃ jīvitā voropeyyāti? Āmantā. Diṭṭhisampanno puggalo satthari agāravoti? Na hevaṃ vattabbe…pe… dhamme…pe… saṅghe…pe… sikkhāya agāravoti? Na hevaṃ vattabbe…pe….
નનુ દિટ્ઠિસમ્પન્નો પુગ્ગલો સત્થરિ સગારવોતિ? આમન્તા. હઞ્ચિ દિટ્ઠિસમ્પન્નો પુગ્ગલો સત્થરિ સગારવો, નો ચ વત રે વત્તબ્બે – ‘‘દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યા’’તિ. નનુ દિટ્ઠિસમ્પન્નો પુગ્ગલો ધમ્મે…પે॰… સઙ્ઘે…પે॰… સિક્ખાય સગારવોતિ? આમન્તા. હઞ્ચિ દિટ્ઠિસમ્પન્નો પુગ્ગલો સિક્ખાય સગારવો, નો ચ વત રે વત્તબ્બે – ‘‘દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યા’’તિ.
Nanu diṭṭhisampanno puggalo satthari sagāravoti? Āmantā. Hañci diṭṭhisampanno puggalo satthari sagāravo, no ca vata re vattabbe – ‘‘diṭṭhisampanno puggalo sañcicca pāṇaṃ jīvitā voropeyyā’’ti. Nanu diṭṭhisampanno puggalo dhamme…pe… saṅghe…pe… sikkhāya sagāravoti? Āmantā. Hañci diṭṭhisampanno puggalo sikkhāya sagāravo, no ca vata re vattabbe – ‘‘diṭṭhisampanno puggalo sañcicca pāṇaṃ jīvitā voropeyyā’’ti.
૬૪૯. દિટ્ઠિસમ્પન્નો પુગ્ગલો સત્થરિ અગારવોતિ? આમન્તા. દિટ્ઠિસમ્પન્નો પુગ્ગલો બુદ્ધથૂપે ઓહદેય્ય ઓમુત્તેય્ય નિટ્ઠુભેય્ય બુદ્ધથૂપે અપબ્યામતો 1 કરેય્યાતિ? ન હેવં વત્તબ્બે…પે॰….
649. Diṭṭhisampanno puggalo satthari agāravoti? Āmantā. Diṭṭhisampanno puggalo buddhathūpe ohadeyya omutteyya niṭṭhubheyya buddhathūpe apabyāmato 2 kareyyāti? Na hevaṃ vattabbe…pe….
દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યાતિ? આમન્તા. નનુ વુત્તં ભગવતા – ‘‘સેય્યથાપિ, ભિક્ખવે, મહાસમુદ્દો ઠિતધમ્મો વેલં નાતિવત્તતિ; એવમેવ ખો, ભિક્ખવે, યં મયા સાવકાનં સિક્ખાપદં પઞ્ઞત્તં તં મમ સાવકા જીવિતહેતુપિ નાતિક્કમન્તી’’તિ 3! અત્થેવ સુત્તન્તોતિ? આમન્તા . તેન હિ ન વત્તબ્બં – ‘‘દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યા’’તિ.
Diṭṭhisampanno puggalo sañcicca pāṇaṃ jīvitā voropeyyāti? Āmantā. Nanu vuttaṃ bhagavatā – ‘‘seyyathāpi, bhikkhave, mahāsamuddo ṭhitadhammo velaṃ nātivattati; evameva kho, bhikkhave, yaṃ mayā sāvakānaṃ sikkhāpadaṃ paññattaṃ taṃ mama sāvakā jīvitahetupi nātikkamantī’’ti 4! Attheva suttantoti? Āmantā . Tena hi na vattabbaṃ – ‘‘diṭṭhisampanno puggalo sañcicca pāṇaṃ jīvitā voropeyyā’’ti.
જીવિતા વોરોપનકથા નિટ્ઠિતા.
Jīvitā voropanakathā niṭṭhitā.
Footnotes:
Related texts:
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૮. જીવિતાવોરોપનકથાવણ્ણના • 8. Jīvitāvoropanakathāvaṇṇanā
